“Zenfant, obeir zot parent”

“Zenfant, obeir zot parent pareil couma le Seigneur inn dire, parski sa li enn kitsoz ki droite.”—Éphésiens 6:1.

 1. Couma l’obeissance kapav enn protection?

L’obeissance, li bien important. Kitfois si nou encore vivant zordi, c’est parski nou finn obeir, alors ki lezot dimoune finn perdi la vie parski zot finn desobeir. Mais obeir ki kitsoz? Obeir par exemple nou lekor, nou lekor ki Bondié finn ‘faire dan enn fason extraordinaire’ ek ki donne nou bann l’avertissement. (Psaume 139:14) Anou prend enn l’exemple. Dan certain pays, ena bann tempete ki dangereux ek bann dimoune koné ki danger sa representé. Kan bann dimoune trouve bann gros nuage noir dan le ciel, kan zot tann bann gros-gros l’orage ek zot trouve bann zeclair, c’est bann signe ki averti zot pou al cachiette. Zot al rod enn place kot zot pou en securité avant ki enn tempete vini, pangar zeclair ou-soit la grêle faire zot perdi la vie.

 2. Kifer bann zenfant bizin gagne bann l’avertissement, ek kifer zot bizin obeir zot parent?

² Ou jeune, ou bizin gagne bann l’avertissement lor bann danger ki ena dan la vie, ek ou bann parent ena responsabilité pou donne ou sa bann l’avertissement-la. Kitfois ou rappel ki zot ti habitué dire ou: “Pa touche sa four-la, li chaud.” Si ou ti pré kot enn la-riviere, zot ti donne ou sa l’avertissement-la: “Pa al trop pré kot de l’eau, li dangereux.” “Guette deux coté avant to traverse chemin.” Malheureusement, bann zenfant finn blessé ou-soit mem finn mort parski zot pa finn obeir. Obeir ou bann parent c’est enn “kitsoz ki droite”—ki normal ek approprié. Li aussi sage pou obeir. (Proverbes 8:33) Enn lot verset la Bible dire ki sa “faire [nou] Seigneur [Jésus Christ] plaisir.” Oui, Bondié donne ou l’ordre pou obeir ou bann parent.—Colossiens 3:20; 1 Corinthiens 8:6.

L’obeissance faire nou gagne bann bienfait ki pou dure pou touletan

 3. Ki été “vrai la-vie” pou la plupart parmi nou, ek couma bann zenfant kapav ena l’espoir pou gagne sa la-vie-la?

³ Kan ou obeir ou bann parent, sa protege ou ‘la-vie asterla,’ mais sa kapav aussi permette ou profite la-vie “ki pou vini,” ki la Bible appel “vrai la-vie.” (1 Timothée 4:8; 6:19) Pou la plupart parmi nou, vrai la-vie c’est la vie eternel ki nou pou gagné lor la terre dan le monde nouveau ki Bondié inn promette bann dimoune ki reste fidel ar so bann commandement. Enn parmi bann commandement ki bien important dire: “ ‘Honore to papa ek to mama’; sa-mem premier commandement ki vinn avek enn promesse: ‘Pou ki tou kapav marche bien pou toi ek ki to vive longtemps lor la terre.’ ” Alors, si ou obeir ou bann parent, ou pou heureux. Ou l’avenir pou assuré ek ou pou kapav gagne la vie eternel dan Paradi lor la terre!—Éphésiens 6:2, 3.

 4. Couma bann zenfant kapav honore Bondié ek gagne bann bienfait kan zot faire sa?

⁴ Kan ou obeir ou bann parent, ou pé honore zot ek ou pé honore Bondié aussi parski c’est Li ki finn donne ou l’ordre pou obeir zot. En mem temps, ou gagne bann bienfait. La Bible dire: “Moi Jéhovah, mo-mem to Bondié, mo-mem ki enseigne toi pou to profit.” (Isaïe 48:17; 1 Jean 5:3) Ki profit ou gagné kan ou obeir? Sa faire ou papa ek ou mama content. En retour zot pou montré zot satisfaction kan zot pou rann ou la-vie pli heureux. (Proverbes 23:22-25) Mais seki pli important, c’est ki ou l’obeissance faire ou Papa ki dan le ciel content, ek Li pou recompense ou dan bann fason extraordinaire! Anou guetté couma Jéhovah ti beni ek ti protege Jésus, ki ti dire lor li-mem: “Mo faire toujours seki faire Li plaisir.”—Jean 8:29.

