Avance vers la maturité—“Grand jour Jéhovah bien pré”

“Anou avance vers la maturité.”—HÉB. 6:1.

1, 2. Ki l’occasion pou “sauvé ek al vers bann montagne” bann chretien premier siecle ki ti reste Jérusalem ek Judée, ti gagné?

KAN Jésus ti lor la terre, so bann disciple ti approche li ek ti demann li: “Ki signe pou montré to presence ek conclusion sa systeme-la?” Jésus ti donne enn prophetie pou reponn zot question, premier realisation sa prophetie-la ti arrivé dan premier siecle. Jésus ti koz lor enn l’evenement ki pa ordinaire ki ti pou montré zot ki la fin ti bien pré. Kan zot ti pou trouve sa l’evenement-la, “bann ki dan Judée [ti pou] bizin commence sauvé ek al vers bann montagne.” (Mat. 24:1-3, 15-22) Eski bann disciple Jésus ti pou reconette sa signe-la ek agir dapré bann l’instruction ki zot ti’nn gagné?

² Preské trente an plitar, en 61 nou lepok, l’apotre Paul ti ecrire enn message bien franc ki ti faire reflechi ek li ti envoye sa bann chretien Hébreux ki ti reste Jérusalem ek tout autour. Paul ek so bann compagnon chretien pa ti koné ki signe ki ti pou montré commencement enn “grand tribulation” ti pou arrivé zis cinq an apré. (Mat. 24:21) En 66 nou lepok, Cestius Gallus ek l’armée romain ti vinn attak Jérusalem ek zot ti pré pou gagne la victoire. Mais apré, enn sel coup zot ti allé ek sa ti donne bann chretien l’occasion pou sauvé ek al dan enn l’endroit kot zot ti pou en securité.

 3. Ki conseil Paul ti donne bann chretien hébreux, ek kifer?

³ Sa bann chretien-la ti bizin ena enn bon discernement ek enn bon vision spirituel pou reconette ki sa bann l’evenement-la ti pé realise bann parole Jésus, ek ki zot ti bizin sauvé. Pourtant, certain ti’nn “faire coumadir zot pa tendé.” Zot ti couma bann tibaba lor plan spirituel ki ti bizin “di-lait.” (Lire Hébreux 5:11-13.) Mem bann ki ti’nn marche dan la verité depuis longtemps ti pé montré bann signe ki zot ti pé “eloigne-zot ar [sa] Bondié vivant[-la].” (Héb. 3:12) Certain ti ena “l’habitude” pou mank bann reunion alors ki zot ti pé vive dan enn lepok kot sa ‘jour difficile-la ti pé kosté.’ (Héb. 10:24, 25) Paul ti donne zot enn conseil ki ti arrive dan enn bon moment: “Asterla ki nou finn laisse doctrine de base concernant Christ, anou avance vers la maturité.”—Héb. 6:1.

 4. Kifer li important ki nou reste lor nou garde lor plan spirituel, ek ki pou aide nou pou faire sa?

⁴ Nou pé vive lepok kot pou ena realisation final prophetie Jésus. “Grand jour Jéhovah”—jour ki pou amenn la fin systeme Satan en entier—“bien pré.” (Tseph. 1:14) Nou bien bizin veille realisation bann prophetie la Bible ek developpe bann relation bien solide avek Jéhovah, couma jamais nou finn faire avant. (1 Pierre 5:8) Eski c’est seki nou pé faire vrai-mem? Maturité lor plan spirituel pou aide nou pa blié dan ki lepok nou pé vive.

Seki maturité lor plan spirituel vedir

5, 6. (a) Ki maturité spirituel impliké? (b) Dan ki deux domaine nou bizin faire zeffort si nou envie avance vers maturité?

⁵ Paul pa ti zis encourage bann chretien hébreu ki ti vive dan premier siecle, ki zot ti bizin avance vers la maturité, mais li ti aussi dire zot seki maturité spirituel impliké. (Lire Hébreux 5:14.) “Bann dimoune ki ena maturité” pa contente-zot pou prend zis “di-lait.” Zot prend “nourriture solide.” Alors zot konn “bann kitsoz de base” ek “bann kitsoz profond” lor la verité, toulé-deux. (1 Cor. 2:10) En plus, zot capacité mental finn entrainé a force zot inn pratiké—kan zot inn mette en pratik seki zot koné—sa finn aide zot pou faire difference entre seki bon ek seki mauvais. Kan zot bizin prend enn decision, sa formation-la aide zot pou discerné ki bann principe biblik ki impliké ek couma pou applik zot.

