“Gard Zot Bon Sans, ek Res lor Zot Gard”

 1. Ki Zezi ti dir so bann disip konsernan lafin, ek ki li ti ankouraz zot pou fer?

DETRWA zour avan lamor Zezi, kat parmi so bann disip ti poz li sa kestion-la: “Ki sign pou montre . . . peryod lafin sa lemond-la?” (Mat. 24:3) So bann disip pa ti kone kan Zerizalem ek so tanp ti pou detrir. Kitfwa se akoz sa ki zot ti poz Zezi sa kestion-la. Kan Zezi ti reponn zot, li pa ti koz zis lor destriksion Zerizalem ek so tanp, me li ti koz osi lor “peryod lafin sa lemond-la.” Azordi, nou pe viv dan sa lepok-la. Zezi ti dir: “Konsernan sa zour-la ouswa sa ler-la, personn pa kone, ni bann anz dan lesiel, ni Garson-la, me zis Papa-la.” Apre sa, li ti ankouraz so bann disip pou “kontign veye.”​—Mark 13:32-37.

 2. Kifer bann Kretien dan premie siek ti bizin res lor zot gard?

² Bann Kretien Zwif dan premie siek ti bizin res lor zot gard pou ki zot kapav sap zot lavi. Zezi ti dir so bann disip ki kitsoz ti pou montre zot ki Zerizalem ti pou detrir. Li ti dir: “Kan zot pou trouv Zerizalem antoure par bann larme, zot bizin kone ki so destriksion pre.” Lerla, zot ti pou bizin ekout lavertisman Zezi ek “koumans sove pou al kot montagn.” (Lik 21:20, 21) Bann ki ti ekout sa lavertisman-la ti gagn lavi sov kan bann Romin ti detrir Zerizalem.

 3. Ki nou pou examine dan sa lartik-la?

³ Azordi, nou pe viv lepok lafin. Sa move lemond-la pre pou detrir. Alor, nou osi nou bizin kontign res lor nou gard ek kontign veye. Dan sa lartik-la, nou pou gete kouma nou kapav res lor nou gard lor plan spiritiel kan nou trouv bann kitsoz ki pe arive dan sa lemond-la. Nou pou gete osi kouma nou kapav fer atansion, ek kouma nou kapav servi bien nou letan.

 4. Kifer nou bien kontan kan nou trouve kouma bann kitsoz ki pe arive dan sa lemond-la, pe realiz bann profesi ki ena dan Labib?

⁴ Nou bien kontan kan nou trouve kouma bann kitsoz ki pe arive dan sa lemond-la, pe realiz bann profesi ki ena dan Labib. Par exanp, Zezi ti koz lor bann kitsoz ki ti pou arive ek ki ti pou montre ki lafin li pre. (Mat. 24:3-14) Pier ti ankouraz nou pou gete kouma bann profesi pe realize parski sa pou fer nou lafwa res for. (2 Pier 1:19-21) Anplis, bann premie parol dernie liv Labib dir: “Enn revelasion par Zezi Kris, ki Bondie inn donn li, pou montre so bann esklav bann kitsoz ki pou bizin arive biento.” (Rev. 1:1) Akoz sa, nou vremem interese ar seki pe arive dan lemond azordi, ek nou anvi kone kouma zot pe realiz profesi ki ena dan Labib. Ek kitfwa nou anvi koz lor sa bann levennman-la ar nou kamarad.

 5. Ki kitsoz fode pa nou fer, me ki kitsoz nou bizin fer? (Get bann zimaz osi.)

⁵ Me selman, kan nou koz lor bann profesi Biblik fode pa ki nou esey devine seki pou arive. Kifer? Parski nou pa anvi dir bann kitsoz ki pou kree divizion dan lasanble. Par exanp, kitfwa nou kapav tann bann dirizan sa lemond-la explike kouma zot pou rezoud bann problem ek amenn lape ek sekirite. Me olie ki nou panse ki seki sa bann dirizan pe fer pe realiz profesi 1 Tesalonisien 5:3, nou bizin res azour avek bann dernie explikasion ki nou gagne. Kan nou koz lor bann kitsoz ki ena dan bann piblikasion ki lorganizasion Zeova donn nou, nou ede pou ki dan lasanble ‘ena linite ant nou dan nou fason panse ek dan nou lopinion.’​—1 Kor. 1:10; 4:6.

