Servi le roi Jésus Christ avek fidelité

“Finn donne li domination, grandeur, ek enn royaume, pou ki bann peuple, bann nation ek bann langue, zot tou servi li.”—DANIEL 7:14.

1, 2. Couma nou koné ki Jésus pa ti commence regné dan enn fason complet en l’an 33 n.l.?

Ki dirigeant finn kapav donne so la-vie pou so bann sujet, setadir bann dimoune ki li dirigé, ek apré ré-vive pou li vinn enn lé-roi? Ki le roi finn kapav vive lor la terre ek faire so bann sujet ena confiance en li ek reste fidel envers li, ek apré, al regné dan le ciel? Enn sel dimoune finn kapav faire sa, ek faire plus encore—Jésus Christ. (Luc 1:32, 33) Jour la Pentecôte l’an 33 a.n.l., apré la mort ek resurrection Jésus Christ, ek apré ki li’nn monte dan le ciel, Bondié ‘ti faire li vinn chef lor tou kitsoz pou la congregation.’ (Éphésiens 1:20-22; Actes 2:32-36) Alors sa lepok-la, Jésus Christ inn commence regné, mais pa dan enn fason complet. So bann premier sujet ti bann chrétien oint, ki ti forme l’Israël spirituel, “Israël Bondié.”—Galates 6:16; Colossiens 1:13.

² Apepré 30 an apré Pentecôte l’an 33 n.l., l’apotre Paul ti dire ki Christ pa ti encore commence regné dan enn fason complet, mais li ti “dan coté droite Bondié, ek li ti pé attann ki so bann l’ennemi placé couma enn l’escabeau pou so lipié.” (Hébreux 10:12, 13) Plitar, vers la fin premier siecle nou lepok, l’apotre Jean, ki ti agé, ti gagne enn vision. Li ti trouve le Roi l’univers, Jéhovah, pé installe Jésus couma le Roi dan enn royaume ki’nn fek etabli dan le ciel. (Révélation 11:15; 12:1-5) Dan nou lepok, nou kapav ré-guette bann preuve ki confirmé ki Jésus inn commence regné en 1914.a

 3. (a) Ki nouveau signification la bonne nouvelle lor Royaume Bondié finn prend depuis 1914? (b) Ki question nou kapav pose nou-mem?

³ Oui, depuis 1914, la bonne nouvelle lor Royaume Bondié finn prend enn nouveau signification. Sa l’année-la, Christ inn vinn le roi dan Royaume Bondié dan le ciel. Li pa pé zis regné, mais li aussi pé servi so pouvoir pou dirige l’activité bann serviteur Jéhovah lor la terre, mem si li pé faire sa “parmi [so] bann l’ennemi.” (Psaume 110:1, 2; Matthieu 24:14; Révélation 12:7-12) En plus, partout dan le monde, so bann sujet pé montré ki zot content pou soumette ar so l’autorité, parski zot pé participe dan enn program l’enseignement lor la Bible. Jamais dan l’Histoire pa finn ena enn program coumsa lor la terre. (Daniel 7:13, 14; Matthieu 28:18) Bann chrétien oint, “bann garson royaume [Bondié],” zot bann “ambassadeur dan place Christ.” Enn grand la-foule “lezot brebis” ki coumadir bann ‘envoyé’ ou-soit bann representant officiel Royaume Bondié, pé soutenir zot fidelement. (Matthieu 13:38; 2 Corinthiens 5:20; Jean 10:16) Mais nou personnellement, nou bizin guetté si nou pé vrai-mem accepté l’autorité Jésus Christ. Eski nou fidelité envers li, bien solid? Couma eski nou kapav fidel envers enn lé-Roi ki dan le ciel? Mais premierement, anou guetté pou ki raison nou bizin fidel envers Christ.

