“Sa bon nouvelle lor royaume-la . . . ”​—MATTHIEU 24:14.

DAN so Sermon celebre ki li ti faire lor montagne, Jésus ti donne enn la priere modele, ek enn bann kitsoz ki li ti enseigne so bann disciple pou demann Bondié c’est: “Ki [so] royaume vini.” Enn quantité dimoune finn aprann sa la priere-la par coeur ek finn repete sa souvent. Dapré enn encyclopedie, c’est ‘la priere principal ki tou chretien servi dan zot l’adoration.’ Pourtant, beaucoup dimoune ki recite sa la priere-la pa koné ki été Royaume Bondié ou-soit ki li pou faire kan li pou vini.​—Matthieu 6:9, 10.

Sa pa etonne nou. Bann chef religieux la chretienté donne different l’explication concernant sa Royaume-la. En plus, sa bann l’explication-la zot compliké ek zot mette bann dimoune dan confusion. Enn parmi zot ecrire ki Royaume Bondié c’est “enn kitsoz ki surnaturel, . . . [enn kitsoz] endan nou-mem ki relié-nou avek Bondié vivant . . . , enn l’experience avek Bondié kot bann zom ek bann femme gagne delivrance.” Enn lot decrire l’evangile lor Royaume couma “l’enseignement concernant l’Eglise.” Ek journal Catéchisme de l’Église catholique dire: “Royaume Bondié [c’est] la justice ek la paix ek la joie dan l’Esprit Saint.”

Ou pou trouve enn explication beaucoup pli clair lor page 2 sa magazine-la. Nou lire: “Bientot Royaume Bondié, ki enn vrai gouvernement dan le ciel, pou tire tou mechanceté ek pou transforme la terre en enn paradis.” Anou guetté couma la Bible soutenir sa l’explication-la.

Bann ki pou dirige la terre dan l’avenir

Enn royaume c’est enn gouvernement ki dirigé par enn le roi. Le Roi Royaume Bondié c’est Jésus Christ ki’nn ressuscité. Dan enn vision ki prophete Daniel ti gagné, li ti trouve Jésus vinn le roi dan le ciel. Li ti ecrire: “Mo ti pé contigne guette bann vision ki mo ti gagné pendant la nuit, ek guetté! Enn kikenn ki ressemblé garson enn zom [Jésus] ti pé vini avek bann nuage dan le ciel. Li ti reussi rente devant l’Ancien bann jour [Jéhovah], ek ti amenn li pré devant Li. Ek ti donne li domination, grandeur, ek enn royaume, pou ki bann peuple, bann nation ek bann langue, zot tou servi li. So domination pou enn domination ki pou duré pou touletan, ek ki pa pou fini ek so royaume jamais pa pou renversé.”​—Daniel 7:13, 14.

Livre Daniel, ki trouve dan la Bible, montré aussi ki Bondié pou etabli sa Royaume-la dan enn fason solide, ki sa Royaume-la pou detruire tou bann gouvernement humain ek ki jamais li pa pou renversé. Chapitre 2 decrire enn rêve ki le roi Babylone ti’nn gagné par inspiration. Dan sa rêve-la, li ti trouve enn grand statue ki ti represente plusieurs puissance mondial ki ti pou vini enn apré lot. Prophete Daniel ti interprete sa rêve-la. Li ti ecrire: “Dan periode final bann jour . . . Bondié ki dan le ciel pou etabli enn royaume ki jamais pa pou detruire. Ek sa royaume-la pa pou vinn pou okenn lot peuple. Li pou crase tou bann lezot royaume ek li pou fini zot, ek li-mem li pou regné pou touletan.”​—Daniel 2:28, 44.

Le Roi Royaume Bondié li pa dirige tousel. Pendant so ministere lor la terre, Jésus ti donne so bann zapotre fidele l’assurance ki zot, ek lezot encore, pou ressuscité pou al vive dan le ciel ek pou assize lor bann trone. (Luc 22:28-30) Li pa ti pé koz lor bann trone litteral, parski couma Jésus ti dire, Royaume Bondié ti pou trouve dan le ciel. La Bible dire ki sa bann le roi ki pou dirigé ensam avek Jésus-la pou sorti “dan tou tribu, ek langue ek peuple ek nation.” Zot pou “enn royaume ek bann pretre pou nou Bondié, ek zot pou regne couma bann le roi ki dirige la terre.”​—Révélation 5:9, 10.

Kifer nouvelle lor Royaume li enn bon nouvelle

Remarké ki Christ Jésus inn gagne pouvoir pou dirigé lor tou “bann peuple, bann nation ek bann langue” ek ki bann ki associé avek li pou “regne couma bann le roi ki dirige la terre.” Alors, kisannla ki pou bann sujet sa Royaume-la? C’est bann ki accepté bon nouvelle ki pé preché zordi. Parmi sa bann sujet-la pou ena aussi bann ki pou ressuscité pou vive lor la terre, ek ki pou ena l’esperance pou vive pou touletan.

La Bible donne enn joli description lor bann benediction ki bann dimoune pou profité kan sa Royaume-la pou dirigé. Anou guette deux-trois sa bann benediction-la:

“Li faire bann la guerre arreté ziska dan boute la terre. L’arc-la, Li casse li, lance-la aussi Li casse li boute-boute; Li brule bann char la guerre dan difé.”​—Psaume 46:9.

“Oui, zot pou range bann lakaz ek zot pou reste ladan; ek zot pou plante bann karo raisin ek zot pou mange zot bann fruit. Zot pa pou rangé pou ki enn lot resté; zot pa pou planté pou ki enn lot mangé.”​—Isaïe 65:21, 22.

