“Dire Nou: Kan Eski Sa Bann Kitsoz-La Pou Arrivé?”

 1. Pareil couma bann zapotre, ki nou bien envie koné?

MINISTERE Jésus lor later ti pré pou fini ek so bann disciple ti bien envie koné seki lavenir ti reservé pou zot. Alors, zis deux-trois jour avant so lamor, quatre parmi so bann zapotre ti demann li: “Kan eski sa bann kitsoz-la pou arrivé, ek ki signe pou montré to presence ek conclusion sa systeme-la?” (Mat. 24:3; Marc 13:3) Jésus ti reponn zot a travers enn prophetie ki trouve dan Matthieu chapitre 24 ek 25 ek ki ti pou realisé lor enn longue periode le temps. Dan sa prophetie-la, Jésus ti annoncé ki pou ena beaucoup l’evenement bien important. So bann parole ena enn grand l’importance pou nou parski nou aussi nou bien interessé pou koné seki lavenir reserve nou.

 2. (a) Pendant bann l’année, ki kitsoz nou finn rod comprend pli bien? (b) Ki trois question nou pou examiné?

² Pendant longtemps, bann serviteur Jéhovah finn etudié prophetie Jésus concernant bann dernier jour ek zot finn prié Jéhovah pou comprend sa. Zot ti rod comprend pli bien lepok kan bann parole Jésus ti pou realisé. Pou trouvé couma nou finn arrivé comprend pli bien seki Jésus ti dire, anou examine trois question: Kan eski ‘la grande tribulation’ commencé? Kan eski Jésus juge “bann mouton” ek “bann cabri”? Kan Jésus ‘arrivé,’ ou-soit vini?​—Mat. 24:21; 25:31-33.

 3. Dan le passé, ki nou ti comprend concernant la grande tribulation?

³ Pendant plusieurs l’année, nou ti croire ki la grande tribulation ti commencé en 1914 avek Premier Guerre Mondial ek Jéhovah ti faire “sa bann jour-la vinn pli courte” en 1918 kan la guerre ti fini, pou ki bann Chretien oint gagne l’occasion preche la bonne nouvelle ar tou nation. (Mat. 24:21, 22) Apré ki pou fini sa travail predication-la, le monde Satan ti pou detruire. Alors, nou ti croire ki la grande tribulation ti pou en trois l’etape: Ti pou ena enn commencement (1914-1918), sa tribulation-la ti pou arreté pendant enn moment (a partir 1918 ek apré), ek li ti pou terminé avek Har-Maguédôn.

 4. Ki finn permette nou comprend pli bien prophetie Jésus concernant bann dernier jour?

⁴ Mais, kan nou finn examine plis en profondeur prophetie Jésus, nou finn comprend ki enn partie prophetie Jésus concernant bann dernier jour ena deux realisation. (Mat. 24:4-22) Ti ena enn premier realisation en Judée dan premier siecle Nou Lepok, ek ti pou ena enn lot realisation dan le monde entier, dan nou lepok. Sa connaissance-la finn amenn ankor plusieurs eclaircissement.a

 5. (a) Ki periode difisil ti commencé en 1914? (b) Sa lepok kot ena malheur-la corresponn ar ki periode dan premier siecle Nou Lepok?

⁵ Nou ti comprend aussi ki premier partie la grande tribulation pa ti commencé en 1914. Kifer? Parski bann prophetie la Bible faire nou koné ki la grande tribulation pa pou commence avek enn la guerre parmi bann nation, mais par enn l’attak lor fausse religion. Alors, bann l’evenement ki finn commencé en 1914, pa ti commencement la grande tribulation, mais “commencement bann douleur.” (Mat. 24:8) Sa “bann douleur[-la]” corresponn avek seki ti arrivé dan Jérusalem ek dan Judée depuis l’an 33 Nou Lepok ziska l’an 66 Nou Lepok.

