“Mo Finn Donn Zot Legzanp”

“Depi tu sa letan la zot ti bizin fini vinn bann anseynan.”— EBRE 5:12.

 1. Kifer eski enn Kretyin kapav santi li konserne kan li lir bann parol ki truv dan Ebre 5:12?

ESKI u’nn santi u konserne kan u’nn lir sa tex Labib lor ki nu lartik baze la? Si wi, u pa tusel. Antan ki bann disip Zezi, nu kone ki nu bizin vinn bann anseynan. (Matye 28:19, 20) Nu kone ki, parski nu pe viv lepok lafin, li byin inportan ki nu vinn bann pli bon anseynan. Ek nu kone ki lavi bann dimunn ki nu pe anseyne depann lor la! (1 Timote 4:16) Donk li normal ki defwa nu poz nu sa bann kestyon la: ‘Eski vremem mo sa bon anseynan ki mo bizin ete la? Kuma mo kapav amelyore?’

2, 3. (a) Dapre enn profeser, ki enn kikenn bizin fer pu li vinn enn bon anseynan? (b) Ki legzanp Zezi finn lese pu nu?

² Me fode pa ki sa dekuraz nu! Si nu panse ki bann teknik spesyal tusel kapav ed nu pu vinn enn bon anseynan, sa kapav dekuraz nu. Lerla li pu byin difisil pu nu progrese. Me, pu ki enn kikenn vinn enn bon anseynan, ena enn lot kitsoz ki pli inportan ki bann teknik. Remarke seki enn profeser finn ekrir lor la. Li dir ki se pa bann teknik spesyal ki fer enn kikenn vinn enn bon anseynan, me seki pli inportan, se lamur. Li vre ki sa profeser la ti pe koz lor lanseynman an zeneral. Me seki li finn dir aplik ar lanseynman ki nu, bann Kretyin, nu done. Kuma?

³ Zezi Kris limem nu legzanp dan sa domenn la. Dayer, li ti dir so bann disip: “Mo finn donn zot legzanp.” (Zan 13:15) Isi li ti pe koz lor legzanp ki li ti lese kan li ti abes li pu servi lezot. Me se pa zis dan sa domenn la ki Zezi ti donn legzanp. Kan li ti lor later, li ti fer bann dimunn konn bon nuvel lor Rwayom Bondye, ek sa li enn legzanp ki nu bizin swiv. (Lik 4:43) Asterla, si u ti bizin servi enn sel mo pu explik predikasyon Zezi, ki mo u ti pu servi? Lamur, pa vre? (Kolosyin 1:15; 1 Zan 4:8) Zezi ti kontan so Papa, Zeova, plis ki ninport ki kitsoz. (Zan 14:31) Me, kan li ti anseyne, li ti montre sa lamur la dan de fason ankor. Zezi ti kontan laverite ki li ti anseyne ek li ti kontan bann dimunn ki li ti pe anseyne. Anu egzaminn inpe plis sa de domenn la, ek gete ki legzanp li finn lese pu nu.

Enn Lamur pu Laverite Ki Li Ti Ena Depi Lontan

 4. Kuma eski Zezi ti devlop enn lamur pu bann lanseynman Zeova?

⁴ Latitid ki enn profeser ena lor size ki li pe anseyne kapav ena enn gran lefe lor fason ki li pu anseyn sa size la. Si li pa kontan sa size la, so bann zelev pu truv sa, ek zot usi zot pu ena mem latitid. Zezi ti ena buku lamur pu laverite ki li ti pe anseyne lor Zeova ek lor so Rwayom. Pandan so lavi dan lesyel, sa sel garson ki Bondye ti kre direkteman la, ti devlop enn gran lamur pu laverite. Li ti enn kikenn ki ti byin kontan aprann. Nu kapav truv sa byin dan Izai 50:4, 5: “Nu Pli Gran Senyer Zeova Limem finn donn mwa lalang bann ki finn gayn enn lanseynman, pu ki mo kapav kone ki mo pu dir sa kikenn ki fatige la. Tulegramatin, Li uver mo zorey pu mo tande, parey kuma bann ki finn anseyne. Senyer Zeova Limem finn uver mo zorey, ek mwa mo pa finn montre mwa rebel. Mo pa finn turn dan lot direksyon.”

5, 6. (a) Ki lexperyans Zezi ti fer kan li ti batize, ek ki lefe sa ti ena lor li? (b) Zezi ek Satan, tulede ti servi Parol Bondye, me ki diferans ti ena ant zot?

