“To Bizin Kontan Jéhovah To Bondie”

 1. Kifer lamour ki ti ena ant Bondie ek so Garson ti grandi?

GARSON Jéhovah, Jésus Christ, ti dir: “Mo kontan mo Papa.” (Jean 14:31) Jésus ti dir osi: “Papa-la ena lafeksion pou so Garson.” (Jean 5:20) Sa pa etonn nou. Apre tou, pandan plizir milyon lane, avan ki li vinn lor later Jésus ti “zouvriye kalifie” Bondie. (Prov. 8:30) Amezir ki Jéhovah ek Jésus ti travay ansam, Jésus ti aprann boukou lor bann kalite so Papa ek li ti ena enn kantite rezon pou kontan Li. An realite, lefe ki zot ti bien pros, sa ti fer zot devlop enn pli gran lamour pou zot kamarad.

 2. (a) Ki savedir kontan enn dimounn? (b) Ki bann kestion nou pou examine?

² Kan nou kontan enn dimounn, nou ena enn gran lafeksion pou li. David, enn ekrivin Psaume, ti sante: “Mo ena lafeksion pou twa, A Jéhovah, mo lafors.” (Ps. 18:1) Se enn santiman koumsa ki nou bizin ena pou Bondie, parski Li ena lafeksion pou nou. Si nou obeir Jéhovah, Li pou montre ki Li kontan nou. (Lir Deutéronome 7:12, 13.) Me, eski vremem nou kapav kontan Bondie, alor ki nou pa kapav trouv Li? Ki sa vedir kontan Jéhovah? Kifer nou bizin kontan Li? Ek kouma nou kapav montre ki nou kontan Bondie?

3, 4. Kifer nou kapav kontan Jéhovah?

³ “Bondie Li enn Lespri”; alor, nou pa kapav trouv Li. (Jean 4:24) Selman, nou kapav kontan Jéhovah, ek bann Lekritir demann nou pou montre sa lamour-la. Par exanp, Moïse ti dir bann Izraelit: “To bizin kontan Jéhovah to Bondie avek tou to leker, tou to nam ek tou to lafors.”​—Deut. 6:5.

⁴ Kifer nou kapav ena enn gran lamour pou Bondie? Parski Li’nn kree nou avek bann bezwin spiritiel ek Li’nn met dan nou kapasite pou montre lamour. Kan nou satisfer nou bann bezwin spiritiel kouma bizin, nou lamour pou Bondie grandi ek sa fer nou ere. Jésus ti dir: “Ere bann ki rekonet ki zot pov lor plan spiritiel, parski Rwayom ki dan lesiel pou zot.” (Mat. 5:3) Konsernan seki sertin apel dezir natirel ki dimounn ena pou ador Bondie, liv Man Does Not Stand Alone, par A. C. Morrison, dir: “Sa bizin fer nou ranpli ar lakrint, letonnman, ek ladmirasion kan nou trouve kouma bann dimounn partou dan lemond pe rod, ek krwar dan, sa Kikenn ki pli siperyer la.”

 5. Kouma nou kone ki nou pa pe perdi nou letan kan nou pe rod Bondie?

⁵ Eski nou pe perdi nou letan kan nou pe rod Bondie? Non, parski Li anvi ki nou trouv Li. Lapot Paul ti montre sa dan enn fason kler kan li ti rann temwaniaz ar enn group dimounn dan l’Aréopage, devan Parthénon​—enn tanp ki ti’nn dedie pou Athéna, dees ki ti protez Athènes. Esey mazine ou laba kan Paul pe koz lor “Bondie ki finn fer lemond ek tou bann kitsoz ki ena ladan” ek apre sa Paul explike ki Bondie “pa res dan bann tanp ki’nn fer ar lame bann dimounn.” Paul dir osi ki Bondie, “avek enn sel zom Li’nn fer tou bann pep, pou zot res partou lor later, ek Li’nn etabli bann letan fixe ek bann limit fixe kot bann dimounn pou reste, pou ki bannla rod Bondie, ek si vremem zot tat-tate pou rod Li ek arive trouv Li, parski an realite, Li pa lwin ar sakenn parmi nou.” (Actes 17:24-27) Wi, bann dimounn kapav trouv Bondie. Plis ki 7,500,000 Temwin Jéhovah ‘finn arive trouv Li’​—ek zot vremem kontan Li.

 6. Ki komannman Jésus ti dekrir kouma “pli gran ek premie komannman”?

⁶ Nou lamour pou Jéhovah bizin sorti dan nou leker. Jésus ti montre sa dan enn fason bien kler kan enn Farizien ti demann li: “Ansegnan, ki pli gran komannman dan Lalwa?” Jésus ti reponn: “‘To bizin kontan Jéhovah to Bondie avek tou to leker ek avek tou to nam ek avek tou to lespri.’ Samem pli gran ek premie komannman.”​—Mat. 22:​34-38.

