Eski To “Dispoze pou Obeir”?

 1. Kifer nou kapav gagn difikilte pou obeir?

ESKI parfwa to gagn difikilte pou obeir? Lerwa David osi ti gagn difikilte pou obeir. Akoz sa, li ti dir Zeova: “Donn mwa enn lespri dobeisans.” (Ps. 51:12) David ti kontan Zeova. Kanmem sa, parfwa li ti trouv sa difisil pou obeir, ek kitfwa nou osi nou gagn sa difikilte-la. Kifer? Premierman, akoz nou inparfe, dezobeisans form parti nou leritaz. Deziemman, Satan kontign pous nou pou rebel kont Zeova, parey kouma li’nn fer. (2 Kor. 11:3) Ek trwaziemman, nou pe viv dan enn lemond ki rebel, setadir “parmi bann dimounn ki dezobeir.” (Efe. 2:2) Akoz sa, nou bizin fer zefor pou lit kont nou linperfeksion, kont Satan, ek kont sa lemond-la. Ek si nou fer sa, nou pou kapav obeir Zeova ek bann dimounn ki Li’nn donn enn sertenn lotorite.

 2. Ki savedir “dispoze pou obeir”? (Zak 3:17)

² Lir Zak 3:17. Disip Zak ti dir ki bann dimounn ki ena sazes, zot “dispoze pou obeir.” Savedir ki nou bizin fer bann gran zefor pou obeir bann dimounn ki Zeova inn donn enn sertenn lotorite. Biensir, Zeova pa atann ki nou obeir bann dimounn ki demann nou pou dezobeir so bann lalwa.—Zist. 4:​18-20.

 3. Kifer Zeova anvi ki nou obeir bann ki ena lotorite?

³ Nou kapav trouv sa pli fasil pou obeir Zeova, ki obeir bann dimounn. Kifer? Parski Zeova touletan donn nou bann instriksion ki parfe. (Ps. 19:7) Parkont, bann dimounn ki ena lotorite, zot inparfe. Kanmem sa, Zeova inn donn enn sertenn lotorite nou bann paran, bann gouvernman, ek bann ansien. (Prov. 6:20; 1 Tes. 5:12; 1 Pier 2:​13, 14) Kan nou obeir zot, nou montre ki nou pe obeir Zeova. Anou gete kouma nou kapav obeir bann dimounn ki Zeova inn donn enn sertenn lotorite, mem si parfwa nou pa dakor ar zot, ouswa nou pa anvi swiv zot bann instriksion.

 4. Kifer boukou zanfan dezobeir zot paran?

⁴ Azordi, boukou zenn “dezobeir zot paran.” (2 Tim. 3:​1, 2) Kifer zot dezobeir? Sertin panse ki zot paran ipokrit, parski zot demann zot zanfan pou fer bann kitsoz ki zotmem zot pa fer. Ena lezot ki panse ki zot paran donn bann konsey ki initil, ki nepli lamod, ouswa ki tro strik. Zenn, eski twa osi to pans koumsa? Boukou zenn gagn difikilte pou obeir lalwa Zeova, ki dir: “Obeir zot paran parey kouma Lesegner anvi, parski sa li enn kitsoz ki drwat.” (Efe. 6:1) Ki kitsoz kapav ed twa pou obeir to paran?

 5. Kifer Zezi li pli bon lexanp lobeisans? (Lik 2:​46-52)

⁵ Zenn, to kapav aprann boukou lor lobeisans gras-a lexanp Zezi. (1 Pier 2:​21-24) Mem si Zezi ti parfe, ek ki so bann paran ti inparfe, li ti obeir zot, mem kan zot ti fer bann erer ouswa kan zot pa ti konpran li. (Ex. 20:12) Anou gete seki ti arive kan Zezi ti ena 12 an. (Lir Lik 2:​46-52.) Li ti al avek so bann paran dan Zerizalem. Me kan bann-la ti pe retourn lakaz, zot pa ti remarke ki Zezi pa ti avek zot. Sa ti responsabilite Zozef ek Mari pou verifie ki tou zot zanfan avek zot. Kan finalman zot ti trouv Zezi, Mari ti met tor lor Zezi parski li ti res Zerizalem. Zezi ti kapav dir zot ki se zot ki ti an-tor! Me olie sa, li ti reponn so bann paran avek respe, ek li ti donn zot enn ti lexplikasion. Selman, Zozef ek Mari “pa ti pe konpran seki li ti pe dir zot.” Me kanmem sa, Zezi “ti kontign obeir zot.”