“[Bondié] pou souye tou larme dan zot lizié, ek la mort nepli pou existé. Dimoune nepli pou en deuil, zot nepli pou ploré ek nepli pou ena douleur. Bann kitsoz avant finn disparette.”​—Révélation 21:3, 4.

“Sa lepok-la lizié bann aveugle pou ouvert, ek zoreille bann sourde pou debouché. Dan sa lepok-la seki boiteux pou sauté couma enn cerf, ek la langue enn kikenn ki pa kapav kozé, pou criyé avek la joie.”​—Isaïe 35:5, 6.

“L’heure pé vini kot tou seki dan bann tombe souvenir pou tann . . . la voix [Jésus] ek pou sorti. Bann dimoune ki finn faire bann bon kitsoz pou ressuscité pou gagne la vie.”​—Jean 5:28, 29.

“Bann ki ena l’humilité pou herite la terre, ek vrai-mem zot pou trouve enn grand la joie dan l’abondance la paix.”​—Psaume 37:11.

Pena doute ki sa li enn bon nouvelle! En plus, bann prophetie la Bible ki’nn realisé faire nou koné ki pa reste beaucoup le temps avant ki Royaume Bondié etabli so domination ki juste lor la terre entier.

“Sa bon nouvelle[-la] . . . ”​—MATTHIEU 24:14.

BANN chretien bizin preche “sa bon nouvelle lor royaume-la.” Zot faire sa kan zot koz lor la avek lezot, setadir zot expliké ki Royaume Bondié c’est enn gouvernement mondial ki pou vini ek ki pou dirige la terre avek justice. Mais, la Bible servi l’expression “bon nouvelle” dan lezot fason encore. Par exemple, li koz concernant “bon nouvelle lor delivrance” (Psaume 96:2); “bon nouvelle Bondié” (Romains 15:16); ek “bon nouvelle concernant Jésus Christ.”​—Marc 1:1.

Dan enn fason simple nou kapav dire ki sa bon nouvelle-la implik tou bann verité lor ki Jésus ti kozé ek ki so bann disciple ti ecrire. Avant ki li ti monte dan le ciel, Jésus ti dire so bann disciple: “Alors, allé ek faire bann disciple parmi bann dimoune dan tou bann nation, baptise zot au nom du Père, du Fils ek l’esprit saint, enseigne zot pou suive tou bann commandement ki mo’nn donne zot.” (Matthieu 28:19, 20) Alors, travail bann vrai chretien c’est pa zis pou informe bann dimoune lor Royaume Bondié. Zot bizin aussi faire zeffort pou faire bann disciple.

Ki bann l’Eglise pé faire dan sa domaine-la? Bann ki pa comprend ki été Royaume Bondié​—ek ena beaucoup​—pa kapav donne lezot enn l’explication exact lor la. Alors, zot faire bann sermon ki pa pou mette bann dimoune mal a l’aise, ki koz lor pardon bann peché ek la foi en Jésus. A travers bann travail social ou-soit kan zot ranz bann l’hopital, bann lekol ek bann lakaz pou bann pauvre, zot essaye attire bann dimoune dan zot l’Eglise. C’est vrai ki sa bann zeffort-la permette zot gagne beaucoup membre dan zot l’Eglise, mais sa pa produire bann vrai chretien ki faire bann zeffort sincere pou vive en accord avek l’enseignement Jésus.

Enn specialiste dan religion ecrire: “La plupart bibliste ek chef religieux dan la chretienté d’accord ki zot supposé faire bann nouveau disciple pou Jésus ek enseigne zot pou faire tou bann kitsoz ki Jésus ti dire. . . . Apré tou, bann l’instruction ki Jésus inn donné lor sa sujet-la, zot bien clair. Mais, nou pa faire seki li ti dire. Nou pa essaye faire li avek serieux. Ek li parette ki nou pa koné couma pou faire sa.”

C’est aussi seki enn sondage, ki ti faire avek bann catholique dan l’Amérique, finn montré. Quatre-vingt quinze pour cent bann dimoune ki ti participe dan sa sondage-la ti d’accord ki preche la bonne nouvelle c’est enn kitsoz ki zot croyance religieux demann zot faire. Pourtant, la plupart ti pensé ki meilleur fason pou faire sa, c’est pa pou koz lor la, mais pou vive dan enn fason kot zot enn l’exemple pou lezot. Enn dimoune ki ti participe dan sa sondage-la ti dire: “Preche l’evangile c’est pa zis kozé, kozé, kozé. Nou-mem nou bizin vinn la Bonne Nouvelle.” Magazine U.S. Catholic, ki ti faire sa sondage-la, dire ki beaucoup ti hesité pou koz lor zot la foi a cause “mauvais zimage ki l’Eglise ti donné en rapport avek bann scandale ki ti arrivé pa trop longtemps concernant bann abus sexuel ek bann l’enseignement l’Eglise ki ti crée bann probleme.”

Dan enn lot pays, enn l’eveque dan religion methodiste ti dire avek regret ki so bann l’Eglise ti divisé ek ti dan confusion, ki zot pa ti ena courage pou accompli zot mission, ek ki zot ti ena preské bann mem principe ki la societé en general. Lor enn ton inpé agacé, li ti demandé: “Kisannla ki pé annonce l’evangile lor Royaume dan enn fason responsable?”

Sa l’eveque-la pa ti donne okenn reponse pou so question. Mais ena enn reponse. Ou pou trouve sa dan prochain lartik.

[L’encadré page 6]

Sa bon nouvelle-la koz lor Royaume Bondié ek aussi lor delivrance par la foi en Jésus Christ