Enn lé-Roi ki merite nou fidelité

 4. Ki Jésus ti faire lor la terre en tant ki le Roi ki Jéhovah ti’nn choisir?

⁴ Nou fidel envers Jésus Christ parski nou apprecié tou seki li finn faire, ek a cause so bann qualité extraordinaire. (1 Pierre 1:8) Kan Jésus ti lor la terre, li ti le Roi ki Jéhovah ti’nn choisir. Li ti montré, dan enn fason limité, seki li pou faire kan so Royaume pou dirige la terre entier, dan l’heure ki Jéhovah inn fixé.Li ti nourri bann dimoune ki ti faim. Li ti gueri bann malade, bann aveugle, bann handicapé, bann sourde, ek bann ki pa ti kapav kozé. Li ti mem ressuscite certain dimoune mort. (Matthieu 15:30, 31; Luc 7:11- 16; Jean 6:5-13) En plus, fason ki Jésus ti vive lor la terre, faire nou konn bann qualité ki li pou manifesté kan li pou dirige la terre en entier—surtout so l’amour ki pousse li pou faire sacrifice pou lezot. (Marc 1:40-45) Guette ki Napoléon Bonaparte ti dire lor Jésus: “Alexandre, César, Charlemagne ek mo-mem, nou finn etabli bann grand royaume, mais couma nou finn arrivé faire sa bann grand kitsoz-la? Par la force. Mais zis Jésus Christ ki finn etabli so royaume lor l’amour, ek ziska zordi, plusieurs million dimoune disposé pou mort pou li.”

 5. Kifer Jésus ti ena enn personnalité ki ti attire lezot?

⁵ Jésus ti ena enn caractere doux ek enn leker humble. Grace a so bon personnalité ek so bann l’enseignement bien encourageant, bann dimoune ki ti decouragé a cause bann pression ek bann fardeau ki ti ena dan zot la-vie, ti regagne courage. (Matthieu 11:28-30) Bann zenfant ti bien a l’aise avek li. Bann zom ki ti ena l’humilité ek bon jugement pa ti hesité pou vinn so bann disciple. (Matthieu 4:18-22; Marc 10:13-16) Parski li ti ena consideration ek respé, sa ti pousse beaucoup femme ki ti ena la crainte pou Bondié, pou suive li. Beaucoup parmi zot ti donne zot lé-temps, zot la force ek zot bann kitsoz materiel pou soutenir li dan so ministere.—Luc 8:1-3.

 6. Ki bann sentiment bien profond Jésus ti manifesté kan Lazare ti mort?

⁶ Jésus Christ ti montré so bann sentiment bien profond kan so camarade Lazare ti mort. Li ti tellement touché kan li ti trouvé ki quantité Marie ek Marthe ti chagrin, ki li ti pousse enn soupir ek li “ti ploré,” tellement li aussi li ti chagrin. Li ti “commence troublé”—so leker ti faire-mal ek li ti chagrin—mem si li ti koné ki li ti pré pou ressuscite Lazare. Apré sa, Jésus ti servi pouvoir ki Jéhovah ti donne li ek li ti ressuscite Lazare. L’amour ek pitié ki li ti ressenti, ti pousse li pou faire sa.—Jean 11:11-15, 33-35, 38-44.

 7. Kifer Jésus merite nou fidelité? (Guette aussi l’encadré dan page 31.)

⁷ Nou impressionné kan nou trouvé ki quantité l’amour Jésus ti ena pou seki droite ek couma li ti detesté kan dimoune ti hypocrite ek mauvais. Deux fois, avek beaucoup courage, li ti pousse bann marchand malhonnete ki ti dan temple. (Matthieu 21:12, 13; Jean 2:14-17) En plus, kan li ti vive couma enn dimoune lor la terre, li ti konn tou sorte qualité difficulté, ek sa ti faire li trouvé par li-mem ki bann pression ek bann problem ki dimoune gagné. (Hébreux 5:7-9) Jésus ti koné aussi ki sa vedir vinn enn victime la haine ek l’injustice. (Jean 5:15-18; 11:53, 54; 18:38–19:16) Finalement, avek courage li ti accepté pou mort dan enn fason cruel pou accompli volonté so Papa ek pou donne so bann sujet la vie eternel. (Jean 3:16) Eski bann qualité ki Jésus ti manifesté, pa pousse ou pou contigne servi li avek fidelité? (Hébreux 13:8; Révélation 5:6-10) Mais ki condition nou bizin rempli pou vinn enn sujet le Roi Jésus Christ?

