Aide bann missié pou progressé lor plan spirituel

“A partir zordi, c’est bann dimoune ki to pou la peche vivant.”​—LUC 5:10.

1, 2. (a) Couma bann missié ti reagir kan Jésus ti preché? (b) Ki nou pou examiné dan sa lartik-la?

ENN jour, pendant ki Jésus ek so bann disciple ti pé preché dan Galilée, zot ti prend enn bateau pou al reposé dan enn place trankil. Mais beaucoup dimoune ti pé suive zot lor la plage. Bann ki ti vini sa jour-la, ti “apepré cinq mille zom, sans compte bann femme ek bann ti zenfant.” (Mat. 14:21) Dan enn lot l’occasion, enn la foule ti vinn pré ar Jésus, zot ti envie ki li gueri zot ek zot ti envie ecoute li. Parmi zot ti ena ‘quatre mille zom, sans compte bann femme ek bann ti zenfant.’ (Mat. 15:38) Li clair ki beaucoup missié ti parmi bann dimoune ki ti vinn vers Jésus ek ti montré ki zot ti interessé ar so l’enseignement. Mais en realité, li ti attann ki pli beaucoup dimoune ti pou accepté la verité. Kifer? Parski apré ki li ti faire enn mirak pou rempli filet bann disciple avek poisson, li ti dire Simon: “A partir zordi, c’est bann dimoune ki [zot] pou la peche vivant.” (Luc 5:10) Kan zot ti pou al preché, c’est coumadir zot ti pou al “la peche.” Zot ti pou al aide beaucoup dimoune pou accepté la verité ek parmi ti pou ena beaucoup missié.

² Zordi aussi pareil, kan nou preché, bann missié montré ki zot interessé ar message ki ena dan la Bible ek zot accepté li. (Mat. 5:3) Selman, beaucoup parmi zot hesité ek pa reussi progressé lor plan spirituel. Couma nou kapav aide zot? Mem si Jésus pa ti etabli enn travail predication zis pou preche ar bann missié, pena doute ki li ti koz lor bann probleme ki ti concerne bann missié dan so lepok. Anou guetté couma nou kapav imite so l’exemple kan nou aide bann missié pou faire face ar trois tracas ki souvent zot gagné zordi: (1) travail, (2) peur seki lezot pensé, ek (3) sentiment ki zot pena assez capacité.

Travail

3, 4. (a) Ki kitsoz ki pli important pou beaucoup zom? (b) Kifer certain zom trouve sa pli important pou gagne l’argent ki rod bann kitsoz spirituel?

³ Enn scribe ti dire Jésus: “Enseignant mo pou suive toi partout kot to pou allé.” Selman, kan Jésus ti dire li ki “Fils de l’homme pena okenn place pou pose so la tête,” scribe-la ti change l’idée. Li pa ti sur kot-sa li ti pou gagne so prochain l’assiette mangé ou-soit kot-sa li ti pou resté. Li parette ki sa l’idée-la pa ti faire li plaisir parski la Bible pa dire nou si li ti vinn enn disciple Jésus.​—Mat. 8:19, 20.

⁴ Souvent, pou bann zom, securité materiel ena plus l’importance ki rod bann kitsoz spirituel. Pou beaucoup parmi zot, gagne enn grand l’education ek garde enn travail bien payé c’est bann kitsoz ki ena top priorité. Dapré zot, gagne kass li pli important ek li pli utile ki n’importe ki bienfait ki nou kapav gagné kan nou etudié la Bible ek ena bann bon relation avek Bondié. Li possible ki seki la Bible enseigné interesse-zot, mais “bann tracas ki ena dan sa le monde-la ek pouvoir ki la richesse ena pou embete dimoune” touffe tou l’interet ki kitfois zot ena. (Marc 4:18, 19) Remarké couma Jésus ti aide so bann disciple pou change zot bann priorité.

5, 6. Ki ti aide André, Pierre, Jacques ek Jean pou change zot priorité concernant zot predication ek zot travail?

⁵ André ek so frere Simon Pierre ti associé dan enn business la peche ensam avek Jean, Jacques ek zot papa Zébédée. Zot business ti pé marche assez bien, parski zot ti mem bizin faire lezot dimoune travail pou zot. (Marc 1:16-20) Kan premier fois André ek Jean ti tann Jean Baptiste koz lor Jésus, zot ti sur ki zot ti’nn trouve le Messie. André ti annonce sa nouvelle-la so frere, Simon Pierre, ek kitfois, Jean aussi ti dire sa so frere, Jacques. (Jean 1:29, 35-41) Dan bann mois ki’nn vini apré, toulé-quatre ti passe zot le temps avek Jésus kan li ti pé preche dan Galilée, dan Judée ek dan Samarie. Apré sa, toulé-quatre ti retourne dan zot business la peche. Zot ti interessé ar bann kitsoz spirituel, mais zot ministere pa ti zot priorité.

