“Retourn ver Mwa”

 1. Ki Zeova resanti kan enn parmi so bann mouton retourne?

DAN lartik avan, nou ti trouve kouma Zeova konpar Limem ar enn bon berze ki pran swin sakenn parmi so bann mouton. Ek kan enn mouton perdi, Li al rod li. Kan bann Izraelit ti abandonn Zeova, Li ti dir zot: “Retourn ver mwa, ek mo pou retourn ver zot.” Nou kone ki Zeova ena mem santiman azordi, parski Li dir: “Mo pa sanze.” (Mal. 3:6, 7) Zezi ti dir ki Zeova ek bann anz extra kontan kan enn mouton ki’nn perdi retourne.​—Lik 15:10, 32.

 2. Ki nou pou gete dan sa lartik-la?

² Kouma nou kapav ed bann ki’nn elwagn zot ar Zeova? Anou get trwa lexanp ki Zezi inn done ki ansegn nou bann leson inportan dan sa domenn-la. Nou pou koz lor bann kalite ki nou bizin ena pou nou kapav ed bann inaktif. Ek nou pou gete kifer li vo lapenn ki nou soutenir zot.

3-4. Kifer sa madam ki mansione dan Lik 15:8-10 la ti fer boukou zefor pou rod so pies ki ti perdi?

³ Nou bizin fer boukou zefor pou rod bann ki anvi retourn ver Zeova. Zezi ti rakont zistwar enn madam ki ti perdi enn drachme, enn pies ki ena boukou valer. Parti pli inportan dan sa lexanp-la se bann zefor ki sa madam-la fer pou rod sa pies-la.​—Lir Lik 15:8-10.

⁴ Zezi dekrir osi seki sa madam-la ti resanti kan li ti retrouv so pies. Dan lepok Zezi, kan enn tifi dan Izrael ti marye, parfwa zour so maryaz, so mama ti donn li enn set ouswa enn lo dis drachme. Kitfwa sa pies ki ti perdi la ti bien spesial pou sa madam-la, parski li ti form parti sa set ouswa sa lo ki so mama ti donn li la. Madam-la ti preske sir ki pies-la ti tom anba. Alor, li ti alim enn lalanp ek li ti rod partou, me li pa ti trouv so pies. Kitfwa so lalanp delwil pa ti ekler ase for pou li trouv sa ti pies an arzan la. Finalman, li ti balie so lakaz an-antie. Lerla, li ti retrouv so pies dan lapousier. Pies-la ti pe briye dan lekleraz so lalanp. Li ti extra kontan! Li ti apel so bann kamarad ek so bann vwazin pou dir zot sa bon nouvel-la.

 5. Kifer sa demann boukou zefor pou rod bann inaktif?

⁵ Parey kouma nou finn aprann dan lexanp ki Zezi ti servi, kan nou perdi enn kitsoz, nou bizin fer boukou zefor pou rod li. Dan mem fason, nou bizin fer boukou zefor pou rod bann ki’nn aret servi Zeova. Kitfwa sa fer boukou lane ki zot pa vinn renion. Li posib ki zot finn al res dan enn landrwa kot bann frer ek ser pa mem konn zot. Me azordi, kitfwa sertin parmi sa bann inaktif-la vremem anvi retourn ver Zeova. Zot anvi rekoumans servi Zeova avek zot bann frer ek ser, me zot pa kapav fer sa san nou led.

 6. Kouma nou tou nou kapav ede pou rod bann inaktif?

⁶ Kisannla kapav ede pou rod bann inaktif? Nou tou nou kapav ede, ki li bann ansien, bann pionie, bann manb lafami, ouswa bann proklamater dan lasanble. Eski to ena enn kamarad ouswa enn fami ki’nn vinn inaktif? Eski to finn zwenn enn inaktif kan to ti pe prese? Si sa dimounn-la aksepte enn vizit, dir li ki to ti pou kontan donn so ladres ek so nimero telefonn bann ansien.

 7. Ki nou aprann ar lexanp enn ansien ki apel Thomas?

⁷ Se sirtou bann ansien ki ena responsabilite pou rod bann inaktif ki anvi retourn ver Zeova. Kouma zot kapav fer sa? Thomas,b enn ansien ki res Lespagn, ti ed plis ki 40 Temwin pou retourn ver Zeova. Thomas dir: “Premierman, mo demann bann frer ek ser si zot kone kotsa bann inaktif reste. Ouswa mo demann bann proklamater si zot konn sertin ki’nn aret vinn renion. Laplipar frer ek ser kontan kan mo demann zot sa, parski zot santi zot inplike dan sa travay-la. Plitar, kan mo vizit bann frer ek ser ki inaktif, mo pran nouvel zot zanfan ek bann lezot manb zot fami. Sertin inaktif ti abitie amenn zot zanfan renion, ek kitfwa sa bann zanfan-la ti bann proklamater. Zot osi zot bizin led pou retourn ver Zeova.”

