Ki Labib Dir Nou lor Sa Kikenn Ki’nn Fer Ekrir Li La?

 1. Kifer to rekonesan ki Zeova inn donn nou Labib?

NOU bien rekonesan ki Zeova inn donn nou Labib! Dan Labib, ena bann konsey ki kapav ed nou pou fer fas ar bann problem ki nou gagne azordi. Anplis, li donn nou enn zoli lespwar pou lavenir. Me pli inportan, dan Labib, nou kapav aprann plis lor Zeova. Kan nou reflesi lor bann zoli kalite ki Zeova ena, sa tous nou leker, ek sa pous nou pou vinn pros ar nou Bondie ek pou vinn so bon kamarad.​—Ps. 25:14.

 2. Kouma Zeova inn fer bann dimounn konn Li?

² Zeova anvi ki bann dimounn konn Li. Dan lepase, Li ti fer sertin parmi so bann serviter gagn bann rev ek bann vizion, ek Li ti avoy bann anz pou partaz so mesaz ar lezot. (Nonb 12:6; Zist. 10:3, 4) Me kouma nou ti pou konn sa bann rev-la, sa bann vizion-la, ouswa sa bann mesaz-la, si pa ti ekrir zot? Se akoz sa ki Zeova inn fer bann dimounn “ekrir dan enn liv” seki Li ti anvi fer nou kone. (Zer. 30:2) Zeova “li plis ki parfe,” alor nou kapav sir ki Labib, se pli bon fason pou Li koz avek nou ek Li ed nou.​—Ps. 18:30.

 3. Kouma Zeova inn fer an-sort ki Labib ankor disponib azordi? (Izai 40:8)

³ Lir Izai 40:8. Pandan bann milye lane, Parol Bondie inn gid bann zom ek bann fam ki fidel. Kouma? Se enn zoli kestion, parski dan lepase, Labib ti ekrir lor bann roulo ki’nn detrir avek letan. Ek akoz sa, nou nepli ena okenn roulo orizinal ki existe azordi. Me Zeova ti fer an-sort ki bann dimounn fer bann kopi so Parol sakre. Mem si sa bann dimounn-la ti inparfe, zot ti fer bien atansion kan zot ti rekopie Labib. Par exanp, konsernan bann Lekritir Ebre, enn biblis ti ekrir: “Nou sir ki pena okenn lot liv ki’nn ekrir dan lepase, ki’nn rekopie dan enn fason exakt parey kouma Labib.” Labib inn ekrir depi bien lontan lor bann roulo ki nepli existe azordi, ek bann dimounn ki’nn rekopie li ti inparfe. Kanmem sa, nou kapav sir ki bann parol ki ena dan Labib azordi, se mesaz sa Kikenn ki’nn fer ekrir li la, setadir Zeova.

 4. Ki nou pou gete dan sa lartik-la?

⁴ “Tou zoli don ek tou kado parfe sorti” kot Zeova. (Zak 1:17) Labib, se enn bann pli zoli kado ki Zeova inn donn nou. Kan enn kikenn donn nou enn kado, so kado montre ki kantite li konn nou ek ki kantite li konn osi seki nou bizin. Li parey pou sa Kikenn ki’nn donn nou Labib la. Kan nou examinn Zeova so kado, nou aprann plis lor Li. Nou aprann ki kantite Li konn nou ek ki kantite Li konn osi seki nou bizin. Dan sa lartik-la, nou pou gete seki Labib ansegn nou lor trwa kalite ki Zeova ena: so sazes, so lazistis, ek so lamour. Pou koumanse, anou gete seki Labib dir nou lor sazes Bondie.

