Aprann Plis lor Zeova Gras-a So Kreasion

 1. Sit enn fason kouma Zob inn aprann konn Zeova pli bien.

ZOB ti koz ar boukou dimounn dan so lavi. Selman, pli zoli konversasion ki li ti gagne se avek Bondie. Zeova ti dir Zob reflesi lor bann kitsoz extraordiner ki Li ti kree. Sa ti pou ed Zob pou konpran ki kantite sazes Zeova ena. Anplis, sa ti pou ed li pou konpran ki Zeova pran swin So bann serviter. Par exanp, Zeova ti rapel Zob ki Li pran swin bann zanimo, alor Li ti pou kapav osi pran li swin. (Zob 38:39-41; 39:1, 5, 13-16) Kan Zob ti reflesi lor kreasion, li ti aprann boukou kitsoz lor bann kalite ki Bondie ena.

 2. Kifer nou kapav trouv sa difisil pou examinn kreasion Zeova?

² Nou osi nou kapav aprann plis lor Zeova kan nou examinn so kreasion. Me kitfwa li kapav difisil pou nou fer sa. Par exanp, si nou res dan enn lavil, kitfwa pa toulezour nou trouv bann kitsoz ki Zeova inn kree. Ek mem si nou res pre ar lanatir, kitfwa nou pena ase letan pou reflesi lor kreasion. Alor, anou gete kifer li bon ki nou pran letan ek fer zefor pou examinn kreasion. Nou pou gete kouma Zeova ek Zezi servi kreasion pou ansegn nou, ek seki nou kapav fer pou aprann plis lor kreasion.

 3. Ki kitsoz montre ki Zeova ti anvi ki Adan profit So kreasion?

³ Zeova ti anvi ki premie imin profit So kreasion. Kan Zeova ti kree Adan, Li ti met li dan enn zoli paradi, ek Li ti donn li responsabilite pou okip sa paradi-la. (Zen. 2:8, 9, 15) Sey mazinn lazwa ki Adan ti ena kan li ti trouv bann lagrin zerme ek bann fler ki pe ouver. Zeova ti donn Adan enn gran privilez: Li ti bizin pran swin zardin Edenn. Zeova ti osi donn Adan responsabilite pou donn bann zanimo bann nom. (Zen. 2:19, 20) Zeova ti kapav fer sa Limem, me Li ti donn Adan sa travay-la. Kitfwa avan ki li ti donn enn zanimo enn nom, Adan ti pran letan pou examinn zanimo-la bien. Li ti gete ki zanimo-la resanble ek kouma li azir. Sirman Adan ti bien kontan sa travay-la! Sa ti donn li lokazion pou trouv sazes Zeova, ek pou reflesi lor bann zoli kitsoz ki Li ti kree.

 4. (a) Sit enn rezon kifer nou bizin examinn kreasion. (b) Ki kitsoz to apresie dan kreasion Zeova?

⁴ Enn rezon kifer nou bizin examinn kreasion Zeova, se parski Li anvi nou fer sa. Li invit nou pou “lev [nou] lizie ek get lesiel.” Apre sa, Li demande: “Kisannla ki’nn kree tou sa bann kitsoz-la?” Nou konn repons-la, pa vre! (Iza. 40:26) Zeova inn kree tou seki ena dan lesiel, lor later, ek dan lamer, ek tousala kapav aprann nou boukou kitsoz lor Li. (Ps. 104:24, 25) Mazinn osi fason ki Li’nn kree nou. Li’nn donn nou kapasite pou apresie bann zoli kitsoz ki ena dan lanatir. Li’nn osi donn nou posibilite pou apresie sa bann kitsoz-la gras-a nou sink sans, setadir gete, touse, santi, goute, ek tande.

 5. Dapre Romin 1:20, ki bienfe nou gagne kan nou examinn kreasion Zeova?

⁵ Labib donn enn lot rezon inportan kifer nou bizin examinn kreasion. Kreasion ansegn nou bann kalite ki Zeova ena. (Lir Romin 1:20.) Par exanp, get bann kitsoz ki Zeova inn kree, ek gete kouma Li’nn fer sa dan enn zoli fason. Sa montre nou ki Zeova ena boukou sazes. Reflesi osi lor kantite manze ki Zeova inn kree pou nou. Sa montre ki Li vremem kontan nou. Kan nou trouv personalite Zeova dan bann kitsoz ki Li’nn kree, nou aprann konn Li pli bien, ek sa pous nou pou vinn pros ar Li. Aster-la, anou gete kouma Zeova servi kreasion pou ansegn nou bann leson inportan.