⁵ Pandan so lavi lor later, alor ki li ti pe grandi, Zezi ti kontiyn kontan sazes Bondye. (Lik 2:52) Plitar, pandan so batem, li’nn fer enn lexperyans byin spesyal. Lik 3:21 dir: “Lesyel finn uver.” Li posib ki se lerla ki Zezi ti’nn kapav rapel so lavi dan lesyel. Apre sa, li’nn pas 40 zur dan dezer, san manze. Devet li ti byin kontan pu reflesi lor tu bann lokazyon kot Zeova ti anseyn li kan li ti dan lesyel. Me zis apre sa, so lamur pu laverite ti pas par enn leprev.

⁶ Zezi ti fatige ek li ti fin. Satan ti rod tant li. Nu truv enn gran diferans ant sa de garson Bondye la! Tulede ti sit bann Lekritir, me dan enn fason diferan. Satan li, li pa ti ena okenn respe pu Parol Bondye. Li ti deform li pu so prop lavantaz. Wi, sa rebel la pa ti kontan Parol Bondye ditu. Me, pena okenn dut ki Zezi li, li ti ena enn gran lamur pu Parol Bondye. Dan sak repons ki li ti rande li ti servi Parol Bondye byin ek li ti sit li. Zezi ti deza egziste avan mem ki Bondye ti fer ekrir sa bann parol la. Me purtan, li ti ena enn gran lestim pu zot. Se so Papa ki dan lesyel ki ti donn sa bann lanseynman la! Dayer, li ti dir Satan ki sa bann parol la zot pli inportan ki manze. (Matye 4:1-11) Wi, Zezi ti kontan tu seki Zeova ti montre li! Me, kuma eski Zezi ti montre so lamur kan li ti anseyne?

Lamur pu Laverite Ki Li Ti Anseyne

 7. Kifer eski Zezi pa ti rod invant so bann prop lanseynman?

⁷ Pena okenn dut ki Zezi ti byin kontan laverite ki li ti pe anseyne. Purtan, li ti byin kapav invant so bann prop lanseynman, parski li ti ena enn gran konesans ek enn gran sazes. (Kolosyin 2:3) Me selman, tuletan li ti rapel bann ki ti pe ekut li, ki seki li pe dir, se pa so lanseynman, me lanseynman so Papa. (Zan 7:16, 8:28, 12:49; Zan 14:10) Zezi ti telman kontan sa laverite la, ki zame li pa ti pu kapav ranplas sa par so bann prop panse.

 8. Dan kumansman so minister, kuma eski Zezi finn montre ki li ti kont lor Parol Bondye?

⁸ Deswit kuma Zezi finn kumans so predikasyon, li finn donn legzanp. Anu gete ki manyer li ti anonse pu premye fwa ki limem Mesi. Eski li finn zis vinn devan bann laful, ek anonse ki limem Kris ek apre pruv sa par bann mirak? Non, li ti al dan Sinagog, kot suvan bann serviter Bondye ti reyni pu lir Parol Bondye. Ek la li’nn lir for profesi Izai 61:1, 2. Li’nn explike ki sa profesi la aplik ar li. Anplis, bann mirak ki li ti fer, ti montre ki Zeova ti avek li. Me mem sa, li ti tuletan kont lor Parol Bondye pu anseyne.

 9. Kan li ti gayn diskisyon avek bann Farizyin, kuma eski Zezi finn montre so latasman pu Parol Bondye?

⁹ Bann lennmi Zezi ti poz li bann kestyon pu teste li. Me zame li pa finn lans li dan bann deba pu lager lor mo, mem si li ti kone ki li ti pu kapav gayne. Okontrer, li ti les Parol Bondye montre ki zot dan lerer. Rapel par egzanp, kan bann Farizyin ti akiz bann disip Zezi. Zot ti dir ki bannla pa ti obeir lalwa lor Saba, parski kan zot ti pas dan enn karo, zot ti kas detrwa zepi sereal pu zot manze. Zezi finn reponn: “Eski zame zot pa finn lir seki David ti fer, kan li ek so bann zom ti gayn fin?” (Matye 12:1-5) Sa bann Farizyin ki ti panse ki zot pli bon ki lezot la, devet ti deza lir seki rakonte dan 1 Samyel 21:1-6. Me malgre sa, zot pa’nn reysi konpran leson inportan ki ti ena ladan. Me Zezi li, li pa ti zis lir, li ti byin reflesi lor la. Li ti’nn konpran bann prinsip ki ena ladan ek li finn aksepte sa avek tu so leker. Li ti kontan bann prinsip ki Zeova ti pe anseyne dan sa pasaz la. Donk, li’nn servi sa ansam avek enn lot legzanp dan Lalwa Moiz, pu montre ki Lalwa Bondye ti rezonab. Bann sef relizye ti pe fer tu pu deform seki Parol Bondye dir, pu zot prop lavantaz. Zot ti pe fer zot bann tradisyon konplike pas avan bann lalwa. Me lamur ki Zezi ti ena pu laverite, ti pus li pu defann Parol Bondye.

