Nou nepli vive pou nou-mem

“[Christ] finn mort pou tou, pou ki bann ki vive, nepli vive pou zot-mem.”—2 CORINTHIENS 5:15.

1, 2. Ki commandement biblik ti pousse bann premier chrétien pou combatte l’egoïsme?

POU Jésus, sa ti so dernier soir lor la terre. Pa ti reste beaucoup lé-temps avant ki li ti pou donne so la-vie pou tou seki ti pou ena la foi en li. Sa soir-la, Jésus ti dire beaucoup kitsoz important ar so bann zapotre ki ti reste fidel. Parmi, li ti donne zot enn commandement ki ti ena enn rapport avek enn qualité ki ti pou identifié so bann disciple. Li ti dire zot: “Mo pé donne zot enn nouveau commandement: zot bizin content zot camarade. Pareil couma mo finn content zot, zot aussi, zot bizin content zot camarade pareil. Par sa zot tou pou koné ki zot mo bann disciple, si zot ena l’amour entre zot.”—Jean 13:34, 35.

² Bann vrai chrétien bizin manifesté enn l’amour ki pou pousse-zot pou sacrifié zot-mem pou zot prochain, ek mette l’interet lezot avant zot prop l’interet. Zot pa ti mem bizin hesité pou ‘donne zot la-vie pou zot camarade.’ (Jean 15:13) Eski bann premier chrétien ti obeir sa nouveau commandement-la? Dan so livre bien populaire ki appel Apologétique, Tertullien, enn ecrivain deuxieme siecle ti rapporte seki bann dimoune dan so lepok ti dire lor bann chrétien: ‘Guetté couma zot content zot camarade, ek couma zot pré pou mort pou zot camarade.’

3, 4. (a) Kifer nou bizin faire tou pou combatte l’egoïsme? (b) Ki nou pou examiné dan sa lartik-la?

³ Nou aussi, nou bizin ‘contigne sarié fardeau sakenn nou camarade, ek coumsa, nou obeir la loi Christ.’ (Galates 6:2) Seulement, l’egoïsme, li enn grand obstacle ki kapav empeche nou obeir la loi Christ, ek ‘content Jéhovah nou Bondié avek tou nou leker, tou nou nâme, ek avek tou nou l’esprit, ek content nou prochain couma nou-mem.’ (Matthieu 22:37-39) Etant donné ki nou imparfait, nou ena tendance pou guette nou prop l’interet avant. En plus, sa tendance-la vinn pli fort avek stress ki ena dan la vie toulé-jour, l’esprit competition ki ena dan lekol ek dan travail, ek la lutte pou joinde lé-deux-boute. Sa tendance ki dimoune ena pou guette zis zot prop l’interet-la, pa pé diminué. L’apotre Paul ti annoncé ki: “Dan dernier jour . . . chaque dimoune pou content zis li tousel.”—2 Timothée 3:1, 2, Bible Bayard.

⁴ Vers la fin so ministere lor la terre, Jésus ti dire so bann disciple faire trois kitsoz ki ti pou aide zot pou combatte l’egoïsme. Ki sa trois kitsoz-la sa, ek couma nou kapav profite so bann l’instruction?

Enn bon solution

 5. Kan Jésus ti pé preche dan nord Galilée, ki li ti annonce so bann disciple, ek kifer sa ti faire zot gagne enn choque?

⁵ Jésus ti pé preche pré ar la ville Césarée de Philippe, dan nord Galilée. Sa la-ville-la ti bien trankil ek bien joli, ek li ti enn l’endroit plus pou detente ki pou koz lor l’esprit sacrifice. Pourtant, la-bas, Jésus ti commence explik so bann disciple ki “li pou bizin al Jérusalem, ek bann ancien, bann pretre ek bann scribe pou faire li passe par beaucoup souffrance, ek [zot] pou faire touye li, ek troisieme jour, li pou ressuscité.” (Matthieu 16:21) Surement, bann disciple Jésus ti bien affecté kan zot ti tann sa, parski zot ti pé atann ki zot Chef pou etablir so Royaume lor la terre!—Luc 19:11; Actes 1:6.