 6. Ki leson nou aprann ar migrasion bann zwazo?

⁶ Zeova ena enn kalandriye. Sak lane, ver lafin Fevriye ziska mi-Me, bann Izraelit ti kapav trouv bann sigogn anvole pou al dan enn lot pei. Bondie ti dir bann Izraelit: “Mem bann sigogn dan lesiel konn zot bann sezon.” (Zer. 8:7) Parey kouma Zeova inn fixe enn moman pou ki bann zwazo fer zot migrasion, Li’nn osi fixe enn moman pou Li amenn so zizman. Azordi, kan nou get migrasion bann zwazo, sa rapel nou ki nou bizin ena konfians ki Zeova ena enn “letan fixe” kot Li pou detrir sa move lemond-la.​—Abak. 2:3.

 7. Ki nou kapav aprann ar fason ki bann zwazo anvole? (Izai 40:31)

⁷ Zeova donn so bann serviter lafors. Zeova ti servi Izai pou dir So bann serviter ki Li ti pou donn zot lafors. Kan zot ti dekouraze, Zeova ti dir zot ki zot ti pou “mont dan ler avek bann lezel kouma bann leg.” (Lir Izai 40:31.) Bann Izraelit ti abitie trouv bann leg anvole san ki zot bat zot lezel. Bann leg fer sa kan zot plann lor bann kolonn ler so. Parey kouma Zeova donn sa bann zwazo-la lafors, Li kapav donn nou osi lafors! Alor, kan to trouv enn zwazo pe anvole dan lesiel san ki li bat so lezel, mazine ki Zeova kapav donn twa osi lafors pou to sirmont to bann problem.

 8. Ki kitsoz Zob ti aprann ar kreasion Zeova, ek ki nou nou kapav aprann?

⁸ Zeova merit nou konfians. Zeova ti ed Zob pou fer Li plis konfians. (Zob 32:2; 40:6-8) Kan Li ti koz ar Zob, Zeova ti koz lor plizir kitsoz ki Li ti kree, kouma par exanp bann zetwal, bann niaz, ek bann zekler. Li ti osi koz lor bann zanimo kouma bef ek seval. (Zob 38:32-35; 39:9, 19, 20) Sa bann kitsoz-la pa ti zis montre Zob ki Bondie pwisan. Sa ti osi montre Zob ki Bondie ena lamour ek ki Li ena boukou sazes. Gras-a sa konversasion-la, Zob ti ena plis konfians an Zeova. (Zob 42:1-6) Dan mem fason, kan nou examinn kreasion, sa rapel nou ki Zeova ena boukou plis sazes ek pwisans ki nou. Alor, Li kapav regle tou nou bann problem, ek nou sir ki Li pou fer li! Kan nou konn sa, sa ogmant nou konfians an Zeova.

9-10. Ki kitsoz soley ek lapli aprann nou lor Zeova?

⁹ Zezi ti konn boukou kitsoz lor lanatir. Labib apel Zezi “zouvriye kalifie.” Zezi ti travay ansam ar so Papa kan so Papa ti kree liniver. (Prov. 8:30) Apre sa, kan Zezi ti vinn lor later, li ti servi kreasion pou ansegn so bann disip boukou kitsoz lor so Papa. Anou get de-trwa parmi sa bann kitsoz-la.

¹⁰ Zeova kontan tou dimounn. Dan so Sermon lor Montagn, Zezi ti koz lor de kitsoz ki bann dimounn pa tro pran kont: lapli ek soley. Sa de kitsoz-la bien inportan pou ki ena lavi lor later. Zeova ti kapav anpes bann move gagn lapli ek soley. Selman, Li pa fer sa parski Li kontan tou dimounn. (Mat. 5:43-45) Zezi ti servi sa lexanp-la pou montre so bann disip ki Zeova anvi montre lamour anver tou dimounn. Alor, ninport kan nou trouv enn zoli kouse soley, ouswa nou trouv lapli tonbe, pa bliye ki Zeova kontan tou dimounn ek ki Li pa get figir. Lexanp Zeova kapav motiv nou pou montre lamour anver tou dimounn, kan nou pres ar zot tou.

11. Kan nou reflesi lor bann zwazo, kouma sa kapav ankouraz nou?

¹¹ Zeova donn nou seki nou bizin pou viv. Dan so sermon, Zezi ti dir: “Get bien bann zwazo ki dan lesiel; zot pa plant bann lagrin, ni rekolte, ni ramas lagrin dan stor, pourtan zot Papa ki dan lesiel nouri sa bann zwazo-la.” Kitfwa bann dimounn ar ki Zezi ti pe koze, ti kapav trouv bann zwazo pe anvole kan Zezi ti dir zot: “Eski zot pena plis valer ki bann zwazo?” (Mat. 6:26) Zezi ti servi sa zoli lexanp-la pou montre bann dimounn ki Bondie ti pou pran zot swin. (Mat. 6:31, 32) Sa lexanp-la kapav osi ankouraz bann fidel serviter Zeova. Enn zenn ser, ki pionie dan Lespagn, ti bien dekouraze parski li pa ti pe gagn enn bon plas pou reste. Me apre ki li ti trouv bann zwazo manz bann lagrin ek bann ti frwi, li ti regagn kouraz. Li dir: “Sa bann zwazo-la ti rapel mwa ki Zeova pran zot swin, ek ki Li pou osi pran mwa swin.” Inpe apre sa, nou ser ti reisi gagn enn bon plas pou reste.

