Sertin zom ki sorti dan Les pe vini. Se bann astrolog, setadir bann zom ki etidie pozision bann zetwal. Zot pretann ki gras-a bann zetwal, zot kapav explik bann dimounn seki pou arive dan zot lavi. (Izai 47:13) Pandan ki zot ti kot zot dan Les, zot inn trouv enn “zetwal” ek zot inn swiv li plizir santenn kilomet ziska Zerizalem, me pa Betleem.

Kan bann astrolog-la ariv laba, zot demande: “Kot lerwa bann Zwif ki finn fek ne?” “Nou finn trouv so zetwal leve dan les e nou finn vini pou ador [“prostern devan,” NW] li.”​—Matie 2:1, 2.

Kisannla ou panse inn servi sa “zetwal”-la pou gid bann astrolog? Rapel ki zetwal-la pa’nn amenn zot direk kot Zezi dan Betleem. Me plito, li’nn gid zot Zerizalem, kot zot inn zwenn Erod, ki ti anvi touy Zezi. Ek Erod ti pou reisi fer sa si Bondie pa ti anpes bann astrolog al dir Erod kotsa Zezi ti ete. Alor, li kler ki se Satan, lennmi Bondie, ki’nn servi sa zetwal-la parski li ti anvi touy Zezi.