Enn l’Héritage Sûr

“SI OU gagne enn lettre de la part enn kikenn ki dire ou ki ou finn gagne enn héritage, faire bien attention. Ou kapav tombe dans piège enn grand escroc.”

Sa c’est l’avertissement ki Le Service des postes des États Unis finn metté lor so site Internet. Kifer? C’est parski par milliers dimoune finn gagne enn lettre ki dire, ‘Enn parmi ou bann proche parent finn mort ek li’nn quitte enn héritage pou ou.’ Résultat: Beaucoup dimoune finn envoye sa escroc-la apépré Rs800.00 pou gagne enn rapport ki explique zot kot sa l’héritage-la trouvé ek ki zot bizin faire pou zot gagne li. Mais zot finn bien déçu. Tou sa bann dimoune-la finn gagne même rapport, donc personne pa ti éna presque okenn chance pou gagne enn l’héritage.

Bann escroc servi sa bann qualités plans-la pou exploite désir naturel ki tou dimoune éna pou gagne enn l’héritage. Mais, la-Bible koz en bien lor bann dimoune ki laisse enn l’héritage. Li dire: “Enn dimoune ki bon pou laisse enn l’héritage pou so bann zenfants.” (Proverbes 13:22) D’ailleurs, dans so Sermon lor Montagne, Jésus Christ li-même ti faire enn déclaration ki bien connu ek ki bien apprécié par beaucoup dimoune. Li ti dire: “Bann humbles zot béni: parski zot pou hérite la-terre.”—Matthieu 5:5, King James Version.

Bann paroles ki Jésus ti prononcé rappelle nous séki le Roi David ti écrire plusieurs siècle de cela: “Bann humbles pou hérite la terre; ek zot pou konn enn grand la-joie parski pou éna la-paix en abondance.”—Psaume 37:11, KJ.

“Hérite la terre”—c’est enn grand l’espoir, pa vrai? Mais eski nous kapav garanti ki c’est pa encore enn plan enn escroc pou embête nous? Nous kapav éna sa l’assurance-la. La terre li enn parmi bann kitsoz ki Jéhovah finn crée. Étant donné ki Jéhovah Li-même Créateur ek Propriétaire la terre, Li éna droit pou donne la terre couma enn héritage à n’importe kisannla Li envie. À travers le Roi David, Jéhovah ti faire enn promesse prophétique à Jésus Christ, so Garçon bien-aimé. Li ti dire li: “Demann moi, ek mo pou donne toi bann nations en héritage, ek la terre entier couma to propriété.” (Psaume 2:8) À cause sa-même, l’apôtre Paul ti dire ki c’est Jésus li-même “ki [Bondié] finn établi couma héritier lor tou kitsoz.” (Hébreux 1:2) Donc, nous kapav éna l’assurance ki, kan Jésus ti dire ki bann dimoune humble “pou hérite la terre,” li ti dire sa sans l’intention pou trompe bann dimoune, ek li éna l’autorité ki bizin pou réalise so promesse.—Matthieu 28:18.

Donc, question capital ki nous kapav demann nous c’est: Couma sa promesse-la pou réalisé? Zordi, partout kot nous guetté nous trouvé ki c’est coumadire bann dimoune violent ek orgueilleux ki pé gagne pli beaucoup succès. Zot pé prend séki zot envie. Mais, ki l’héritage pou resté pou bann dimoune humble? En plus, à cause pollution, la terre rempli avec bann problèmes bien grave. Bann dimoune avide pé exploite bann ressources la terre sans ki zot réfléchi lor conséquences ki sa kapav éna dans l’avenir. Enn la-terre ki vaut la peine hérité, eski li pou existé enn jour? Nous invite ou pou lire prochain l’article, coumsa ou pou kapav gagne réponse à sa bann question-la ek lézot encore.

“Bann Humbles Pou Hérite la Terre”​—Couma?

“SÛREMENT ou konn bien bann paroles encourageant ki Jésus ti prononcé kan li ti dire ki ‘bann humbles pou hérite la terre.’ Mais, kan ou trouve tou séki bann dimoune pé faire ar zot camarade ek ar la terre, eski jamais ou finn demann ou, ki pou resté lor sa la-terre-la ki vaut la peine pou bann dimoune hérité?”—Matthieu 5:5; Psaume 37:11; King James Version.

Myriam, enn Témoin Jéhovah, ti servi sa question-la pou commence enn conversation Biblique. Monsieur avec ki li ti pé kozé finn réponn ki si Jésus finn faire sa promesse-la, vrai-même enn jour la terre pou vinn enn l’endroit ki vaut la peine hérité ek non pa enn l’endroit dévasté kot dimoune népli kapav vive.

