Enn administration ki realise projet Bondié

“[Bondié] dirige tou kitsoz dapré so prop volonté.”—Éphésiens 1:11.

 1. Kifer tou congregation bann Témoins de Jéhovah, pou joinde le 12 avril 2006?

MERCREDI 12 avril 2006, tard dan l’apré-midi, environ 16 million dimoune pou rassemblé pou celebré Mémorial la mort Jésus. Dan tou la-salle kot zot pou faire sa, zot pou mette lor enn la-table, bann l’embleme, setadir di-pain sans levain, ki represente lekor Jésus, ek di-vin rouge, ki represente di-sang ki li’nn versé. Pou ena enn discours ki pou explik signification Mémorial la mort Jésus ek vers la fin sa discours-la, pou passe sa bann l’embleme-la parmi l’assistance; pou passe di-pain avant, ek apré pou passe di-vin. Dan certain congregation bann Témoins de Jéhovah, enn ou plusieurs dimoune dan l’assistance pou mange sa di-pain ek pou boire sa di-vin-la. Mais, dan la plupart congregation, personne pa pou prend sa bann l’embleme-la. Kifer zis enn tigit chrétien, bann ki ena l’espoir pou al dan le ciel, ki prend sa bann l’embleme-la, alors ki la majorité, ki ena l’espoir pou vive lor la terre, pa prend sa?

2, 3. (a) Ki Jéhovah ti crée en accord avek so projet? (b) Kifer Jéhovah ti crée la terre ek bann dimoune?

² Jéhovah Li enn Bondié ki realise so bann projet. Pou faire sa, Li “dirige tou kitsoz dapré so prop volonté.” (Éphésiens 1:11) En premier, Li ti crée so sel Garson directement. (Jean 1:1, 14; Révélation 3:14) Lerla, a travers sa Garson-la, Li ti crée bann lezot garson spirituel, ek finalement, Li ti crée l’univers, la terre ek bann dimoune.—Job 38:4, 7; Psaume 103:19-21; Jean 1:2, 3; Colossiens 1:15, 16.

³ Jéhovah pa ti crée la terre zis couma enn place kot dimoune pou gagne bann l’epreuve, pou testé zot ek guetté si zot merité al faire partie parmi so famille spirituel dan le ciel. Beaucoup religion la chrétienté enseigne sa. Mais Jéhovah ti crée la terre dan enn but bien precis: pou ki dimoune “reste lor la.” (Isaïe 45:18) Bondié ti crée la terre pou bann dimoune, ek Li ti crée bann dimoune pou reste lor la terre. (Psaume 115:16) La terre entier ti bizin vinn enn paradi, rempli avek bann dimoune ki droite, ki ti pou planté ek prend soin la terre. Jamais Bondié pa ti donne premier couple ki Li ti mette lor la terre, l’espoir pou al vive dan le ciel.—Genèse 1:26-28; 2:7, 8, 15.

Satan mette en doute projet Jéhovah

 4. Couma eski Satan ti mette en doute fason ki Jéhovah dirigé depuis commencement l’histoire l’humanité?

⁴ Enn parmi bann garson spirituel Bondié ti rebellé ek ti decidé pou gate projet Jéhovah. Bondié ti’nn donne li liberté pou prend so prop decision, mais li ti mal servi sa liberté-la. Li ti troublé la paix tou bann ki ti soumette-zot avek amour ar direction Jéhovah. Satan ti pousse premier couple pou vinn independant ar Bondié. (Genèse 3:1-6) Li pa ti mette en doute pouvoir Jéhovah, mais plutot li ti mette en doute fason ki Jéhovah dirigé. C’est coumsa ki Satan ti mette en doute droit ki Bondié ena pou dirigé depuis commencement l’histoire l’humanité.

 5. Ki lot question Satan ti soulevé, ek kisannla ti concerné par sa?

⁵ Dan lepok Job, Satan ti souleve enn lot question ki ena enn rapport direct avek droit ki Jéhovah ena pou dirigé. Satan ti mette en doute bann mobile ki pousse bann serviteur Jéhovah pou soumette ar Li ek servi Li. Li ti pretann ki zot pé servi Jéhovah zis par interet, pou bann raison egoïste ek ki si zot passe par bann l’epreuve, zot pou detourne-zot ar Bondié. (Job 1:7-11; 2:4, 5) Mem si li ti souleve sa question-la en rapport avek enn serviteur Bondié ki ti lor la terre, sa ti concerne aussi bann garson Bondié ki dan le ciel, ek mem Garson ki Bondié ti crée directement.