⁶ Paul ti ecrire: “Li necessaire ki nou porte enn l’attention plus ki normal ar bann kitsoz ki nou finn tendé, pou ki jamais nou pa eloigné tigit par tigit.” (Héb. 2:1) Li kapav arrivé ki nou eloigné tigit par tigit ar la verité sans ki nou rann-nou compte. Nou kapav evite faire sa l’experience-la si nou porte “enn l’attention plus ki normal” kan nou etudié la Bible, kot nou ou-soit dan reunion. Alors, sakenn parmi nou bizin demann li-mem: ‘Eski mo encore toujours pé etudié zis bann doctrine de base? Eski mo pé faire kitsoz a cause ki a faire, par routine sans ki mo laisse mo leker impliké en entier avek la verité? Couma mo kapav vrai-mem progressé dan la verité?’ Pou nou kapav avance vers la maturité nou bizin faire zeffort dan au moins deux domaine. Nou bizin konn bien Parole Bondié. Ek nou bizin aprann obeir.

Konn bien Parole Bondié

 7. Ki bienfait nou kapav tiré kan nou konn Parole Bondié pli bien?

⁷ Paul ti ecrire: “N’importe ki dimoune ki prend di-lait pa konn parole la justice, parski li enn tibaba.” (Héb. 5:13) Pou gagne maturité nou bizin konn bien parole Bondié, so message ki Li ena pou nou. Sa message-la trouve dan so Parole, la Bible, alors nou bizin serieux dan nou l’etude la Bible ek bann publication ki “l’esclave fidele et avisé” donne nou. (Mat. 24:45-47) Kan nou etudié dan sa fason-la, nou pou koné couma Bondié pensé, ek sa pou kapav aide nou pou entraine nou bann capacité mental. Anou prend l’exemple enn soeur ki appel Rose.a Li dire: “Enn rappel ki finn ena enn grand l’effet dan mo la vie c’est pou lire la Bible regulierement. Sa inn prend moi preské deux an pou lire la Bible en entier, mais mo ti ena l’impression ki c’est premier fois ki mo pé aprann pou konn mo Createur. Mo ti aprann fason ki Li agir, seki Li content ek seki Li pa content, ki quantité Li fort, ek couma so sagesse bien profond. Lire la Bible toulé-jour finn soutenir moi pendant bann moment bien difficile ki mo’nn gagné dan mo la vie.”

 8. Ki pouvoir Parole Bondié kapav ena lor nou?

⁸ Si nou lire enn portion la Bible regulierement, sa pou permette message ki ena ladan ‘ena enn pouvoir’ lor nou. (Lire Hébreux 4:12.) Sa lecture-la kapav forme seki nou été au fond nou-mem ek faire nou gagne plus faveur Jéhovah. Eski ou bizin faire enn programme pou ou kapav passe plus le temps pou lire la Bible ek pou medite lor seki li dire?

9, 10. Konn bien Parole Bondié, ki sa impliké? Donne enn l’exemple.

⁹ Pou nou konn bien la Bible, li pa assez ki nou zis konn seki li dire. Bann chretien ki ti couma bann tibaba lor plan spirituel dan lepok Paul ti ena enn certaine connaissance lor seki Parole Bondié ti dire. Pourtant, zot pa ti servi li dan zot la vie personnel, ni zot ti mette en pratik seki zot ti koné, pou trouve bann bon resultat ki sa produire. Parski sa bann dimoune-la pa ti laisse message ki ena dan la Bible guide zot pou prend bann bon decision dan zot la vie, zot pa ti vrai-mem konn sa message-la.

¹⁰ Konn bien Parole Bondié vedir koné ki sa Parole-la dire ek mette en pratik seki li enseigné. L’experience enn soeur ki appel Kyle montré couma nou kapav faire sa. Kyle ti gagne probleme avek enn so camarade travail. Ki li ti faire pou reglé sa probleme-la? Li dire: “Verset ki desuite inn vinn dan mo la tête c’est Romains 12:18 ki dire: ‘Autant ki sa depann lor zot, vive en paix avek tou dimoune.’ Alors mo ti prend enn rendez-vous avek sa camarade-la apré travail.” Sa rendez-vous-la ti bien passé, ek camarade-la ti bien impressionné par fason ki Kyle ti reglé sa probleme-la. Kyle raconté: “Mo’nn aprann ki si nou applik bann principe biblik, touletan nou pou reussi.”