Jésus ti faire so travail bien, couma bizin

 5. Ki bann raison nou ena pou pensé ki Jésus ti faire so travail bien, couma bizin?

⁵ Jésus ti premier zenfant Marie. Joseph, so papa adoptif ti enn charpentier. Jésus aussi ti vinn enn charpentier—surement li ti aprann sa metier-la ar Joseph. (Matthieu 13:55; Marc 6:3; Luc 1:26-31) Ki qualité charpentier ou pensé Jésus ti été? Kan li ti dan le ciel, avant ki Bondié ti transfere so la-vie dan ventre Marie par enn mirak, Jésus, en tant ki la sagesse personnifié, ti dire: “Mo ti vinn couma enn zouvrier qualifié a coté [Bondié], ek mo ti vinn sa kikenn ki Li ti bien content-la, jour apré jour.” Kan li ti dan le ciel, Jésus ti faire so travail couma bizin ek Bondié ti donne li so faveur. Eski ou pa pensé ki, kan li ti vinn lor la terre aussi, li ti travail dur pou vinn enn bon zouvrier, enn bon charpentier?—Proverbes 8:30; Colossiens 1:15, 16.

 6. (a) Kifer ou pensé Jésus ti aide so bann parent dan lakaz kan li ti jeune? (b) Dan ki fason bann zenfant kapav imite Jésus?

⁶ Nou sur ki, kan Jésus ti enn zenfant, parfois li ti al joué, pareil couma la Bible dire bann zenfant ti faire dan so lepok. (Zekaria 8:5; Matthieu 11:16, 17) Pourtant, ou kapav sur ki Jésus ti ena bann l’ouvrage lakaz pou faire en plus ki li ti bizin aprann metier charpentier avek Joseph. Kifer? Parski li-mem ti pli grand kot li ek so famille pa ti riche. Plitar, Jésus ti vinn enn predicateur ek li ti consacré so la-vie pou so ministere ziska ki li ti mem sacrifié so confort personnel. (Luc 9:58; Jean 5:17) Eski ou trouvé couma ou kapav imite Jésus? Eski ou bann parent demann ou pou nettoye ou la-chambre ou-soit pou faire lezot l’ouvrage? Eski zot encourage ou pou adore Bondié, par exemple kan zot demann ou pou assisté reunion ek partage ou bann croyance avek lezot dimoune? Dapré ou, kan Jésus ti jeune, couma li ti pou reagir si ti demann li pou faire sa bann kitsoz-la?

Enn etudiant la Bible ki serieux ek enn bon enseignant

 7. (a) Avek kisannla kitfois Jésus ti voyagé pou Pâque? (b) Kot Jésus ti été kan lezot ti lor chemin pou retourne lakaz, ek ki li ti pé faire la-bas?

⁷ Dan enn famille israélite, tou bann garson ek bann zom ti bizin obeir l’ordre pou al adore Jéhovah dan so temple pendant trois fête ki bann Juif ti faire. (Deutéronome 16:16) Kan Jésus ti ena 12 an, li possible ki tou so famille ti al Jérusalem pou fête Pâque. Surement so bann demi-frere ek demi-soeur aussi ti faire sa voyage-la. Kitfois parmi bann ki ti faire sa voyage-la ensam avek zot, ti ena Salomé, ki nou pensé, ti soeur Marie. Ti ena aussi Zébédée, mari Salomé ek zot bann garson, Jacques ek Jean, ki plitar ti vinn bann zapotre Jésus.a (Matthieu 4:20, 21; 13:54-56; 27:56; Marc 15:40; Jean 19:25) Kan zot ti pé retourne lakaz, kitfois Joseph ek Marie ti pensé ki Jésus ti avek bann lezot membre la famille, a cause sa-mem zot pa ti’nn remarké dé-suite ki li pa ti là. Trois jour plitar, kan finalement Marie ek Joseph ti reussi trouve Jésus, li ti dan temple, “li ti pé assizé au milieu bann enseignant, li ti pé ecoute zot ek li ti pé pose zot question.”—Luc 2:44-46.

