Trouv Lazwa dan To Travay

1-3. (a) Ki boukou dimounn resanti konsernan zot travay? (b) Ki bann kestion nou pou examine dan sa sapit-la?

PARTOU dan lemond, bann dimounn travay dir pou pran swin zotmem ek zot fami. Boukou pa kontan zot travay ek sertin mem strese toulezour kan zot al travay. Si to dan sa ka-la, ki to kapav fer pou ki to travay vinn pli agreab? Ki to bizin fer pou to santi twa bien dan to travay?

² Zeova dir nou: “Ki sakenn manze ek bwar ek gagn satisfaksion pou tou sa travay dir ki li’nn fer la. Sa se enn don Bondie.” (Ekleziast 3:13) Zeova inn kree nou avek sa bezwin ek sa dezir pou travay la. Li anvi ki nou santi nou bien dan nou travay.​—Lir Ekleziast 2:24; 5:18.

³ Alor, ki kapav ed nou pou trouv lazwa dan nou travay? Ki kalite travay enn Kretien bizin rezete? Kouma nou kapav trouv lekilib ant nou travay ek nou ladorasion pou Zeova? Ek ki travay pli inportan nou kapav fer?

4, 5. Ki Zeova panse lor travay?

⁴ Zeova limem kontan travay. Zenez 1:1 dir: “O-koumansman, Bondie ti kree lesiel ek later.” Apre ki Bondie ti fini kree later ek tou seki ena lor la, Li ti dir ki so kreasion ti “bien bon.” (Zenez 1:31) Nou Kreater ti satisfe avek seki Li ti kree.​—1 Timote 1:11, NW.

⁵ Zeova zame pa aret travay. Zezi ti dir: “Mo Papa ankor pe travay.” (Zan 5:17) Mem si nou pa konn tou bann kitsoz extraordiner ki Zeova inn fer, nou konn sertin parmi zot. Li’nn swazir bann ki pou form parti dan so Rwayom ek ki pou dirize ansam ar so Garson, Zezi Kris. (2 Korintien 5:17) Zeova pe osi kontign gid ek pran swin bann dimounn. Si zordi dan lemond antie, bann milyon dimounn pe aprann konn Zeova ek ena lespwar pou viv pou touletan dan enn paradi lor later, se gras-a travay predikasion.​—Zan 6:44; Romin 6:23.

6, 7. Ki kalite travayer Zezi ti ete?

⁶ Parey kouma so Papa, Zezi kontan travay. Zezi ti “zouvriye kalifie” Bondie avan ki li ti vinn lor later ek li ti partisip dan kreasion tou kitsoz dan lesiel ek lor later. (Proverb 8:22-31; Kolosien 1:15-17, NW) Kan li ti lor later, Zezi ti kontign travay dir. Kan li ti zenn, li ti aprann pou vinn enn bon sarpantie. Kitfwa li ti aranz bann laport, latab ek sez. Zezi ti telman bon dan so travay ki bann dimounn ti konn li kouma enn “sarpantie.”​—Mark 6:3.

⁷ Me selman, travay pli inportan ki Zezi ti fer lor later, se pres bonn nouvel ek ansegn bann dimounn lor Zeova. Li ti ena trwa-z-an-edmi pou akonpli so minister, ek li ti travay dir depi boner gramatin ziska tar aswar. (Lik 21:37, 38; Zan 3:2) Zezi ti mars plizir santenn kilomet lor bann semin later, pou partaz bonn nouvel ar maximum dimounn posib.​—Lik 8:1.

8, 9. Kifer Zezi ti kontan so travay?

⁸ Pou Zezi, fer travay so Papa ti koumadir manze. Sa travay-la ti donn li lenerzi ek lafors. Ena zour, Zezi ti travay telman dir ki li pa ti mem pran letan pou manze. (Zan 4:31-38) Li ti profit tou lokazion pou ed lezot aprann konn so Papa. Akoz samem li ti kapav dir Zeova: “Mo finn glorifie twa lor later par tou seki mo finn fer; mo finn terminn louvraz ki to ti donn mwa pou fer.”​—Zan 17:4.

⁹ Li kler ki Zeova ek Zezi travay dir ek gagn lazwa ek satisfaksion dan zot travay. Nou anvi “imit” Bondie ek “swiv bien [Zezi] so tras.” (Efezien 5:1; 1 Pier 2:21, NW) Akoz samem nou fer zefor pou travay dir ek fer nou best dan tou seki nou fer.

10, 11. Ki kapav ed nou pou ena enn latitid pozitif lor nou travay?