 8. Dan lexanp garson ki’nn perdi ki trouv dan Lik 15:17-24, kouma papa-la tret so garson ki’nn retourn lakaz?

⁸ Ki bann kalite nou bizin ena si nou anvi ed bann ki anvi retourn ver Zeova? Anou gete ki nou kapav aprann ar parabol Zezi konsernan garson ki’nn perdi. (Lir Lik 15:17-24.) Dan sa lexanp-la, Zezi explike kouma finalman garson-la ti realize ki li ti bien bet, ek li ti desid pou retourn kot li. Papa garson-la ti galoupe pou al zwenn so garson ek ti may li pou montre ki kantite li kontan li. Garson-la ti santi li koupab akoz tou seki li ti fer ek li ti panse ki li pa ti merit lafeksion so papa. Li ti ouver so leker ar so papa ek so papa ti konpran so lapenn. Lerla, papa-la ti pran bann dispozision pou rasir so garson, pou montre li ki li bien kontan ki li’nn retourn lakaz. Papa-la pa ti tret li kouma enn travayer me kouma so garson ki li bien kontan. Pou akeyir so garson ek montre ki li kontan li, papa-la ti organiz enn fet ek ti donn li bann zoli linz.

 9. Ki bann kalite nou bizin ena pou nou kapav ed bann inaktif pou retourn ver Zeova? (Get lankadre “Kouma Nou Kapav Ed Bann Ki Anvi Retourne.”)

⁹ Zeova resanble sa papa ki dan sa lexanp-la. Li bien kontan nou bann frer ek ser ki inaktif ek Li anvi ki zot retourn ver Li. Kan nou imit Zeova, nou kapav ed zot pou retourne. Pou nou fer sa, nou bizin ena pasians, konpasion, ek lamour. Kifer nou bizin manifeste sa bann kalite-la, ek kouma nou kapav fer sa?

10. Kifer nou bizin ena pasians pou ed enn kikenn retourn ar Zeova?

¹⁰ Nou bizin ena pasians parski sa pran letan avan ki enn kikenn retourn ar Zeova. Boukou frer ek ser, ki ti inaktif avan, dir ki bann ansien ek lezot dan lasanble finn bizin vizit zot plizir fwa avan ki zot rekoumans servi Zeova. Enn ser ki apel Nancy ek ki res Lazi dir: “Enn bon kamarad dan lasanble ti ed mwa boukou. Li ti kontan mwa kouma enn gran ser. Li ti rapel mwa bann bon moman ki nou ti pase ansam. Li ti ekout mwa avek pasians kan mo ti exprim mo santiman, ek li pa ti ezite pou donn mwa bann konsey. Li ti enn bon kamarad ek li ti touletan pre pou ed mwa.”

11. Kifer nou bizin ena konpasion pou ed bann dimounn ki’nn blese lor plan afektif?

¹¹ Nou kapav konpar konpasion ar enn medsinn ki bien efikas ki kapav ed bann dimounn pou geri lor plan afektif. Sertin finn vinn inaktif parski enn kikenn dan lasanble ti ofans zot ek zot ankor santi zot blese ouswa ankoler. Akoz sa bann santiman-la, zot nepli anvi retourn ver Zeova. Sertin panse ki finn tret zot dan enn fason inzis. Alor, kitfwa zot bizin enn kikenn ki pou ekout zot ek konpran zot santiman. (Zak 1:19) María, ki enn moman ti inaktif, dir: “Mo ti bizin enn kikenn pou ekout mwa, rekonfort mwa, donn mwa bann bon konsey, ek ed mwa.”

12. Kifer nou kapav konpar lamour Zeova ar enn lakord?

¹² Labib konpar lamour ki Zeova ena pou so pep ar enn lakord. Dan ki sans lamour Zeova li kouma enn lakord? Anou pran enn lexanp: Fer koumadir to pe nwaye dan enn lamer ki bien move ek enn kikenn donn twa enn zile sovtaz. Pena dout ki to pou bien apresie so led, parski zile-la pou ed twa pou flote. Me enn zile sovtaz li pa ase pou ki to gagn lavi sov. Delo-la bien fre, ek to pou gagn lavi sov zis si to reisi rant dan enn bato. Alor, to bizin ki enn kikenn avoy twa enn lakord pou ris twa dan bato. Kan bann Izraelit ti elwagn zot ar Zeova, Li ti dir: “Mo finn kontign ris zot avek bann lakord . . . lamour.” (Oze 11:4) Azordi osi, Zeova ena mem santiman anver bann ki finn aret servi Li ek ki pe nwaye ar problem ek traka. Li anvi ki zot kone ki Li kontan zot, ek Li anvi ki zot vinn pros ar Li. Zeova kapav servi twa pou montre so lamour anver zot.