12. Dapre Matie 10:29-31, ki nou kapav aprann ar lexanp bann mwano?

¹² Sakenn parmi nou ena valer pou Zeova. Avan ki Zezi avoy so bann zapot al prese, li ti dir zot ki fode pa zot per ki bann dimounn persekit zot. (Lir Matie 10:29-31.) Li ti explik zot sa, kan li ti koz lor enn parmi bann zwazo ki ena pli boukou dan Izrael, setadir bann mwano. Dan lepok Zezi, sa bann zwazo-la ti ena bien tigit valer. Kanmem sa, li ti dir so bann disip: “Pena enn sel ki tom anba san ki zot Papa kone.” Apre sa, li ti dir: “Zot ena plis valer ki boukou mwano.” Kan li ti dir zot sa, Zezi ti rasir so bann disip ki sakenn parmi zot ena valer pou Zeova. Alor, zot pa ti bizin per si zot gagn persekision. Kan bann disip ti pe prese dan bann lavil ek bann vilaz, sirman zot ti rapel bann parol Zezi kan zot ti trouv bann mwano pe anvole. Ninport kan to trouv enn ti zwazo, rapel ki to ena valer pou Zeova, parski twa osi to “ena plis valer ki boukou mwano.” Alor, fode pa to per si bann dimounn persekit twa, parski Zeova pou soutenir twa.​—Ps. 118:6.

13. Ki kitsoz pou ed nou pou aprann plis lor Zeova gras-a kreasion?

¹³ Nou kapav aprann ankor boukou kitsoz lor Zeova gras-a kreasion. Kouma? Pou koumanse, nou bizin pran letan pou examinn kreasion. Ek apre sa, nou bizin reflesi lor seki sa aprann nou lor Zeova. Me kitfwa nou kapav gagn difikilte pou fer sa. Géraldine, enn ser ki res Kamerounn, dir: “Mo’nn grandi dan lavil, alor mo ti bizin fer boukou zefor pou examinn lanatir.” Enn ansien, ki apel Alfonso, dir: “Mo’nn konpran ki mo ti bizin fixe enn zour ek enn moman presi, pou mo kapav tousel pou examinn kreasion Zeova ek pou mo reflesi lor seki sa aprann mwa lor Li.”

14. Ki David ti aprann kan li ti reflesi lor kreasion Zeova?

¹⁴ David ti pran letan pou reflesi lor kreasion Zeova. Li ti dir Zeova: “Kan mo admir lesiel, travay ki to lame finn fer, kan mo get avek admirasion lalinn ek zetwal ki to finn met anplas, ki valer imin ena pou ki li dan to panse?” (Ps. 8:3, 4) Kan David ti get lesiel aswar, li pa ti zis get bann zoli zetwal. Li ti osi reflesi lor seki sa bann zetwal-la ti ansegn li lor Zeova, ek li ti aprann ki Zeova bien-bien gran. David ti osi reflesi lor kouma so lekor ti devlope dan vant so mama, ek sa ti ogmant so rekonesans pou sazes Zeova.​—Ps. 139:14-17.

15. Explike kouma to’nn trouv bann kalite Zeova dan so kreasion. (Psom 148:7-10)

¹⁵ Parey kouma David, kitfwa nou pa bizin al lwin pou trouv enn kitsoz dan lanatir lor ki nou kapav reflesi. Si to get otour twa, to kapav trouv bann kalite ki Zeova ena. Par exanp, kan soley tap lor twa ek ki to santi enn ti saler lor to lapo, mazinn pwisans Zeova. (Zer. 31:35) Kan to trouv enn zwazo pe aranz so nik, mazinn sazes Zeova. Kan to trouv enn ti lisien pe galoup deryer so lake, mazine ki Zeova Li enn Bondie ki zwaye. Ek kan to trouv enn mama pe zwe ar so ti-baba, remersie Zeova parski Li ena boukou lamour. Wi, nou ena boukou lokazion pou aprann plis lor Zeova gras-a bann kitsoz ki Li’nn kree, ki zot tipti ouswa gro, ki zot pre ouswa lwin.​—Lir Psom 148:7-10.

16. Ki kitsoz nou bien deside pou fer?

¹⁶ Nou Bondie ena sazes, Li ena lamour, Li bien pwisan, ek tou seki Li’nn kree bien zoli. Nou pou aprann plis lor sa bann kalite-la ek lor lezot ankor, si nou examinn bien kreasion ki ena otour nou. Alor regilierman, anou pran letan pou apresie bann kitsoz ki Zeova inn kree ek pou reflesi lor seki sa ansegn nou lor Li. Kan nou fer sa, nou pou vinn pli pros ar nou Kreater. (Zak 4:8) Dan prosin lartik, nou pou gete kouma bann paran kapav ed zot zanfan pou vinn pli pros ar Zeova gras-a kreasion.