“Verifié Bien Bann Kitsoz ki Pli Important”

1, 2. Ki prophetie concernant bann dernier jour kitfois ti faire bann disciple Jésus etonné, ek kifer?

PIERRE, Jacques, Jean ek André ti enfin tousel avek zot Maitre. Seki Jésus ti dire enn tipé avant concernant destruction temple ti tracasse zot beaucoup. (Marc 13:1-4) Alors, zot ti demann li: “Dire nou: Kan eski sa bann kitsoz-la pou arrivé, ek ki signe pou montré to presence ek conclusion sa systeme-la?” (Mat. 24:1-3) Jésus ti koz lor bann evenement, ou-soit bann condition ki ti pou amenn bann grand changement dan zot la vie, ek aussi bann l’evenement ki ti pou arrivé dan bann dernier jour mauvais systeme Satan. Ti ena enn l’evenement ki surement ti faire bann disciple Jésus etonné. Apré ki Jésus ti annonce bann malheur couma par exemple la guerre, la famine, ek bann pratik ki kont la loi ki ti pou augmenté, li ti annoncé ki ti pou aussi ena enn kitsoz positif dan bann dernier jour. Li ti dire: “Sa bon nouvelle lor royaume-la pou preché partout kot dimoune resté lor la terre couma enn temoignage pou tou bann nation; ek lerla la fin pou vini.”​—Mat. 24:7-14.

² Bann disciple Jésus ti bien content pou preche la bonne nouvelle lor Royaume Bondié ensam avek li. (Luc 8:1; 9:1, 2) Surement zot ti rappel ki Jésus ti dire: “Vrai-mem, recolte-la li grand, mais bann travailleur zot tigit. Alors, suppliye Maitre recolte pou Li envoye bann travailleur dan so recolte.” (Luc 10:2) Mais couma zot ti pou preche “partout kot dimoune resté lor la terre” ek donne “enn temoignage . . . tou bann nation”? Kot-sa bann travailleur-la ti pou sorti? Si selman zot ti kapav trouvé seki ti pou arrivé dan l’avenir kan zot ti pé assizé avek Jésus sa jour-la! Pena doute ki zot ti pou etonné pou trouve realisation bann parole ki nou kapav lire zordi dan Matthieu 24:14.

 3. Couma Luc 21:34 pé realisé zordi, ek ki nou bizin demann-nou-mem?

³ Nou pé vive dan lepok kot prophetie Jésus pé realisé. Plusieurs million dimoune pé preche la bonne nouvelle lor Royaume Bondié, partout lor la terre. (Is. 60:22) Mais Jésus ti montré ki, dan dernier jour, li ti pou difficile pou certain mette le Royaume en premier dan zot la vie. Zot ti pou tellement occupé avek lezot kitsoz ki zot leker ti pou “vinn lourd.” (Lire Luc 21:34.) Zordi, nou pé trouve realisation sa bann parole-la aussi. Certain parmi bann serviteur Bondié pé laisse-zot distraire. Nou kapav trouve sa dan bann decision ki zot prend en rapport avek zot travail, bann grand l’etude, ek bann kitsoz materiel. Zot passe aussi trop beaucoup le temps dan sport ek dan bann divertissement. Ena lezot ki stressé a cause bann pression ek bann tracas ki zot gagné toulé-jour. Demann-ou-mem: ‘Moi, ki mo pé faire? Eski mo pé mette volonté Bondié en premier dan mo la vie?’

 4. (a) Ki la priere Paul ti faire pou bann Chretien dan Philippes, ek kifer? (b) Ki nou pou examiné dan sa lartik-la ek dan prochain lartik, ek ki l’objectif nou pou ena?