 6. Couma nou pou koné ki la grande tribulation inn commencé?

⁶ Couma nou pou koné ki la grande tribulation inn commencé? Jésus ti annoncé: “Kan zot trouve sa kitsoz degoutant ki faire bann degat-la, lor ki prophete Daniel ti kozé, deboute dan enn place ki saint, (sa dimoune ki pé lire-la bizin servi so discernement,) alors bann ki dan Judée bizin commence sauvé ek al vers bann montagne.” (Mat. 24:15, 16) Dan premier realisation sa prophetie-la, l’expression “deboute dan enn place ki saint” ti arrivé en l’an 66 Nou Lepok, kan l’armée Romain (“sa kitsoz degoutant[-la]”) ti attak Jérusalem ek so temple (enn place ki saint pou bann Juif). Dan deuxieme ek pli grand realisation, sa pou arrivé kan Nations Unies (“kitsoz degoutant” dan nou lepok) pou attak la Chretienté (ki saint pou bann ki pretann zot Chretien) ek pou attak le reste Babylone la Grande. Révélation 17:16-18 koz lor sa mem l’attak-la. C’est avek sa l’evenement-la ki la grande tribulation pou commencé.

 7. (a) Couma ‘bann dimoune ti gagne lavi sauve’ dan premier siecle? (b) Ki nou kapav attann pou arrivé dan lavenir?

⁷ Jésus ti aussi annoncé: “Pou faire sa bann jour-la vinn pli courte.” Premier realisation sa prophetie-la ti arrivé en l’an 66 Nou Lepok, kan l’armée Romain ti faire so l’attak “vinn pli courte.” Lerla, bann Chretien oint dan Jérusalem ek dan Judée ti sauvé, pou ‘sap zot lavi.’ (Lire Matthieu 24:22; Mal. 3:17) Alors, ki nou kapav attann pou arrivé pendant la grande tribulation ki pé vini? Nou kapav attann ki Jéhovah faire l’attak ki Nations Unies pou faire kont fausse religion “vinn pli courte,” pou ki vrai religion pa detruire ensam avek fausse religion. Nou kapav sur ki peuple Bondié pou gagne lavi sauve.

 8. (a) Ki bann l’evenement pou ena apré premier partie la grande tribulation? (b) Kan eski kitfois dernier membre 144,000 pou al dan le ciel? (Guette note.)

⁸ Ki pou arrivé apré premier partie la grande tribulation? Seki Jésus ti dire montré ki pou ena enn periode le temps ki pou duré ziska commencement Har-Maguédôn. Ki bann l’evenement pou arrivé dan sa periode-la? Nou gagne reponse dan Ézékiel 38:14-16 ek dan Matthieu 24:29-31. (Lire.)b Apré sa, Har-Maguédôn, point pli important la grande tribulation pou arrivé, pareil couma seki ti arrivé kan Jérusalem ti detruire en l’an 70 Nou Lepok. (Mal. 4:1) Avek la guerre Har-Maguédôn a lafin, sa grande tribulation ki pé vini-la pou enn l’evenement unique​—enn l’evenement ki “jamais pa finn ena depuis commencement le monde.” (Mat. 24:21) Apré Har-Maguédôn, Regne Mille An Christ pou commencé.

 9. Ki l’effet prophetie Jésus lor la grande tribulation ena lor bann serviteur Jéhovah?

⁹ Sa prophetie concernant la grande tribulation-la fortifié nou. Kifer? Parski sa donne nou l’assurance ki n’importe ki l’epreuve nou kapav gagné, bann serviteur Jéhovah, en tant ki groupe, pou traverse la grande tribulation. (Rév. 7:9, 14) Nou surtout content, parski kan pou ena Har-Maguédôn, Jéhovah pou justifié so souveraineté ek pou sanctifié so nom ki saint.​—Ps. 83:18; Ézék. 38:23.

10. Dan le passé, ki nou ti croire concernant lepok ki pou ena jugement bann mouton ek bann cabri?

¹⁰ Asterla, anou guette realisation enn lot partie prophetie Jésus​—parabole concernant jugement bann mouton ek bann cabri. (Mat. 25:31-46) Avant, nou ti pensé ki c’est a partir 1914 ek pendant tou lepok bann dernier jour, ki Jésus juge bann dimoune couma bann mouton ou-soit bann cabri. Nou ti croire ki bann ki rejette message lor Royaume Bondié ek ki mor avant commencement la grande tribulation, pou fini jugé couma bann cabri ek zot pa pou ena okenn l’espoir pou ressuscité.