13. Kouma lexanp Pablo montre nou ki nou lamour kapav ed lezot pou retourn ver Zeova?

¹³ Li bien inportan ki to kontign dir bann inaktif ki Zeova kontan zot ek ki to montre zot ki twa osi to kontan zot. Pablo, ki nou ti mansione dan lartik avan, ti inaktif pandan plis ki 30 an. Li dir: “Enn zour, kan mo ti pe sorti lakaz gramatin, mo ti zwenn enn ser aze bien zanti. Li ti koz ar mwa avek boukou lamour. Mo ti koumans plore kouma enn zanfan. Mo ti dir li ki se Zeova ki ti avoy li pou koz ar mwa. Se sa moman-la ki mo ti desid pou retourn ver Zeova.”

14. Dapre Lik 15:4, 5, ki berze-la ti fer kan li ti retrouv so mouton?

¹⁴ Nou bizin kontign ed ek ankouraz bann inaktif mem apre ki zot finn retourn ver Zeova. Dan lexanp Zezi, garson ki ti perdi la ti soufer lor plan afektif. Kitfwa bann inaktif osi pe soufer lor plan afektif ek sa pou pran inpe letan avan ki zot geri. Kitfwa zot feb lor plan spiritiel akoz bann lexperyans ki zot inn fer dan lemond Satan. Alor, nou bizin ed zot pou fortifie zot lafwa an Zeova. Dan lexanp ki Zezi ti servi konsernan mouton ki ti perdi la, Zezi ti explike kouma sa berze-la ti met so mouton lor so zepol pou amenn li dan so troupo. Mem si berze-la ti deza pran boukou letan ek fer boukou zefor pou rod so mouton, li ti konpran ki li ti bizin kontign sarye li. Mouton-la pa ti ase for pou li marse par limem pou li retourn dan troupo.​—Lir Lik 15:4, 5.

15. Kouma nou kapav ed bann inaktif ki anvi retourn ver Zeova? (Get lankadre “Enn Zouti ki Ena Boukou Valer.”)

¹⁵ Kitfwa nou pou bizin pran boukou letan ek fer boukou zefor pou ed bann inaktif pou sirmont bann problem ki pe anpes zot servi Zeova. Me avek led lespri sin, Labib, ek bann piblikasion, nou pou kapav ed zot pou fortifie zot relasion avek Zeova. (Rom. 15:1) Kouma nou kapav fer sa? Enn ansien ki ena lexperyans dir: “Laplipar bann inaktif ki desid pou rekoumans servi Zeova bizin ki enn kikenn re-etidie Labib avek li.”c Alor, si bann ansien demann twa pou etidie avek enn inaktif ek ki to kapav fer li, aksepte sa privilez-la avek lazwa. Sa ansien-la dir osi: “Proklamater ki fer sa letid-la bizin vinn enn bon kamarad avek inaktif-la, enn kikenn ki li kapav fer konfians ek avek ki li kapav koze san ezite.”

16. Kouma nou kone ki bann anz ed nou pou rod bann inaktif?

¹⁶ Ena boukou lexperyans ki montre nou ki bann anz ed nou pou rod bann inaktif ki anvi retourn ver Zeova. (Rev. 14:6) Par exanp, enn frer inaktif ki apel Silvio ek ki res dan Ekwater, ti sipliy Zeova pou avoy enn kikenn pou ed li. Pandan ki li ti pe priye, kikenn ti pez sonet. De ansien ti devan so laport. Pandan sa vizit-la, bann ansien ti bien kontan pou ed li.

17. Ki nou pou resanti si nou ed bann inaktif?

¹⁷ Nou gagn boukou lazwa kan nou ed enn inaktif pou retourn ver Zeova. Salvador, enn pionie ki fer boukou zefor pou ed bann inaktif, dir: “Kan mo mazinn bann inaktif ki’nn retourn ver Zeova, mo telman kontan ki mo plore. Mo extra kontan ki mo kapav travay ansam avek Zeova pou ed enn parmi so bann serviter pou sorti dan lemond Satan ek pou retourn dan lasanble.”​—Zist. 20:35.

18. Si to enn inaktif, ki kitsoz to kapav sir?

¹⁸ Si to enn inaktif, to kapav sir ki Zeova ankor kontan twa. Li anvi ki to retourn ver Li. Me to ena bann zefor pou fer pou retourn ver Zeova. Parey kouma sa papa ki dan parabol Zezi la, Zeova pe atann twa retourne, ek Li pou bien kontan pou akeyir twa.