Bann condition ki bizin rempli pou vinn enn sujet le Roi Jésus Christ

 8. Ki condition bann sujet Jésus Christ bizin rempli?

⁸ Prend enn l’exemple: si ou envie al reste dan enn pays, surement ou pou bizin rempli certain condition, pa vrai? Kitfois ou pou bizin ena enn bon moralité ek enn bon la-santé. Li pareil aussi pou bann ki envie vive enba domination Royaume Bondié: zot bizin garde enn bon moralité ek enn bon la-santé spirituel.—1 Corinthiens 6:9-11; Galates 5:19-23.

 9. Couma nou kapav montré ki nou fidel envers Jésus Christ?

⁹ Jésus Christ demann aussi so bann sujet ki zot reste fidel envers li ek envers so Royaume. Zot montré zot fidelité kan zot vive en accord avek seki li ti enseigné kan li ti lor la terre, en tant ki le Roi ki Jéhovah ti’nn choisir. Par exemple, zot faire Royaume Bondié ek So volonté passe avant bann kitsoz materiel. (Matthieu 6:31-34) Zot aussi essaye manifesté enn personnalité pareil couma Jésus Christ, mem dan bann situation bien difficile. (1 Pierre 2:21- 23) En plus, zot suive l’exemple Jésus kan zot faire premier pas pou aide lezot.—Matthieu 7:12; Jean 13:3-17.

10. Couma bann chrétien kapav montré ki zot fidel envers Jésus (a) dan zot famille ek (b) dan la congregation?

¹⁰ Bann disciple Jésus montré aussi ki zot fidel envers li kan zot imite so bann qualité dan zot famille. Par exemple, bann mari montré zot fidelité envers zot lé-Roi ki dan le ciel, kan zot imite li dan fason ki zot traite zot femme ek zot zenfant. (Éphésiens 5:25, 28-30; 6:4; 1 Pierre 3:7) Bann femme montré zot fidelité envers Jésus par enn conduite pur ek kan zot manifesté “enn caractere trankil ek douce.” (1 Pierre 3:1-4; Éphésiens 5:22-24) Bann zenfant montré zot fidelité envers Jésus kan zot obeir, pareil couma Jésus ti obeir. Kan Jésus ti jeune, li ti soumette ar so bann parent, mem si zot ti imparfait. (Luc 2:51, 52; Éphésiens 6:1) Dan congregation, bann sujet Jésus Christ essaye imite li avek fidelité kan zot “mette-zot dan place zot camarade, [kan zot] montré l’affection fraternel,” ek kan zot montré “beaucoup compassion” envers lezot. Zot faire zeffort pou ressemblé Jésus, zot ena “l’humilité, [zot] pa rann le mal pou le mal, ek [zot] pa insulté bann ki insulté zot.”—1 Pierre 3:8, 9; 1 Corinthiens 11:1.

Bann sujet Jésus Christ ki obeir so la-loi

11. Ar ki la loi bann sujet Jésus Christ bizin soumette?

¹¹ Bann dimoune ki envie al reste dan enn lot pays, bizin obeir la-loi sa pays-la. Li pareil aussi pou bann sujet Jésus Christ. Zot bizin soumette-zot ar “la loi Christ” ek vive en accord avek tou bann l’ordre ek bann l’enseignement ki li’nn donné. (Galates 6:2) Zot bizin surtout vive dapré “la loi royal” lor l’amour. (Jacques 2:8) Ki sa bann la-loi-la demandé?

12, 13. Couma eski nou montré nou soumission envers “la loi Christ”?

¹² Bann sujet Jésus Christ zot imparfait ek zot faire erreur. (Romains 3:23) A cause sa, zot bizin contigne developpe “enn l’amour fraternel ki pa hypocrite” pou ki zot kapav ‘content sakenn zot camarade beaucoup, avek tou zot leker.’ (1 Pierre 1:22) “Si enn kikenn ena enn kitsoz kont [so camarade],” en tant ki chrétien, li pou applik la loi Jésus, li pou ‘supporte so camarade ek li pou pardonne li volontairement.’ Si zot suive sa la-loi-la, sa pou aide zot pou passe lor defaut lezot ek pou rod bann raison pou content zot prochain. Eski ou pa content ki ou parmi bann dimoune ki fidel envers nou lé-Roi Jésus ek ki couvert zot avek l’amour ki “soude nou tou ensam”?—Colossiens 3:13, 14.

