La Bible kapav aide ou pou trouve la joie

MEM si li pa enn livre medical, la Bible koz lor bann l’effet, negatif ou-soit positif, ki bann sentiment kapav ena lor la santé mental ek physik enn dimoune. La Bible dire: “Enn leker ki dan la joie faire di-bien couma enn kitsoz ki gueri, mais enn l’esprit ki’nn abatte, faire lezo sec.” Nou lire aussi: “Eski to finn montré ki to decouragé dan jour malheur? To pou ena enn tigit la-force mem.” (Proverbes 17:22; 24:10) Bann sentiment decouragement kapav prend nou l’energie, ek faire nou senti-nou tellement faible ek abatte ki nou mem pa envie rod l’aide, nou zis envie reste coumsa-mem.

Decouragement kapav aussi affecté spiritualité enn dimoune. Bann dimoune ki pensé ki zot pena okenn valeur souvent pensé ki jamais zot pa pou kapav ena bann bon relation avek Bondié ek gagne so faveur. Simone, ki mentionné dan lartik avant, pa ti sur ki li ti “sa qualité dimoune ki kapav gagne faveur Bondié-la.” Pourtant kan nou guette dan Parole Bondié, la Bible, nou trouvé ki Li considere avek faveur bann dimoune ki faire zeffort pou faire Li plaisir.

Bondié vrai-mem prend nou compte

La Bible dire nou ki “Jéhovah pré ar bann dimoune ki ena enn grand chagrin dan zot leker; ek Li sauve bann ki demoralisé.” Bondié pa meprise “enn leker ki’nn cassé ek ki dan la peine,” mais Li promette ki Li “pou faire revive l’esprit bann ki ena l’humilité, ek pou faire revive leker bann ki dan la peine.”—Psaume 34:18; 51:17; Isaïe 57:15.

Enn jour Jésus, Garson Bondié, ti trouve sa necessaire pou explik so bann disciple ki Bondié trouve seki ena de bon dan So bann serviteur. Dan enn l’exemple, li ti dire ki Bondié remarké kan enn moineau tombe enba—enn kitsoz ki pena l’importance pou la plupart dimoune. Li ti aussi dire ki Bondié konn tou ti detail lor bann dimoune, mem comié cheveux ena lor zot la-tête. Jésus ti termine so l’exemple par sa bann parole-la: “Alors pa peur: zot vaut plus ki beaucoup moineau.” (Matthieu 10:29-31)a Jésus ti montré ki malgré seki bann dimoune kapav pensé lor zot-mem, bann ki ena la foi ena vrai-mem valeur devant lizié Bondié. En realité, l’apotre Pierre rappel nou ki “Bondié pa faire preference, mais dan n’importe ki nation, dimoune ki ena la crainte pou Li ek ki pratik la justice, Bondié accepté li.”—Actes 10:34, 35.

Garde enn l’attitude raisonnable

Parole Bondié encourage nou pou ena enn l’attitude raisonnable lor nou-mem. L’apotre Paul ti inspiré pou ecrire: “Par sa faveur ki finn donne moi-la ek ki mo pa merité, mo dire sakenn parmi zot pou pa pense plus ki bizin lor li-mem; mais pou pense dan enn fason ki montré ki li ena enn bon jugement, sakenn dapré la foi ki Bondié finn donne li.”—Romains 12:3.

Surement nou pa envie ena enn tellement grand l’opinion lor nou-mem ki nou vinn vantard, ni nou envie tombe dan lot extreme ek pensé ki nou pa vaut nanyin. Plutot, nou l’objectif, c’est pou ena enn l’opinion raisonnable lor nou-mem, enn l’opinion ki prend en consideration nou bann limite ek aussi nou bann point fort. Enn chrétienne exprime-li dan sa fason-la: “Mo pa ni enn demon, ni enn ange. Mo ena mo bann point fort ek mo bann point faible, ek tou dimoune pareil coumsa.”

Bien-sur li pa facile pou ena enn l’attitude equilibré coumsa. Kitfois nou pou bizin faire enn quantité zeffort pou tire dan nou l’esprit enn l’attitude trop negatif ki nou finn developpé lor nou-mem pendant plusieurs l’année. Mais, avek l’aide Bondié, nou kapav change nou personnalité ek aussi fason ki nou trouve la vie. Avredir, c’est seki Parole Bondié encourage nou pou faire. Nou lire: “Rejette vié personnalité ki basé lor zot ancien conduite, ek ki pé gaté par so bann desir ki mette dimoune dan l’erreur; mais zot bizin renouvelé la force ki motive zot l’esprit, ek zot bizin mette lor zot la nouvelle personnalité ki finn crée dapré volonté Bondié dan enn justice ek enn fidelité ki vrai.”—Éphésiens 4:22-24.

Kan nou faire zeffort pou transforme ‘la-force ki motive nou l’esprit,’ setadir, direction ki nou l’esprit ena tendance pou prend, nou kapav change enn personnalité ki trop negatif, ek faire li vinn positif. Lena ki nou ti mentionné dan premier lartik, ti realisé ki tant ki li pa ti tire dan so l’esprit sa l’idée ki personne pa kapav content li ou-soit aide li, nanyin pa ti pou kapav change bann sentiment ki li ti ena lor li-mem. Ki conseil pratik ki sorti dan la Bible, finn aide Lena, Simone, ek lezot pou faire sa qualité transformation-la?