¹⁰ Antan ki bann serviter Zeova, nou travay dir pou gagn seki neseser pou noumem ek nou fami. Nou anvi santi nou bien dan nou travay, me sa pa touletan fasil. Alor, ki nou kapav fer si nou pa kontan nou travay?

¹¹ Ena enn latitid pozitif. Kitfwa nou pa pou kapav sanz nou sitiasion, me nou kapav sanz nou latitid. Kan nou konpran seki Zeova anvi nou fer, sa kapav ed nou. Par exanp, Zeova atann ki enn sef fami fer so best pou pran swin so fami. Ofet, Labib dir ki si enn kikenn pa pran swin so fami, “li pli pir ki enn dimounn ki pena lafwa.” (1 Timote 5:8, NW) Si to enn sef fami, to travay dir pou donn to fami seki zot bizin. Ki to kontan to travay ouswa non, to kone ki to pe fer Zeova plezir kan to pe donn to fami seki zot bizin.

12. Ki bann bienfe nou gagne kan nou travay dir ek res onet?

¹² Travay dir ek res onet. Sa pou kapav ed twa pou trouv lazwa dan to travay. (Proverb 12:24; 22:29) Anplis, to patron pou kapav fer twa konfians. Bann patron bien kontan bann travayer ki onet parski zot pa pou kokin kas, ni bann materyo, ouswa letan. (Efezien 4:28) Me, pli inportan ankor, Zeova kone kan to pe travay dir ek ki to onet. To kapav ena “enn konsians kler” parski to kone ki to pe fer Bondie plezir.​—Ebre 13:18; Kolosien 3:22-24.

13. Ki lezot bienfe nou kapav gagne kan nou onet dan travay?

¹³ Pa bliye ki to kondwit dan travay kapav donn Zeova loner. Sa donn nou enn lot rezon pou ki nou santi nou bien dan nou travay. (Tit 2:9, 10) Li kapav mem arive ki enn to bann koleg pou anvi etidie Labib akoz to bon lexanp.​—Lir Proverb 27:11; 1 Pier 2:12, NW.

14-16. Ki nou bizin pran an konsiderasion kan nou pe swazir enn travay?

¹⁴ Labib pa donn enn lalis travay ki enn Kretien kapav ouswa pa kapav fer. Me ena bann prinsip dan Labib ki kapav gid nou kan nou bizin swazir enn travay. (Proverb 2:6) Kan nou servi bann prinsip Labib, nou kapav poz noumem sa bann kestion-la:

¹⁵ Eski sa travay-la pou obliz mwa fer enn kitsoz ki Zeova pa kontan? Nou’nn aprann ki ena bann pratik ki Zeova deteste, kouma kokin ek koz manti. (Exod 20:4; Zistwar Bann Apot 15:29; Efezien 4:28; Revelasion 21:8) Alor nou pou fer atansion pou rezet ninport ki travay ki al kont bann prinsip Zeova.​—Lir 1 Zan 5:3, NW.

¹⁶ Eski sa travay-la soutenir ouswa ankouraz enn pratik ki Zeova kondane? Par exanp, si propoz twa enn travay kouma resepsionis dan enn labank disan, ki to pou fer? Pena nanye demal pou fer resepsionis. Me to kone ki Zeova panse lor disan. Alor, mem si se pa twa ki pou fer sa bann transfizion disan la, eski to pa pou santi twa koupab parski to kone ki Zeova panse lor la?​—Zistwar Bann Apot 15:29.

17. Ki kapav ed nou pou pran bann desizion ki fer Zeova plezir?

¹⁷ Kan nou servi bann prinsip Bondie, nou kapav vinn kouma bann dimounn ki ti dekrir dan Ebre 5:14, NW, “bann ki afors zot inn pratike, ena bann kapasite pou diserne, ki finn antrene pou fer diferans ant seki bien ek seki mal.” Demann tomem: ‘Si mo aksepte sa travay-la, eski sa pou afekte lezot? Eski sa travay-la pou obliz mwa pou kit mo konzwin ek mo bann zanfan ek al dan enn lot pei? Ki lefe sa pou ena lor zot?’

18. Kifer li kapav enn vre defi pou res konsantre lor nou ladorasion?

¹⁸ Akoz nou pe viv dan “bann lepok kritik, difisil pou siporte,” li kapav difisil pou met nou ladorasion pou Zeova an premie dan nou lavi. (2 Timote 3:1, NW) Trouv ek gard enn travay kapav enn vre defi. Li vre ki nou bizin pran swin nou fami, me nou kone ki nou ladorasion bizin pas an premie. Fode pa ki bann kitsoz materyel vinn tro inportan dan nou lavi. (1 Timote 6:9, 10, NW) Alor, kouma nou kapav “verifie bien bann kitsoz ki pli inportan” ek anmemtan pran swin nou fami?​—Filipien 1:10, NW.

