“Bann juste pou brillé bien fort pareil couma soleil”

“Dan sa lepok-la, bann juste pou brillé bien fort pareil couma soleil dan royaume zot Papa.”—MAT. 13:43.

 1. Ki different l’aspect concernant Royaume Bondié Jésus ti expliké par bann l’exemple?

JÉSUS CHRIST ti servi beaucoup l’exemple, ou-soit bann parabole pou explik different l’aspect concernant Royaume Bondié. Li “ti dire bann la foule tou sa bann kitsoz-la a travers bann l’exemple. Oui, li pa ti koz ar zot sans ki li ti servi enn l’exemple.” (Mat. 13:34) Dan bann l’exemple kot Jésus ti koz lor seme la grain la verité lor Royaume Bondié, li ti mette l’accent lor deux kitsoz: premierement, c’est condition leker enn dimoune ki pousse li pou accepté ou-soit refuse sa message ki li tendé-la, ek deuxiemement, c’est Jéhovah ki derriere sa croissance spirituel-la. (Marc 4:3-9, 26-29) Jésus ti donne aussi bann l’exemple pou montré ki ti pou ena enn grand l’accroissement parmi bann dimoune ki ti pou accepté Royaume Bondié, mem si au commencement pa ti pou trouve sa l’accroissement-la desuite. (Mat. 13:31-33) En plus, li ti attire l’attention ki pa tou dimoune ki accepté message lor Royaume Bondié ki necessairement digne pou vinn bann sujet sa Royaume-la.—Mat. 13:47-50.a

 2. Dan l’exemple Jésus concernant di-blé ek mauvais l’herbe, ki bon la grain representé?

² Mais ena enn l’exemple ki Jésus ti donné ki mette l’accent lor rassemblement bann ki pou regne avek li dan so Royaume. Souvent bann dimoune appel sa parabole-la, parabole di-blé ek mauvais l’herbe, ek nou trouve sa dan Matthieu chapitre 13. Alors ki dan enn lot l’exemple Jésus ti dire ki la grain ki semé represente “la parole ki concerne royaume” Bondié, mais dan l’exemple di-blé ek mauvais l’herbe, li dire nou ki bon la grain represente enn lot kitsoz —“bann garson royaume Bondié.” (Mat. 13:19, 38) Sa bann garson-la zot pa bann sujet Royaume Bondié, mais zot “bann garson,” setadir bann heritier sa Royaume-la.—Rom. 8:14-17; lire Galates 4:6, 7.

L’exemple di-blé ek mauvais l’herbe

 3. Ki probleme sa missié dan l’exemple Jésus-la ti gagné ek ki li ti decide pou faire pou reglé sa probleme-la?

³ Anou guette sa l’exemple-la: “Royaume ki dan le ciel inn vinn pareil couma enn missié ki ti seme bon la grain dan so karo. Pendant ki bann zom ti pé dormi, so l’ennemi ti vini ek ti seme mauvais l’herbe au milieu di-blé, ek ti allé. Kan plante-la ti germé ek ti produire bann fruit, alors mauvais l’herbe-la aussi ti parette. Lerla, bann esclave maitre lakaz-la ti vini ek ti dire li: ‘Maitre, eski to pa ti seme bon la grain dan to karo? Mais alors, kot sa mauvais l’herbe-la sorti?’ Li ti dire zot: ‘Enn l’ennemi, enn zom, inn faire sa.’ Zot ti dire li: ‘Eski to’lé ki nou sorti ek nou al ramasse li?’ Li ti dire zot: ‘Non, pangar kan zot pé ramasse mauvais l’herbe, zot deracine di-blé-la avek li. Laisse toulé-deux pousse ensam ziska recolte; lerla dan lepok recolte mo pou dire bann ki faire recolte: D’abord ramasse mauvais l’herbe ek attache li par paquet pou brulé, apré sa, ramasse di-blé dan mo store.’ ”—Mat. 13:24-30.

 4. (a) Kisannla sa missié dan l’exemple Jésus-la? (b) Kan ek couma eski Jésus ti commence seme sa bon la grain-la?

⁴ Kisannla sa missié ki ti seme bon la grain dan so karo-la? Plitar, Jésus ti donne sa l’explication-la so bann disciple: “Sa missié ki seme bon la grain-la, c’est Fils de l’homme.” (Mat. 13:37) Pendant trois an et demi ki li ti faire so ministere lor la terre, Jésus, “Fils de l’homme” ti prepare karo pou li planté. (Mat. 8:20; 25:31; 26:64) Apré sa, depuis jour la Pentecôte l’an 33 nou lepok, li ti commence seme bon la grain—“bann garson royaume.” Nou comprend ki Jésus ti commence seme sa bann la grain-la kan, en tant ki representant Jéhovah, li ti commence envoye l’esprit saint lor so bann disciple, coumsa li’nn oint zot pou zot vinn bann garson Bondié.b (Actes 2:33) Sa bon la grain-la ti developpé pou vinn bann di-blé bien formé. Sa vedir ki, l’objectif kan ti seme bon la grain c’est pou rassemblé finalement tou bann ki ti pou vinn bann coheritier ek bann le roi avek Jésus dan so Royaume.

