Batem​—Enn Lobzektif ki Vo Lapenn!

Zezi ti dir ki bann Kretien bizin pran batem. (Lir Matie 28:19, 20.) Ki ete batem? Ek ki bann zefor enn dimounn bizin fer pou ki li kapav pran batem?

1. Ki ete batem?

“Batem” sorti dan enn mo Grek ki vedir “plonze.” Kan Zezi ti pran batem, Zan ti plonz li dan Larivier Zourdin, ek apre ‘li ti sorti dan dilo.’ (Mark 1:9, 10) Bann vre Kretien pran batem dan mem fason, setadir plonz zot net dan delo.

2. Ki enn dimounn montre kan li pran batem?

Kan li pran batem, enn dimounn montre ki li’nn vwe so lavi ar Zeova. Kouma enn dimounn vwe so lavi ar Zeova? Avan li pran batem, li pou priye Zeova personelman, ek pou dir Zeova ki li anvi servi Li pou touletan. Li promet pou ador zis Zeova tousel ek pou fer volonte Zeova vinn kitsoz pli inportan dan so lavi. Li swazir pou ‘pa mazinn zis limem ek pou kontign swiv’ lexanp Zezi ek so bann lansegnman. (Matie 16:24) Kan enn dimounn vwe so lavi ar Zeova ek pran batem, sa pou ed li pou vinn pli pros ar Zeova ek avek bann serviter Zeova.

3. Ki enn dimounn bizin fer avan ki li pran batem?

Avan ki ou pran batem, li bien inportan ki ou aprann konn Zeova ek ki ou fer ou lafwa an Li vinn pli for. (Lir Ebre 11:6.) Plis ou konesans ek ou lafwa an Zeova pou ogmante, plis ou pou kontan Li. Lerla, ou pou anvi koz lor Li ek viv an-akor avek So bann prinsip. (2 Timote 4:2; 1 Zan 5:3) Enn fwa ki enn dimounn ‘amenn enn lavi dign Lesegner, Zeova, ek ki li rod fer Li plezir,’ li kapav desid pou vwe so lavi ar Zeova ek pran batem.​—Kolosien 1:9, 10.a

ANOU GET INPE PLIS

4. Seki nou aprann ar batem Zezi

Lir Matie 3:13-17 pou gagn plis detay lor batem Zezi. Apre sa, get sa bann kestion-la ansam:

• Eski Zezi ti enn zanfan kan li ti pran batem?

• Kouma li ti pran batem? Eski ti vers zis enn tigit delo lor li?

Apre so batem, Zezi ti koumans fer travay spesial ki Bondie ti donn li. Lir Lik 3:21-23 ek Zan 6:38, ek apre sa, get sa kestion-la ansam:

• Apre ki Zezi ti pran batem, ki kitsoz li ti met an premie dan so lavi?

5. Ou kapav pran batem!

Vwe ou lavi ar Zeova ek pran batem kapav fer per. Selman, si ou kontign aprann konn Zeova, tigit-tigit ou pou fer bann progre ek enn zour ou pou reisi pran sa desizion inportan la. Zwe VIDEO-la pou trouv lexanp bann dimounn ki’nn reisi pran sa desizion-la.

VIDEO: Kouma To Kapav Vinn Kamarad Zeova? (1:11)

Lir Zan 17:3, NW ek Zak 1:5, ek apre sa, get sa kestion-la ansam:

• Ki kitsoz kapav ed enn dimounn pou pran batem?

1. Nou vwe nou lavi ar Zeova kan nou dir Li ki nou anvi servi Li pou touletan

2. Zour nou batem, nou montre bann dimounn ki nou’nn vwe nou lavi ar Bondie

6. Batem permet nou form parti fami Zeova

Kan nou pran batem, nou form parti dan enn sel fami internasional. Li vre ki nou sorti dan diferan landrwa ek diferan kiltir, me nou tou ena bann mem krwayans ek nou viv an-akor avek seki Labib ansegne. Lir Psom 25:14 ek 1 Pier 2:17, ek apre sa, get sa kestion-la ansam:

• Kan enn dimounn pran batem, ki lefe sa ena lor so lamitie avek Zeova ek lor so lamitie avek bann lezot serviter Zeova?

SEKI NOU’NN APRANN

Zezi ti ansegne ki bann Kretien bizin pran batem. Pou ki enn dimounn fer sa, li bizin kontign fer so lafwa dan Zeova vinn pli for, viv an-akor avek bann prinsip Zeova, ek vwe so lavi ar Li.

Eski Ou Rapel?

• Ki ete batem, ek kifer li inportan?

• Kan ou pran batem ki sa montre?

• Ki enn dimounn bizin fer avan ki li vwe so lavi ar Zeova ek pran batem?

DEKOUVER

Aprann ki savedir batem.

“Ki Ete Batem?” (Lartik lor jw.org)

Bann konsey ki kapav ed enn dimounn pou pran batem.

“Lamour ek Rekonesans Pous Twa pou Pran Batem” (Latour Degard, Mars 2020)

Gete seki ti motiv enn dimounn pou pran batem.

“Zot ti envie ki mo trouve par mo-mem ki été la verité” (Latour Degard, Mars-Avril 2013)

Kifer batem li enn lobzektif ki vo lapenn? Kouma to kapav prepar twa pou pran batem?

« Devrais-je me faire baptiser ? » (Les jeunes s’interrogent. Réponses pratiques, Volim 2, sapit 37)