 8. Ki Jésus ti faire dan temple, ek kifer bann ki ti ecoute li, ti etonné?

⁸ Dan ki sens eski Jésus ti pé ‘pose question’ bann enseignant? Li possible ki li pa ti pé pose bann question zis par curiosité ou-soit zis pou gagne bann renseignement. Mot grec ki servi dan sa verset-la kitfois ti ena enn rapport avek bann question ki posé dan la cour. Sa faire nou pense enn avocat dan enn partie adverse ki pose bann question enn temoin (appel sa enn contre-interrogatoire). Oui, alors ki Jésus ti encore jeune, li ti’nn vinn enn etudiant la Bible ki ti etonne bann enseignant religieux ki ti bien qualifié! La Bible dire: “Tou bann ki ti pé ecoute li ti reste etonné par so l’intelligence ek par so bann reponse.”—Luc 2:47.

 9. Couma ou kapav suive l’exemple Jésus ek etudié la Bible ou aussi?

⁹ Dapré ou, alors ki Jésus ti encore jeune, couma li ti kapav etonne bann enseignant ki ti bien qualifié par so connaissance lor la Bible? Bien-sur li ti ena chance pou ena bann parent ki ti ena la crainte pou Bondié ek ki ti enseigne li bann la-loi Bondié depuis tipti. (Exode 12:24-27; Deutéronome 6:6-9; Matthieu 1:18-20) Nou kapav sur ki Joseph ti amenn Jésus dan synagogue kot ti lire ek ti explik bann l’Ecriture sacré. Eski ou aussi ou ena chance pou ena bann parent ki etudié la Bible avek ou ek ki amenn ou reunion? Eski ou apprecié zot zeffort, pareil couma Jésus ti apprecié zeffort so bann parent? Eski ou partage avek lezot seki ou aprann, pareil couma Jésus ti faire?

Jésus ti soumette

10. (a) Kifer bann parent Jésus ti bizin koné kot-sa li ti été? (b) Ki bon l’exemple Jésus inn laissé pou bann zenfant?

¹⁰ Couma ou pensé Marie ek Joseph ti été kan zot ti trouve Jésus dan temple finalement apré trois jour? Nou sur ki zot ti bien soulagé. Mais Jésus li, li ti etonné ki so bann parent pa ti koné kot li ti été. Zot toulé-deux ti koné ki Jésus ti’nn né par enn mirak. En plus, mem si zot pa ti konn tou bann detail, surement zot ti ena enn ti l’idée ki enn jour li ti pou vinn enn Sauveur ek Chef dan Royaume Bondié. (Matthieu 1:21; Luc 1:32-35; 2:11) A cause sa Jésus ti demann zot: “Kifer eski zot ti bizin rod moi? Eski zot pa ti koné ki mo bizin dan lakaz mo Papa?” Pourtant, Jésus ti obeir so bann parent ek li ti retourne Nazareth avek zot. La Bible dire: “Li ti contigne soumette ar zot.” En plus, “so mama ti garde bien tou sa bann parole-la dan so leker.”—Luc 2:48-51.

11. Ki leson lor l’obeissance ou kapav aprann ar l’exemple Jésus?

¹¹ Eski ou trouve sa facile pou imite Jésus ek pou obeir ou bann parent touletan? Ou-soit eski ou ena l’impression ki souvent zot pa comprend la vie ki ena dan le monde zordi ek ki ou pli koné ki zot? Li vrai ki dan certain domaine li possible ki ou konn plus ki zot, par exemple, kitfois ou konn servi enn telephone portable ou-soit enn l’ordinateur, ou-soit lezot gadget modern ki ena zordi, pli bien ki zot. Mais reflechi lor l’exemple Jésus ki ti etonne bann enseignant bien qualifié par “so l’intelligence ek par so bann reponse.” Surement ou pou d’accord ki, comparé ar Jésus, ou pa konn beaucoup kitsoz. Pourtant Jésus ti soumette ar so bann parent. Sa pa vedir automatiquement ki li ti toujours d’accord avek zot bann decision. Mais, “li ti contigne soumette ar zot,” ek li ti contigne faire sa pendant tou so l’adolescence. Ki leson ou pensé ou kapav tiré ar so l’exemple?—Deutéronome 5:16, 29.