⁴ Bann Chretien ki ti vive dan premier siecle ti bizin faire bann grand zeffort pou garde bann kitsoz spirituel couma enn priorité dan zot la vie. L’apotre Paul ti prié pou ki bann Chretien dan Philippes “verifié bien bann kitsoz ki pli important.” (Lire Philippiens 1:9-11.) Pareil couma l’apotre Paul, la plupart Chretien ti pé “montré ki zot ena encore plus courage pou annonce parole Bondié sans okenn la peur.” (Phil. 1:12-14) Zordi aussi pareil, la plupart parmi nou pé preche Parole Bondié avek courage. Mais kan-mem, si nou examine seki l’organisation Jéhovah pé faire dan nou lepok, eski sa pa pou aide nou pou vinn plus zelé dan l’activité predication? Oui, sa pou aide nou! Dan sa lartik-la, anou reflechi lor bann disposition ki Jéhovah inn prend pou realise bann parole ki trouve dan Matthieu 24:14. Ki l’objectif so l’organisation ena, ek couma sa kapav motive nou ek nou famille? Dan sa lartik-la ek dan prochain lartik, nou pou examine seki kapav aide nou pou enduré ek pou marche ensam avek l’organisation Jéhovah.

5, 6. (a) Kifer Jéhovah inn donne bann vision lor partie invisible so l’organisation? (b) Ki Ézékiel ti trouvé dan enn vision?

⁵ Ena beaucoup kitsoz ki Jéhovah pa’nn trouve necessaire pou faire ecrire dan la Bible. Par exemple, Li pa finn donne bann detail lor fason ki nou cerveau travail ou-soit couma l’univers fonctionné, mem si sa bann renseignement-la ti pou bien interessant! Au contraire, Jéhovah finn donne nou bann renseignement ki nou bizin, pou comprend so projet ek pou vive en accord avek so volonté. (2 Tim. 3:16, 17) Li bien interessant ki la Bible donne nou enn l’idée lor partie invisible l’organisation Jéhovah! Nou bien content pou lire sa bann renseignement-la dan livre Isaïe, Ézékiel, Daniel ek dan Révélation ki Jean inn ecrire. (Is. 6:1-4; Ézék. 1:4-14, 22-24; Dan. 7:9-14; Rév. 4:1-11) C’est coumadir Jéhovah inn avance enn rideau pou permette nou trouve certain kitsoz ki pé passé dan le ciel. Kifer Jéhovah inn donne nou sa bann renseignement-la?

⁶ Jéhovah envie ki nou pa blié ki nou forme partie dan enn l’organisation universel. Ena beaucoup kitsoz ki pé passé pou soutenir projet Jéhovah, mais ki nou pa trouvé. Par exemple, Ézékiel ti trouve enn grand char dan le ciel ki represente partie invisible l’organisation Jéhovah. Sa char-la kapav avancé bien vite ek change direction enn sel coute. (Ézék. 1:15-21) Chaque fois ki so bann la roue tourné, char-la kapav al lor enn longue distance. Dan sa vision-la, Ézékiel ti kapav aussi trouve sa Kikenn ki pé conduire sa char-la. Li ti dire: “Mo ti trouve enn kitsoz ki ti pé brillé pareil couma electrum, pareil couma difé, endan, tout autour . . . sa ti pareil couma la gloire Jéhovah.” (Ézék. 1:25-28) Surement Ézékiel ti bien impressionné par sa vision-la! Li ti trouvé ki Jéhovah ena tou controle lor so l’organisation ek Li pé dirige li par so l’esprit saint. C’est vrai-mem enn l’exemple extraordinaire ki montré couma partie invisible l’organisation Jéhovah pé avancé!

 7. Couma vision ki Daniel ti gagné, donne nou confiance?

⁷ Daniel aussi ti gagne enn vision ki donne nou confiance. Li ti trouve Jéhovah, “l’Ancien bann jour” pé assizé lor enn trone ki ti coumadir bann la flamme difé. Sa trone-la ti lor bann la roue. (Dan. 7:9) Jéhovah ti envie ki Daniel trouve So l’organisation pé avancé, setadir pé travail pou faire So volonté. Daniel ti aussi trouve “enn kikenn ki ressemblé garson enn zom,” setadir Jésus, ki ti pé gagne l’autorité lor partie visible l’organisation Jéhovah. Jésus Christ pa pou regne zis pou deux-trois l’année. Au contraire, so domination li “enn domination ki pou duré pou touletan, ek ki pa pou fini ek so royaume jamais pa pou renversé.” (Dan. 7:13, 14) Sa vision-la encourage nou pou ena confiance en Jéhovah ek pou reconette seki Li pé faire. Kan Jésus ti lor la terre, li ti faire so preuve. Alors, Jéhovah inn donne li “domination, grandeur, ek enn royaume.” Jéhovah ena confiance dan so Garson. Sa vedir ki nou aussi nou kapav ena confiance dan domination Jésus.