 5. Ki Labib dir lor Bondie so sazes?

⁵ Zeova kone ki nou bizin so bann bon konsey. Ek dan Labib, ena bann konsey ki ranpli ar sazes. Bann konsey ki ena dan Labib kapav ena enn bon lefe lor bann dimounn. Labib kapav sanz zot lavi. Kan Moiz ti ekrir bann premie liv Labib, li ti dir bann Izraelit: “Sa bann parol-la bizin bien inportan pou zot, parski zot lavi depann lor la.” (Det. 32:47) Bann ki ti obeir bann Lekritir, ti ena enn zoli lavi ek zot ti ere. (Ps. 1:2, 3) Mem si sa fer lontan ki’nn ekrir Parol Bondie, li ankor ena pouvwar pou sanz lavi bann dimounn. Par exanp, lor jw.org, ena enn seri lartik ki apel “Labib Sanz Lavi Bann Dimounn.” Ladan, ena zistwar plis ki 50 dimounn ki’nn reisi fer bann gran sanzman ek amelior zot lavi, parski zot inn obeir bann konsey ki ena dan Labib.​—1 Tes. 2:13.

 6. Kifer Labib bien diferan ar bann lezot liv?

⁶ Pena okenn lot liv ki parey kouma Labib. Kifer nou dir sa? Parski Bondie Zeova, sa Kikenn ki’nn fer ekrir Labib la, Li eternel, Li tou-pwisan, ek Li ena plis sazes ki ninport kisann-la. Azordi, ena boukou ekrivin ki nepli la, me kanmem sa, boukou dimounn ankor lir zot bann liv. Ek bien souvan, bann konsey ki ena dan sa bann liv-la nepli itil. Parkont, bann konsey ki ena dan Labib, zot eternel, ek zot inn ed boukou dimounn ki’nn viv dan diferan lepok. Kan nou lir Labib ek nou reflesi lor la, Bondie servi so lespri sin pou montre nou kouma nou kapav met an pratik bann konsey ki ena ladan. (Ps. 119:27; Mal. 3:16; Ebre 4:12) Bondie vremem anvi ed twa, ek sa bizin ankouraz twa pou lir Labib regilierman!

 7. Kouma Labib ti ed bann serviter Zeova dan lepase pou res dan linite?

⁷ Ena enn lot kitsoz ki montre ki ena sazes Bondie dan Labib. Labib ed bann serviter Bondie pou viv dan linite. Kan bann Izraelit ti rant dan Later Promiz, zot ti al res dan diferan landrwa. Sertin ti vinn bann peser, ena ti fer elvaz zanimo, ek ena ti bann planter. Alor, li ti kapav arive ki bann Izraelit ki ti viv dan enn landrwa, aret gagn traka bann lezot Izraelit ki ti viv dan bann lezot landrwa dan Later Promiz. Selman, Zeova ti pran bann dispozision pou ki bann Izraelit rasanble ansam plizir fwa, pou zot ekout lektir so Parol ek zot gagn bann explikasion. (Det. 31:10-13; Ne. 8:2, 8, 18) Esey mazine seki enn Izraelit ti resanti kan li ti ariv Zerizalem. Kitfwa li ti trouv bann milyon lezot serviter Zeova ki ti sorti dan lezot landrwa ek ki ti reini ansam pou ador Zeova! Se koumsa ki Zeova ti ed so pep pou res dan linite. Plitar, kan lasanble Kretien ti forme, bann Kretien ti koz diferan langaz, ek zot pa ti ena mem nivo sosial. Me zot ti ador vre Bondie dan linite, parski zot ti kontan bann Lekritir. Anplis, bann ki ti vinn dan laverite ti reisi konpran Parol Bondie zis parski bann lezot Kretien ti pe ed zot ek ki zot tou ti pe rasanble ansam.​—Zist. 2:42; 8:30, 31.

 8. Kouma Labib pe ed bann serviter Zeova azordi pou res dan linite?

⁸ Azordi, nou Bondie ki ena sazes pe kontign ansegn so pep ek Li ed zot pou res dan linite gras-a Labib. Tou manze spiritiel ki nou gagne sorti dan Labib. Anplis, nou zwenn regilierman dan bann renion ek bann lasanble pou ekout bann lansegnman ki sorti dan Labib. Alor, Labib enn zouti bien inportan ki Zeova servi pou ed so pep pou “servi Li kot-a-kot.”​—Sof. 3:9.

