Tu Bann Vre Kretyin Pres Labonn Nuvel

“Sant pu Zeova, beni so non. Zur apre zur anons labonn nuvel delivrans ki Li done.”—PSOM 96:2.

 1. Ki bon nuvel bann dimunn bizin tande, ek kuma eski bann Temwin Zeova finn donn legzanp pu anons sa bon nuvel la partu?

DAN sa lemond kot tulezur ena katastrof la, nu vremem sulaze kan nu kone ki lager, krim, lafaminn ek dominer tusala pu disparet byinto, parey kuma Labib finn anonse. (Psom 46:9; 72:3, 7, 8, 12, 16) Eski sa pa vremem enn bon nuvel ki tu dimunn bizin tande? Bann Temwin Zeova partaz sa lopinyon la. Partu dimunn konn zot kuma bann ki pe pres enn “bon nuvel lor enn kitsoz ki meyer.” (Izai 52:7) Li vre ki buku Temwin finn sufer persekisyon akoz zot byin deside pu anons labonn nuvel. Me pu zot, lintere bann dimunn pas avan tu. Wi, bann Temwin finn fer zot enn repitasyon pu zot kuraz ek zot perseverans!

 2. Donn enn rezon kifer bann Temwin Zeova byin devwe dan travay predikasyon.

² Bann Temwin Zeova byin devwe dan sa travay la parey kuma bann Kretyin premye syek ti ete. Zisteman zurnal Katolik Romin L’Osservatore Romano (La documentation catholique) dir konsernan sa bann Kretyin la: “Deswit apre zot batem, bann premye Kretyin ti santi ki li ti zot devwar pu anons Levanzil partu. Sa bann esklav la ti transmet Levanzil personelman avek lezot.” Kifer eski bann Temwin Zeova byin devwe kumsa? Premyerman, parski labonn nuvel ki zot anonse sorti ar Zeova Limem. Eski kapav ena enn pli bon rezon ki sa? Avredir, kan zot prese, zot pe reponn linvitasyon sa ekrivin psom la: “Sant pu Zeova, beni so non. Zur apre zur anons labonn nuvel delivrans ki Li done.”—Psom 96:2.

 3. (a) Pu ki dezyem rezon bann Temwin Zeova byin devwe? (b) Kuma eski Bondye donn “delivrans”?

³ Bann parol sa ekrivin psom la rapel nu enn dezyem rezon kifer bann Temwin Zeova byin devwe dan sa travay la. Zot mesaz, li enn mesaz ki sap lavi bann dimunn. Zordi, buku dimunn travay dan domenn medikal, sosyal, ekonomik uswa dan lezot sekter pu amelyor lavi bann dimunn. Nu apresye buku sa bann zefor la. Me tu seki enn dimunn kapav fer pu so prosin, li byin limite konpare avek “delivrans” ki Bondye Li, Li done. Par mwayin Zezi Kris, Zeova pu delivre bann dimunn ki sumet, Li pu sap zot dan pese, maladi, ek lamor. Bann ki pu gayn sa bann benediksyon la pu kapav viv pu tuletan! (Zan 3:16, 36; Revelasyon 21:3, 4) Zordi, sa delivrans la li parmi “bann travay extraordiner” Bondye ki bann Kretyin pe fer zot prosin kone. Wi, zot obeir sa bann parol la: “Anons laglwar [Bondye] parmi bann nasyon, parmi tu bann pep fer konn so bann travay extraordiner. Parski Zeova gran ek Li merit loner. Li fer nu gayn lakrint, plis ki tu bann lezot bondye.”—Psom 96:3, 4.

Legzanp Nu Met

4-6. (a) Sit enn trwazyem rezon kifer bann Temwin Zeova byin devwe? (b) Kuma eski Zezi ti montre ki li ti byin devwe dan travay predikasyon labonn nuvel?

⁴ Bann Temwin Zeova byin devwe pu enn trwazyem rezon. Zot swiv legzanp Zezi Kris. (1 Pyer 2:21) Sa zom parfe la ti aksepte avek tu so leker travay “pu al anons labonn nuvel ar bann dimunn ki sumet.” (Izai 61:1; Lik 4:17-21) Alor, li ti vinn enn evanzelizater, setadir enn kikenn ki anons labonn nuvel. Li ti travers partu dan Galile ek Zide pu “pres labonn nuvel dirwayom.” (Matye 4:23) Parski li ti kone ki enn kantite ti pu aksepte labonn nuvel, li ti dir so bann disip: “Rekolt la gran, me travayer tigit. Akoz sa mem, siply Met rekolt la pu Li avoy travayer dan so rekolt.”—Matye 9:37, 38.