 6. Couma Jéhovah finn montré-Li fidel ar so projet ek ar so nom?

⁶ Jéhovah Li fidel ar so projet ek ar signification so nom. Li ti faire Li-mem vinn enn Prophete ek enn Sauveur.a Li ti dire Satan: “Mo pou mette la-haine entre toi ek la femme, ek entre to descendance ek so descendance. Li pou crase to la-tête ek to pou crase so talon.” (Genèse 3:15) “La femme” ici represente l’organisation Jéhovah ki dan le ciel. Jéhovah ti pou servi Descendance ‘sa femme-la’ pou reponn bann l’accusation Satan, ek pou donne bann descendant Adam, l’espoir ki enn jour zot pou sauvé, ek zot pou gagne la vie eternel.—Romains 5:21; Galates 4:26, 31.

“Saint secret so volonté”

 7. Ki projet Jéhovah inn faire dimoune koné a travers l’apotre Paul?

⁷ Dan lettre ki li ti ecrire bann chrétien dan la ville Éphèse, l’apotre Paul ti donne enn joli explication ki montré couma Jéhovah dirige bann kitsoz pou realise so bann projet. Li ti ecrire: “Li’nn faire nou konn saint secret so volonté. Sa saint secret-la, li dapré seki faire Li plaisir; setadir Li’nn decidé en Li-mem pou etablir enn administration a la fin bann lé-temps fixé; setadir pou rassemblé tou kitsoz encore dan Christ, bann kitsoz ki dan le ciel ek bann kitsoz ki lor la terre.” (Éphésiens 1:9, 10) Jéhovah ena enn grand projet pou etablir l’unité dan enn l’univers kot pou ena zis bann creature ki soumette-zot ar so règne parski zot content Li. (Révélation 4:11) Lerla, so nom pou sanctifié, zot tou pou trouvé ki Satan enn grand menteur, ek volonté Bondié pou faire “lor la terre pareil couma dan le ciel.”—Matthieu 6:10.

 8. Ki sa vedir mot ki’nn traduire par “administration”?

⁸ ‘Seki faire Jéhovah plaisir,’ setadir so projet, ti pou realisé par “enn administration.” Ici, Paul ti servi enn mot ki vedir “dirige enn lakaz.” Sa administration-la pa vedir enn gouvernement couma Royaume Bondié, mais plutot enn fason pou dirige bann kitsoz.b Pou realise so projet, Jéhovah ti pou dirige bann kitsoz dan enn fason extraordinaire. Sa ti pou coumadir enn “saint secret,” ki Li ti pou faire nou comprend tigit par tigit, avek le temps.—Éphésiens 1:10; 3:9, note.

 9. Tigit par tigit, couma Jéhovah ti faire konn saint secret so volonté?

⁹ Par enn serie l’alliance, Jéhovah ti faire koné tigit par tigit couma Li ti pou realise so projet concernant sa Descendance ki Li ti promette en Éden-la. Jéhovah ti faire enn promesse, ou-soit enn l’alliance avek Abraham. Dapré sa l’alliance-la, sa Descendance-la ti pou vinn lor la terre parmi bann descendance Abraham, ek ki par li, “tou bann nation lor la terre,” ti pou gagne enn benediction si zot merité. Sa l’alliance-la ti montré aussi ki ti pou ena lezot dimoune ki ti pou forme partie dan sa descendance-la. (Genèse 22:17, 18) L’alliance la Loi ki Jéhovah ti faire avek nation Israël, ti montré ki dan So projet, ti pou ena “enn royaume pretre.” (Exode 19:5, 6) L’alliance ki Li ti faire avek David ti montré ki sa Descendance-la, li-mem pou chef dan Royaume Bondié ek Li pou regné pou touletan. (2 Samuel 7:12, 13; Psaume 89:3, 4) Enn fois ki l’alliance la Loi ti amenn bann Juif vers le Messie, Jéhovah ti donne plus renseignement lor fason ki so projet pou realisé. (Galates 3:19, 24) Bann dimoune ki ti pou associé avek partie principal sa descendance-la, ti pou forme sa “royaume pretre” ki ti annoncé-la. Zot ti pou rente dan “enn nouveau l’alliance” en tant ki enn nouveau nation “Israël,” enn Israël spirituel.—Jérémie 31:31-34; Hébreux 8:7-9.c

10, 11. (a) Couma Jéhovah ti montré kisannla sa Descendance ki ti’nn annoncé-la? (b) Kifer Garson Bondié ti vinn lor la terre?