 9. Ki kalite nou bizin ena pou ki nou konpran Labib? (Lik 10:21)

⁹ Anou get enn lot kitsoz ki montre ki Zeova ena sazes. Li’nn fer ekrir Labib dan enn fason ki zis bann dimounn ki ena limilite kapav konpran. (Lir Lik 10:21.) Partou dan lemond bann dimounn lir Labib. Enn biblis ti dir ki Labib “li pa zis liv ki bann dimounn plis lir, me li osi liv ki bann dimounn fer plis atansion kan zot lir.” Selman, se zis bann dimounn ki ena limilite ki vremem konpran Labib ek met li an pratik.​—2 Kor. 3:15, 16.

10. Dan Labib, ki kitsoz ankor montre nou ki Zeova ena sazes?

¹⁰ Anou get enn lot kitsoz ki montre ki Zeova ena sazes. Zeova, Li pa zis servi Labib pou ansegn so pep, me Li osi servi Labib pou ansegn ek rekonfort sakenn parmi nou personelman. Kan nou lir Labib, nou kapav trouve ki Zeova interese ar sakenn parmi nou. (Iza. 30:21) Kan to ti dan enn problem, eski to’nn deza lir enn verse ek trouve ki sa inn ekrir zis pou twa? Selman, Labib inn ekrir pou tous leker bann milyon dimounn. Alor, kouma bann linformasion ki ena dan Labib kapav exakteman seki to bizin? Sa li posib zis parski sa Kikenn ki’nn fer ekrir Labib la, Limem ki ena plis sazes dan liniver.​—2 Tim. 3:16, 17.

11. Kan Zeova inn fer ekrir Labib, kouma Li’nn montre ki Li pa fer preferans?

¹¹ Enn lot kalite ki Zeova ena, se lazistis. (Det. 32:4) Kan enn kikenn zis, bien souvan li pa fer preferans. Ek Zeova, Li pa fer preferans. (Zist. 10:34, 35; Rom. 2:11) Nou trouve ki Zeova pa fer preferans parski Li’nn fer ekrir Labib dan langaz ki boukou dimounn ti pe koze sa lepok-la. Parmi bann 39 premie liv Labib, laplipar ti ekrir an Ebre, lang ki pep Bondie ti bien konpran sa lepok-la. Me dan premie siek, pli boukou dimounn ti pe koz Grek. Akoz sa, preske toule 27 dernie liv Labib ti ekrir an Grek. Zeova pa ti fer ekrir so Parol dan enn sel lang. Azordi, ena preske wit milyar dimounn lor later, ek zot koz boukou lang. Alor, kouma tou sa bann dimounn-la kapav aprann konn Zeova?

12. Sit enn fason kouma Daniel 12:4 pe realize dan bann dernie zour.

¹² Atraver profet Daniel, Zeova ti promet ki dan lepok lafin, “vre konesans” ki ena dan Labib ti pou “vinn an-abondans.” Boukou dimounn ti pou konpran Labib. (Lir Daniel 12:4.) Enn kitsoz ki’nn ed boukou dimounn pou konpran Labib, se ki’nn tradir li, inn pibliye li, ek inn distribie li ek bann piblikasion Biblik ar boukou dimounn. Labib inn vinn liv ki’nn plis tradir ek plis distribie dan lemond. Parfwa, bann tradiksion Labib ki bann konpagni fer kout bien ser. Parkont, lorganizasion Zeova inn tradir Parol Bondie an-antie ouswa an parti dan plis ki 240 lang, ek ninport kisann-la kapav gagn enn Labib gratis. Gras-a sa, bann dimounn partou lor later pe aprann konn “bon nouvel lor Rwayom Bondie” avan ki lafin vini. (Mat. 24:14) Nou Bondie lazistis anvi donn maximum dimounn posibilite pou konn Li kan zot lir Labib. Li fer sa parski Li bien kontan sakenn parmi nou.