 6. Kifer Jésus ti reprend Pierre dan enn fason severe?

⁶ Dé-suite, Pierre “ti amenn Jésus a-part ek li ti commence reprend li, li ti dire li: ‘Pa trop severe avek to-mem, Seigneur, to pa pou konn sa qualité sort-la ditou.’ ” Ki Jésus ti reponn-li? “Li ti tourne so ledo ar Pierre, ek li ti dire li: ‘Passe derriere moi, Satan! To enn l’obstacle ki kapav faire moi tombé, parski to pena pensée Bondié, mais bann pensée dimoune.’ ” Ena vrai-mem enn grand difference entre sa deux l’attitude-la! Jésus li, li ti bien disposé pou accepté la vie sacrifice ki Bondié ti finn decidé pou li—enn la-vie ki ti pou fini dé-trois mois plitar, par so la-mort lor enn poteau. Pierre li, li ti encourage Jésus pou amenn enn la-vie trankil. Li ti dire Jésus: “Pa trop severe avek to-mem.” Surement Pierre ti ena bann bon l’intention. Pourtant, Jésus ti reprend li, parski dan sa l’heure-la, Pierre ti laisse Satan influence li. Pierre ‘pa ti ena bann pensée Bondié, mais bann pensée dimoune.’—Matthieu 16:22, 23; note.

 7. Dapré Matthieu 16:24, ki Jésus ti dire so bann disciple, zot bizin faire?

⁷ Nou tann preské mem zaffaire zordi. Souvent, le monde encourage enn kikenn pou ‘pa trop severe avek li-mem’ ou-soit pou ‘amenn enn la-vie facile.’ Mais Jésus li, li ti encourage enn l’attitude bien different. Li ti dire so bann disciple: “Si kikenn envie suive moi, li bizin renié li-mem ek prend so poteau ek contigne suive moi.” (Matthieu 16:24) Livre The New Interpreter’s Bible dire: “Sa bann parole-la pa pé invite bann dimoune pou vinn bann disciple, mais zot encourage bann ki finn deja vinn disciple Christ, pou reflechi lor seki sa vedir.” Dan sa verset-la, Jésus mentionne trois kitsoz ki bann croyant bizin faire. Anou examine zot, enn par enn.

 8. Expliké ki sa vedir renié nou-mem.

⁸ Premierement, nou bizin renié nou-mem. Mot grec ki servi pou ‘renié,’ montré enn volonté pou rejette bann desir egoïste ou-soit bann l’avantage personnel. Kan nou renié nou-mem, nou pa zis renonce ar certain plaisir de temps en temps; mais sa pa vedir aussi ki nou bizin prive nou net, ou-soit amenn enn la-vie ki pou rann nou malade. Kan la Bible dire ki ‘nou la-vie nepli pou nou,’ sa vedir ki nou accepté pou donne Jéhovah nou la-vie ek tou seki faire partie dan nou la-vie. (1 Corinthiens 6:19, 20) Dan place ki nou guette zis nou prop l’interet, nou faire service Bondié passe avant tou dan nou la-vie. Kan nou renié nou-mem, nou bien decidé pou faire volonté Bondié, mem si a cause nou l’imperfection, nou pa envie faire li. Nou montré ki nou finn consacré tou nou la-vie pou faire volonté Bondié, kan nou voué-nou ar Li ek kan nou prend bapteme. Lerla, nou faire tou pou ki pendant tou nou la-vie, nou vive en accord avek promesse ki nou finn faire.

 9. (a) Kan Jésus ti lor la terre, ki enn poteau ti representé? (b) Dan ki fason eski nou prend nou poteau?

⁹ Deuxieme kitsoz ki nou bizin faire, c’est prend nou poteau. Dan premier siecle, enn poteau ti represente souffrance, la honte ek la mort. En general, ti touye zis bann criminel lor enn poteau, ou-soit, apré ki ti fini touye zot, ti apendan zot lekor lor enn poteau. Kan Jésus ti servi sa expression-la, li ti montré ki enn chrétien bizin pré pou accepté persecution ek mem la mort, parski li pa faire partie dan le monde. (Jean 15:18-20) Bann principe ki nou suive en tant ki chrétien faire nou different avek bann dimoune dan le monde, alors li possible ki le monde ‘koz en mal lor nou.’ (1 Pierre 4:4) Sa kapav arrivé dan lekol, dan travail, ou-soit mem dan la famille. (Luc 9:23) Mais seulement, nou disposé pou enduré kan le monde meprise nou, parski nou nepli vive pou nou-mem. Jésus ti dire: “Heureux zot été kan dimoune koz en mal lor zot, persecute zot ek koz menti pou dire tou sorte qualité mauvais kitsoz lor zot, a cause moi. Zot bizin content ek saute dan la joie, parski zot ena enn grand recompense dan le ciel.” (Matthieu 5:11, 12) Oui, seki pli important pou nou c’est gagne faveur Bondié.