10. Kuma eski Zezi ti realiz bann profesi konsernan fason ki Mesi ti pu anseyne?

¹⁰ Zezi ti telman kontan laverite, ki li pa ti kapav anseyn sa kumadir kiafer, san okenn santiman. Bann profesi dan Labib ti anonse ki Mesi ti pu dir ‘bann parol ki fer plezir pu tande.’ (Zenez 49:21) Zezi ti realiz sa bann profesi la kan li ti anseyn laverite, li ti dir “bann parol ki ti fer plezir pu tande.” (Lik 4:22) Donk, so mesaz ti byin interesan ek kler. Sirman bann dimunn ti kapav truv so bann santiman, ek zot ti kapav truv sa lintere ki li ti ena la lor so figir, ek par fason ki li ti pe koze. Wi, ti enn plezir pu ekut li. Se enn bon legzanp ki nu kapav swiv kan nu partaz seki nu finn aprann ar lezot.

11. Zezi ti ena buku kapasite, me kifer eski sa pa finn fer li vinn vantar?

¹¹ Li vre ki Zezi ti byin konpran laverite Bondye ek li ti dir bann parol ki tus leker bann dimunn. Me, eski sa bann kapasite la finn fer li vinn vantar? Se seki suvan ariv bann dimunn ki anseyne. Me, rapel ki Zezi ti ena sazes. Me sa sazes ki li ti ena la ti montre so lakrint pu Bondye. Si enn kikenn ena sa kalite sazes la, li pa pu fer vantar, parski ‘bann dimunn ki konn zot limit, zot ena sazes.’ (Proverb 11:2) Me ti ena enn lot kitsoz ki ti anpes Zezi pu vinn vantar.

Zezi Ti Kontan Bann Dimunn Ki Li Ti Anseyne

12. Kuma eski Zezi finn montre ki li pa ti anvi ki so bann disip per li?

¹² Par fason ki li ti anseyne, Zezi ti tuletan montre ki li byin kontan bann dimunn. Zame li ti dir kitsoz pu fer bann dimunn per li, parey kuma bann dimunn vantar fer. (Eklezyast 8:9) Kan Pyer ti truv enn mirak ki Zezi ti fer, li ti gayn sok ek li ti tom dan lipye Zezi. Me Zezi pa ti anvi ki so bann disip per li. Avek bonte li’nn dir Pyer: “Aret gayn per.” Apre sa li’nn koz lor enn gran travay predikasyon ki Pyer usi ti pu fer. (Lik 5:8-10) Donk, Zezi pa ti anvi ki so bann disip servi Bondye par laper, me plito par lamur pu laverite.

13, 14. Kuma eski Zezi ti montre ki li ti konpran bann dimunn?

¹³ Ena enn lot fason ki Zezi ti montre ki li ti byin kontan bann dimunn. Li ti kapav met li dan zot plas. ‘Letan li ti truv bann laful, li ti gayn pitye pu zot, parski zot ti ranpli ar stres ek zot ti fane inpe partu kuma bann muton ki pena berze.’ (Matye 9:36) Zezi ti byin sagrin zot ek li ti anvi fer kitsoz pu ed zot.