 5. Kisannla sa l’ennemi dan l’exemple Jésus-la, ek ki mauvais l’herbe representé?

⁵ Kisannla sa l’ennemi-la ek ki sa mauvais l’herbe-la representé? Jésus dire nou ki sa l’ennemi-la “c’est Satan le Diable.” Li ti decrire mauvais l’herbe couma “bann garson sa kikenn ki mauvais-la.” (Mat. 13:25, 38, 39) Dan la realité, sa mauvais l’herbe ki Jésus ti pé kozé-la ti surement enn l’herbe empoisonné ki appel “l’ivraie,” en français. Sa plante empoisonné-la ressemblé di-blé kan li fek commence poussé ek avant ki li mur. C’est enn bon comparaison avek bann soi-disant chretien, bann ki pretann ki zot bann garson Royaume Bondié mais ki pa produire bann bon fruit! Sa bann chretien hypocrite ki pretann ki zot bann disciple Christ-la, en realité zot forme partie dan “descendance” Satan le Diable.—Gen. 3:15.

 6. Kan eski mauvais l’herbe ti commence parette, ek dan ki sens bann zom ti “dormi” dan sa lepok-la?

⁶ Kan sa bann chretien ki comparé ar mauvais l’herbe-la ti commence parette? Jésus ti dire: “Pendant ki bann zom ti pé dormi.” (Mat. 13:25) Kan sa ti arrivé? Nou trouve reponse dan seki l’apotre Paul ti dire bann ancien dan la ville Éphèse: “Mo koné ki apré ki mo’nn fini allé, bann loulou ki dominere pou rente parmi zot ek pou maltraite troupeau Bondié, ek ki parmi zot-mem, bann zom pou levé ek pou deforme la verité pou faire bann disciple suive zot.” (Actes 20:29, 30) Li ti conseil bann ancien pou reste lor zot garde lor plan spirituel. A mesure ki bann zapotre, ki ti faire “obstacle” kont l’apostasie, ti commence dormi dan la mort, beaucoup chretien ti commence dormi lor plan spirituel. (Lire 2 Thessaloniciens 2:3, 6-8.) C’est dan sa lepok-la ki enn grand l’apostasie ti commencé.

 7. Eski certain parmi bann di-blé ti vinn mauvais l’herbe? Expliké.

⁷ Jésus pa ti dire ki di-blé pou vinn mauvais l’herbe, mais ki mauvais l’herbe pou semé au milieu di-blé. Alors sa l’exemple-la pa koz lor bann vrai chretien ki quitte la verité. Non, li koz lor enn action volontaire ki Satan faire pou mette bann mauvais dimoune dan congregation chretien pou gate li. Kan Jean, dernier zapotre, ti agé, sa l’apostasie-la ti’nn fini commencé ek ti kapav trouve sa dan enn fason bien clair.—2 Pierre 2:1-3; 1 Jean 2:18.

“Laisse toulé-deux pousse ensam ziska recolte”

8, 9. (a) Kifer l’ordre ki Maitre-la ti donne so bann esclave ti logik pou bann ki ti pé ecoute Jésus? (b) Dan realisation sa parabole-la, couma di-blé ek mauvais l’herbe ti pousse ensam?

⁸ Bann esclave Maitre-la ti vinn faire li koné ki ena enn probleme ek ti demande li: “Eski to’lé ki nou sorti ek nou al ramasse [mauvais l’herbe]?” (Mat. 13:27, 28) So reponse parette etonnant. Li ti dire zot laisse di-blé ek mauvais l’herbe-la pousse ensam ziska periode recolte. Sa l’ordre-la ti logik pou bann disciple Jésus. Zot ti koné ki quantité li ti difficile pou faire difference entre di-blé ek mauvais l’herbe. En plus, bann ki ti ena l’experience dan plantation ti koné aussi ki racine sa mauvais l’herbe-la souvent ti maye ensam avek racine di-blé.c Li pa etonnant ki Maitre-la ti dire zot attann!

⁹ Dan mem fason, toute longue bann siecle, bann different secte la chretienté finn produire enn grand quantité mauvais l’herbe—d’abord parmi l’Eglise catholique ek l’Eglise orthodoxe, ek plitar parmi plusieurs groupe protestant ki ti’nn developpé. En mem temps, a travers le monde, enn tigit la grain vrai di-blé ti’nn semé. Dan l’exemple Jésus, maitre lakaz-la ti attann avek patience enn longue periode pendant ki plante-la poussé, ziska ki lepok recolte vini, ki enn periode pli courte.