10. Ki nou bizin faire si nou envie contigne suive Jésus?

¹⁰ Troisiemement, Jésus Christ ti dire ki nou bizin contigne suive li. Dapré enn dictionnaire biblik, ‘suive’ vedir ‘accompagné,’ ou-soit “enn kikenn ki al dan mem direction.” (An Expository Dictionary of New Testament Words, par W. E. Vine) Nou lire dan 1 Jean 2:6: “Enn kikenn ki dire ki li en union avek [Bondié], li obligé li aussi, contigne marche pareil couma [Christ] finn marché.” Couma Jésus ti marché? Jésus ti ena l’amour pou so Papa ek pou so bann disciple, a cause sa, li pa ti egoïste. L’apotre Paul ti ecrire: “Christ pa ti faire li-mem plaisir.” (Romains 15:3) Mem kan li ti fatigué ou-soit kan li ti faim, Jésus ti mette l’interet lezot avant so prop l’interet. (Marc 6:31-34) Jésus ti faire aussi bann grand zeffort pou preche Royaume Bondié ek pou enseigné. Eski nou pa bizin imite li nou aussi, ek montré ki nou zélé kan nou rempli nou mission pou ‘faire bann disciple parmi bann dimoune tou nation, ek kan nou enseigne zot pou suive tou bann kitsoz ki Jésus finn dire’? (Matthieu 28:19, 20) Dan tousala, Christ finn laisse enn l’exemple pou nou, ek nou bizin “suive bien so bann trace.”—1 Pierre 2:21.

11. Kifer li important ki nou renié nou-mem, ki nou prend nou poteau, ek ki nou contigne suive Jésus Christ?

¹¹ Li bien important ki nou renié nou-mem, ki nou prend nou poteau, ek ki nou contigne suive Jésus, nou Model. Si nou faire sa, nou finn trouve enn bon solution pou combatte l’egoïsme, enn defaut ki empeche nou manifesté l’amour sincere. En plus, Jésus ti dire: “Kikenn ki envie sauve so la-vie, pou perdi li, mais kikenn ki perdi so la-vie a cause moi, pou trouve li. Parski, ki profit enn dimoune pou ena si li gagne le monde entier, mais ki li paye sa ar so la-vie? Ou-soit ki kitsoz enn dimoune pou donné en echange so la-vie?”—Matthieu 16:25, 26.

Nou pa kapav servi deux maitre

12, 13. (a) Ki sa jeune chef ki ti vinn guette Jésus-la, ti envie koné? (b) Ki conseil Jésus ti donne li, ek kifer?

¹² Plusieurs mois apré ki Jésus ti dire so bann disciple ki zot bizin renié zot-mem, enn jeune chef, bien riche ti vinn guette Jésus ek ti dire li: “Enseignant, ki bon kitsoz mo bizin faire pou gagne la vie eternel?” Jésus ti dire li “contigne suive bann la-loi Bondié” ek li ti cite certain sa bann la-loi-la. Jeune chef-la ti dire: “Mo finn faire tousala.” Li ti parette bien sincere ek li ti finn faire tou so possible pou obeir bann commandement ki ti ena dan la-Loi. Alors li ti demande Jésus: “Ki mo bizin faire encore?” Lerla, Jésus ti propose li enn kitsoz special, li ti dire li: “Si to’lé vinn parfait, [“complet,” New American Standard Bible] al vann to bann di-bien ek donne bann pauvre, ek to pou gagne enn tresor dan le ciel, apré sa, vini, suive moi.”—Matthieu 19:16-21.

