Jésus Christ—Pli grand Missionnaire ki’nn existé

“Mo enn representant ki sorti kot Li, ek sa Kikenn-la finn envoye moi.”—JEAN 7:29.

1, 2. Ki été enn missionnaire, ek kisannla nou kapav considere couma pli grand Missionnaire?

KAN ou tann mot “missionnaire,” ki sa faire ou pensé? Certain pense bann missionnaire la chretienté, ek parmi ena beaucoup ki mele-zot dan bann zaffaire politik ek economik dan bann pays kot finn envoye zot. Mais ou, en tant ki Témoin de Jéhovah, surement ou pense bann missionnaire ki College central envoyé pou preche la bonne nouvelle dan plusieurs pays partout lor la terre. (Mat. 24:14) Sa bann missionnaire-la servi zot lé-temps ek zot la-force pou faire enn bon travail: aide bann dimoune pou approche ar Jéhovah ek pou developpe bann bon relation avek Li.—Jacq. 4:8.

² Dan texte principal Les Saintes Écritures — Traduction du monde nouveau pena okenn place kot ena mot “missionnaire,” ni singulier, ni pluriel. Selman, dan enn note en rapport avek Éphésiens 4:11, la Bible de référence precisé ki mot grec ki finn traduire par “ évangélisateurs ” kapav aussi traduire par “bann missionnaire.” Jéhovah, Li-mem pli grand Evangelisateur, setadir enn kikenn ki annonce enn bon nouvelle. Mais nou pa kapav dire ki Jéhovah Li pli grand Missionnaire, parski Li, personne pa finn envoye Li. Parkont, Jésus Christ ti dire concernant so Papa dan le ciel: “Mo enn representant ki sorti kot Li, ek sa Kikenn-la finn envoye moi.” (Jean 7:29) Jéhovah ti montré so grand l’amour pou bann dimoune kan Li ti envoye lor la terre so sel Garson ki Li ti’nn crée direct. (Jean 3:16) Nou kapav dire ki Jésus li pli grand Missionnaire ki finn existé parski enn parmi bann raison kifer Bondié ti envoye li lor la terre c’est pou “rann temoignage lor la verité.” (Jean 18:37) Li ti bien reussi dan so mission pou preche la bonne nouvelle lor Royaume Bondié, ek zordi nou encore pé tire profit ar l’activité ki li ti faire. Par exemple, nou kapav applik bann methode ki li ti servi pou enseigné dan nou ministere, ki nou bann missionnaire ou-soit non.

 3. Ki bann question nou pou examiné?

³ Kan nou pensé ki Jésus ti enn proclamateur Royaume Bondié, sa faire nou pose bann question couma: Ki bann difficulté Jésus ti gagné kan li ti lor la terre? Kifer so fason enseigné ti efficace? Ek kifer li ti gagne succès dan so ministere?

Li ti pré pou adapté-li ar enn nouveau l’environnement

4-6. Ki bann grand changement ti ena dan la vie Jésus kan Bondié ti envoye li lor la terre?

⁴ Zordi bann missionnaire ek bann chretien ki demenagé pou al servi dan bann l’endroit kot bizin plus proclamateur, kitfois zot bizin adapté ar enn niveau la-vie pli bas ki zot ti habitué ena. Mais nou pa kapav mem mazinn difference ki ena entre la vie ki Jésus ti amené lor la terre ek la vie ki li ti ena dan le ciel. La-bas, li ti vive avek so Papa, parmi bann ange ki ti servi Jéhovah avek bann bon mobile. (Job 1:6; 2:1) Pou Jésus, sa ti vrai-mem enn grand difference pou retrouve-li parmi bann dimoune ki faire peché, dan enn lé-monde pourri! (Marc 7:20-23) Jésus ti mem bizin supporte jalousie ek l’esprit competition ki ti ena entre bann disciple ki ti pli proche ar li. (Luc 20:46; 22:24) Bien sur, li ti reussi adapté-li dan enn fason parfait avek tou seki ti arrive li lor la terre.

⁵ Jésus pa ti commence koz enn langue enn coute coumsa, par mirak, li ti bizin aprann koz sa langue-la couma enn tibaba. C’est enn grand changement pou li kan nou maziné ki li ti pé donne l’ordre bann ange kan li ti dan le ciel! Lor la terre, Jésus ti koz au moins enn ‘langage ki bann zom’ kozé. Sa langage-la ti different net avek ‘langage bann ange.’ (1 Cor. 13:1) Mais selman, concernant bann parole ki faire plaisir pou tendé, okenn dimoune lor la terre jamais pa finn dire bann parole couma Jésus.—Luc 4:22.

⁶ Anou considere bann lezot grand changement ki finn ena dan la vie Garson Bondié kan li ti vinn lor la terre. Mem si Jésus pa ti herite peché Adam, li ti vinn enn dimoune, pareil couma bann ki plitar ti pou vinn so bann “frere,” setadir so bann disciple oint. (Lire Hébreux 2:17, 18.) Pendant dernier la nuit ki li ti passé lor la terre, Jésus pa ti demann so Papa envoye “plus ki douze legion ange.” Mais pourtant maziné ki li-mem li ti ena l’autorité lor bann ange en tant ki Mikaël, l’Archange! (Mat. 26:53; Jude 9) Oui, Jésus ti faire bann mirak; pourtant, seki li ti faire kan li ti lor la terre ti bien limité kan nou compare seki li ti pou’nn kapav faire dan le ciel.