Recolte ki nou pé attann depuis longtemps

10, 11. (a) Kan ena lepok recolte? (b) Dan ki sens amenn di-blé symbolik dan store Jéhovah?

¹⁰ Jésus dire nou: “Recolte c’est conclusion enn systeme, ek bann ki faire recolte c’est bann ange.” (Mat. 13:39) Pendant dernier jour sa mauvais systeme kot nou pé vive-la, ena enn separation ki pé faire—pé rassemblé bann garson royaume ek pé separe zot ar bann ki ressemblé mauvais l’herbe. En rapport avek sa, l’apotre Pierre ti ecrire: “Le temps fixé inn arrivé pou ki jugement commencé avek lakaz Bondié. Mais si li commence par nou avant, couma sa pou fini pou bann ki pa obeir la bonne nouvelle Bondié?”—1 Pierre 4:17.

¹¹ Enn tipé apré ki bann dernier jour, setadir “conclusion enn systeme,” ti’nn commencé, enn jugement ti commencé pou bann ki ti pretann ki zot bann vrai chretien—ki zot ti vrai-mem “bann garson royaume” ou-soit ki zot ti “bann garson sa kikenn ki mauvais-la.” Au commencement recolte, “d’abord” Babylone la Grande ti tombé, “apré sa” ti’nn rassemblé bann garson royaume. (Mat. 13:30) Mais zordi, dan ki sens eski bann ange inn amenn di-blé symbolik dan store Jéhovah? Bann garson royaume ki ti’nn mort, ti gagne zot recompense dan le ciel, ek bann ki ti encore vivant, ti forme partie dan congregation chretien ki’nn retabli. La, zot gagne faveur ek protection Jéhovah.

12. Comié le temps recolte duré?

¹² Comié le temps sa jugement-la duré? Jésus ti koz lor recolte couma enn “lepok,” alors li duré pendant enn periode le temps. (Rév. 14:15, 16) Jugement chaque chretien oint li duré toute longue lepok la fin. Li pou duré ziska ki sa bann chretien oint-la pou scellé dan enn fason definitif.—Rév. 7:1-4.

13. Dan ki fason “mauvais l’herbe” faire dimoune tombé, ek dan ki sens zot pratik bann kitsoz ki kont la loi?

¹³ Ki bann dimoune ki pou rassemblé en dehors Royaume, ek dan ki sens zot faire dimoune tombé ek zot pratik bann kitsoz ki kont la loi? (Mat. 13:41) Clergé la chretienté ki comparé ar mauvais l’herbe, finn embete plusieurs million dimoune pendant bann siecle. Zot finn faire sa par moyen bann l’enseignement ki deshonore Bondié; sa bann fausse l’enseignement-la zot “bann kitsoz ki faire tombé.” Par exemple, zot enseigne bann doctrine couma punition eternel dan enn l’enfer difé ek Trinité, enn l’enseignement ki mette dimoune dan confusion ek ki couma enn mystere pou zot. Beaucoup chef religieux donne enn mauvais l’exemple zot bann membre kan zot finn ena bann l’amitié adultere avek sa le monde-la ek dan certain cas kan zot finn ena enn conduite immoral. (Jacq. 4:4) En plus, la chretienté tolere encore plus l’immoralité sexuel parmi so bann membre. (Lire Jude 4.) Malgré tousala, devant dimoune, zot contigne faire coumadir zot attaché ar Bondié. Bann garson royaume vrai-mem content ki zot separé ar sa ‘mauvais l’herbe-la,’ ar so bann mauvais l’influence ek so bann fausse l’enseignement ki faire dimoune tombé!

14. Dan ki sens bann ki comparé ar mauvais l’herbe ploré ek grince zot lé-dent?

¹⁴ Dan ki sens bann dimoune ki comparé ar mauvais l’herbe zot ploré ek zot grince zot lé-dent? (Mat. 13:42) “Bann garson sa kikenn ki mauvais-la” zot tourmenté parski “bann garson royaume” finn devoile zot mauvais l’influence ki empoisonne bann dimoune lor plan spirituel. Zot aussi plaigné parski bann membre zot l’eglise pa soutenir zot couma avant ek zot pé perdi controle lor bannla.—Lire Isaïe 65:13, 14.

15. Dan ki sens bann ki comparé ar mauvais l’herbe pou brulé dan difé?

¹⁵ Dan ki sens eski ramasse sa mauvais l’herbe-la ek brule li dan difé? (Mat. 13:40) Sa represente seki pou arrivé finalement ar mauvais l’herbe. Dan enn fason symbolik pou jette li dan four difé, sa montré ki li pou konn enn destruction eternel. (Rév. 20:14; 21:8) Bann fausse chretien ki comparé ar mauvais l’herbe, bann faussaire, pou detruire net pendant “grand tribulation.”—Mat. 24:21.