¹³ Dapré Jésus, pou ki sa missié-la kapav servi Jéhovah avek tou so leker, li ti pou bizin debarrasse enn kitsoz ki ti pé prend pli grand place dan so la-vie—so richesse. Enn vrai disciple Christ pa kapav servi deux maitre. Li pa “kapav esclave Bondié ek la Richesse toulé-deux.” (Matthieu 6:24) Li bizin ena seki la Bible appel “enn lizié simple”, setadir, fixé tou so l’attention lor bann kitsoz spirituel. (Matthieu 6:22) Kan enn dimoune debarrasse so bann di-bien pou donne bann pauvre, li pé faire enn grand sacrifice. Jésus ti offert sa jeune chef-la privilege extraordinaire pou ramasse enn tresor dan le ciel, enn tresor ki ti pou donne li la vie eternel, ek ki ti pou permette li finalement regne avek Jésus dan le ciel. Mais sa missié-la pa ti pré pou renié li-mem. La Bible dire: “Li finn allé, bien triste, parski li ti ena beaucoup di-bien.” (Matthieu 19:22) Seulement, ena lezot disciple Jésus ki finn reagir enn fason different.

14. Ki quatre pecheur ti faire kan Jésus ti invite zot pou suive li?

¹⁴ Environ deux an avant sa, Jésus ti faire mem l’invitation avek quatre pecheur ki ti appel Pierre, André, Jacques ek Jean. Sa jour-la, deux parmi zot ti pé lapeche ek deux lezot-la ti pé repare zot filet. Jésus ti dire zot: “Suive moi ek mo pou faire zot lapeche bann dimoune.” Finalement, toulé-quatre ti quitte business la-peche ki zot famille ti ena, ek ti suive Jésus pou lé-reste zot la-vie.—Matthieu 4:18-22.

15. Dan nou lepok, ki sacrifice enn Témoin finn faire pou suive Jésus?

¹⁵ Zordi, beaucoup chrétien finn imite l’exemple sa quatre pecheur-la, plutot ki sa jeune chef riche-la. Zot finn sacrifié la richesse ek bann grand possibilité dan le monde pou zot kapav servi Jéhovah. Par exemple, Débora raconté: “Kan mo ti ena 22 an, mo ti bizin prend enn grand decision. Sa ti faire six mois depuis ki mo ti pé etudié la Bible, ek mo ti envie voué mo la-vie pou servi Jéhovah, mais mo famille ti bien opposé ar sa decision-la. Zot ti bann multi-millionnaire, ek zot ti pensé ki, si mo vinn enn Témoin de Jéhovah, sa ti pou amenn la honte lor la famille. Zot ti donne moi 24 heure pou choisir, soit enn la-vie bien riche, ou-soit la verité. Zot ti dire ki si mo pa coupe tou contact avek bann Témoin, zot pa pou donne moi mo part l’heritage. Jéhovah finn aide moi pou prend enn bon decision ek Li finn donne moi la force pou reste ferme. Mo finn passe 42 an dan service a plein-temps ek mo pa regretté. Mo finn tourne mo ledo ar enn la-vie egoïste, ki mette plaisir en premier, ek sa finn evite moi vive mem qualité la-vie ki bann membre mo famille, enn la-vie ki pena sens ek kot pena okenn satisfaction. Ensam avek mo mari, mo finn aide plus ki cent dimoune pou konn la verité. Sa bann zenfant spirituel-la, zot ena plus valeur pou moi ki n’importe ki richesse materiel.” Ena plusieurs million lezot Témoins ki ena sa-mem sentiment-la. Eski ou aussi pareil?

16. Couma nou kapav montré ki nou nepli vive pou nou-mem?

¹⁶ Sa desir pou nepli vive pou zot-mem, finn pousse plusieurs millier Témoins de Jéhovah pou faire service pionnier, setadir preche la bonne nouvelle a plein temps. Ena certain ki zot situation pa permette zot pou faire pionnier, ki kan-mem ena l’esprit pionnier ek participe dan predication tant ki zot kapav. Bann parent aussi manifesté mem l’esprit kan zot sacrifié beaucoup lé-temps, ek aussi zot l’interet personnel, pou donne zot zenfant enn l’education spirituel. Nou tou, nou kapav montré dan different fason, ki Royaume Bondié occupe premier place dan nou la-vie.—Matthieu 6:33.