Aprann l’obeissance

11. Ki montré nou ki sa kapav difficile pou obeir dan bann situation difficile?

¹¹ Sa kapav difficile pou applik seki nou finn aprann dan la Bible, surtout dan bann situation difficile. Par exemple, enn tipé apré ki Jéhovah ti delivré bann Israélite dan l’Égypte, zot “ti commence laguerre avek Moïse” ek zot ti contigne “testé Jéhovah.” Kifer? Parski zot pa ti ena de l’eau pou boire. (Ex. 17:1-4) Moins ki deux mois apré ki zot ti faire enn l’alliance avek Bondié ek ki zot ti accepté pou faire “tou bann parole ki Jéhovah [ti] dire,” zot ti desobeir so la Loi concernant l’idolatrie. (Ex. 24:3, 12-18; 32:1, 2, 7-9) Eski zot ti’nn commence gagne peur parski Moïse ti reste trop longtemps absent, pendant ki li ti pé gagne bann instruction lor montagne Horeb? Ou-soit eski zot ti peur pangar bann Amaléqite revinn attak zot? Eski zot ti pensé ki zot pa ti pou kapav faire nanyin sans Moïse, ki enn tipé avant ti’nn zis bizin leve so la main pou faire zot gagne la victoire? (Ex. 17:8-16) Li possible, mais n’importe ki raison ki zot ti ena, bann Israélite “ti refuse obeir.” (Actes 7:39-41) Paul ti encourage bann chretien pou ‘faire tou zot possible’ pou evite “tombe dan mem l’exemple desobeissance” ki bann Israélite kan zot ti peur pou rente dan la Terre promise.—Héb. 4:3, 11.

12. Couma Jésus inn aprann l’obeissance, ek ki bienfait sa inn amené?

¹² Pou nou avance vers la maturité nou bizin faire tou seki nou kapav pou obeir Jéhovah. Pareil couma Jésus Christ li-mem inn donne nou l’exemple, souvent nou aprann l’obeissance par bann kitsoz ki nou enduré. (Lire Hébreux 5:8, 9.) Avant li vinn lor la terre, Jésus ti obeir so Papa. Selman, pou li faire volonté so Papa lor la terre, li ti bizin souffert lor plan physik ek mental. A travers l’obeissance dan bann condition terrible, Jésus inn “vinn parfait” pou bann nouveau privilege ki Bondié ti reservé pou li, setadir pou vinn le Roi ek Grand Pretre.

13. Ki montré si nou finn aprann l’obeissance?

¹³ Ki nou kapav dire lor nou? Eski nou bien decidé pou obeir Jéhovah mem kan nou dan bann situation bien difficile? (Lire 1 Pierre 1:6, 7.) Bann conseil ki Bondié donné en rapport avek moralité, l’honneteté, fason ki nou bizin servi nou la langue, lecture ek l’etude personnel la Bible, assisté reunion ek preché, zot bien clair. (Jos. 1:8; Mat. 28:19, 20; Éph. 4:25, 28, 29; 5:3-5; Héb. 10:24, 25) Eski nou obeir Jéhovah dan sa bann domaine-la mem kan nou dan bann situation bien difficile? Nou l’obeissance montré ki nou finn progressé vers la maturité.

Maturité lor plan spirituel—Kifer li important?

14. Donne enn l’exemple pou montré couma kan nou avance vers maturité sa kapav protege nou.

¹⁴ Si enn chretien ena bann capacité mental ki bien entrainé pou li kapav faire difference entre seki bon ek seki mauvais dan sa le monde ‘ki’nn perdi tou sens moral-la,’ sa pou enn vrai protection pou li. (Éph. 4:19) Anou prend l’exemple Jacques, enn frere ki lire regulierement bann publication biblik ek ki bien apprecié zot. Li ti accepté enn travail kot tou so bann collegue ti bann madame. Jacques raconté: “Alors ki beaucoup parmi zot ti montré bien ki zot pena enn bon moralité, ti ena enn parmi ki ti parette enn dimoune bien respectable ek li ti montré ki li ti interessé ar la Bible. Mais enn jour, alors ki nou ti tousel dan enn place dan travail, li ti commence faire moi bann avance sexuel. Mo ti croire li ti pé badiné, mais fason ki li ti pé faire avek moi, li ti bien difficile pou arrete li. Desuite mo ti rappel enn l’experience ki mo ti lire dan La Tour de Garde concernant enn frere ki ti dan mem situation dan so travail. Lartik-la ti servi l’exemple Joseph ek femme Potiphar.b Alors desuite mo ti repousse sa tifi-la ek li ti sorti, li ti allé.” (Gen. 39:7-12) Jacques ti bien reconnaissant ki nanyin pa’nn arrivé plus ki sa, ek ki li’nn kapav garde enn bon conscience.—1 Tim. 1:5.