Zot “pou brillé bien fort pareil couma soleil”

16, 17. Ki Malaki ti prophetisé concernant temple Bondié, ek kan eski sa prophetie-la ti commence realisé?

¹⁶ Kan eski bann chretien ki comparé ar di-blé pou commence “brillé bien fort pareil couma soleil”? (Mat. 13:43) En rapport avek purification temple Bondié, Malaki ti prophetisé: “ ‘Enn coute, Li pou vinn dan So temple, sa vrai seigneur ki zot pé rodé-la, ek messager l’alliance ki zot bien content. Guetté! Pena doute ki Li pou vini,’ Jéhovah, Chef bann l’armée inn dire. ‘Mais kisannla ki pou supporte jour ki Li pou vini, ek kisannla ki pou kapav tini deboute kan Li pou parette? Parski Li pou couma difé enn kikenn ki purifié ek couma la poudre ki bann dimoune servi pou lave linge. Ek Li pou bizin assizé pareil couma enn kikenn ki affiné ek ki purifié l’argent, ek Li pou bizin purifié bann garson Lévi; Li pou bizin purifié zot pareil couma purifié l’or ek l’argent, ek vrai-mem zot pou vinn pou Jéhovah bann dimoune ki presente enn offrande avek justice.’ ”—Mal. 3:1-3.

¹⁷ Nou comprend ki dan nou lepok, sa prophetie-la ti commence realisé en 1918 kan Jéhovah, ensam avek “messager l’alliance,” setadir Jésus Christ, ti faire enn inspection dan temple spirituel. Malaki ti aussi annoncé seki pou arrivé enn fois ki sa purification-la pou fini: “Pena doute ki encore enn fois, zot pou trouve difference entre enn bon dimoune ek enn mauvais dimoune, entre enn dimoune ki servi Bondié ek enn dimoune ki pa finn servi Li.” (Mal. 3:18) Lepok kot bann vrai chretien ti’nn regagne zot la force spirituel, ek ti reprend zot l’activité, c’est sa lepok-la-mem ki recolte ti’nn commencé.

18. Ki Daniel ti annoncé pou arrivé dan nou lepok?

¹⁸ Concernant nou lepok, prophete Daniel ti annoncé: “Bann ki ena l’intelligence pou brillé pareil couma le ciel ki bien eclairé; ek bann ki amenn enn quantité dimoune vers la justice, couma bann zetoile, pou touletan, oui pou toujours.” (Dan. 12:3) Kisannla sa bann ki brillé coumsa-la? C’est bann chretien oint, vrai di-blé ki Jésus ti mentionné dan so l’exemple lor di-blé ek mauvais l’herbe! De plus en plus dimoune ki forme partie dan la grande foule lezot brebis comprend bien ki pé “ramasse” sa mauvais l’herbe-la. Kan zot associé-zot ensam avek le reste membre l’Israël spirituel, sa bann futur sujet Royaume Bondié-la zot aussi, zot faire zot la lumiere brillé dan sa le monde bien noir-la.—Zek. 8:23; Mat. 5:14-16; Phil. 2:15.

19, 20. Ki “bann garson royaume” pé attann avek impatience, ek ki nou pou examiné dan prochain lartik?

¹⁹ Zordi, “bann garson royaume” attann avek impatience pou gagne zot recompense ki rempli ar la gloire dan le ciel. (Rom. 8:18, 19; 1 Cor. 15:53; Phil. 1:21-24) Mais en attendant, zot bizin reste fidele ek contigne brillé, montré ki zot different ar “bann garson sa kikenn ki mauvais-la.” (Mat. 13:38; Rév. 2:10) Nou tou nou bien content pou trouvé ki finn “ramasse” mauvais l’herbe dan nou lepok, ek resultat ki sa finn ena!

²⁰ Mais ki relation ena entre sa bann garson royaume-la ek bann membre la grande foule ki pé augmenté ek ki ena l’esperance pou vive pou touletan lor la terre couma bann futur sujet Royaume Bondié? Prochain lartik pou reponn sa question-la.

[Notes]

Eski ou rappel?

Dan l’exemple Jésus lor di-blé ek mauvais l’herbe, ki sa bann kitsoz-la representé?

• Bon la grain

• Sa missié ki seme sa la grain-la

• Seme bann la grain

• L’ennemi

• Mauvais l’herbe

• Lepok recolte

• Store

• Ploré ek grince le dent

• Four difé

[Zimage page 25]

Bon la grain finn commence semé a partir la Pentecôte l’an 33 nou lepok

[Zimage page 28]

Dan nou lepok, pé amenn di-blé symbolik dan store Jéhovah

[Remerciement photo page 28]

Pictorial Archive (Near Eastern History) Est.