 8. Ki l’effet bann vision ki Jéhovah ti donne Ézékiel ek Isaïe ti ena lor zot, ek ki l’effet sa bizin ena lor nou?

⁸ Ki l’effet sa bann vision lor l’organisation Jéhovah-la bizin ena lor nou? Pareil couma Ézékiel, nou aussi nou bien impressionné par seki Jéhovah pé faire. (Ézék. 1:28) Kan nou medite lor l’organisation Jéhovah, sa kapav pousse nou pou agir, pareil couma Isaïe ti faire. Kan li ti gagne l’occasion pou dire lezot seki Jéhovah pé faire, li ti saisi sa l’occasion-la sans hesité. (Lire Isaïe 6:5, 8.) Isaïe ti ena confiance ki, avek l’aide Jéhovah, li ti pou kapav reussi faire face ar n’importe ki difficulté. Li pareil aussi pou nou, seki nou finn trouvé lor partie invisible l’organisation Jéhovah, bizin impressionne nou ek pousse nou pou faire plus dan service Bondié. Sa encourage nou beaucoup pou koné ki nou forme partie dan enn l’organisation ki pé contigne avancé pou faire volonté Jéhovah!

9, 10. Kifer bizin ena enn partie visible l’organisation Jéhovah?

⁹ A travers so Garson, Jéhovah inn etabli enn partie visible so l’organisation lor la terre ki travail en accord avek sa partie invisible-la. Sa partie visible-la li necessaire pou realise travail ki mentionné dan Matthieu 24:14. Kifer? Anou examine trois raison.

¹⁰ Premierement, Jésus ti dire ki so bann disciple ti pou al preché “ziska dan region pli loin lor la terre.” (Actes 1:8) Deuxiemement, bann ki ti pou participe dan sa l’activité-la, ti pou bizin la nourriture spirituel ek l’encouragement. (Jean 21:15-17) Troisiemement, zot ti pou bizin assisté bann reunion pou adore Jéhovah ensam ek pou aprann couma pou preché. (Héb. 10:24, 25) Pou ki bann disciple Jésus accompli tousala, zot ti pou bizin bien organisé.

11. Couma nou montré ki nou soutenir bann disposition ki l’organisation Jéhovah prend?

¹¹ Couma nou kapav montré ki nou soutenir bann disposition ki l’organisation Jéhovah prend? Enn fason important c’est kan nou touletan mette nou confiance dan bann frere ki dirige l’activité predication. Jéhovah ek Jésus faire zot confiance, ek nou aussi nou bizin faire pareil. Ena beaucoup l’activité dan le monde zordi ki ti pou kapav detourne l’attention sa bann frere-la. Pourtant, lor ki kitsoz zot inn contigne fixé zot l’attention?

12, 13. Couma bann ancien rempli zot responsabilité, ek kifer sa encourage nou?

¹² Partout dan le monde, Jéhovah finn etabli bann ancien ki ena l’experience pou organise ek dirige l’activité predication dan bann pays kot zot été. Pou prend bann decision, sa bann frere-la laisse-zot dirigé par Parole Bondié, zot faire li vinn ‘enn la lampe pou zot lipié, ek enn la lumiere pou zot chemin’ ek zot prié avek tou zot leker pou gagne direction Jéhovah.​—Ps. 119:105; Mat. 7:7, 8.

¹³ Pareil couma bann ancien dan premier siecle, bann ancien ki dirige l’activité predication zordi, mette “ministere ki concerne la parole” en premier dan zot la vie. (Actes 6:4) Zot bien content kan zot trouve progré ki ena dan l’activité predication dan zot prop pays ek partout dan le monde. (Actes 21:19, 20) Zot pa etabli enn quantité regle. Au contraire, kan zot faire bann l’arrangement pou ki l’activité predication progressé, zot suive seki la Bible dire ek direction ki l’esprit saint donne zot. (Lire Actes 15:28.) Kan zot faire sa, sa bann frere responsable-la donne enn bon l’exemple tou bann membre congregation.​—Éph. 4:11, 12.