6-7. Ki kitsoz kapav ed bann zenn pou obeir zot bann paran?

⁶ Zenn, eski parfwa to gagn difikilte pou obeir to bann paran kan zot fer bann erer, ouswa kan zot pa konpran twa? Anou gete seki kapav ed twa. Premierman, reflesi lor seki Zeova resanti. Labib dir nou ki kan to obeir to bann paran, “sa fer plezir Lesegner.” (Kol. 3:20) Zeova kone ki to bann paran parfwa pa konpran twa, ouswa parfwa zot met bann lalwa ki difisil pou obeir. Me kan to fer zefor pou obeir zot, sa fer leker Zeova kontan.

⁷ Deziemman, reflesi lor seki to bann paran resanti. Kan to obeir to bann paran, zot pou ere ek zot pou fer twa plis konfians. (Prov. 23:​22-25) Lerla, to pou vinn pli pros ar zot. Enn frer ki apel Alexandre ek ki res Belzik, dir: “Kan mo’nn koumans fer seki mo bann paran ti demann mwa, nou ti vinn pli pros ek nou ti pli ere.”b Trwaziemman, si to obeir to bann paran aster-la, sa pou ed twa dan lavenir. Paulo, ki res Brezil, dir: “Kan mo’nn aprann pou obeir mo bann paran, sa finn ed mwa pou obeir Zeova ek bann dimounn ki ena lotorite.” Zenn, Labib donn twa enn bon rezon pou obeir to bann paran. Li dir: “Pou ki tou kapav mars bien pou twa ek ki to res lontan lor later.”—Efe. 6:​2, 3.

 8. Kifer boukou zenn obeir zot paran?

⁸ Boukou zenn inn gagn bann bienfe kan zot inn obeir zot paran. Luiza, ki res Brezil, pa ti konpran kifer li pa ti gagn drwa ena enn portab, parski laplipar zenn so laz ti ena enn portab. Me apre, li’nn konpran ki se parski so bann paran ti pe protez li. Li’nn konpran ki kan li obeir so bann paran, se pou so prop dibien parski bann-la kone seki pli bon pou li. Elizabeth, enn zenn ser ki res Letazini, parfwa gagn difikilte pou obeir so bann paran. Li dir: “Kan mo pa konpran kifer mo bann paran inn met enn lalwa, mo reflesi lor bann lezot lalwa ki zot inn deza mete ar mwa ek kouma sa inn protez mwa.” Monica, ki res Armeni, dir ki li pli ere kan li obeir so bann paran, ki kan li dezobeir zot.

 9. Ki kitsoz boukou dimounn panse lor bann lalwa?

⁹ Labib dir ki bann gouvernman, zot “bann lotorite ki diriz nou.” (Rom. 13:1) Boukou dimounn dakor ki nou bizin bann gouvernman, ek kitfwa zot obeir sertin lalwa ki sa bann gouvernman-la mete. Selman, kitfwa zot pa obeir bann lalwa ki zot pa kontan, ouswa ki zot trouv inzis. Par exanp, dan enn pei Lerop, boukou dimounn dir ki li normal ki zot pa pey bann tax ki zot panse inzis. Se pou sa rezon-la ki dan sa pei-la, bann dimounn pey zis de-tier bann tax ki zot sipoze pey gouvernman.

10. Kifer nou bizin obeir bann lalwa mem si nou pa kontan zot?

¹⁰ Labib dir ki se Satan ki pe kontrol bann gouvernman, ki bann gouvernman fer bann dimounn soufer, ek ki biento Bondie pou detrir bann gouvernman. (Ps. 110:​5, 6; Ekle. 8:9; Lik 4:​5, 6) Selman, Labib dir osi ki bann “ki opoz [zot] ar lotorite, [zot] al kont dispozision Bondie.” Pou linstan, Zeova pe permet ki bann gouvernman dirize parski gras-a zot ena lord. Ek Li atann ki nou obeir bann gouvernman. Akoz sa, nou bizin “rann sakenn seki zot bizin gagne: seki demann tax, donn li tou sort kalite tax; seki demann respe, donn li respe; seki demann loner, donn li loner.” (Rom. 13:​1-7) Si nou trouve ki enn lalwa li pa lozik, li inzis, ouswa li fer nou depans boukou kas, mazine ki nou bizin obeir Zeova. Ek Zeova demann nou pou obeir bann gouvernman, tanki zot pa al kont so bann lalwa.—Zist. 5:29.