 6. Ki leson nou aprann dan 2 Pier 3:11-13?

⁶ Lir 2 Pier 3:11-13. Pier ed nou pou reflesi kifer nou bizin examinn bann profesi ki ena dan Labib. Li ankouraz nou pou “kontign gard dan [nou] lespri prezans zour Zeova.” Kifer li dir sa? Se pa pou nou esey kone ki “zour” ouswa ki “ler” Zeova pou amenn Armagedon. Se parski nou anvi servi bien letan ki nou reste pou fer “bann aksion ki montre ki [nou] kondwit sin ek ki [nou] atase ar Bondie.” (Mat. 24:36; Lik 12:40) Nou anvi kontign ena enn bon kondwit ek kontign fer zefor pou servi Zeova parski nou kontan Li. Pou reisi fer sa, nou bizin fer atansion.

 7. Kouma nou montre ki nou pe fer atansion? (Lik 21:34)

⁷ Zezi pa ti zis dir so bann disip fer atansion ar bann kitsoz ki pe arive dan lemond. Li ti osi dir zot fer atansion ar zotmem. Nou trouv sa lavertisman-la dan Lik 21:34. (Lir.) Zezi ti dir: “Me zot, fer atansion.” Enn dimounn ki fer atansion, li remark tou bann danze ki kapav gat so lamitie avek Zeova ek li fer zefor pou res lwin ar sa bann kitsoz-la. Se koumsa ki li pou kapav res dan lamour Bondie.​—Prov. 22:3; Zid 20, 21.

 8. Ki konsey Pol inn donn bann Kretien?

⁸ Pol ti dir bann Kretien fer atansion. Par exanp, li ti dir bann Kretien dan Efez: “Fer bien atansion ki zot fason viv pa parey kouma bann dimounn ki pena okenn sazes, me plito kouma bann dimounn ki ena sazes.” (Efe. 5:15, 16) Satan pe esey fer tou pou gat nou lamitie avek Zeova. Akoz sa, Labib dir nou “kontign konpran ki volonte Zeova ete,” pou ki nou kapav protez nou kont tou bann latak Satan.​—Efe. 5:17.

 9. Kouma nou kapav konpran volonte Zeova?

⁹ Labib pa koz lor tou bann danze ki kapav gat nou lamitie avek Zeova. Souvan, nou bizin pran bann desizion konsernan bann kitsoz ki pa mansione dan Labib. Alor, pou nou pran bann bon desizion, nou bizin konpran “volonte Zeova.” Pou nou kapav konpran volonte Zeova, nou bizin etidie Labib ek reflesi lor la. Plis nou konpran volonte Zeova ek ena “fason panse Kris,” plis nou pou kapav mars “kouma bann dimounn ki ena sazes.” Nou pou kapav fer sa, mem si pena okenn reg ki dir nou seki nou bizin fer dan sak sitiasion. (1 Kor. 2:14-16) Parfwa, ena bann danze ki fasil pou rekonet; parkont ena sertin danze ki difisil pou rekonet.

10. Ar ki bann danze nou bizin res lwin?

¹⁰ Nou bizin res lwin ar bann danze kouma fer galan, bwar tro boukou, manz tro boukou, koz bann koze kontrer, bann divertisman violan, pornografi, ek lezot kitsoz ankor. (Ps. 101:3) Satan pe rod tou lokazion pou gat nou lamitie avek Zeova. (1 Pier 5:8) Si nou pa fer atansion, Satan kapav plant dan nou leker ek nou lespri bann lagrin kouma lanvi, materyalis, malonet, laenn, lorgey, ek rankinn. (Gal. 5:19-21) O-koumansman, kitfwa to kapav panse ki sa bann kitsoz-la pa danzere. Me si to pa azir deswit pou derasinn sa bann defo-la, zot pou kontign grandi kouma enn plant toxik ki kapav anpwazonn twa ek zot pou fer twa ditor.​—Zak. 1:14, 15.