¹⁴ Anu get enn lot lokazyon kot Zezi ti montre ki li konpran bann dimunn. Enn fwa, dan enn gran laful, enn madam ki ti ena enn lemorazi, ti koste ar li. Li ti tus so linz, ek li finn geri. Zezi ti santi enn lafors kit li, me li pa’nn truve kisannla ki’nn geri. Li ti byin anvi truv sa madam la. Kifer? Li pa ti anvi truv li pu repros li ki li’nn dezobeir Lalwa Bondye uswa lalwa bann Skrib ek bann Farizyin. Dayer, li posib ki sa madam la ti pe per, atansyon Zezi dir li sa. Okontrer Zezi finn dir li: “Mo tifi, to lafwa finn geri twa. Al anpe, retruv to lasante, ek ki sa maladi grav la kit twa.” (Mark 5:25-34) Remarke ki bann parol Zezi ti montre ki li ti byin konpran sa madam la. Li pa ti zis dir: ‘Mo geri twa.’ Non! Okontrer, li ti dir: “Retruv to lasante, ek ki sa maladi grav la kit twa.” Dan so levanzil, Mark ti servi isi enn mo ki vedir “fwete” pu tortir enn dimunn. Donk, Zezi ti rekonet ki sa maladi la ti pe fer sa madam la sufer buku ek sa ti byin demoraliz li. Ala kifer Zezi ti byin sagrin li.

15, 16. Ki bann legzanp ki montre ki Zezi ti truv bann bon kalite ki bann dimunn ti ena?

¹⁵ Ena ankor enn lot fason ki Zezi ti montre ki li ti kontan bann dimunn. Li ti get zot bann bon kalite. Anu gete ki ti arive kan li ti zwenn Natanael, ki plitar ti vinn enn so bann zapot. ‘Kan Zezi ti truv Natanael pe vinn ver li, li ti dir: “Gete, sa enn vre Izraelit sa, se pa enn dimunn tret.’” Zezi ti ena puvwar pu truv dan leker Natanael, donk li ti kone ki kalite dimunn li ti ete. Byinsir, Natanael pa ti parfe. Li ti ena so bann defo, parey kuma nu tu. Dayer, kan li ti tann koz lor Zezi, li ti dir fran-fran: “Eski bon kitsoz kapav sorti dan Nazaret?” (Zan 1:45-51) Zezi ti kapav dir buku kitsoz lor Natanael, me li finn truv enn bon kalite ki li ti ena setadir, li ti enn dimunn onet.

¹⁶ Anu get enn lot legzanp. Enn sef larme, ki pa ti Zwif—sirman enn Romin—ti apros Zezi ek ti demann li pu geri so esklav ki ti malad. Zezi ti byin kone ki sa ofisye la ti ena so bann defo. Dayer, enn sef larme sa lepok la, kitfwa ti partisip dan bann lager, fer krim ek ador bann fos bondye. Me Zezi pa finn get tusala. Li finn get enn bon kitsoz ki sa misye la ti ena, setadir so gran lafwa. (Matye 8:5-15) Plitar kan Zezi ti koz avek bandi ki ti atase lor enn poto pre kot li, li pa ti repros li pu tu bann move kitsoz ki li ti fer dan lepase. Okontrer li finn ankuraz li ek li finn donn li enn lespwar pu lavenir. (Lik 23:43) Zezi ti kone ki si nu kritik bann dimunn, sa pu zis dekuraz zot. Li finn fer zefor pu truv bon kalite ki bann dimunn ti ena. Ek pena dut, sa finn ankuraz bannla pu amelyor zot ankor plis.

Pre pu Servi Bann Dimunn

17, 18. Kan li’nn aksepte pu vinn lor later, kuma eski Zezi finn montre li pre pu servi lezot?

¹⁷ Zezi ti pre pu ed lezot. Sa li enn lot gran prev ki montre ki li ti kontan bann dimunn. Mem avan ki li vinn lor later, li ti tuletan kontan bann dimunn. (Proverb 8:30, 31) Antan ki “Laparol,” uswa port parol Bondye, li ti gayn lokazyon pu koz avek bann dimunn. Sirman, sa ti fer li buku plezir. (Zan 1:1) Selman, enn rezon kifer li’nn vinn lor later, se pu anseyn bann dimunn direkteman. Akoz sa, “li finn kit tu seki li ti ena [so gran pozisyon dan lesyel] ek li finn pran form enn esklav.” (Filipyin 2:7; 2 Korintyin 8:9) Kan li ti lor later, Zezi zame pa ti atann ki lezot servi li. Okontrer limem li’nn dir ki li “finn vini, pa pu ki lezot servi li, me pu ki li, li servi ek li donn so nam kuma enn ranson an esanz pu buku.” (Matye 20:28) Donk, Zezi ti realiz sa bann parol la.