19. Kan nou fer Zeova konfians, kouma sa kapav ed nou pou res ekilibre dan nou travay?

¹⁹ Met tou to konfians dan Zeova. (Lir Proverb 3:5, 6.) Nou kone ki Bondie vremem interese ar nou ek Li kone exakteman seki nou bizin. (Psom 37:25; 1 Pier 5:7) So Parol dir nou: “Pa les lamour pou larzan dominn zot lavi, ek kontant zot ar seki zot ena. Parski Li’nn dir: ‘Zame mo pou kit twa, ek zame mo pou abandonn twa.’” (Ebre 13:5, NW) Zeova pa anvi ki nou kontign gagn traka ar seki nou pou donn nou fami. Plizir fwa, Li’nn montre ki Li kapav donn so bann serviter seki zot bizin. (Matie 6:25-32) Ninport ki travay nou ena, nou bizin etidie Parol Bondie regilierman, pres bonn nouvel, ek asiste nou bann renion.​—Matie 24:14; Ebre 10:24, 25.

20. Kouma nou kapav gard nou lavi sinp?

²⁰ Gard to lizie fixe lor enn sel kitsoz. (Lir Matie 6:22, 23, NW.) Sa vedir kontign gard to lavi sinp pou ki to kapav res konsantre lor to servis pou Zeova. Li pou bet si nou les kas, enn lavi konfortab ouswa bann dernie gajet vinn pli inportan ki nou lamitie ar Bondie. Alor, ki pou ed nou pou donn priorite bann kitsoz ki pli inportan? Nou bizin esey fer tou pou pena okenn det. Si to deza ena enn det, organiz twa pou diminie ouswa ranbours li. Si nou pa fer atansion, bann kitsoz materyel kapav pran boukou nou letan ek lenerzi. Lerla, kitfwa nou pa pou mem pran letan pou priye, etidie ouswa prese. Olie ki nou les bann kitsoz materyel konplik nou lavi, nou anvi aprann kontant nou ar bann kitsoz debaz kouma “manze ek linz.” (1 Timote 6:8, NW) Ek dan ninport ki sitiasion nou ete, li bon ki nou examinn nou sitiasion detanzantan pou gete si nou kapav fer plis pou Zeova.

21. Nou bizin deside ki kitsoz ki ena premie plas dan nou lavi. Kifer?

²¹ Swazir bien to priorite. Nou bizin bien servi nou letan, nou lenerzi ek nou bann kitsoz materyel. Si nou pa fer atansion, bann kitsoz ki ena mwins linportans kouma ledikasion ouswa kas pou pran tou nou letan. Zezi ti dir: “Avan tou kitsoz, kontign rod Rwayom.” (Matie 6:33, NW) Seki nou swazir, nou bann labitid, nou bann aktivite toulezour ek nou bann lobzektif montre ki kitsoz ena premie plas dan nou leker.

22, 23. (a) Ki travay pli inportan tou Kretien ena? (b) Ki kapav ed nou pou trouv lazwa dan nou travay?

²² Kitsoz ki pli inportan pou nou, se servi Zeova. Ek enn fason pou nou fer sa, se kan nou pres bonn nouvel. (Matie 24:14; 28:19, 20) Parey kouma Zezi, nou anvi fer tou seki nou kapav dan sa travay-la. Sertin inn al servi dan bann landrwa kot bizin plis proklamater. Ena ki pe aprann enn lot lang pou pres ar bann dimounn ki koz sa lang-la. Koz avek bann ki’nn fer sa ek poz zot bann kestion. Zot pou dir twa ki zot pli ere ek ki zot bien satisfe ar zot lavi.​—Lir Proverb 10:22.

²³ Azordi, boukou parmi nou, pas boukou letan dan travay, ouswa mem fer de-trwa travay zis pou kapav donn zot fami seki zot bizin pou viv. Zeova konn sa, ek li apresie tou seki nou fer pou pran swin nou fami. Alor, ninport ki travay nou fer, anou kontign imit Zeova ek Zezi ek travay dir. Ek rapel ki travay pli inportan ki nou ena, se servi Zeova ek pres bon nouvel lor Rwayom Bondie. Sa pou donn nou enn vre lazwa.