11. Sit enn danze ki difisil pou rekonet, ek kifer nou bizin res lwin ar sa danze-la.

¹¹ Enn danze ki difisil pou rekonet se bann move frekantasion. Sey mazine ki to travay avek enn kikenn ki pa Temwin. To anvi ki sa dimounn-la ena enn bon lopinion lor bann Temwin Zeova, alor to zanti avek li. Detanzantan, kitfwa to al manze avek li. Me avek letan, to koumans fer sa pli souvan. Parfwa, sa dimounn-la koz lor bann kitsoz imoral, me to pa pran li kont. Me avek letan, to koumans abitie ar sa ek to koumans trouv sa normal. Lerla enn zour, li invit twa pou al bwar enn zafer apre travay ek to aksepte. Plis letan pase, plis to koumans pans parey kouma to kamarad. Dapre twa, dan komie letan ankor to pou koumans azir parey kouma li? Li vre ki nou bizin zanti ek respekte tou dimounn. Me nou bizin rapel ki bann dimounn avek ki nou pas letan pou ena enn gran linflians lor nou. (1 Kor. 15:33) Si nou swiv konsey Zezi ek nou fer atansion, nou pou evit frekant bann dimounn ki pa swiv bann prinsip Zeova. (2 Kor. 6:15) Nou pou rekonet sa danze-la ek nou pou res lwin ar li.

12. Pandan ki bann disip Zezi ti pe atann “peryod lafin sa lemond-la,” ki zot ti bizin fer?

¹² Zezi ti anvi ki so bann disip res bien okipe pandan ki zot pe atann “peryod lafin sa lemond-la?” Li ti donn zot enn travay pou fer. Li ti donn zot lord pou pres bon nouvel “dan Zerizalem, partou dan Zide ek Samari, ek ziska dan bann landrwa pli lwin lor later.” (Zist. 1:6-8) Bann disip Zezi ti gagn enn gro travay pou fer! Kan zot ti fer zot maximum dan sa travay-la sa montre ki zot ti servi bien zot letan.

13. Kifer nou bizin servi bien nou letan? (Kolosien 4:5)

¹³ Lir Kolosien 4:5. Kan nou reflesi bien lor fason ki nou pe servi nou letan, nou montre ki nou pe fer bien atansion. Anplis, “bann sitiasion ki personn pa atann” kapav ariv nou tou. (Ekle. 9:11) Nou kapav mor san ki nou atann!

14-15. Kouma nou kapav servi bien nou letan? (Ebre 6:11, 12) (Get zimaz osi.)

¹⁴ Nou kapav servi bien nou letan kan nou fer volonte Zeova ek nou ranforsi nou lamitie avek Li. (Zan 14:21) Nou bizin “vinn ferm, solid, ena touzour boukou pou fer dan travay Lesegner.” (1 Kor. 15:58) Lerla, mem si nou mor ouswa si lafin sa lemond-la arive, nou pa pou ena okenn regre parski nou’nn fer nou best pou Zeova.​—Mat. 24:13; Rom. 14:8.

¹⁵ Azordi, Zezi pe kontign gid so bann disip pou ki zot pres lor Rwayom Bondie partou lor later. Zezi inn tini so promes ek li pe fer so par. Gras-a nou bann renion ek nou bann piblikasion, Zezi ansegn nou kouma pou pres bon nouvel. Li’nn osi donn nou tou seki nou bizin pou fer sa travay-la. (Mat. 28:18-20) Nou osi nou fer nou par kan nou fer nou maximum pou pres ar tou dimounn ek pou ansegn zot, ek kan nou res lor nou gard an-atandan ki lafin vini. Kan nou swiv konsey ki trouv dan Ebre 6:11, 12, nou pou reisi tini ferm nou lesperans “ziska lafin.”​—Lir.

16. Ki nou bien deside pou fer?

¹⁶ Zeova inn fixe enn zour ek enn ler kot Li pou detrir lemond Satan. Kan sa zour-la pou arive, Zeova pou realiz tou bann profesi ki Li’nn fer ekrir dan so Parol, Labib. Me parfwa, nou kapav panse ki sa zour-la pe tarde pou vini. Selman, nou kapav sir ki zour Zeova “pa pou an-retar!” (Abak. 2:3) Alor, anou bien deside “pou kontign atann Zeova,” ek “pou kontign atann avek pasians Bondie ki pou sov [nou].”​—Mish. 7:7.