C’est enn réponse bien positif, pa vrai? Mais eski nous éna bann raison pou pense coumsa? Oui, parski la Bible donne nous bann raisons solide pou croire ki sa promesse-la pou réalisé. À vrai dire, réalisation sa promesse-la éna enn rapport direct avec projet ki Bondié éna pou bann dimoune ek pou la terre. Ek nous sûr ki, kan Li envie faire enn kitsoz, Li pou réalise li. (Isaïe 55:11) Donc, ki projet Bondié ti éna au commencement pou la terre, ek couma sa projet-la pou réalisé?

Projet Éternel ki Bondié Éna pou la Terre

Jéhovah ti crée la terre pou enn raison bien précis. “Sa-même ki Jéhovah, Créateur le ciel finn dire, Li-même vrai Bondié ki finn forme la terre ek finn faire li, Li-même ki finn établi li solidement, ki pa finn crée li pou nanyin, mais ki finn forme la terre pou ki dimoune reste lor là. ‘Moi mo Jéhovah ek péna personne apart moi.’” (Isaïe 45:18) Donc, Jéhovah finn crée la terre pou dimoune resté. En plus, d’après projet Bondié, zot ti pou reste lor la pou touletan. “Li finn bien fixé bann fondation la terre, jamais, oui jamais li pa pou bougé.”—Psaume 104:5; 119:90.

L’ordre ki Bondié ti donne premier couple humains, montré clairement ki projet Li ti éna pou la terre. Guette séki Jéhovah ti dire Adam ek Ève: “Gagne beaucoup zenfants, rempli la terre ek cultive li, ek exerce enn contrôle lor bann poissons dans la mer, lor bann créatures ki envolé dans le ciel, ek tou créatures vivant ki bougé lor la terre.” (Genèse 1:28) C’est lor sa la-terre ki Bondié ti confié Adam ek Ève-la, ki zot ek zot bann descendants ti pou vive pou touletan. Plusieurs siècles plitar, enn psalmiste ti écrire: “En séki concerne le ciel, li pou Jéhovah, mais la terre, Li finn donne sa bann dimoune.”—Psaume 115:16.

Ki kitsoz, Adam ek Ève ek zot bann descendants ti bizin faire pou réalise sa projet extraordinaire-la? Sakenn parmi zot ti bizin reconnaite ki Bondié Jéhovah, Celui ki’nn crée zot ek ki’nn donne zot lavi, Li zot Souverain. Ek zot ti bizin disposé pou obéir Li. D’ailleurs, Jéhovah ti clair lor sa question-la, kan Li ti donne Adam sa l’ordre-la: “To kapav mange [fruit] tou bann pié dans jardin quantité to envie. Mais en séki concerne pié connaissance bon ek mauvais, to bizin pa mange [so fruit], parski jour to pou mange sa, pena baré sa jour la-même to pou mort.” (Genèse 2:16, 17) Pou ki Adam ek Ève contigne vive dans jardin d’Éden, zot ti bizin obéir sa l’ordre bien simple ek bien clair-la. Kan zot ti pou faire sa, zot ti pou montré zot reconnaissance pou tou séki zot Papa ti faire pou zot.

Mais, Adam ek Ève finn désobéir Bondié volontairement. Zot finn rejette l’ordre ki Jéhovah ti donne zot. En fait, kan zot inn faire sa, zot finn tourne zot lédo ar sa kikenn ki’nn donne zot tou séki zot ti éna-la. (Genèse 3:6) C’est coumsa ki zot, ek zot bann descendants aussi, finn perdi sa joli Paradis-la. (Romains 5:12) Mais eski sa finn empêche Bondié réalise projet ki Li ti éna kan Li ti crée la terre?

Enn Bondié Ki Pa’nn Changé

À travers so prophète Malaki, Bondié dire: “Mo-même Jéhovah, mo pa finn changé.” (Malaki 3:6) Concernant sa verset-la, Louis Fillion, enn Bibliste Français finn remarqué ki sa déclaration-la bien associé avec réalisation bann promesses Bondié. Fillion écrire: “Jéhovah ti kapav détruire complètement so peuple rebelle. Mais, parski Li enn Bondié ki jamais pa change so bann promesses, n’importe ki arrivé, Li pa pou manqué pou réalise séki Li’nn promette dans le passé.” Jamais Bondié pa pou blié promesse ki Li faire ar enn dimoune, enn nation ou-soit ar l’humanité en entier. Mais kan l’heure pou arrivé Li pou réalise li. La Bible dire: “Li rappelle so l’alliance pou touletan. Li rappelle l’ordre ki Li’nn donné pou mille génération.”—Psaume 105:8.