14, 15. (a) Ki bann disposition inn prend pou soutenir l’activité predication partout lor la terre? (b) Ki ou pensé lor seki ou pé faire pou soutenir l’activité predication?

¹⁴ Beaucoup frere travail dur toulé-jour pou prepare la nourriture spirituel ki pou servi dan bann publication, bann reunion, ek bann l’assemblée. Beaucoup parmi nou pa trouve zot faire sa travail-la. Plusieurs millier volontaire travail bien dur pou traduire la nourriture spirituel dan apepré 600 langue pou ki pli beaucoup dimoune kapav aprann “bann kitsoz extraordinaire lor Bondié” dan zot prop langue. (Actes 2:7-11) Bann jeune frere ek soeur travail lor bann la presse bien rapide ki produire bann livre. Apré sa, distribué sa bann livre-la dan bann congregation, mem bann congregation ki bien loin lor la terre.

¹⁵ Ena plusieurs disposition ki permette nou pou garde nou l’attention fixé lor predication la bonne nouvelle avek nou congregation. Par exemple, plusieurs millier volontaire travail dan construction bann la Salle du Royaume ek bann la Salle l’Assemblée. Ena beaucoup ki aide bann ki’nn affecté par bann catastrophe naturel ou-soit ki bien bizin l’aide pou faire face ar enn probleme medical. Ena lezot ki organise bann l’assemblée ek ki enseigné dan bann lekol theocratik. Ena encore lezot travail ki bann volontaire faire ki nou pa trouvé. Ki l’objectif tou sa travail-la? C’est pou aide nou pou preche la bonne nouvelle, pou progressé dan la verité, ek pou aide encore plus dimoune pou vinn bann adorateur Jéhovah. Eski partie visible l’organisation Jéhovah finn reste concentré lor bann kitsoz ki pli important? Oui bien sur!

16. Ki sujet interessant ou kapav etudié dan ou l’etude personnel ou-soit dan ou l’adoration en famille?

¹⁶ Eski de temps en temps, nou prend le temps pou reflechi lor bann travail ki l’organisation Jéhovah faire? Dan zot l’adoration en famille ou-soit zot l’etude personnel, certain finn choisir pou faire bann recherche lor l’organisation Jéhovah ek pou medite lor la. Li bien interessant pou etudié bann vision ki Jéhovah ti donne Isaïe, Ézékiel, Daniel ek Jean. Livre Les Témoins de Jéhovah : Prédicateurs du Royaume de Dieu ek lezot publication ou-soit DVD ki disponible dan ou langue, enseigne beaucoup kitsoz interessant lor l’organisation Bondié.

17, 18. (a) Couma sa lartik-la finn aide ou? (b) Ki bann question ou kapav demann-ou-mem?

¹⁷ Li bon ki nou medite lor seki Jéhovah pé faire a travers so l’organisation. Ensam avek sa l’organisation extraordinaire-la, anou bien decidé pou garde nou l’esprit fixé lor bann kitsoz ki pli important. Si nou faire sa, nou pou fortifié-nou-mem pou ena mem determination ki Paul, ki ti ecrire: “Parski nou finn gagne sa ministere-la grace a misericorde ki Bondié inn faire nou, nou pa baisse lé-bras.” (2 Cor. 4:1) Paul ti aussi donne sa l’encouragement-la so bann frere: “Fodé pa nou renoncé pou faire seki bien, parski kan ler arrivé, nou pou recolté si nou pa laisse la fatigue decourage nou.”​—Gal. 6:9.

¹⁸ Eski ena bann changement ki nou bizin faire personnellement ou-soit en tant ki famille pou nou mette bann kitsoz ki pli important en premier dan nou la vie toulé-jour? Eski nou kapav simplifié nou la vie ou-soit diminué nou bann divertissement pou ki nou passe plus le temps dan predication? Dan prochain lartik, nou pou examine cinq kitsoz ki pou aide nou pou marche ensam avek l’organisation Jéhovah.