Kestyon Bann Lekter

Ki sinifi expresyon: ena “lavi an limem”?

Labib dir ki Zezi ena “lavi an limem” ek ki so bann disip ena “lavi an zotmem.” (Zan 5:26; 6:53) Me, sa de pasaz-la pena mem sinifikasyon.

Apepre enn an plitar, Zezi ti dir bann ki ti pe ekut li: “Wi, vremem mo dir zot, si zot pa manz laser ek bwar disan fils de l’homme, zot pena lavi an zotmem. Tu dimunn ki manz mo laser ek bwar mo disan posed lavi pu tuletan, ek mo pu resisit li dan dernye zur.” (Zan 6:53, 54) Isi kan Zezi servi lexpresyon ena “lavi an zotmem,” li pe dir: gayn “lavi pu tuletan.” Lezot plas dan Bann Lekritir Grek, nu truv bann expresyon dan mem form gramatikal. Ala de legzanp: “Ena disel an zotmem” ek “gayn an zotmem pinisyon ki zot merite.” (Mark 9:50; Romin 1:27) Dan sa de legzanp-la, sa bann fraz-la pa vedir puvwar pu donn lezot disel uswa donn lezot enn pinisyon. Okontrer, li inplik leta enn kitsoz ki konplet, ki ful an limem. Donk, expresyon ena “lavi an zotmem” ki truv dan Zan 6:33 vedir sinpleman gayn lavi dan enn sans konplet.

Kan li ti pe koz lor so bann disip ki ena “lavi an zotmem,” Zezi ti mansyonn so laser ek so disan. Plitar, kan li ti etabli Repa Diswar Nu Senyer, ankor enn fwa Zezi ti koz lor so laser ek so disan. Li ti demann so bann disip ki pu form parti dan nuvo lalyans, pu pran dipin san levin ek divin. Eski sa vedir ki zis bann Kretyin ki ena lespwar pu viv dan lesyel ek ki form parti dan nuvo lalyans avek Bondye Zeova ki gayn lavi konplet? Non. Enn an ti’nn pase ant sa de lokazyon ki Zezi ti pronons sa bann parol-la. Bann ki ti tann Zezi dir bann parol ki truv dan Zan 6:53, 54, pa ti kone ki pu ena enn selebrasyon ki pu fer tulelane kot pu ena dipin ek divin ki pu reprezant laser ek disan Kris.

Dapre Zan sapit 6, Zezi ti konpar so lekor ar lamann ek apre li ti dir: “Zot bann anset ti manz lamann dan dezer me purtan zot finn mor. Ala dipin ki sorti dan lesyel, pu ki tu dimunn kapav manz sa ek pa mor. Momem dipin vivan ki’nn sorti dan lesyel; tu dimunn ki manz sa dipin-la, pu viv pu tuletan.” Laser Zezi ek so disan ti pli siperyer ki lamann. Kuma? Dan sans ki Zezi ti donn so laser pu ki “tu dimunn viv.” Grasa li, lavi pu tuletan finn vinn posib.a Donk, expresyon ena “lavi an zotmem” ki truv dan Zan 6:53, aplik pu tu bann dimunn ki gayn lavi pu tuletan, ki li dan lesyel uswa lor later.—Zan 6:48-51.

Kan eski bann disip Zezi gayn lavi an zotmem uswa lavi dan enn sans konplet? Pu bann eritye Rwayom Bondye ki’nn swazire par lespri sin, sa pu arive kan zot resisite pu al viv dan lesyel kuma bann kreatir spirityel imortel. (1 Korintyin 15:52, 53; 1 Zan 3:2) Bann “lezot muton” Zezi pu gayn lavi dan enn sans konplet apre lafin Reyn Mil an. Lerla, zot pu’nn finn pas zot leprev ek Bondye pu’nn fini konsider zot kuma bann dimunn ki fidel ek diyn pu gayn lavi pu tuletan dan Paradi lor later.—Zan 10:16; Revelasyon 20:5, 7-10.

[Notes]

[Zimage page 9]

Tu bann Kretyin kapav ena ‘lavi an zotmem’