15. Couma kan nou avance vers maturité sa kapav fortifié nou leker spirituel?

¹⁵ Li important ki nou ena maturité parski sa fortifié nou leker spirituel ek empeche nou pou ‘laisse tou sorte qualité l’enseignement ki bizarre sarié nou allé.’ (Lire Hébreux 13:9.) Kan nou faire zeffort pou faire bann progré lor plan spirituel, nou l’esprit reste fixé lor “bann kitsoz ki pli important.” (Phil. 1:9, 10) Lerla, nou augmente nou reconnaissance pou Bondié ek pou tou bann disposition ki Li’nn prend pou nou profit. (Rom. 3:24) Enn chretien ki enn “adulte en seki concerne [so] capacité pou comprend” developpe sa qualité reconnaissance-la ek ena bann bon relation avek Jéhovah.—1 Cor. 14:20.

16. Ki ti aide enn soeur pou developpe enn ‘leker ki fort’?

¹⁶ Enn soeur ki appel Louise ti reconette ki pendant enn certain temps apré so bapteme, seki ti ena plus l’importance pou li, c’est l’impression ki li ti donne lezot. Li ti dire: “Mo pa ti pé faire nanyin mauvais, mais mo leker pa ti rempli ar enn grand desir pou servi Jéhovah. Mo ti rann-moi compte ki mo ti bizin faire certain changement si mo ti envie ena sentiment ki mo pé donne Jéhovah tou seki mo kapav. Pli grand changement ki mo ti bizin faire c’est mette tou mo leker dan so service.” Kan Louise ti faire sa bann zeffort-la, li ti ‘faire so leker vinn fort’ ek sa ti aide li beaucoup kan li ti gagne enn probleme la santé ki ti bien fatigue li. (Jacq. 5:8) Louise ti dire: “Mo ti bizin lutté, mais mo ti vinn bien proche ar Jéhovah.”

“Obeir avek zot leker”

17. Kifer l’obeissance ti bien important dan premier siecle?

¹⁷ Conseil ki Paul ti donné pou “avance vers la maturité” ti sauve la vie bann chretien premier siecle ki ti pé reste Jérusalem ek Judée. Bann ki ti suive sa conseil-la ti ena discernement spirituel ki bizin pou reconette signe ki Jésus ti donné pou zot “commence sauvé ek al vers bann montagne.” Kan zot ti trouve “sa kitsoz degoutant ki faire bann degat-la . . . deboute dan enn place ki saint,” setadir kan zot ti trouve l’armée romain entoure Jérusalem ek rente dan la ville, zot ti koné ki ti’nn arrive ler pou zot sauvé. (Mat. 24:15, 16) Bann chretien ti prend compte l’avertissement prophetik ki Jésus ti donné, ek zot ti sauvé, zot ti quitte Jérusalem avant so destruction, ek dapré Eusèbe, enn pretre ki ti aussi enn historien, zot ti al vive dan la ville Pella dan region Guiléad kot ti ena montagne. Grace a sa, zot ti evite pli grand malheur ki ti arrive Jérusalem dan l’histoire.

18, 19. (a) Kifer li tellement important ki nou obeir dan nou lepok? (b) Ki nou pou examiné dan prochain lartik?

¹⁸ L’obeissance ki nou developpé kan nou pé avance vers la maturité, pou sauve nou la vie kan pou ena realisation final prophetie Jésus concernant “enn grand tribulation” couma jamais pa finn ena lor la terre avant. (Mat. 24:21) Eski nou pou obeir n’importe ki direction important ki “l’intendant fidele” kapav donne nou dan l’avenir? (Luc 12:42) Li vrai-mem important ki nou aprann “obeir avek [nou] leker”!—Rom. 6:17.

¹⁹ Pou nou kapav gagne maturité nou bizin entraine nou bann capacité mental. Nou faire sa kan nou faire zeffort pou konn pli bien Parole Bondié ek kan nou aprann pou obeir. Bann jeune gagne beaucoup difficulté kan zot faire zeffort pou avance vers la maturité spirituel. Prochain lartik pou examiné couma zot kapav reussi faire face ar sa bann difficulté-la.

[Note]

Ki ou finn aprann?

• Ki été maturité spirituel, ek couma nou gagne sa?

• Kan nou konn bien Parole Bondié couma sa aide nou pou avance vers la maturité?

• Couma nou aprann l’obeissance?

• Cite bann fason couma maturité aide nou.

[Zimage lor page 15]

Kan nou applik bann conseil biblik sa aide nou pou faire face ar bann probleme dan enn fason ki montré nou maturité

[Zimage lor page 16]

Bann chretien premier siecle ti gagne la vie sauve parski zot ti suive conseil Jésus