11-12. Dapre Lik 2:​1-6, ki lalwa Zozef ek Mari ti bizin obeir mem si sa ti difisil, ek ki rezilta sa finn ena? (Get zimaz osi.)

¹¹ Zozef ek Mari ti obeir bann lotorite, mem kan sa ti bien difisil. (Lir Lik 2:​1-6.) Anou gete seki nou kapav aprann ar zot lexanp. Mari ti ansint depi apepre nef mwa, kan li ek Zozef ti bizin fer enn kitsoz bien difisil. Lanperer Romin Ogis ti donn lord pou ki fer enn resansman. Akoz sa, Zozef ek Mari ti bizin retourn Betleem. Sa ti enn vwayaz apepre 150 kilomet, ek zot ti bizin travers bann kolinn. Sa ti bien difisil, sirtou pou Mari. Kitfwa zot ti trakase pou lasante Mari ek pou zot ti baba ki pa ti ankor ne. Sey mazine seki ti kapav arive si Mari ti akouse pandan sa vwayaz-la! Anplis, sa baba ki ti dan so vant la ti pou vinn Lemesi. Eski Zozef ek Mari ti servi sa kouma enn pretext pou ki zot pa obeir gouvernman Romin?

¹² Mem si Zozef ek Mari ti bien trakase, zot ti obeir lalwa gouvernman Romin. Ek Zeova ti beni zot lobeisans. Zot vwayaz ziska Betleem ti bien pase, Mari ti donn nesans enn baba ki ti an bonn sante, ek zot ti mem ede pou realiz enn profesi Labib.—Mish. 5:2.

13. Kan nou obeir lalwa, kouma sa kapav ed nou bann frer ek ser?

¹³ Kan nou obeir bann lotorite, nou gagn bann bienfe ek lezot osi gagn bann bienfe. Kifer nou dir sa? Parski kan bann dimounn dezobeir bann lalwa, zot gagn bann konsekans. Me nou, parski nou obeir bann lotorite, nou pa gagn sa bann konsekans-la. (Rom. 13:4) Kan sakenn parmi nou obeir bann lotorite, sa ena enn lefe osi lor fason ki bann dimounn konsider bann Temwin Zeova. Par exanp, finn gagn plizir lane dan Nizeria, bann solda ti rant dan enn Lasal pandan enn renion. Zot ti pe rod bann dimounn ki ti pe fer manifestasion pou pa pey tax. Selman, ofisie ki ti an-sarz la ti dir so bann solda sorti dan Lasal. Li ti dir: “Bann Temwin pa pou al manifeste pou pa pey tax.” Sak fwa ki to obeir lalwa, to ede pou ki bann Temwin Zeova ena enn bon repitasion. Ek enn zour, kitfwa sa repitasion-la pou kapav protez to bann frer ek ser!—Mat. 5:16.

14. Ki kitsoz ti ed enn ser pou obeir bann lotorite?

¹⁴ Selman, li kapav arive ki parfwa nou gagn difikilte pou obeir bann lotorite. Joanna, enn ser ki res Letazini, dir: “Mo ti trouv sa difisil pou obeir gouvernman, parski bann manb mo fami ti sibir bann linzistis akoz bann lotorite.” Selman, Joanna ti fer bann gro zefor pou sanz so fason panse. Premierman, li ti aret lir bann linformasion lor bann rezo sosial, ki ti kapav fer li pans bann kitsoz negatif lor gouvernman. (Prov. 20:3) Deziemman, olie ki li atann enn sanzman politik, li ti priye pou li ena plis konfians an Zeova. (Ps. 9:​9, 10) Ek trwaziemman, li ti lir bann lartik dan nou bann piblikasion ki koz lor netralite. (Zan 17:16) Azordi, Joanna santi li anpe, parski li respekte ek obeir bann lotorite.

15. Kifer nou kapav gagn difikilte pou obeir bann instriksion lorganizasion Zeova?

¹⁵ Zeova demann nou pou “obeir bann ki pe diriz” lasanble. (Ebre 13:17) Mem si nou Sef, Zezi, li parfe, bann dimounn ki li servi pou diriz lasanble, zot inparfe. Akoz sa, nou kapav gagn difikilte pou obeir zot, sirtou kan zot demann nou pou fer enn kitsoz ki nou pa anvi fer. Enn fwa, lapot Pier osi ti gagn difikilte pou obeir. Kan enn anz ti demann li pou manz bann zanimo ki inpir dapre Lalwa Moiz, Pier trwa fwa ti refize. (Zist. 10:​9-16) Kifer? Parski sa instriksion-la pa ti lozik pou li, ek li ti abitie fer bann kitsoz dan enn lot fason. Si Pier inn gagn difikilte pou obeir instriksion enn anz ki parfe, fode pa nou etone si parfwa nou gagn difikilte pou obeir instriksion bann zom ki inparfe!