11. Kifer jugement pou koné si bann dimoune zot bann mouton ou-soit bann cabri, pa’nn commencé en 1914?

¹¹ En 1995, La Tour de Garde ti ré-examine Matthieu 25:31, ki dire: “Kan Fils de l’homme pou arrive dan so la gloire, ek tou bann ange avek li, lerla li pou assize lor so trone ki rempli ar la gloire.” Ti expliké ki Jésus ti vinn le Roi dan Royaume Bondié en 1914 mais li pa ti “assize lor so trone ki rempli ar la gloire” en tant ki Juge lor “tou bann nation.” (Mat. 25:32; compare avek Daniel 7:13.) Mais, parabole bann mouton ek bann cabri decrire Jésus surtout couma enn Juge. (Lire Matthieu 25:31-34, 41, 46.) Jésus pa ti ankor agir en tant ki Juge lor tou bann nation en 1914, alors, sa jugement pou decidé ki bann dimoune ki comparé ar mouton ou-soit cabri-la, pa ti’nn kapav commencé sa l’année-la.c Mais alors, kan eski Jésus pou faire sa jugement-la?

12. (a) Kan eski premier fois Jésus pou agir couma Juge lor tou bann nation? (b) Ki bann l’evenement ki mentionné dan Matthieu 24:30, 31 ek Matthieu 25:31-33, 46?

¹² Prophetie Jésus concernant bann dernier jour montré ki Jésus pou agir premier fois couma Juge lor tou bann nation apré destruction fausse religion. Couma nou ti mentionné dan paragraphe 8, certain l’evenement ki pou arrivé pendant sa periode-la trouve dan Matthieu 24:30, 31. Kan ou examine sa bann verset-la, ou pou remarké ki Jésus annonce bann l’evenement ki pareil ar seki li mentionné dan parabole bann mouton ek bann cabri. Par exemple, Fils de l’homme vini avek la gloire ek avek bann ange; tou bann tribu ek bann nation rassemblé; bann ki’nn jugé couma bann mouton “leve zot la tête” parski zot pou gagne “lavi eternel.”d Bann ki’nn jugé couma bann cabri “tape zot l’estomac ar chagrin,” zot realisé ki c’est “destruction eternel” ki pé attann zot.​—Mat. 25:31-33, 46.

13. (a) Kan eski Jésus pou jugé kisannla ki couma bann mouton ou-soit bann cabri? (b) Ki l’effet sa connaissance-la ena lor fason ki nou considere nou ministere?

¹³ Alors, ki conclusion nou kapav tiré? Jésus pou jugé kisannla parmi bann dimoune dan tou nation zot bann mouton ou-soit bann cabri kan li pou vini pendant la grande tribulation. Apré sa, kan pou ena Har-Maguédôn, bann ki couma bann cabri pou ‘detruire’ pou touletan. Ki l’effet sa connaissance-la ena lor fason ki nou considere nou ministere? Sa aide nou pou trouvé ki quantité nou predication important. Avant ki la grande tribulation commencé, bann dimoune ankor ena le temps pou change zot l’attitude ek commence marche dan chemin ki serré ki “amenn vers lavi.” (Mat. 7:13, 14) Li vrai, zordi bann dimoune kapav manifesté enn l’attitude ki montré ki zot couma bann mouton ou-soit bann cabri. Selman, nou bizin rappel ki c’est pendant la grande tribulation ki pou ena jugement final pou koné kisannla ki bann mouton ou-soit bann cabri. Alors, nou ena bann bon raison pou contigne donne pli beaucoup dimoune possible, l’occasion pou ecouté ek pou accepté message lor Royaume Bondié.

14, 15. Cite quatre verset ki faire reference ar l’arrivée Jésus Christ en tant ki Juge.

¹⁴ Kan nou examine prophetie Jésus plis en detail, eski sa montré ki nou bizin change fason ki nou comprend lepok kan lezot l’evenement important pou realisé? Prophetie Jésus donne enn reponse. Anou guetté couma.

¹⁵ Dan enn partie so prophetie ki trouve dan Matthieu 24:29–25:46, Jésus mette l’accent surtout lor seki pou arrivé pendant bann dernier jour ek pendant la grande tribulation. Dan sa bann verset-la, Jésus faire reference huit fois ar so l’arrivée ou-soit kan li pou “vini.”e Concernant la grande tribulation, li dire: “Zot pou trouve Fils de l’homme pé vinn lor bann nuage.” “Zot pa koné ki jour zot Seigneur pé vini.” “Dan enn ler ki zot pa attann, ki Fils de l’homme pé vini.” Ek dan so parabole lor bann mouton ek bann cabri, Jésus dire: “Fils de l’homme pou arrive dan so la gloire.” (Mat. 24:30, 42, 44; 25:31) Sa quatre reference-la pou realisé dan lavenir kan Jésus Christ pou vini en tant ki Juge. Kot-sa dan prophetie Jésus eski nou trouve quatre lezot reference?