⁵ An akor avek lapriyer ki li ti fer, Zezi ti form lezot pu pres labonn nuvel. Avek letan li ti avoy so bann zapot par zot mem ek li ti dir zot: “Amezir ki zot ale, prese, ek dir, ‘Rwayom ki dan lesyel finn aprose.’” Eski u panse ki li ti pu pli pratik si sa bann disip la ti organiz enn program led pu diminye bann problem sosyal sa lepok la? Ubyin eski u panse ki zot ti bizin partisip dan politik pu lit kont koripsyon ki ti byin popiler sa lepok la? Non. Zezi finn plito etabli enn model pu tu bann predikater labonn nuvel kan li ti dir so bann disip: “Amezir ki zot ale, prese.”—Matye 10:5-7.

⁶ Plitar, Zezi ti avoy enn lot grup disip pu anons sa mesaz la: “Rwayom Bondye finn aprose.” Zezi ti extra kontan kan li ti tann bannla rakont bann bon rezilta ki zot ti gayne dan zot turne predikasyon. Li ti fer sa lapriyer la: “Mo donn twa loner an piblik, Papa, Senyer lesyel ek later, parski avek swin to finn kasyet bann saz ek bann intelektyel sa bann kitsoz la, ek to finn revel sa ar bann tibaba.” (Lik 10:1, 8, 9, 21) Avan ki zot swiv Zezi, bann disip la ti ena metye peser, planter, ek zot ti pe fer lezot travay kumsa. Alor, zot ti kuma bann tibaba konpare ar bann sef relizye ki ti ena bel-bel ledikasyon. Me purtan, bann disip finn gayn formasyon pu pres pli bon nuvel ki kapav ena.

 7. Apre ki Zezi finn mont dan lesyel, avek kisannla so bann disip ti prese an premye?

⁷ Apre ki Zezi finn mont dan lesyel, so bann disip ti kontiyn anons sa bonn nuvel ki donn lavi la, partu. (Akt 2:21, 38-40) Avek ki zot ti prese an premye? Eski zot ti al ver bann nasyon ki pa ti konn Bondye? Non, zot premye teritwar ti Izrael, enn pep ki ti konn Zeova depi plis ki 1,500 an. Eski zot ti ena drwa pres dan enn peyi kot ti pe deza ador Zeova? Wi. Zezi ti dir zot: “Zot pu mo bann temwin dan Zerizalem, partu dan Zide ek Samari, ek ziska parti pli lwin lor later.” (Akt 1:8) Izrael ti bizin tann labonn nuvel parey kuma ninport ki lezot nasyon.

 8. Kuma eski zordi bann Temwin Zeova imit bann disip Zezi dan premye syek?

⁸ Parey kumsa mem, zordi bann Temwin Zeova pres partu lor later. Zot pe korper ansam avek sa anz ki Zan ti truve dann vizyon ek ki “ena enn bon nuvel eternel pu anons kuma enn levanzil ar bann ki res lor later, ar tu nasyon, tribi, lang ek pep.” (Revelasyon 14:6) Pandan lane 2001, bann Temwin Zeova finn travay dan 235 peyi ek teritwar, ek sertin sa bann peyi la konsidere deza kuma bann peyi Kretyin. Eski li mal pu bann Temwin Zeova pres dan bann plas kot Lakretyinte finn deza fini etabli so bann legliz? Ena kapav truv sa mal ek mem dir ki bann Temwin pe kokin zot bann manb. Me, bann Temwin Zeova rapel santiman ki Zezi ti ena pu bann ti dimunn Zwif so lepok. Mem si sa lepok la ti ena bann pret pu anseyn sa bann dimunn la, Zezi pa ti ezite pu anons zot labonn nuvel. Li “finn gayn pitye pu zot, parski zot pa ti ena nanyin ek zot ti fane inpe partu-partu parey kuma bann muton ki pena berze.” (Matye 9:36) Kan bann Temwin Zeova truv bann ti dimunn ki pa konn Zeova ek so Rwayom, eski zot bizin ezite pu partaz labonn nuvel avek zot zis parski sertin relizyon pretann ki zot deza ena lotorite lor sa bann dimunn la? Si nu swiv legzanp bann zapot Zezi, nu pu reponn non. Labonn nuvel bizin prese “dan tu nasyon,” san fer exepsyon.—Mark 13:10.