⁶ Inpé plitar, Jésus ti invite Pierre ek André pou suive li ek pou “la peche bann dimoune.” Couma zot ti reagir? “Desuite, zot ti laisse zot filet, ek zot ti suive li.” Jacques et Jean aussi ti faire pareil. ‘Desuite, zot ti quitte zot bateau ek zot papa, ek zot ti suive li.’ (Mat. 4:18-22) Ki ti aide zot pou commence preché a plein temps? Eski zot ti prend sa decision-la lor enn coute-tête? Non. Dan bann mois avant, sa bann zom-la ti ecoute Jésus ek ti trouve li faire bann mirak. Zot ti trouve so zele pou seki droite, ek resultat extraordinaire ki li ti gagné kan li ti preché. A cause sa, zot la foi ek zot confiance en Jéhovah ti vinn pli fort!

 7. Couma nou kapav aide nou bann etudiant la Bible pou ena plus confiance dan capacité ki Jéhovah ena pou donne so bann serviteur seki zot bizin?

⁷ Couma nou kapav imite Jésus kan nou aide nou bann etudiant la Bible pou ena plus confiance en Jéhovah? (Prov. 3:5, 6) Fason ki nou enseigné joué enn grand role ladan. Bondié inn promette ki Li pou donne nou beaucoup benediction si nou mette so Royaume en premier dan nou la vie. Kan nou enseigné, nou kapav attire l’attention lor sa promesse-la. (Lire Malaki 3:10; Matthieu 6:33.) Mem si nou kapav servi different verset la Bible pou montré bien couma Jéhovah donne so bann serviteur seki zot bizin, fodé pa nou blié seki nou prop l’exemple kapav faire. Kan nou raconte bann l’experience ki nou-mem nou finn faire dan nou la vie, sa kapav aide plus nou bann etudiant pou faire Jéhovah confiance. Nou kapav aussi partage avek zot bann l’experience encourageant ki nou lire dan nou bann publication.a

 8. (a) Kifer li important ki enn etudiant la Bible “gouté ek guetté ki Jéhovah Li bon”? (b) Couma nou kapav aide enn etudiant pou trouvé personnellement ki Jéhovah Li bon?

⁸ Pou ki enn dimoune developpe enn la foi solide, li pa assez ki li zis lire ek ecoute l’experience bann dimoune ki’nn gagne benediction Jéhovah. Enn missié ki pé etudié la Bible bizin aussi faire l’experience dan so la vie personnel ki Jéhovah Li bon. Enn ecrivain Psaume ti chanté: “Gouté ek guetté ki Jéhovah Li bon; heureux sa zom fort ki rod so protection-la.” (Ps. 34:8) Couma nou kapav aide sa etudiant-la pou trouvé ki Jéhovah Li bon? Faire coumadir li ena probleme l’argent, ek en mem temps li pé essaye combatte enn mauvais l’habitude, par exemple fumé, joué pou kass ou-soit boire ziska sou. (Prov. 23:20, 21; 2 Cor. 7:1; 1 Tim. 6:10) Si nou montré etudiant-la prié pou gagne l’aide Bondié pou combatte enn mauvais l’habitude, eski sa pa pou aide li pou trouvé couma Jéhovah bon envers li personnellement? Reflechi aussi ki kapav arrivé si nou encourage enn etudiant pou donne priorité bann kitsoz spirituel kan li reserve le temps pou etudié la Bible chaque semaine ek pou prepare ek assisté bann reunion. Oui, kan personnellement li trouvé couma Jéhovah beni so bann zeffort, so la foi pou vinn pli fort!

Peur seki lezot pensé

9, 10. (a) Kifer Nicodème ek Joseph, ki sorti Arimathée, pa ti faire koné ki zot ti bann disciple Jésus? (b) Kifer certain missié zordi hesité pou suive Christ?

⁹ Kitfois certain zom hesité pou suive Christ a cause pression ki zot gagné ar lezot dimoune. Par exemple, Nicodème ek Joseph ki sorti Arimathée, pa ti faire koné ki zot ti bann disciple Jésus, parski zot ti peur seki lezot Juif ti pou dire ou-soit faire, si zot ti konn sa. (Jean 3:1, 2; 19:38) Ti ena enn raison kifer zot ti peur. Bann chef religieux ti ena vrai-mem enn grand la haine pou Jésus. Alors, si enn kikenn ti dire ki li ti ena la foi en Jésus, sa dimoune-la ti pou nepli gagne droit mette so lipié dan synagogue.​—Jean 9:22.