Parfois li difficile pou obeir

12. Couma l’obeissance kapav sap ou la-vie?

¹² Li pa toujours facile pou obeir. C’est seki nou trouvé kan nou guette seki ti arrive deux jeune tifi, ena deux-trois l’année. Zot ti pé al traverse enn l’autoroute six lane au lieu ki zot ti passe par enn passerelle. Alors ki zot camarade Jean ti pé monté pou prend passerelle, zot ti criyé li: “Allé Jean, vini. To pou traverse avek nou, pa vrai?” Mais kan Jean ti hesité, alors enn parmi sa bann tifi-la ti sikann li: “Toi to enn capon toi!” Jean pa ti peur pou traverse chemin, mais li ti dire zot: “Mo bizin obeir mo mama.” Enn tipé apré, Jean ti tann enn grand coute frein, ek letan li ti guette en-bas, li ti trouve enn l’auto tape ar sa deux tifi-la. Enn ladan ti mort, ek lot-la ti tellement blessé ki ti bizin coupe enn so lipié. Mama sa deux tifi-la, ki ti bien dire zot passe par passerelle, plitar ti dire mama Jean: “Mo ti pou bien content ki mo bann tifi ti obeissant pareil couma ou garson!”—Éphésiens 6:1.

13. (a) Kifer ou bizin obeir ou bann parent? (b) Kan eski enn zenfant pa pou obeir so bann parent?

¹³ Kifer Bondié dire: “Zenfant, obeir zot parent”? Parski kan ou obeir ou bann parent, ou pé obeir aussi Bondié. En plus, ou bann parent ena plus l’experience ki ou. C’est seki nou trouvé dan sa accident ki nou fek raconté-la. Cinq an avant ki sa ti arrivé, mama Jean ti ena enn camarade ek sa camarade-la so garson ti mort dan enn accident kan li ti essaye traverse sa mem l’autoroute-la! Li vrai ki li pa toujours facile pou obeir ou bann parent, mais c’est seki Bondié demann ou faire. Parkont, si ou bann parent ou-soit lezot dimoune demann ou pou koz menti, pou kokin ou-soit pou faire lezot kitsoz ki Bondié condamné, ou bizin “obeir Bondié couma enn chef plutot ki bann zom.” A cause sa-mem ki, apré ki la Bible dire “obeir zot parent,” li ajouté, “couma le Seigneur inn dire.” Sa vedir ki ou bizin obeir ou bann parent dan tou kitsoz ki en accord avek bann la-loi Bondié.—Actes 5:29.

14. Kifer li pli facile pou enn dimoune parfait obeir, mais mem sa, kifer enn dimoune parfait bizin aprann l’obeissance?

¹⁴ Eski ou pensé ki, si ou ti parfait, setadir, “pur, separé ar bann dimoune ki faire peché” couma Jésus ti été, li ti pou toujours facile pou obeir ou bann parent? (Hébreux 7:26) Si ou ti parfait, ou pa ti pou ena tendance pou faire seki mauvais, couma asterla. (Genèse 8:21; Psaume 51:5) Mais, mem Jésus ti’nn bizin aprann bann leson lor l’obeissance. La Bible dire: “Mem si [Jésus] ti Garson Bondié, li ti aprann l’obeissance par bann kitsoz ki li ti enduré.” (Hébreux 5:8) Couma bann souffrance ti aide Jésus pou aprann l’obeissance, enn kitsoz ki jamais li pa ti’nn bizin aprann dan le ciel?

15, 16. Couma Jésus ti aprann l’obeissance?

¹⁵ Grace a bann instruction ki Jéhovah ti donne zot, Joseph ek Marie ti protege Jésus kont bann danger kan li ti encore zenfant. (Matthieu 2:7-23) Mais plitar, Bondié ti arrete protege Jésus dan enn fason surnaturel. Jésus ti tellement souffert lor plan moral ek physik, ki la Bible dire ki li “ti faire bann supplication ek aussi bann demande . . . , li ti criyé fort ek li ti ploré.” (Hébreux 5:7) Kan eski sa ti arrivé?