Bann principe la Bible ki favorise la joie

“Jette to fardeau lor Jéhovah Li-mem, ek Li-mem Li pou soutenir toi.” (Psaume 55:22) Avant tou, la priere kapav aide nou pou trouve vrai la-joie. Simone dire: “Kan mo senti-moi decouragé, mo tourne vers Jéhovah ek mo demann Li so l’aide. Jamais mo finn vive enn situation kot mo pa finn senti so la-force ek so direction.” Kan sa ecrivain psaume-la encourage nou pou jette nou fardeau lor Jéhovah, en realité, li pé rappel nou ki Jéhovah pa zis interessé ar nou, mais Li aussi considere nou couma bann dimoune ki digne pou gagne so l’aide ek so soutien. Dan la soirée Pâques 33 n.l., bann disciple Jésus ti triste a cause seki Jésus ti dire concernant so depart ki ti pé approché. Jésus ti encourage zot pou prié so Papa, ek apré li ti dire: “Demandé ek zot pou gagné, pou ki zot la-joie vinn complet.”—Jean 16:23, 24.

“Ena beaucoup plus bonheur kan donné ki kan recevoir.” (Actes 20:35) Pareil couma Jésus ti enseigné, kan nou donné, sa aide nou pou trouve vrai la-joie dan nou la-vie. Kan nou donné, sa permette nou pou concentré lor besoin lezot plutot ki concentré lor bann defaut ki nou croire nou ena. Kan nou aide lezot ek ki nou trouve zot reconnaissance pou seki nou faire, sa donne nou enn satisfaction, ek nou ena enn l’attitude pli positif lor nou-mem. Lena ena conviction ki kan li partage bon nouvel ki ena dan la Bible regulierement avek lezot, sa aide li dan deux fason. Li dire: “Premierement sa donne moi sa bonheur ek sa satisfaction ki Jésus ti mentionné-la. Deuxiemement, mo joinde beaucoup dimoune ki reagir dan enn fason favorable, seki aide moi pou trouve la joie.” Kan nou donne nou lé-temps ek nou l’energie avek generosité, nou pou trouvé ki sa bann parole ki ena dan Proverbes 11:25, zot vrai: “Enn dimoune ki arrose bien lezot, lezot aussi pou arrose li bien.”

“Okenn jour pa bon pou enn dimoune ki dan chagrin; mais enn dimoune ki ena leker joyeux, ena touletan enn festin [devant li].” (Proverbes 15:15) Nou tou, nou ena enn choix lor fason ki nou considere nou-mem ek nou situation. Nou kapav trouve tou kitsoz pa bon ek senti-nou malheureux, ou-soit nou kapav choisir pou pense dan enn fason positif, ‘ena enn leker joyeux,’ coumadir nou dan enn festin. Simone dire: “Mo essaye reste positif autant ki mo kapav. Mo reste occupé avek mo l’etude personnel ek predication, ek mo perseveré dan la priere. Mo aussi essaye entoure moi avek bann dimoune ki ena enn l’attitude positif, ek mo essaye soutenir ek aide lezot.” Enn l’attitude coumsa faire gagne vrai la-joie, pareil couma la Bible dire: “Trouve la joie en Jéhovah ek vinn joyeux, zot bann dimoune juste; ek crié avek la joie, zot tou ki ena leker droite.”—Psaume 32:11.

“Enn vrai camarade montré so l’amour touletan; li couma enn frere ki’nn né pou bann moment difficile.” (Proverbes 17:17) Kan nou confié-nou dan enn dimoune ki nou content, ou-soit enn dimoune en ki nou ena confiance, sa kapav aide nou pou faire face avek bann sentiment negatif, ek pou konn control zot avant ki zot englouti nou. Kan nou koz avek lezot, sa kapav aussi aide nou pou ena enn l’attitude raisonnable ek positif. Simone admette: “Sa faire di-bien kan ou kapav koz lor seki ou ressenti. Ou bizin dire enn lot dimoune seki ou ressenti. Souvent sa-mem assez, ou bizin zis exprime ou bann sentiment.” Si ou faire sa, ou pou trouvé ki quantité bann parole sa proverbe-la vrai: “Kan enn dimoune dan grand tracas, sa faire so leker lourd, mais enn bon parole rann li joyeux.”—Proverbes 12:25.

Seki ou kapav faire

Nou finn examine zis dé-trois principe extraordinaire ek pratik ki sorti dan la Bible, ek ki kapav aide nou pou surmonte bann sentiment negatif, ek pou trouve vrai la-joie. Si ou trouvé ki ou aussi ou couma sa bann dimoune ki pé lutté kont bann sentiment ki zot pa vaut nanyin-la, nou encourage ou pou examine enn tipé plus Parole Bondié, la Bible. Aprann pou ena enn l’attitude pli realiste ek raisonnable lor ou-mem ek lor ou relation avek Bondié. Nou esperé sincerement ki, avek Parole Bondié couma enn guide, ou pou kapav trouve vrai la-joie dan tou seki ou faire.

[Note]

[Zimage, page 7]

Kan ou applik bann principe la Bible, sa favorise la joie