Tu Bann Premye Kretyin Ti Pres Labonn Nuvel

 9. Dan premye syek, kisannla dan kongregasyon Kretyin ti partisip dan travay predikasyon?

⁹ Kisannla dan premye syek ti partisip dan travay predikasyon? Bann fe montre ki tu bann Kretyin ti bann predikater labonn nuvel. Enn ekrivin, W. S. Williams fer sa remark la: “Tu dimunn kone ki tu bann Kretyin dan Legliz premye syek . . . ti pres levanzil.” Konsernan seki ti arive zur Fet Lapantkot lane 33 N.L., Labib dir: “Zot tu finn ranpli ar lespri sin ek finn kumans koz dan diferan lang, parey kuma lespri ti pe donn zot drwa pu koze.” Avek letan, parmi bann predikater labonn nuvel finn ena bann misye ek bann madam, zenn ek vye, esklav ek zom lib. (Akt 1:14; 2:1, 4, 17, 18; Yoel 2:28, 29; Galat 3:28) Kan persekisyon ti obliz buku Kretyin pu kit Zerizalem ale, “bann ki ti truv zot inpe partu-partu finn travers peyi ek zot finn anons labonn nuvel baze lor laparol.” (Akt 8:4) Pa zis enn ti grup nome ki ti pres labonn nuvel, me tu “bann ki ti truv zot inpe partu-partu.”

10. Avan destriksyon sistem Zwif, ki dub travay ti akonpli?

¹⁰ Sa mem ki ti arive dan sa bann premye lane la. Zezi ti anonse: “Sa bonn nuvel lor rwayom la pu prese partu kot dimunn reste lor later kuma enn temwaynaz pu bann nasyon; ek lerla lafin pu vini.” (Matye 24:14) Sa bann parol la ti realize dan premye syek, kan labonn nuvel ti prese partu avan ki bann larme Romin detrir sistem relizye ek sistem politik Zwif. (Kolosyin 1:23) Anplis, tu bann disip Zezi ti obeir sa komannman ki li ti donn zot la: “Alor ale ek fer bann dimunn dan tu bann nasyon vinn bann disip, batiz zot onon Papa, onon Garson ek onon lespri sin, anseyn zot pu pratik tu bann kitsoz ki mo finn komann zot.” (Matye 28:19, 20) Bann premye Kretyin pa ti pus bann dimunn pu krwar dan Zezi ek apre les zot debriy zot difil pu gete kuma zot pu servi Bondye, parey kuma sertin predikater fer zordi. Plito, zot ti anseyn bannla pu vinn bann disip Zezi. Zot ti organiz bann kongregasyon, ek zot ti form sa bann nuvo disip la pu ki an retur zot usi zot pres labonn nuvel ek zot fer bann disip. (Akt 14:21-23) Bann Temwin Zeova swiv mem model zordi.

11. Kisannla zordi pe partisip dan travay pu anons pli bon nuvel ki kapav ena pu limanite?

¹¹ Enn kantite Temwin Zeova finn swiv legzanp bann Kretyin premye syek kuma Pol, Barnabas ek lezot, ek zot finn al servi kuma misyoner dan bann peyi etranze. Zot travay finn vremem donn bann rezilta, pwiski zot pa finn deles zot misyon pres labonn nuvel pu pran par dan politik uswa dan bann lezot zafer. Zot finn sinpleman obeir lord Zezi: “Amezir zot ale, prese.” Me, laplipar Temwin Zeova pa misyoner. Buku fer enn travay profann pu gayn zot lavi, ek ena ki ankor lekol. Ena ki pe elve bann zanfan. Me tu bann Temwin partaz avek lezot labonn nuvel ki zot finn aprann. Zenn ek vye, misye ek madam, zot tu obeir avek lazwa sa konsey ki Labib done la: “Pres laparol, insiste pu fer li dan lepok favorab, dan lepok difisil.” (2 Timote 4:2) Parey kuma bann ki ti kumans fer sa travay la dan premye syek, bann Temwin Zeova kontiyn “anseyne ek anons labonn nuvel konsernan Kris Zezi, san arete.” (Akt 5:42) Zot pe anons pli bon nuvel ki kapav ena pu limanite.