L’amour kisannla ki oblige nou?

17. Ki pousse nou pou faire sacrifice?

¹⁷ Li pa facile pou manifesté enn l’amour ki pousse nou pou faire sacrifice. Mais kifer nou senti-nou obligé pou ena sa l’amour-la? Paul ti ecrire: “L’amour ki Christ ena, oblige nou, parski nou finn realisé ki enn sel zom finn mort pou nou tou . . . Ek li finn mort pou nou tou, pou ki bann ki vive, nepli vive pou zot-mem, mais pou sa kikenn ki finn mort pou zot-la, ek ki finn relevé.” (2 Corinthiens 5:14, 15) Oui, c’est l’amour ki Christ finn ena pou nou, ki oblige nou pou arrete vive pou nou-mem. Sa donne nou vrai-mem enn grand motivation! Parski Christ finn mort pou nou, eski nou pa senti-nou obligé pou vive pou li? Kan nou reflechi bien, c’est parski nou reconnaissant envers l’amour ki Bondié ek Jésus Christ finn ena pou nou, ki sa finn oblige nou pou voué nou la-vie pou servi Bondié ek pou vinn bann disciple Christ.—Jean 3:16; 1 Jean 4:10, 11.

18. Kifer li vaut la peine ki nou amenn enn la-vie sacrifice?

¹⁸ Eski sa vaut la peine ki nou nepli vive pou nou-mem? Kan sa jeune chef riche-la ti rejette l’invitation Jésus ek ti allé, Pierre ti demande Jésus: “Guetté! Nou finn quitte tou ek nou finn suive toi; ki nou pou gagné, nou?” (Matthieu 19:27) Pierre ek lezot zapotre ti vrai-mem renié zot-mem. Ki recompense zot ti pou gagné? D’abord, Jésus ti koz lor privilege ki zot ti pou ena pou regne avek li dan le ciel. (Matthieu 19:28) En mem temps, Jésus ti koz lor bann benediction ki sakenn parmi so bann disciple ti pou gagné. Li ti dire zot: “Tou seki finn quitte lakaz, ou frere, ou soeur, ou mama, ou papa, ou zenfant, ou terrain, a cause moi, ek a cause la bonne nouvelle, pou gagne cent fois plus, zordi dan nou lepok . . . ek dan le monde ki pé vini, la vie eternel.” (Marc 10:29, 30) Nou gagne beaucoup plus ki seki nou finn sacrifié. Nou bann papa, mama, frere, soeur ek zenfant spirituel, eski zot pena beaucoup plus valeur ki tou seki nou finn sacrifié a cause Royaume Bondié? Kisannla ki finn konn plus bonheur dan so la-vie—Pierre ou-soit sa jeune chef riche-la?

19. (a) Lor ki kitsoz vrai bonheur depann? (b) Ki nou pou examiné dan prochain lartik?

¹⁹ Par so parole ek par so bann action, Jésus finn montré ki nou pou vive heureux kan nou donné, ek kan nou servi lezot, ek pa kan nou amenn enn la-vie egoïste. (Matthieu 20:28; Actes 20:35) Kan nou arrete vive pou nou-mem, mais kan nou contigne suive Christ, nou gagne enn grand satisfaction dan nou la-vie asterla, ek dan l’avenir nou ena l’espoir pou vive pou touletan. Bien-sur, kan nou renié nou-mem, Jéhovah vinn nou Proprietaire. Lerla, nou vinn bann esclave Bondié. Mais ki bienfait nou gagné kan nou vinn bann esclave coumsa? Couma sa influence bann decision ki nou prend dan nou la-vie? Prochain lartik pou reponn sa bann question-la.

Eski ou rappel?

• Kifer nou bizin combatte l’egoïsme?

• Ki sa vedir, renié nou-mem, prend nou poteau, ek contigne suive Jésus?

• Ki pousse nou pou nepli vive pou nou-mem?

• Kifer li vaut la peine pou amenn enn la-vie sacrifice?

[Zimage, page 9]

“Pa trop severe avek to-mem, Seigneur”

[Zimage, page 11]

L’amour pousse bann Témoins de Jéhovah pou preche la bonne nouvelle avek zèle