 7. Ki savedir kontan Bondie avek (a) ‘tou nou leker’? (b) ‘tou nou nam’? (c) ‘tou nou lespri’?

⁷ Ki Jésus ti pe rod dir kan li ti dir ki nou bizin kontan Bondie avek ‘tou nou leker’? Li ti pe rod dir ki nou bizin kontan Jéhovah avek nou leker sinbolik dan enn fason konple, setadir sa bizin ena enn lefe lor nou bann dezir, nou bann lemosion ek nou bann santiman. Nou bizin osi kontan Li avek ‘tou nou nam,’ setadir tou nou lavi. Anplis, nou bizin kontan Bondie avek ‘tou nou lespri,’ setadir tou nou lintelizans. Sa montre ki nou bizin kontan Jéhovah dan enn fason konple, san okenn rezerv.

 8. Kan nou kontan Jéhovah dan enn fason konple, ki sa pous nou pou fer?

⁸ Si nou kontan Bondie avek tou nou leker, tou nou nam, ek tou nou lespri, nou pou etidie so Parol avek serye, nou pou fer seki Li demann nou avek tou nou leker, ek nou pou pres bon nouvel lor Rwayom Bondie avek zel. (Mat. 24:14; Rom. 12:1, 2) Kan nou vremem kontan Jéhovah, sa fer nou vinn pli pros avek Li. (Jacq. 4:8) Li vre ki nou pa kapav sit tou bann rezon kifer nou bizin kontan Bondie. Me anou examinn de-trwa sa bann rezon-la.

 9. Kifer ou kontan Jéhovah?

⁹ Jéhovah inn kree nou ek donn nou seki nou bizin pou viv. Paul ti dir: “Se par Li ki nou ena lavi, nou bouze ek nou existe.” (Actes 17:28) Jéhovah inn donn nou later, enn landrwa extraordiner pou reste. (Ps. 115:16) Li osi donn nou manze ek lezot kitsoz ki nou bizin pou kontign viv. Akoz sa, Paul ti kapav dir bann dimounn ki ti pe ador bann zidol dan Lystres, ki “Bondie vivan . . . prouve ki Li existe par bann bon kitsoz ki Li’nn fer, Li donn zot lapli ek bann sezon kot ena labondans; Li’nn donn zot manze an-abondans ek Li’nn ranpli zot leker avek lazwa.” (Actes 14:15-17) Eski se pa enn rezon pou kontan nou Gran Kreater ki donn nou seki nou bizin avek amour?​—Eccl. 12:1.

10. Kouma nou bizin konsider dispozision ki Jéhovah inn pran pou eliminn pese ek lamor?

¹⁰ Bondie inn pran dispozision pou eliminn pese ek lamor ki nou’nn erite ar Adam. (Rom. 5:12) An realite, “Bondie prouv so prop lamour anver nou, kan Christ finn mor pou nou, alor ki nou ti ankor bann dimounn ki fer pese.” (Rom. 5:8) Pena dout ki nou leker ranpli ar lamour pou Jéhovah parski Li’nn pran dispozision pou nou gagn pardon nou bann pese si nou repanti ek si nou ena lafwa dan sakrifis Jésus.​—Jean 3:16.

11, 12. Ki bann lesperans Jéhovah inn donn nou?

¹¹ Jéhovah ‘donn nou lesperans pou ranpli nou avek lazwa ek lape.’ (Rom. 15:13) Lesperans ki Bondie donn nou ed nou pou andire kan nou lafwa pas par bann test. Bann Kretien ki ena lesperans pou al viv dan lesiel ek ki ‘res fidel ziska lamor pou gagn kouronn lavi.’ (Rév. 2:10) Bann Kretien ki ena lesperans pou viv lor later ek ki res fidel pou gagn bann benediksion pou touletan lor later, dan Paradi ki Bondie inn promet. (Luc 23:43) Ki lefe nou lesperans ena lor nou? Eski sa pa ranpli nou ar lazwa ek lape, ek fer nou ena lamour pou sa Kikenn ki donn nou “tou zoli don ek tou kado parfe [la]”?​—Jacq. 1:17.