¹⁶ Sa ti arrivé surtout dan bann dernier l’heure ki Jésus ti passé lor la terre, kan Satan ti faire tou seki li ti kapav pou pousse Jésus pou desobeir. Jésus ti bien bouleversé parski li ti pou mort couma enn criminel ek sa ti pou kapav ena enn mauvais l’effet lor reputation so Papa. Tellement sa ti tracasse-li ki “li ti contigne prié [dan jardin Gethsémané] ek so transpiration ti vinn couma bann goutte di-sang ki ti pé tombe enba.” Inpé plitar, kan bannla ti mette li lor enn poteau, sa ti faire li tellement souffert ki “li ti criyé fort ek li ti ploré.” (Luc 22:42-44; Marc 15:34) C’est coumsa ki li ti “aprann l’obeissance par bann kitsoz ki li ti enduré” ek lerla li’nn faire leker so Papa content. Zordi Jésus dan le ciel, li comprend nou kan nou souffert ek kan nou bizin lutté pou obeir.—Proverbes 27:11; Hébreux 2:18; 4:15.

Aprann pou obeir

17. Couma nou bizin considere discipline ki nou gagné?

¹⁷ Kan ou bann parent discipline ou, sa montré ki zot envie seki pli bon pou ou, ki zot content ou. La Bible pose sa question-la: “Ki sa garson ki so papa pa discipliné-la?” Eski li pa ti pou triste si ou bann parent pa ti ena assez l’amour pou ou pou prend la peine pou discipline ou? Li pareil, c’est parski Jéhovah content ou ki Li discipline ou. “Li vrai ki tou discipline kan nou pé gagne li pa parette enn kitsoz ki donne la joie, mais enn kitsoz ki triste; pourtant plitar pou bann ki li finn formé, li rapporte enn fruit la paix, setadir la justice.”—Hébreux 12:7-11.

18. (a) Kan enn parent discipline so zenfant avek amour, ki sa montré? (b) Dapré seki ou’nn remarké, kan enn dimoune finn gagne enn discipline coumsa, ki bann l’effet positif sa finn ena lor li?

¹⁸ Jésus ti prend l’exemple enn lé-roi ki ti règne en Israël dan le passé ek ki ti ena enn grand sagesse. Sa lé-roi-la ti montré ki li necessaire ki bann parent discipline zot zenfant avek amour. Salomon ti ecrire: “Enn kikenn ki hesité pou servi so baton, ena la haine pou so garson, mais enn kikenn ki content so garson, rod li avek discipline.” Salomon ti mem dire ki kan enn dimoune gagne discipline avek amour, li kapav sap dan la mort. (Proverbes 13:24; 23:13, 14; Matthieu 12:42) Enn soeur rappel ki, kan li ti encore zenfant ek kan li ti faire mauvais pendant reunion, so papa ti dire li ki li pou corrige li kan zot pou rente lakaz. Zordi, li garde enn bon souvenir so papa ki’nn discipline li avek amour, parski sa inn donne li enn bon formation dan so la-vie.

19. Kifer surtout ou bizin obeir ou bann parent?

¹⁹ Si ou ena bann parent ki content ou assez pou prend le temps pou discipline ou avek amour, alors ou kapav reconnaissant envers zot. Obeir zot, pareil couma nou Seigneur Jésus ti obeir so bann parent, Joseph ek Marie. Mais obeir zot surtout parski ou Papa ki dan le ciel, Jéhovah demann ou pou faire sa. Lerla, ou pou gagne bann bienfait ek ‘tou pou kapav marche bien pou ou ek ou pou vive longtemps lor la terre.’—Éphésiens 6:2, 3.

[Note]

Couma ou pou reponn?

• Ki bienfait bann zenfant kapav gagné kan zot obeir zot parent?

• Couma Jésus inn donne nou l’exemple kan li ti obeir so bann parent?

• Couma Jésus ti aprann l’obeissance?

[Zimage, page 20]

Kan Jésus ti ena douze an, li ti ena enn bon connaissance lor bann l’Ecriture