16. Ki lezot verset koz lor l’arrivée Jésus?

¹⁶ Concernant l’esclave fidele et avisé, Jésus dire: “Heureux sa esclave-la si, kan so maitre arrivé, [“inn vini,” note] li trouve li pé faire sa.” Dan parabole bann vierge, Jésus dire: “Pendant ki zot ti pé al acheté de l’huile, nouveau marié ti arrivé [“ti vini,” Kingdom Interlinear].” Dan parabole bann talent, Jésus dire: “Apré enn bon boute le temps, maitre sa bann esclave-la ti vini.” Dan mem parabole, maitre-la dire: “Kan mo arrivé [inn vini, Int] mo ti pou gagne seki pou moi.” (Mat. 24:46; 25:10, 19, 27) Dan ki lepok eski sa quatre l’arrivée Jésus-la corresponn?

17. Dan le passé, ki nou ti dire concernant l’arrivée Jésus ki mentionné dan Matthieu 24:46?

¹⁷ Dan le passé, nou ti dire dan nou bann publication ki sa quatre dernier reference-la applik ar l’arrivée Jésus en 1918. Enn l’exemple, guette seki Jésus ti dire concernant “l’esclave fidele et avisé.” (Lire Matthieu 24:45-47.) Nou ti comprend ki, kan verset 46 dire ki le “maitre arrivé,” sa ti ena enn rapport avek lepok kan Jésus ti vinn inspecté condition spirituel bann Chretien oint en 1918 ek ki le Maitre ti etabli sa esclave-la lor tou so bann di-bien en 1919. (Mal. 3:1) Mais, kan nou examine prophetie Jésus plis en profondeur, nou trouvé ki nou bizin change fason ki nou comprend dan ki lepok certain l’aspect sa prophetie-la realisé. Kifer?

18. Kan nou examine prophetie Jésus en entier, ki conclusion nou tiré concernant so l’arrivée?

¹⁸ Dan bann verset ki trouve avant Matthieu 24:46, mot “vini” a chaque fois faire reference ar lepok kan Jésus pou vini pou prononce ek faire so jugement pendant la grande tribulation. (Mat. 24:30, 42, 44) Ek aussi, couma nou ti examiné dan paragraphe 12, kan Matthieu 25:31 koz lor ‘Fils de l’homme ki pou arrivé,’ sa faire reference ar sa mem lepok jugement ki pou ena dan lavenir-la. Alors, li raisonnable pou dire ki c’est aussi dan lavenir, pendant la grande tribulation, ki Jésus pou arrivé ek pou etabli l’esclave fidele lor tou so bann di-bien couma mentionné dan Matthieu 24:46, 47.f Oui, kan nou examine prophetie Jésus en entier, li clair ki sa huit reference ki en rapport avek so l’arrivée-la, corresponn ar enn lepok jugement ki pou ena dan lavenir pendant la grande tribulation.

19. Ki bann nouveau l’explication nou finn examiné, ek ki bann question nou pou examiné dan lezot lartik?

¹⁹ En resumé, ki nou finn aprann? Au commencement sa lartik-la, nou ti pose trois question concernant kan certain l’evenement ti pou arrivé. D’abord, nou finn trouvé ki la grande tribulation pa finn commencé en 1914, mais pou commencé kan Nations Unies pou attak Babylone la Grande. Apré, nou finn guetté kifer jugement Jésus en rapport avek bann mouton ek bann cabri pa finn commencé en 1914, mais pou arrivé pendant la grande tribulation. Finalement, nou finn examiné kifer Jésus pa ti vini pou etabli l’esclave fidele lor tou so bann di-bien en 1919, mais li pou faire sa pendant la grande tribulation. Alors, sa trois l’evenement ki ti mentionné au commencement sa lartik-la pou arrivé dan lavenir, dan mem periode​—la grande tribulation. Ki l’effet sa nouveau l’explication-la ena lor fason ki nou comprend l’exemple ki Jésus ti donné lor l’esclave fidele et avisé? Ek aussi, ki l’effet sa ena lor fason ki nou comprend lezot parabole ki Jésus ti donné ek ki pé realisé pendant lepok lafin? Dan bann prochain lartik nou pou examine sa bann question important-la.