¹⁰ Zordi dan certain l’endroit, si enn missié trop interessé ar Bondié, ar la Bible ek ar la religion, so bann collegue travail, so bann camarade ou-soit so famille, kapav persecute li. Dan lezot l’endroit, sa kapav mem dangereux pou dire ki nou pé change nou religion. Kan enn zom dan l’armée, dan politik, ou-soit li bien actif dan so l’endroit, li kapav trouve sa bien difficile pou faire face ar pression ki li gagné ar lezot dimoune si li koz lor la religion. Par exemple, enn missié ki reste l’Allemagne ti dire: “Seki bann Témoins preché lor la Bible li vrai. Mais si zordi mo vinn enn Témoin, demain-mem tou dimoune pou fini koné. Ki dimoune pou pensé dan mo travail, dan mo l’endroit, ek dan club kot moi ek mo famille été? Mo pa pou kapav supporte sa.”

11. Couma Jésus ti aide so bann disciple pou faire face ar la peur ki zot ti ena pou bann dimoune?

¹¹ Mem si okenn parmi bann zapotre Jésus pa ti capon, zot tou ti bizin lutte kont la peur ki zot ti ena pou bann dimoune. (Marc 14:50, 66-72) Couma Jésus ti aide zot pou progressé, mem si pression ki zot ti gagné ar lezot ti bien fort? Jésus ti prepare so bann disciple pou persecution ki zot ti pou gagné plitar. Li ti dire: “Zot heureux kan bann dimoune ena la haine pou zot, ek kan bannla rejette zot, kan koz en mal lor zot ek meprise zot nom couma enn kitsoz ki mauvais a cause Fils de l’homme.” (Luc 6:22) Jésus ti averti so bann disciple ki zot ti bizin attann ki lezot koz en mal lor zot. C’est “a cause Fils de l’homme” ki zot ti pou gagne sa l’opposition-la. Jésus ti aussi rassure so bann disciple ki Bondié ti pou soutenir zot tant ki zot ti compte lor Li pou gagne l’aide ek la force. (Luc 12:4-12) En plus, li ti invite bann nouveau pou pa hesité frequente so bann disciple ek pou faire camarade ar zot.​—Marc 10:29, 30.

12. Dan ki fason nou kapav aide bann nouveau pou faire face ar la peur ki zot ena pou bann dimoune?

¹² Nou aussi nou bizin aide bann etudiant la Bible pou faire face ar la peur ki zot ena pou bann dimoune. Souvent li pli facile pou faire face ar enn difficulté kan nou’nn prepare-nou a l’avance. (Jean 15:19) Par exemple, bann collegue travail enn etudiant la Bible ek lezot dimoune kitfois pa d’accord avek so bann nouveau croyance ou-soit zot kapav pose li bann question. Kifer nou pa aide li pou prepare bann reponse simple, raisonnable, ki basé lor la Bible pou reponn zot. Nou kapav faire camarade ar li, ek aussi presente li ar lezot membre dan congregation, surtout bann ki kitfois dan mem situation ki li. Seki pli important, nou bizin montré li pou prié regulierement ek avek tou so leker. Sa kapav aide li pou vinn proche ar Bondié, pou rod So protection ek pou faire Jéhovah vinn couma enn roche solide pou li.​—Lire Psaume 94:21-23; Jacques 4:8.

Sentiment ki zot pena assez capacité

13. Certain pensé ki zot pena assez capacité. Couma sa empeche-zot pou implik-zot dan bann kitsoz spirituel?

¹³ Certain missié hesité pou implik-zot dan bann kitsoz spirituel parski zot pa trop konn lire ou-soit zot pa kapav exprime zot bien, ou-soit-mem parski zot timide. Certain missié pa senti-zot a l’aise pou dire seki zot pensé en publik. Kan zot pensé ki zot pou bizin etudié, donne bann commentaire dan reunion, ou-soit preche avek lezot, c’est enn tracas pou zot. Enn frere reconette: “Kan mo ti jeune, mo ti degazé al kot enn la porte, mo ti faire semblant pese sonnette, mo ti sorti devant la porte-la trankil-trankil, ek esperé ki personne pa ti ni tann moi, ni trouve moi. . . . Sa ti faire moi malade kan mo ti pensé ki mo ti bizin al preché devant la porte bann dimoune.”