¹² Bondie inn donn nou lesperans rezireksion ki rekonfort nou leker. (Actes 24:15) Pena dout ki sa fer nou bien tris kan enn kikenn ki nou bien kontan mor, me parski nou ena lesperans ki pou ena rezireksion, ‘nou pa sagrin parey kouma bann lezot dimounn ki pena okenn lesperans.’ (1 Thess. 4:13) Parski Li kontan nou, Jéhovah pe atann avek inpasians ler kot Li pou resisit bann mor, sirtou bann dimounn fidel, parmi ena Job. (Job 14:15) Mazinn lazwa ki nou pou ena kan nou pou akeyir bann dimounn ki pou resisite lor later. Nou leker vremem ranpli ar lamour pou nou Papa ki dan lesiel ki’nn donn nou sa lesperans extraordiner la!

13. Ki prev nou ena ki Bondie vremem interese ar nou?

¹³ Jéhovah vremem interese ar nou. (Lir Psaume 34:6, 18, 19; 1 Pierre 5:6, 7.) Nou kone ki nou Bondie ki kontan nou touletan la pou ed bann ki fidel anver Li, alor nou santi nou an sekirite parski nou form parti dan “troupo ki dan [so] patiraz.” (Ps. 79:13) Anplis, nou pou trouv bien lamour ki Bondie ena pou nou par bann kitsoz ki Li pou fer par mwayin So Rwayom Mesianik. Kan Lerwa ki Li’nn swazir, Jésus Christ, pou debaras later ar violans, bann dimounn dominer, ek bann move kitsoz, lerla bann dimounn obeisan pou profit lape ek pou viv dan bien. (Ps. 72:7, 12-14, 16) Eski ou pa dakor ki sa bann benediksion-la donn nou bann bon rezon pou kontan Bondie avek tou nou leker, tou nou nam, tou nou lafors, ek tou nou lespri?​—Luc 10:27.

14. Ki gran privilez Bondie inn donn nou?

¹⁴ Jéhovah inn donn nou so faver kan Li’nn donn nou gran privilez pou servi Li kouma So bann Temwin. (Is. 43:10-12) Nou kontan Bondie parski Li’nn donn nou lokazion pou soutenir so souverennte ek pou donn bann dimounn ki pe viv dan sa lemond trouble la enn vre lesperans. Anplis, nou kapav koz avek lafwa ek konviksion parski nou pe anons bann bon nouvel ki baze lor Parol vre Bondie ek So bann promes touletan realize. (Lir Josué 21:45; 23:14.) Biensir, nou kapav kontign ankor lalis bann benediksion ek bann rezon pou kontan Jéhovah. Me kouma nou kapav montre ki nou kontan Li?

15. Kouma sa kapav ed nou kan nou etidie ek aplik Parol Bondie?

¹⁵ Etidie avek serye ek aplik Parol Bondie. Kan nou fer sa, nou montre ki nou kontan Jéhovah ek ki nou vremem anvi ki so parol azir kouma enn ‘lalimier pou nou semin.’ (Ps. 119:105) Si nou pe konn bann dekourazman, nou kapav gagn rekonfor gras-a bann verse ki montre nou ki Bondie kontan nou. Par exanp Psaume 51:17 dir: “Enn leker ki’nn kase ek ki dan lapenn, A Bondie, to pa pou rezet sa.” Ek Psaume 94:18, 19 dir: “To lamour fidel, A Jéhovah, ti kontign soutenir mwa. Kan ti ena boukou panse ki ti pe trakas mwa, to ti rekonfort mwa ek to ti soulaz mwa.” Jéhovah montre so mizerikord anver bann ki soufer, ek Jésus osi parey ena pitie pou bann dimounn. (Is. 49:13; Mat. 15:32) Kan nou etidie Labib, sa kapav fer nou trouve kouma Jéhovah interese ar nou ek sa pous nou an retour pou ena enn lamour pli profon pou Li.

16. Kan nou priye Bondie regilierman, kouma sa ogmant nou lamour pou Li?

¹⁶ Priye Bondie regilierman. Nou bann lapriyer fer nou vinn pli pros avek sa Kikenn “ki ekout lapriyer [la].” (Ps. 65:2) Kan nou trouve ki Bondie pe reponn nou bann lapriyer, nou lamour pou Li vinn pli for. Par exanp, kitfwa nou finn trouve ki Li pa les nou gagn enn tantasion ki nou pa kapav siporte. (1 Cor. 10:13) Si kan nou ena traka, nou tourn nou ver Jéhovah atraver bann siplikasion, kitfwa nou pou gagn “lape Bondie,” enn lape ki zis Bondie kapav donn nou. (Phil. 4:6, 7) Parfwa, nou kapav dir enn lapriyer dan nou leker​—parey kouma Nehémia ti fer​—ek rann nou kont ki Bondie pe reponn nou lapriyer. (Neh. 2:1-6) Kan nou “persevere dan lapriyer” ek trouve ki Jéhovah pe reponn sa bann lapriyer-la, nou lamour pou Li grandi ek nou ena plis konfians ki Li pou ed nou andire kan nou lafwa pas par lezot test.​—Rom. 12:12.