13. Kifer nou kapav dir ki nou trouv lamour Zeova dan Labib? (Zan 21:25)

¹³ Labib ed nou pou konpran ki lamour se pli gran kalite ki Zeova ena. (1 Zan 4:8) Nou trouv sa kan nou reflesi lor seki Zeova inn fer ekrir dan Labib ek lor seki Li pa’nn fer ekrir. Dan Labib, Li’nn dir nou zis seki nou bizin pou ki nou kapav ena enn bon lamitie avek Li, pou ki nou kapav viv ere depi aster-la mem, ek pou ki nou kapav viv pou touletan dan lavenir. Zeova pa’nn nway nou ar bann linformasion ki pa neseser. Li’nn fer sa parski Li kontan nou.​—Lir Zan 21:25.

14. Kouma Labib montre ki Bondie kontan nou?

¹⁴ Zeova inn osi montre ki Li kontan nou dan fason ki Li koz ar nou. Li montre sa kan Li respekte nou dignite. Dan Labib, Li pa’nn donn nou enn lalis bann reg lor seki nou gagn drwa fer ek seki nou pa gagn drwa fer. Okontrer, Li servi bann biografi, bann profesi, ek bann konsey pou ed nou pou pran bann bon desizion. Lerla, sa motiv nou pou kontan Li ek pou obeir Li avek tou nou leker.

15. (a) Kouma Labib montre ki Zeova vremem interese ar nou? (b) Dapre zimaz pou sa paragraf-la, lor ki personaz Biblik sa tipti tifi-la, sa zenn frer-la, ek sa ser aze la pe reflesi? (Zen. 39:1, 10-12; 2 Ler. 5:1-3; Lik 2:25-38)

¹⁵ Labib montre nou ki Zeova vremem interese ar nou. Kouma? Dan Labib, ena boukou zistwar ki tous nou leker. Nou kapav konpran santiman sa bann personaz Biblik la, parski zot “ti ena bann santiman parey kouma nou.” (Zak 5:17) Me pli inportan, kan nou trouve kouma Zeova inn azir avek zot, sa ed nou pou konpran “ki Zeova ranpli ar lafeksion ek tandres, ek [Li] ena mizerikord.”​—Zak 5:11.

16. Dan Labib, kan nou lir lor zistwar bann dimounn ki’nn fer erer, ki sa aprann nou lor Zeova? (Izai 55:7)

¹⁶ Labib montre nou enn lot fason ankor ki Zeova kontan nou. Labib rasir nou ki Zeova pa pou abandonn nou kan nou fer bann erer. Par exanp, bann Izraelit plizir fwa ti fer pese kont Zeova. Me kan zot ti repanti avek tou zot leker, Zeova ti pardonn zot. (Lir Izai 55:7.) Bann Kretien dan premie siek osi ti kone ki Bondie bien kontan zot. Par exanp, ti ena enn zom ki ti fer enn pese bien grav, me ki ti repanti. Lerla, zapot Pol ti ankouraz bann Kretien pou “pardonn li . . . ek rekonfort li.” (2 Kor. 2:6, 7; 1 Kor. 5:1-5) Li extraordiner ki Zeova pa rezet so bann serviter zis parski zot fer erer! Okontrer, Li ed zot avek boukou lamour ek Li koriz zot, pou ki zot kapav revinn so kamarad. Zeova promet ki Li pou pardonn tou bann peser ki repanti!​—Zak 4:8-10.

17. Kifer Labib li enn kado extraordiner?

¹⁷ Zeova inn donn nou enn zoli kado! Kifer Labib li extraordiner? Kouma nou’nn trouve, Labib montre nou ki Zeova ena sazes, Li zis, ek Li bien kontan nou. Sa liv-la montre nou ki Zeova anvi ki nou aprann konn Li. Li anvi ki nou vinn so kamarad.

18. Kouma nou kapav montre nou rekonesans pou “zoli don” ki Zeova inn donn nou?

¹⁸ Nou pa anvi bliye ki Labib se enn “zoli don” ki Zeova inn donn nou. (Zak 1:17) Alor, anou kontign montre nou rekonesans pou sa zoli kado-la. Nou kapav fer sa kan nou lir Labib ek nou reflesi lor la. Lerla, nou kapav sir ki Zeova pou beni nou bann zefor, ek ki nou “pou trouv konesans Bondie.”​—Prov. 2:5.