14. Kifer bann disciple Jésus pa ti kapav gueri enn garson ki ti possedé par enn demon?

¹⁴ Maziné ki quantité bann disciple Jésus ti mank confiance en zot-mem kan zot pa ti kapav gueri enn garson ki ti possedé par enn demon. Papa garson-la ti vinn guette Jésus ek ti dire li: “[Mo garson] gagne crise epilepsie ek li malade, souvent li tombe dan difé ek souvent dan de l’eau; ek mo finn amenn li ar to bann disciple, mais zot pa’nn kapav gueri li.” Jésus ti tire demon-la lor sa garson-la ek ti gueri li. Plitar bann disciple ti vinn guette Jésus ek ti demann li: “Kifer nou pa finn kapav tire demon-la?” Jésus ti reponn: “Parski zot ena tigit la foi. Vrai-mem mo dire zot: Si zot ena la foi mem grosseur ki enn la grain moutarde, zot pou dire sa montagne-la: ‘Sorti ici al la-bas,’ ek li pou al la-bas, ek nanyin pa pou impossible pou zot.” (Mat. 17:14-20) Pou nou kapav surmonte bann difficulté ki couma bann montagne, nou bizin ena la foi en Jéhovah. Ki pou arrivé si enn dimoune pa faire sa ek concentré zis lor so bann prop capacité? Li pa pou reussi, ek lerla sa pou faire li mank confiance en li-mem.

15, 16. Si enn etudiant la Bible pensé ki li pena assez capacité, couma nou kapav aide li?

¹⁵ Enn bon fason pou aide enn kikenn ki pé lutte kont sentiment ki li pena assez capacité, c’est pou encourage li pou fixé so l’attention lor Jéhovah au lieu ki lor li-mem. Pierre ti ecrire: “Abaisse-zot enba la main puissant Bondié pou ki Li eleve zot kan ler pou arrivé, pendant ki zot jette tou zot tracas lor Li.” (1 Pierre 5:6, 7) Pou nou kapav faire sa, nou bizin aide nou etudiant la Bible pou vinn enn dimoune spirituel. Enn kikenn ki spirituel accorde enn grand l’importance ar bann kitsoz spirituel. Li content Parole Bondié ek li manifesté “fruit l’esprit” dan so la vie. (Gal. 5:22, 23) Li enn dimoune ki ena l’habitude pou faire la priere. (Phil. 4:6, 7) En plus, li compte lor Bondié pou gagne courage ek la force ki li bizin pou reussi faire face ar n’importe ki situation ou-soit pou rempli n’importe ki responsabilité.​—Lire 2 Timothée 1:7, 8.

¹⁶ Kitfois certain etudiant la Bible bizin aussi enn l’aide pratik pou zot kapav lire, pou gagne conversation ou-soit pou exprime-zot bien. Lezot kapav pensé ki zot pa digne pou servi Bondié a cause bann mauvais kitsoz ki zot ti faire avant zot konn Jéhovah. Dan toulé-deux cas, si nou aide zot avek patience ek amour, c’est kitfois sa-mem ki zot bizin. Jésus ti dire: “C’est pa bann dimoune ki bien ki bizin docteur, mais bann ki malade.”​—Mat. 9:12.

“La peche” pli beaucoup missié

17, 18. (a) Couma nou kapav joinde pli beaucoup missié dan nou ministere? (b) Ki nou pou etudié dan prochain lartik?

¹⁷ Zis dan la Bible ki ena enn message ki kapav faire bann dimoune vrai-mem heureux ek nou envie aide pli beaucoup missié pou accepté sa message-la. (2 Tim. 3:16, 17) Alors, couma nou kapav joinde pli beaucoup missié dan nou ministere? Kan nou passe plus le temps pou rann temoignage dan tantot, dan l’apré-midi en week-end, ou-soit dan congé publik kan pli beaucoup missié lakaz. Si possible, nou kapav demann pou koz avek chef la famille. Kan li approprié, anou rann temoignage informel ar bann missié ki travail avek nou. Nou kapav aussi aide bann mari ki pa Témoin pou zot interessé ar la verité.

¹⁸ Kan nou preche avek tou dimoune ki nou joinde, nou kapav sur ki bann dimoune ki pé rod la verité pou ecoute nou message. Anou aide avek patience tou bann dimoune ki montré enn l’interet sincere pou la verité. Mais, couma nou kapav aide bann zom ki’nn fini prend bapteme pou ena desir pou qualifié-zot pou prend bann responsabilité dan congregation? Prochain lartik pou reponn sa question-la.

[Note]

Couma ou pou reponn?

• Couma nou kapav aide bann missié pou donne priorité bann kitsoz spirituel?

• Couma nou kapav aide bann nouveau pou faire face ar pression lezot dimoune?

• Ki kapav aide certain missié pou surmonte sentiment ki zot pena assez capacité?

[Zimage page 25]

Eski ou crée bann l’occasion pou preche avek bann missié?

[Zimage page 26]

Couma ou kapav prepare ou etudiant la Bible pou faire face ar bann l’epreuve?