¹⁰ Le temps ti’nn arrivé pou ki sa Descendance ki Jéhovah ti promette-la, vinn lor la terre pou realise So projet. Jéhovah ti envoye l’ange Gabriel pou annonce Marie ki li pou gagne enn garson ek li ti pou bizin appel li Jésus. Ange-la ti dire li: “Li pou vinn enn kikenn ki grand, ek pou appel li Garson Très-Haut; ek Jéhovah pou donne li trone David, so papa, ek li pou vinn le roi lor lakaz Jacob pou touletan, ek so royaume pa pou fini.” (Luc 1:32, 33) Grace a sa bann parole-la, nou koné kisannla sa Descendance ki ti’nn promette-la.—Galates 3:16; 4:4.

¹¹ Garson Bondié ti pou bizin vinn lor la terre ek passe par bann grand l’epreuve ki ti pou testé li ziska dernier limite. Jésus tousel ki ti pou kapav donne enn reponse parfait ar question ki Satan ti soulevé. Eski li ti pou reste fidel envers so Papa? Sa lepok-la, sa ti encore enn saint secret. Plitar l’apotre Paul ti donne sa l’explication-la: “Nou bizin reconette ki sa saint secret ki concerne nou l’attachement envers Bondié-la, li grand: ‘Li ti vinn couma enn dimoune lor la terre, [Bondié] ti declare li droite dan l’esprit, li ti apparette ar bann ange, dimoune ti preche li parmi bann nation, dimoune ti croire li dan le monde, ek [Bondié] ti enleve li dan la gloire.’ ” (1 Timothée 3:16) Oui, parski Jésus inn reste fidel ziska la mort, li’nn donne enn reponse final ar l’accusation Satan. Mais ti ena lezot detail en rapport avek sa saint secret-la ki bann serviteur Bondié ti bizin koné.

“Saint secret royaume Bondié”

12, 13. (a) Cite enn partie ‘sa saint secret lor royaume Bondié-la.’ (b) Ki Jéhovah ti bizin faire kan Li ti choisir certain dimoune pou al vive dan le ciel?

¹² Enn fois, kan Jésus ti pé preché en Galilée, li ti montré ki sa saint secret-la ti ena enn rapport direct avek so Royaume messianik. Li ti dire so bann disciple: “Zot, zot finn gagne privilege pou comprend bann saint secret lor royaume ki dan le ciel [“royaume Bondié,” Marc 4:11].” (Matthieu 13:11) Enn partie sa saint secret-la ti concerne enn “ti troupeau” 144,000 dimoune, ki Jéhovah ti pou choisir pou associé avek so Garson. Zot ti pou forme partie dan sa descendance-la ek zot ti pou règne avek Jésus dan le ciel.—Luc 12:32; Révélation 14:1, 4.

¹³ Bann dimoune finn crée pou vive lor la terre; sa vedir ki Jéhovah ti bizin faire “enn nouveau creation” pou ki certain dimoune kapav al vive dan le ciel. (2 Corinthiens 5:17) L’apotre Pierre ti enn parmi sa bann dimoune ki ti ena sa grand privilege-la. Li ti ecrire: “Nou beni Bondié ek Papa nou Seigneur Jésus Christ, parski dan so grand misericorde, Li finn donne nou enn nouveau naissance pou nou ena enn l’esperance vivant, grace a resurrection Jésus Christ parmi bann mort, pou nou gagne enn l’heritage ki pa kapav pourri, ni vinn impur, ni fletri. Sa finn reservé pou zot dan le ciel.”—1 Pierre 1:3, 4.

14. (a) Couma bann non-Juif ti concerné par “saint secret royaume Bondié”? (b) Kifer nou kapav comprend “bann kitsoz profond ki concerne Bondié”?

¹⁴ Enn lot partie sa saint secret lor Royaume-la, ti concerne volonté Bondié pou ajoute bann non-Juif ar sa tigit dimoune ki Li ti choisir pou al règne avek Jésus Christ dan le ciel. Concernant sa partie dan sa ‘l’administration-la,’ setadir la fason ki Jéhovah ti pou dirige realisation so projet, Paul ti dire: “Dan lezot generation, [Bondié] pa finn faire bann dimoune konn sa secret-la, couma asterla Li finn faire bann saint zapotre ek bann prophete konn sa par l’esprit, setadir ki bann dimoune dan bann nation pou vinn heritier ek membre ensam avek sa lekor-la, ek gagne enn part ensam avek nou dan promesse ki finn faire, dan l’unité avek Jésus Christ par la bonne nouvelle.” (Éphésiens 3:5, 6) Oui, Bondié inn faire “bann saint zapotre” comprend sa partie dan saint secret-la. Zordi aussi pareil, sans l’aide l’esprit saint, nou pa ti pou kapav comprend “bann kitsoz profond ki concerne Bondié.”—1 Corinthiens 2:10; 4:1; Colossiens 1:26, 27.