17. Si nou kontan Bondie, kouma nou pou konsider nou bann renion?

¹⁷ Pran labitid pou asiste bann renion ek bann lasanble. (Héb. 10:24, 25) Bann Izraelit ti rasanble pou ekout ek aprann bann kitsoz lor Jéhovah pou ki zot kapav ena lakrint pou Li ek obeir so Lalwa. (Deut. 31:12) Li pa difisil pou nou soumet ar volonte Bondie si nou vremem kontan Li. (Lir 1 Jean 5:3.) Alor, fode pa nou les nanye fer nou konsider nou bann renion kouma enn kitsoz ki pa inportan. Wi, nou pa’le les nanye fer nou perdi lamour ki nou ti ena o-koumansman pou Jéhovah.​—Rév. 2:4.

18. Ki nou lamour pou Bondie pous nou pou fer?

¹⁸ Pres “laverite lor bonn nouvel” avek zel. (Gal. 2:5) Nou lamour pou Bondie pous nou pou koz lor Rwayom Mesianik ki pou So Garson ki Li bien kontan. Sa Garson-la pou “al lager pou laverite” pandan Har-Maguédôn. (Ps. 45:4; Rév. 16:14, 16) Se vremem enn gran lazwa pou ed bann dimounn aprann lor lamour Bondie ek nouvo lemond ki Li’nn promet!​—Mat. 28:19, 20.

19. Kifer nou bizin ena rekonesans pou bann ansien ki Jéhovah inn etabli?

¹⁹ Montre ki nou ena rekonesans pou bann ansien ki Jéhovah inn etabli. (Actes 20:28) Jéhovah touletan anvi seki pli bon pou nou, se akoz sa ki Li’nn etabli bann ansien. Bann ansien zot “kouma enn plas kot kapav al kasiet kont divan, enn refiz kont siklonn, parey kouma bann ti larivier dan enn pei kot pena delo, parey kouma lonbraz enn gro ros lor enn later bien sek.” (Is. 32:1, 2) Nou kontan kan nou ena enn plas pou kasiet kont bann divan bien violan ouswa kont bann siklonn! Kan soley pe tap for lor nou, nou kontan kan nou pe kapav kasiet dan lonbraz enn gro ros. Sa bann konparezon-la ed nou pou trouve ki bann ansien donn nou led spiritiel ek lankourazman ki nou bizin. Kan nou obeir bann ki pe pran latet dan kongregasion, nou montre ki nou ena rekonesans pou sa ‘bann zom ki kouma bann don la’ ek nou montre ki nou ena lamour pou Bondie ek pou Jésus, Sef kongregasion.​—Éph. 4:8; 5:23; Héb. 13:17.

20. Si ou kontan Bondie, ki lefe Jacques 1:22-25 pou ena lor ou?

²⁰ Si ou kontan Jéhovah, ou pou vinn enn ‘dimounn ki met laparol an pratik, ek pa enn dimounn ki zis tande.’ (Lir Jacques 1:22-25.) Enn “dimounn ki met laparol an pratik” ena lafwa ek sa pous li pou pres avek zel ek pou partisip dan bann renion. Parski ou vremem kontan Jéhovah, ou pou obeir so “lalwa parfe,” setadir ou pou fer tou seki Li demann ou.​—Ps. 19:7-11.

21. Ar ki kitsoz kapav konpar bann lapriyer ki ou fer avek tou ou leker?

²¹ Ou lamour pou Jéhovah pou pous ou pou priye Li souvan avek tou ou leker. Lalwa Mozaik ti demann bann pret pou bril lansan sak zour, ek li kler ki David ti pe konpar so lapriyer ar sa lansan-la kan li ti sante: “Fer ki mo lapriyer li prepare parey kouma lansan devan twa [Jéhovah], ek mo lame ki leve lao zot kouma bann ofrand lagrin ki fer dan tanto.” (Ps. 141:2; Ex. 30:7, 8) Alor, si ou fer bann lapriyer inb, bann siplikasion sinser, bann louanz ek bann remersiman avek tou ou leker, sa bann lapriyer-la pou kouma bann lansan ki ena enn bon loder, setadir Bondie pou aksepte zot.​—Rév. 5:8.

22. Ki nou pou examine dan prosin lartik?

²² Jésus ti dir ki nou bizin kontan Bondie ek osi nou prosin. (Mat. 22:37-39) Prosin lartik pou montre kouma kan nou kontan Jéhovah ek so bann prinsip, sa pou ed nou azir bien avek lezot dimounn ek manifeste lamour anver zot.