¹⁸ Zezi ti aksepte pu abes li pu ed bann dimunn ki li ti pe anseyne. Li ti pre pu fer tu pu ed zot. Li ti mars par santenn kilomet pu prese ek pu zwenn pli buku dimunn ki kapav. Li ti travers Izrael an antye. Zezi pa ti parey kuma bann Farizyin. Li ti konn abes li, ek bann dimunn ti kapav apros li fasilman. Tu kalite dimunn, bann ki ti ena enn gran plas travay, bann solda, bann avoka, bann fam, bann zanfan, bann pov, bann dimunn malad, mem bann dimunn ki ti rezete par lasosyete, ti kontan pu koz ar li. Zot pa ti per li. Mem si li ti parfe, Zezi ti enn imin ek parey kuma nu tu, defwa li ti fatige ek li ti gayn fin. Me tuletan li ti pran kont seki lezot bizin avan mem ki li get pu li. Li ti fer sa, mem si li ti santi li fatige, uswa si li ti bizin enn ti moman trankil pu repoze, uswa pu priye.

19. Zezi ti konn abes li, li ti ena pasyans, ek li ti montre li bon anver so bann disip. Kuma eski li finn les enn legzanp dan sa bann domenn la?

¹⁹ Zezi ti pre pu servi so bann prop disip usi. Li ti fer sa kan li ti anseyn zot avek bonte ek buku pasyans. Defwa, zot ti tarde pu konpran bann kitsoz inportan. Me zame Zezi pa finn bes lebra, uswa perdi pasyans, uswa mem kriy ar zot. Li ti tuletan truv enn mwayin pu ed zot pu konpran. Anu pran enn legzanp. Pa kone komye fwa bann disip ti lager pu kone kisannla ki pli gran parmi zot. Lanwit avan ki Zezi mor, zot ti ankor pe lager. Me sak fwa Zezi ti truv bann mwayin pu montre zot ki zot bizin konn abes zot. Dan sa domenn la, ek dan lezot domenn ankor, Zezi ti kapav dir: “Mo finn donn zot legzanp.”—Zan 13:5-15; Matye 20:25; Mark 9:34-37.

20. Ki metod, ki diferan ar bann Farizyin, Zezi ti servi, ek kifer eski sa li ti enn bon metod?

²⁰ Remarke ki Zezi pa ti zis dir so bann disip seki zot bizin fer, li “ti donn legzanp.” Li pa ti koz avek so bann disip dan enn fason pu abes zot. Li pa ti donn zot linpresyon ki li ti tro inportan pu fer bann kitsoz ki li ti dir zot fer. Bann Farizyin ki ti fer kumsa. Akoz sa, Zezi ti dir: “Zot dir me zot pa fer.” (Matye 23:3) Zezi ti met an pratik seki li ti pe anseyne. Kumsa li’nn montre zot egzakteman kuma zot kapav aplik sa bann lanseynman la dan zot lavi. Par egzanp, kan li ti ankuraz so bann disip pu amenn enn lavi sinp, ki pa materyalis, zot pa ti bizin al devine pu kone ki li ti pe rod dir. Zot ti kapav truv sa dan bann parol ki li ti dir: “Bann renar ena enn landrwa kot zot al dormi ek bann zwazo dan lesyel ena zot nik, me Garson enn zom li, li pena okenn plas pu poz so latet.” (Matye 8:20) Zezi ti servi so bann disip, ek li finn les zot enn bon legzanp pu swiv.

21. Ki nu pu egzamine dan prosin lartik?

²¹ Wi, vremem Zezi li pli Gran Anseynan ki finn egziste. Tu bann dimunn sinser ki’nn truv li ek ki’nn tann li, ti rekonet ki li ti kontan laverite ki li ti pe anseyne, ek bann dimunn ki li ti pe anseyne. Zordi usi, bann dimunn ki etidye so legzanp, zot truv sa. Me, kuma eski nu kapav swiv legzanp parfe Zezi Kris? Prosin lartik pu egzaminn sa kestyon la.

Kuma Eski U Pu Reponn?

• Ki kitsoz ki fer enn kikenn vinn enn bon anseynan ek kisannla finn donn legzanp dan sa domenn la?

• Kuma eski Zezi ti montre ki li ti kontan laverite ki li ti anseyne?

• Kuma eski Zezi ti montre ki li ti kontan bann dimunn?

• Sit bann legzanp ki montre kuma Zezi ti pre pu servi lezot?

[Zimaz lor paz 8]

Kuma eski Zezi ti montre ki li ti kontan bann prinsip ki truv dan Parol Bondye?