15, 16. Kifer Jéhovah ti choisir bann ki ti pou associé avek Jésus Christ parmi bann dimoune lor la terre?

¹⁵ Jean ti trouve “cent quarante-quatre mille” pé debouté avek “l’Agneau” lor montagne Sion. Concernant sa group-la, la Bible dire ki finn “acheté zot lor la terre,” ek finn “acheté zot parmi bann dimoune, ek zot couma bann premier recolte pou Bondié ek pou l’Agneau,” Jésus Christ. (Révélation 14:1-4) Jéhovah ti choisir so premier garson spirituel pou vinn partie principal sa descendance ki Li ti promette en Éden-la. Mais kifer eski Li finn choisir bann associé Jésus parmi bann dimoune lor la terre? L’apotre Paul ti expliké ki sa ti group dimoune-la ti’nn “choisir dapré projet [Jéhovah],” “dapré seki faire plaisir so volonté.”—Romains 8:17, 28-30; Éphésiens 1:5, 11; 2 Timothée 1:9.

¹⁶ Jéhovah ena projet pou sanctifié so nom ki grand ek ki saint, ek pou justifié droit ki Li ena pou dirige l’univers. Par so “administration” setadir enn fason dirigé ki rempli ar sagesse, Li ti envoye so Garson premier-né lor la terre, kot li finn testé ziska la mort. En plus, Jéhovah ti decidé ki dan Royaume messianik, dirigé par so Garson, ti pou ena bann dimoune ki zot aussi, finn contigne soutenir So droit pou dirige l’univers, ziska zot la-mort.—Éphésiens 1:8-12; Révélation 2:10, 11.

17. Kifer nou content pou koné ki Jésus ek bann ki pou associé avek li dan so Royaume, ti vive couma bann dimoune lor la terre avant?

¹⁷ Jéhovah ti montré so grand l’amour envers bann descendant Adam kan Li ti envoye so Garson lor la terre, ek kan Li ti choisir bann dimoune pou al règne ensam avek Jésus dan so Royaume. Couma sa disposition-la ti pou profitable pou So bann lezot serviteur fidel ki’nn vive depuis lepok Abel? Bann dimoune imparfait finn né esclave peché ek la mort; zot bizin enn guerison spirituel ek physik pou zot vinn parfait, en accord avek projet ki Jéhovah ti ena au commencement pou bann dimoune. (Romains 5:12) Bann dimoune ki ena l’espoir pou vive pou touletan lor la terre gagne enn grand l’encouragement kan zot koné ki zot lé-Roi pou content zot pareil couma li ti content so bann disciple kan li ti lor la terre, ek ki li pou comprend zot aussi pareil. (Matthieu 11:28, 29; Hébreux 2:17, 18; 4:15; 7:25, 26) Bann ki pou associé avek Jésus dan le ciel, zot pou vinn bann lé-roi ek aussi bann pretre. Sa bann zom ek sa bann femme fidel-la finn bizin lutté kont bann faiblesse ek finn passe par bann difficulté, pareil couma nou. Kan nou comprend sa, sa rassure beaucoup!—Romains 7:21-25.

Projet Jéhovah pa pou manké pou realisé

18, 19. Kifer asterla nou comprend pli bien seki Paul ti dire dan Éphésiens 1:8-11, ek ki nou pou examiné dan prochain lartik?

¹⁸ Asterla nou comprend pli bien seki Paul ti dire bann chrétien oint dan Éphésiens 1:8- 11. Li ti dire zot ki Jéhovah ti faire zot konn “saint secret so volonté,” ki zot finn “etablir couma bann heritier” avek Jésus, ek ki “ti’nn fini choisir [sa group-la] en avance, en accord avek projet sa kikenn ki dirige tou kitsoz-la dapré so prop volonté.” Nou comprend ki tousala faire partie dan enn “administration” extraordinaire ki Jéhovah finn mette en place pou realise so projet. Sa aide nou pou comprend aussi kifer zis enn tigit chrétien prend l’embleme pendant Mémorial.

¹⁹ Dan prochain lartik, nou pou guetté ki Mémorial representé pou bann chrétien ki ena l’espoir pou al dan le ciel. Nou pou aprann aussi kifer bann million dimoune ki ena l’espoir pou vive lor la terre, bizin vrai-mem envie koné seki Mémorial representé.

[Note]

Revision

• Kifer Jéhovah ti crée la terre ek ti mette bann dimoune lor là?

• Kifer li ti necessaire ki Garson Bondié gagne bann l’epreuve lor la terre?

• Kifer Jéhovah ti choisir bann ki pou règne ensam avek Jésus, parmi bann dimoune lor la terre?