Konverti Dimunn Uswa Pres Labonn Nuvel?

12. Ki ete prosélytisme, ek kuma bann dimunn finn arive konpran sa?

¹² Dan langaz Grek mo pro·se’ly·tos, vedir enn kikenn “konverti.” Mo Franse “prosélytisme” sorti dan sa mo la ek li vedir “travay pu konverti bann dimunn.” Zordi zur, ena dir ki konverti bann dimunn, sa li fer buku ditor. Enn dokiman ki ti pibliye par World Council of Churches (Konsey Mondyal bann Legliz) dir mem ki “konverti dimunn li enn pese.” Kifer? Catholic World Report dir: “Telman Legliz Ortodox finn fer enn vole konplint, dimunn finn arive krwar ki sa mo ‘prosélytisme’ la vedir fors dimunn pu konverti dan enn lot relizyon.”

13. Sit detrwa ka kot finn fer dimunn ditor kan finn rod konverti zot.

¹³ Eski konverti dimunn vremem fer ditor? Kapav. Zezi ti dir ki kan bann skrib ek Farizyin ti konverti bann dimunn, sa ti fer sa bann dimunn la ditor. (Matye 23:15) Byinsir, “konverti dimunn par fors,” sa li pabon. Dapre istoryin Zozef, par egzanp kan Zan Irkan, ki ti enn desandan Makabe, ti dominn bann abitan enn peyi ki ti apel Idime, li “ti les bann abitan la res dan zot peyi akondisyon ki zot ti fer sirkonsizyon ek ki zot ti pre pu obzerv bann lalwa Zwif.” Alor, si bann abitan Idime ti anvi viv anba lotorite Zwif, zot ti pu bizin pratik relizyon Zwif. Bann istoryin rakont nu usi ki dan wityem syek N.L., Charlemagne ti konkerir bann Saxon ki ti bann payin ki ti viv dan lenor l’Europe. Li ti servi lafors pu obliz zot konverti.a Me eski bann Sakson uswa sa bann abitan Idime la ti konverti sinserman? Get par egzanp Lerwa Erod, ki ti rod tuy Zezi kan li ti ankor zanfan. Li ti enn abitan Idime ki ti finn konverti Zwif. Me, u krwar ki enn dimunn kumsa ti pre pu swiv Lalwa ki Bondye ti donn Moiz?—Matye 2:1-18.

14. Kuma eski sertin misyoner Lakretyinte met presyon lor bann dimunn pu zot konverti?

¹⁴ Eski ankor konverti dimunn par fors zordi? Dan enn sertenn fason, ena ankor fer li. Ena bann ka kot par egzanp sertin misyoner Lakretyinte ofer laburs pu al etidye dan lezot peyi ar tu seki kapav konverti. Ubyin sertin fer enn refizye ki pe sufer lafaminn ekut enn sermon pu ki li kapav gayn enn bol manze. Dapre enn deklarasyon ki enn lasanble bann Levek Ortodox ti fer an 1992, “bann dimunn aksepte pu konverti swa parski parfwa tant zot par bann kitsoz materyel, swa parski parfwa servi diferan form vyolans pu fors zot pu konverti.”

15. Eski bann Temwin Zeova konverti bann dimunn kuma zordi lemond li, li konpran sa mo konverti la? Explike.

¹⁵ Pa bon fors bann dimunn pu zot sanz zot relizyon. Byinsir bann Temwin Zeova pa azir kumsa.b Alor zot pa konverti bann dimunn, dapre seki zordi lemond li, li konpran par konverti. Plito, parey kuma bann premye Kretyin, zot pres labonn nuvel avek tu dimunn. Zot invit ninport kisannla ki aksepte zot mesaz volonterman, pu aprann plis par enn letid Labib. Sa bann dimunn interese la aprann pu montre zot lafwa— ki baze solidman lor enn konesans Labib egzak— dan Bondye ek dan so bann proze. Lerla, zot invok non Bondye, Zeova, pu zot sape. (Romin 10:13, 14, 17) Ki zot aksepte labonn nuvel uswa non, sa li enn swa personel. Nanyin pa obligatwar. Si ti ena kit lobligasyon, konversyon la pa ti pu ena okenn sans. Pu enn dimunn gayn faver Bondye, so ladorasyon bizin sorti dan so leker.—Deteronom 6:4, 5; 10:12.