Mais couma nous kapav sûr ki Jéhovah pa finn change projet ki Li ti éna au commencement pou la terre? C’est parski partout dans so Parole inspiré, la Bible, nous lire ki Li’nn promette pou donne la terre à bann dimoune ki obéissant. (Psaume 25:13; 37:9, 22, 29, 34) En plus, la Bible dire ki bann dimoune ki Jéhovah inn béni, pou vive en sécurité. Sakenn pou assize “en bas so pié raisin ek so pié figue,” ek ‘personne pa pou faire zot tremblé.’ (Mika 4:4; Ézékiel 34:28) Bann dimoune ki Jéhovah finn choisiré “pou vrai-même range bann lakaz ek zot pou reste ladan; ek zot pou vrai-même plante bann karo raisins ek zot pou mange [zot] bann fruits.” Zot pou vive en paix même avec bann zanimaux.—Isaïe 11:6-9; 65:21, 25.

La Bible donne nou enn l’autre avant goût sa promesse Bondié-la. Pendant règne le Roi Salomon, ti éna la paix ek prospérité en Israël. Kan Salomon ti régné, “Juda ek Israël ti vive en sécurité, sakenn en bas so pié raisins ek en bas so pié figue, depuis Dân ziska Béer-Shéba, pendant touletan ki Salomon ti régné.” (1 Rois 4:25) La Bible dire ki Jésus “pli grand ki Salomon.” Guette séki enn psalmiste ti dire à propos règne Jésus: “Dans so l’époque, enn juste pou germé, ek pou éna l’abondance la-paix ziska ki népli éna la lune.” Sa l’époque-la, “pou éna la grain en abondance lor la terre, ek la-haut lor bann montagnes pou éna l’abondance.”—Luc 11:31; Psaume 72:7, 16.

Nous sûr ki Jéhovah pou tenir parole. Li pou assure Li ki bann dimoune pa zis gagne enn l’héritage, mais Li pou aussi ré-faire la terre vinn joli pareil couma li ti été avant. En Révélation 21:4, Parole Bondié dire nous ki dans sa nouveau lé-monde-la, Bondié “pou essuye tou larmes dans lizié [bann dimoune], ek la mort népli pou existé. Dimoune pou népli en deuil, zot pou népli ploré, zot pou népli éna douleur.” En réalité, c’est promesse enn paradis ki Li pé faire ici!—Luc 23:43.

Couma Nous Kapav Gagne l’Héritage ki Bondié Inn Promette?

C’est grâce à enn gouvernement ki dans le ciel, enn Royaume dirigé par Jésus Christ, ki la terre pou transformé en enn paradis. (Matthieu 6:9, 10) D’abord sa Royaume-la pou “détruire tou bann ki détruire la terre.” (Révélation 11:18; Daniel 2:44) Ensuite, Jésus Christ, en tant ki “Prince de Paix,” pou réalise sa bann paroles prophétique-la: “So domination royal ek la paix jamais pou fini.” (Isaïe 9:6, 7) Kan sa Royaume-la pou régné, plusieurs millions dimoune pou gagne possibilité pou hérite la terre, parmi pou éna aussi bann ressuscité.—Jean 5:28, 29; Actes 24:15.

Kisannla ki pou digne pou gagne sa grand l’héritage-la? Guette séki Jésus ti dire: “Heureux bann dimoune doux, parski zot pou hérite la terre.” (Matthieu 5:5) Ki veut dire humble, ou-soit doux? D’après bann dictionnaire, enn dimoune “humble,” ou-soit “doux,” c’est enn dimoune ki gentil, raisonnable, ki soumette, ki tranquille, ou-soit même timide. Mais en Grec original sa mot-la éna enn pli grand signification. Guette séki nous kapav lire dans New Testament Wordbook, de William Barclay: ‘Éna la douceur dans sa mot-la, mais derrière sa douceur-la éna la force l’acier.’ Sa qualité-la aide enn dimoune pou supporte enn souffrance sans ki li garde rancune, ou-soit même sans ki li rode tire vengeance. Li kapav faire sa parski li éna enn bon relation avec Bondié, ek c’est sa relation-la ki donne li sa la-force-la.—Isaïe 12:2; Philippiens 4:13.

Enn dimoune humble, c’est enn dimoune ki montré dans tou domaine dans so la-vie ki li accepté bann principes ki Bondié finn établi. Li pa persisté pou faire kitsoz selon séki li même ou-soit selon séki lézot dire. C’est enn dimoune ki disposé pou écoute l’enseignement ki donne li ek laisse li enseigné par Jéhovah. Psalmiste David ti écrire: “[Jéhovah] pou faire bann dimoune humble marche d’après so bann décision judiciaire, ek Li pou enseigne bann ki humble, so la-loi.”—Psaume 25:9; Proverbes 3:5, 6.

Eski ou pou parmi “bann humbles,” bann ki pou hérite la terre? Si ou faire zefforts pou aprann konn Jéhovah ek so volonté à travers enn l’étude Biblique ek si ou mette en pratique séki ou pé aprann, ou aussi ou pou kapav atann pou hérite enn paradis lor la terre, ek vive dans sa paradis-la pou touletan.—Jean 17:3.