LESON 17

Ki Kalite Dimounn Zezi Ete?

Version Inprime

Amezir ki nou pou aprann plis lor seki Zezi ti dir ek ti fer kan li ti lor later, nou pou dekouver bann kalite ki pou fer nou anvi vinn kamarad avek li ek so Papa, Zeova. Ki bann zoli kalite Zezi ena? Ek kouma nou kapav imit li?

1. Dan ki fason Zezi parey kouma so Papa?

Kan Zezi ti dan lesiel, pandan bann milyar lane li’nn gagn lokazion get so Papa ki ena boukou lamour ek pou aprann avek Li. Gras-a sa, Zezi pans parey kouma Zeova, ena bann mem santiman ki Li, ek azir parey kouma Li. (Lir Zan 5:19.) Avredir, Zezi telman imit bien bann kalite ki so Papa ena, ki li’nn kapav dir: “Seki finn trouv mwa finn trouv mo Papa.” (Zan 14:9) Plis ou pou aprann konn Zezi, plis ou pou aprann konn Zeova pli bien. Par exanp, nou pou trouve ki Zezi ti bien gagn traka bann dimounn ek sa pou montre ou ki kantite Zeova gagn ou traka.

2. Kouma Zezi ti montre ki li kontan Zeova?

Zezi ti dir: “Lemonn bizin kone ki mo kontan mo Papa, akoz samem tou seki mo Papa dir mwa fer, mo fer.” (Zan 14:31) Kan li ti lor later, Zezi ti montre ki kantite li kontan so Papa kan li ti obeir Li, mem kan sa ti difisil. Zezi ti telman kontan so Papa ki li ti touletan koz lor Li ek li ti mem ed lezot pou ena enn bon lamitie avek so Papa.—Zan 14:23.

3. Kouma Zezi ti montre ki li kontan bann dimounn?

Labib dir nou ki Zezi ti “ena boukou lafeksion pou bann dimounn.” (Proverb 8:31) Li ti montre so lamour pou zot, kan li ti ankouraz zot ek ed zot san ki li ti atann nanye an retour. Bann mirak ki Zezi ti fer, montre ki li ti pwisan, me sirtou ki li ti bien sagrin kan li ti trouv bann dimounn soufer. (Mark 1:40-42) Li ti bon anver tou dimounn ek li ti tret zot tou parey. Seki li ti dir ti rekonfort bann dimounn ki ti ena enn leker sinser ek ti donn zot lespwar. Zezi kontan tou bann dimounn, akoz sa li ti pre pou soufer ek mor pou zot. Me li sirtou kontan bann dimounn ki swiv so bann lansegnman.—Lir Zan 15:13, 14.

ANOU GET INPE PLIS

Nou pou aprann plis lor bann kalite ki Zezi ena. Nou pou gete osi kouma nou kapav imit Zezi ki ti kontan bann dimounn ek ki ti zenere.

4. Zezi kontan so Papa

Lexanp Zezi montre kouma nou kapav montre nou lamour pou Bondie. Lir Lik 6:12 ek Zan 15:10; 17:26, NW. Apre ki ou’nn fini lir sak verse, get sa kestion-la ansam:

Kouma nou kapav imit Zezi ek montre ki nou kontan Zeova?

Zezi pe priye. — Zezi ti kontan so Papa ki dan lesiel, ek souvan li ti koz ar Li dan lapriyer

5. Zezi gagn traka bann dimounn

Zezi ti fer lintere lezot pas avan so prop lintere. Mem kan li ti bien fatige, li ti servi so letan ek so lenerzi pou ed bann dimounn. Lir Mark 6:30-44, ek apre sa, get sa bann kestion-la ansam:

Dapre sa bann verse-la, kouma Zezi ti montre ki li ti gagn traka bann dimounn?—Get verse 31, 34, 41, ek 42.
Ki ti pous Zezi pou ed lezot?—Get verse 34.
Zezi ti imit bien bann kalite Zeova, alor ki sa aprann ou lor Zeova?
Zezi ti gagn traka bann dimounn, sit sertin fason kouma nou kapav imit li.

Zezi pe nouri bann milye dimounn par enn mirak. Li’nn miltipliye sink dipin ek de pwason ek li pe donn sa bann disip. Bann disip pe partaz manze ar bann zom, bann fam ek bann zanfan.

6. Zezi zenere

Mem si Zezi pa ti ena boukou kitsoz, li ti partaz seki li ti ena avek lezot. Ek li ankouraz nou osi pou fer parey. Lir Zistwar Bann Apot 20:35, ek apre sa, get sa kestion-la ansam:

Dapre Zezi, kouma nou kapav ere?

Zwe VIDEO-la, ek apre sa, get sa kestion-la ansam:

VIDEO: “Ena Plis Lazwa kan Done ki Gagne”—Extre (4:00)

Sit sertin fason kouma nou kapav zenere mem si nou pena boukou kitsoz.

Eski ou ti kone?

Labib ansegn nou ki nou bizin priye Zeova lor nom Zezi. (Lir Zan 16:23, 24.) Kan nou priye dan sa fason-la, nou rekonet seki Zezi inn fer pou ed nou vinn kamarad Zeova.

SERTIN DIMOUNN DIR: “Bann dimounn soufer parski Bondie pe pini zot.”