16. Mem si Pol ti bizin swiv enn instriksion ki kitfwa li ti trouv inzis, ki li ti fer? (Zist. 21:​23, 24, 26)

¹⁶ Lapot Pol ti “dispoze pou obeir,” mem kan li ti gagn enn instriksion ki kitfwa li ti trouv inzis. Bann Kretien Zwif ti tann dir ki Pol ti pe ankouraz bann Zwif “pou abandonn Lalwa Moiz.” (Zist. 21:21) Bann ansien dan Zerizalem ti demann Pol pou pran kat dimounn ar li, pou li al pirifie li dan tanp. Sa ti pou montre ki li ti pe swiv Lalwa. Selman, Pol ti kone ki bann Kretien ti nepli bizin swiv Lalwa Moiz. Anplis, li pa ti fer nanye demal. Kanmem sa, Pol ti swiv konsey bann ansien. Li “ti pran bann zom-la ek ti pirifie limem dapre seremoni pirifikasion ansam avek zot.” (Lir Zistwar Bann Zapot 21:​23, 24, 26.) Pol ti obeir instriksion ki li ti gagne, ek sa finn ede pou ki ena linite parmi bann Kretien.—Rom. 14:​19, 21.

17. Ki nou kapav aprann ar lexanp Stephanie?

¹⁷ Enn ser ki apel Stephanie, ti gagn difikilte pou aksepte enn desizion ki bann frer responsab ti pran. So mari ek li ti pe servi dan enn group ki koz enn lot lang, ek zot ti bien zwaye dan zot servis. Selman, kan biro nasional ti desid pou ferm group-la, sa koup-la ti bizin retourn dan enn lasanble ki koz zot lang maternel. Stephanie dir: “Mo ti extra tris, ek mo pa ti dakor ki ti bizin led dan enn lasanble ki koz nou lang maternel.” Kanmem sa, Stephanie ti desid pou soutenir sa desizion-la. Li dir: “Avek letan, mo’nn konpran ki bann frer ti pran enn bon desizion. Dan nou nouvo lasanble, boukou frer ek ser tousel dan laverite. Alor, nou’nn vinn enn fami pou zot ek nou’nn bien ankouraz zot. Mo pe osi fer letid enn ser ki ti inaktif avan. Ek aster-la, mo ena plis letan pou mo letid personel.” Stephanie dir: “Mo konsians kler, parski mo kone ki mo’nn fer mo maximum pou obeir desizion ki bann frer inn pran.”

18. Ki bienfe nou gagne kan nou obeir?

¹⁸ Nou kapav aprann pou obeir. Zezi “ti aprann lobeisans,” pa kan tou ti korek dan so lavi, me plito “ar bann kitsoz ki ti fer li soufer.” (Ebre 5:8) Parey kouma Zezi, bien souvan se kan nou gagn bann difikilte ki nou aprann pou obeir. Par exanp, kan pandemi COVID-19 ti fek koumanse ek ki ti demann nou pou aret al Lasal ek aret prese lakaz-lakaz, kitfwa nou ti gagn difikilte pou obeir! Selman, nou lobeisans inn protez nou, li’nn ede pou ki ena linite dan lasanble, ek li’nn fer plezir Zeova. Azordi, nou pare pou obeir ninport ki instriksion ki nou pou gagne pandan gran soufrans. Sa bann instriksion-la kapav sov nou lavi!—Zob 36:11.

19. Kifer to anvi obeir?

¹⁹ Dan sa lartik-la, nou’nn trouve ki nou gagn boukou benediksion kan nou obeir. Selman, rezon prinsipal pou kifer nou obeir Zeova, se parski nou kontan Li ek nou anvi fer Li plezir. (1 Zan 5:3) Zame nou pa pou kapav retourn Zeova tou seki Li’nn fer pou nou! (Ps. 116:12) Selman, nou kapav obeir Li ek bann dimounn ki Li’nn donn enn sertenn lotorite. Si nou fer sa, nou pou montre ki nou ena sazes, ek Zeova kontan bann dimounn ki ena sazes.—Prov. 27:11.