¹³ En plus, Jésus ti expliké ki l’amour ki li ti montré, li pli grand ki l’amour ki bann dimoune ena en general pou zot prochain. (Jean 13:34, 35) Si nou content zis bann ki content nou, nou pa pé faire “enn kitsoz extraordinaire.” Dan sa cas-la, nou l’amour pa pou complet. Jésus ti encourage nou pou imite l’amour so Papa, setadir manifesté enn l’amour ki basé lor bann principe, ek content mem nou bann l’ennemi ki ena la haine pou nou ek ki persecute nou. (Matthieu 5:46-48) C’est sa l’amour-la pousse ki pousse bann sujet Royaume Bondié pou perseveré dan travail principal ki Jésus inn donne zot. Ki sa travail-la sa?

Fidelité bann sujet Jésus passe par bann l’epreuve

14. Kifer li important ki nou preché?

¹⁴ Zordi, bann sujet Royaume Bondié ena enn travail important pou faire, zot bizin “rann temoignage a fond lor royaume Bondié.” (Actes 28:23) Li bien important ki zot faire sa parski Royaume messianik pou prouvé ki Jéhovah ena droit pou dirige l’univers. (1 Corinthiens 15:24- 28) Kan nou preche la bonne nouvelle, bann dimoune ki ecoute nou, gagne l’occasion zot aussi pou vinn bann sujet Royaume Bondié. En plus, le Roi Jésus Christ guette fason ki bann dimoune reagir ar sa message-la pou decidé couma li pou juge zot. (Matthieu 24:14; 2 Thessaloniciens 1:6-10) Alors, enn fason principal ki nou kapav montré nou fidelité envers Jésus Christ c’est kan nou obeir l’ordre ki li’nn donné pou preche so Royaume avek lezot.—Matthieu 28:18-20.

15. Kifer fidelité bann chrétien passe par bann l’epreuve?

¹⁵ Bien-sur, Satan pé faire tou seki li kapav pou arrete nou travail predication, ek bann dirigeant sa lé-monde-la pa reconette l’autorité Jésus Christ. (Psaume 2:1-3, 6-8) C’est a cause sa ki Jésus ti averti so bann disciple, li ti dire zot: “Enn esclave pa pli grand ki so maitre. Si bannla finn persecute moi, bannla pou persecute zot aussi.” (Jean 15:20) Alors, bann disciple Jésus Christ retrouve-zot dan enn la-guerre spirituel kot zot fidelité pé passe par bann l’epreuve.—2 Corinthiens 10:3-5; Éphésiens 6:10-12.

16. Couma bann sujet Royaume Bondié rann “Bondié bann kitsoz ki pou Bondié”?

¹⁶ Mais kan-mem, bann sujet Royaume Bondié reste fidel ar zot lé-Roi invisible sans ki zot mank respé pou bann gouvernement sa lé-monde-la. (Tite 3:1, 2) Jésus ti dire: “Rann César bann kitsoz ki pou César, mais rann Bondié bann kitsoz ki pou Bondié.” (Marc 12:13-17) Sa vedir ki bann sujet Jésus Christ obeir bann la-loi gouvernement ki pa kont bann la-loi Bondié. (Romains 13:1-7) Mais, kan la cour supreme bann Juif ti al kont la loi Bondié ek ti donne l’ordre bann disciple Jésus pou arrete preché, bann disciple ti reponn dan enn fason bien ferme mais avek respé, ki zot ti bizin “obeir Bondié couma enn chef plutot ki bann zom.”—Actes 1:8; 5:27-32.