Pres Labonn Nuvel dan Nu Lepok

16. Kuma eski travay predikasyon labonn nuvel bann Temwin Zeova finn ogmante dan nu lepok?

¹⁶ Tutlong nu lepok, bann Temwin Zeova finn pres labonn nuvel DiRwayom ek kumsa zot finn fer Matye 24:14 konn enn pli gran realizasyon. Peryodik Latur Degard li enn instriman byin inportan dan zot travay predikasyon labonn nuvel.c An 1879, kan bann premye nimero Latur Degard ti pibliye, sa peryodik la ti ena enn tiraz anviron 6,000 kopi dan enn sel lang. An 2001, plis ki 122 an plitar, so tiraz finn ariv 23,042,000 kopi dan 141 lang. Ansam avek sa ogmantasyon la, finn ena usi lakrwasman dan travay predikasyon labonn nuvel bann Temwin Zeova. Konpar sa detrwa milye lertan ki bann proklamater ti pase sak lane dan sa travay la dan 19 em syek avek sa 1,169,082,225 ertan ki finn pase dan travay predikasyon pandan lane 2001. Get komye letid Labib finn dirize an mwayenn sak mwa: 4,921,702. Wi, vremem enn gro travay finn akonpli! Ek tusala finn akonpli par 6,117,666 predikater aktif.

17. (a) Ki kalite fos bondye dimunn pe adore zordi? (b) Ki tu dimunn bizin kone, malgre zot lang, zot nasyonalite uswa zot ran sosyal?

¹⁷ Enn ekrivin psom finn ekrir: “Tu bondye bann pep zot bann bondye ki pena okenn valer; me an seki konsern Zeova, Limem finn fer lesyel.” (Psom 96:5) Zordi dan sa lemond dirize par bann guvernman la, dimunn ador nasyonalis, bann lanblem nasyonal, bann gran dimunn dan sa lemond la, bann kitsoz materyel, ek larises limem. (Matye 6:24; Efezyin 5:5; Kolosyin 3:5) Enn fwa, Mohandas K. Gandhi ti dir: “Mo byin sir ki . . . zordi l’Europe li Kretyin zis par non. An realite, li pe ador Mammon (bondye larises).” Alor li kler ki partu bann dimunn bizin tann labonn nuvel. Tu dimunn, ninport ki lang li koze, ki nasyonalite li ete, uswa ki ran sosyal li ena, li bizin konn Zeova ek so bann proze. Nu swete ki tu dimunn pu obeir bann parol sa ekrivin psom la: “Donn Zeova laglwar ek lafors. Donn Zeova laglwar ki so non merite”! (Psom 96:7, 8) Bann Temwin Zeova ed bann dimunn pu aprann lor Zeova pu ki zot kapav donn Li laglwar kuma bizin. Bann ki aksepte sa led la gayn enn kantite benediksyon. Ki bann benediksyon zot gayne? Nu pu egzaminn sa dan prosin lartik.

[Not anba paz]

Eski U Kapav Explike?

• Kifer eski bann Temwin Zeova zot bann predikater labonn nuvel ki byin devwe?

• Kifer eski bann Temwin Zeova pres dan bann landrwa mem kot Lakretyinte finn fini etabli bann legliz?

• Kifer eski bann Temwin Zeova pa konverti bann dimunn dapre seki zordi lemond li, li konpran par konverti?

• Kuma eski travay predikasyon labonn nuvel bann Temwin Zeova finn ogmante dan nu lepok?

[Zimaz lor paz 19]

Zezi ti enn predikater labonn nuvel ki ti byin devwe ek li ti form lezot pu fer sa mem travay la

[Zimaz lor paz 20]

Tu bann ki ti dan kongregasyon premye syek ti partisip dan predikasyon labonn nuvel

[Zimaz lor paz 21]

Pabon fors bann dimunn pu sanz zot relizyon