17. Kifer nou kapav faire face avek courage kan nou fidelité passe par bann l’epreuve?

¹⁷ Bien-sur, bann sujet Jésus Christ bizin ena beaucoup courage pou reste fidel envers zot lé-Roi kan zot gagne persecution. Mais Jésus ti dire: “Zot bizin heureux kan dimoune koz en mal lor zot, persecute zot ek koz menti pou dire tou sorte qualité mauvais kitsoz lor zot, a cause moi. Zot bizin content ek saute dan la joie, parski zot ena enn grand recompense dan le ciel.” (Matthieu 5:11, 12) Bann premier disciple Jésus finn faire l’experience sa bann parole-la. Mem si zot bann l’ennemi ti faire fouette zot parski zot ti pé contigne preche Royaume Bondié, zot ti content “parski ti’nn juge zot digne pou gagne deshonneur a cause so nom. Toulé-jour dan temple ek de maison-en-maison, zot ti contigné enseigné ek annonce la bonne nouvelle lor Jésus Christ, sans arreté.” (Actes 5:41, 42) Ou aussi, ou merite felicitation parski ou manifesté mem l’attitude fidel kan ou endure bann l’epreuve, la maladie, deuil, ou-soit l’opposition.—Romains 5:3-5; Hébreux 13:6.

18. Ki nou aprann ar bann parole ki Jésus ti dire Ponce Pilate?

¹⁸ Avant ki Jésus ti vinn le Roi dan Royaume Bondié, li ti explik gouverneur romain Ponce Pilate ki so “royaume pa faire partie dan sa lé-monde-la.” Li ti dire aussi: “Si mo royaume ti faire partie dan sa lé-monde-la, mo bann serviteur ti pou laguerre pou ki pa livré moi ar bann Juif. Mais, mo royaume [pa sorti dan sa lé-monde-la].” (Jean 18:36) Sa vedir ki bann sujet Royaume Bondié pa prend okenn zarme kont personne ek zot pa prend part dan okenn laguerre ki ena dan le monde. Parski zot fidel envers “Prince la paix,” zot pa mele-zot ar bann kitsoz ki divise le monde zordi.—Isaïe 2:2-4; 9:6, 7.

Bann benediction eternel pou bann sujet fidel

19. Kifer bann sujet Jésus Christ kapav guette l’avenir avek confiance?

¹⁹ Bann fidel sujet Jésus Christ, “le Roi tou bann lé-roi,” kapav guette l’avenir avek confiance. Zot attann avek impatience kan li pou montré so grand pouvoir lor la terre. (Révélation 19:11–20:3; Matthieu 24:30) Le reste bann chrétien oint, “bann garson royaume [Bondié]” pé attann zot grand l’heritage pou vinn bann lé-roi dan le ciel avek Jésus Christ. (Matthieu 13:38; Luc 12:32) Bann membre “lezot brebis,” ki pé servi avek fidelité, pé attann kan zot lé-Roi pou dire: “Vini, zot ki finn beni par mo Papa, herite [sa Paradi ki pou dirigé par] royaume [Bondié-la], ki finn preparé pou zot depuis fondation le monde.” (Jean 10:16; Matthieu 25:34) Oui, nou souhaité ki tou bann sujet Royaume Bondié bien decidé pou contigne servi le Roi Jésus Christ avek fidelité!

[Note]

Eski ou kapav expliké?

• Kifer Jésus Christ merite nou fidelité?

• Couma bann sujet Jésus Christ montré zot fidelité envers li?

• Kifer nou envie reste fidel envers Christ, nou lé-Roi?

[L’encadré, page 31]

LEZOT QUALITÉ EXTRAORDINAIRE KI JÉSUS CHRIST ENA

Li pa faire preference—Jean 4:7-30.

Li ena compassion—Matthieu 9:35-38; 12:18-21; Marc 6:30-34.

L’amour pousse li pou faire sacrifice—Jean 13:1; 15:12-15.

Li fidel—Matthieu 4:1-11; 28:20; Marc 11:15-18.

Li mette li dan place lezot—Marc 7:32-35; Luc 7:11-15; Hébreux 4:15, 16.

Li raisonnable—Matthieu 15:21-28.

[Zimage, page 29]

Kan nou montré l’amour pou nou camarade, nou pé soumette ar “la loi Christ” avek fidelité

[Zimage, page 31]

Eski bann qualité Jésus Christ pousse ou pou servi li avek fidelité?