 7. Couma bann Juif ti agir en rapport avek la Loi?

⁷ Kan Jésus ti dan le ciel en tant ki “la Parole,” kitfois li ti sa Porte-parole Bondié ki ti guide bann Israélite dan desert-la. (Jean 1:1; Ex. 23:20-23) Bann Israélite ti ‘gagne la Loi ki’nn transmette par bann ange mais zot pa ti’nn garde li.’ (Actes 7:53; Héb. 2:2, 3) Dan premier siecle, bann chef religieux juif pa ti vrai-mem comprend but ki la Loi ti ena. Prend par exemple la loi lor sabbat. (Lire Marc 3:4-6.) Bann scribe ek bann Pharisien “ti neglige bann kitsoz ki pli important dan la Loi, setadir, la justice, misericorde ek fidelité.” (Mat. 23:23) Malgré sa, Jésus pa ti baisse lé-bras ek li pa ti arrete annonce la verité.

 8. Kifer Jésus kapav aide nou?

⁸ Jésus ti bien disposé pou aide lezot. Li ti ena l’amour pou bann dimoune ek li ti vrai-mem envie aide zot. Jamais li ti perdi so desir pou preche la bonne nouvelle. Ek parski li ti fidele envers Jéhovah kan li ti lor la terre, “grace a li, tou bann ki obeir li pou gagne enn delivrance eternel.” En plus, “parski li-mem li finn souffert kan li’nn passe par bann l’epreuve, li kapav vinn au secours bann [couma nou] ki pé passe par bann l’epreuve.”—Héb. 2:18; 5:8, 9.

Enn enseignant ki’nn gagne enn bon formation

9, 10. Ki qualité formation Jésus ti gagné avant ki Bondié envoye li lor la terre?

⁹ Zordi, avant ki bann chretien al servi couma bann missionnaire, College central prend bann disposition pou ki zot gagne enn formation. Eski Jésus ti gagne enn formation li? Oui, mais avant ki li ti oint pou vinn le Messie, li pa ti al dan bann lekol kot bann rabbin ti allé, ni li ti gagne enn l’enseignement par enn grand chef religieux. (Jean 7:15; compare avek Actes 22:3.) Alors, couma eski Jésus ti vinn enn enseignant qualifié coumsa?

¹⁰ N’importe ki Jésus ti’nn kapav aprann ar so mama, Marie ek ar Joseph, so papa adoptif, c’est surtout ar pli grand l’Autorité ki existé, setadir Jéhovah, ki li ti gagne enn formation pou so ministere. En rapport avek sa, Jésus ti dire: “Mo pa finn koz par mo prop l’autorité, mais mo Papa ki finn envoye moi finn donne moi enn commandement concernant seki mo bizin dire ek seki mo bizin kozé.” (Jean 12:49) Remarké ki Garson Bondié ti gagne bann l’instruction precis lor seki li ti bizin enseigné. Avant li vinn lor la terre, nou sur ki Jésus ti passe beaucoup lé-temps pou ecoute bann instruction ki so Papa ti donne li. Li pa ti pou kapav gagne enn pli bon formation ki sa, pa vrai?

11. Ziska ki point Jésus ti reflete mem sentiment ki so Papa envers bann dimoune?

¹¹ Depuis ki li ti’nn crée, Jésus ti’nn developpe bann relation bien proche avek so Papa. Kan li ti dan le ciel, Jésus ti kapav comprend ki sentiment Bondié ena envers bann dimoune kan li ti observé couma Jéhovah ti agir envers zot. Tellement Garson Bondié ti montré mem l’amour ki Bondié ena pou bann dimoune ki li ti kapav dire en tant ki la sagesse personnifié: “Bann kitsoz ki mo ti bien content ti avek bann dimoune ki lor la terre.”—Prov. 8:22, 31.

12, 13. (a) Ki Jésus finn aprann kan li’nn observe fason ki so Papa ti agir avek bann Israélite? (b) Couma Jésus ti mette en pratik seki li ti aprann?

¹² Pendant so formation, Garson Bondié ti kapav aussi observé couma so Papa ti traite bann situation difficile. Par exemple, li ti trouvé couma Jéhovah ti agir avek bann Israélite kan zot ti desobeir. Nou trouve sa dan Nehémia 9:28 ki dire: “Desuite couma zot ti ena trankilité, zot ti recommence faire seki mauvais devant toi [Jéhovah], ek to ti abandonne zot dan la main zot bann l’ennemi ki ti faire dominere ar zot. Lerla zot ti retourné ek zot ti suppliye toi pou aide zot, ek toi to ti tann zot depuis le ciel, ek dan to grand misericorde, plusieurs fois to ti delivré zot.” Parski Jésus ti collabore avek Jéhovah ek ti observe fason ki so Papa ti agir, li ti developpe mem compassion pou bann dimoune dan so territoire.—Jean 5:19.

¹³ Jésus ti mette en pratik formation ki li ti gagné: li ti montré compassion envers so bann disciple. La nuit avant so la-mort, tou bann zapotre ki li ti bien content “ti abandonne li ek ti sauvé.” (Mat. 26:56; Jean 13:1) L’apotre Pierre ti mem renié Jésus Christ trois fois! Mais kan-mem, Jésus ti donne possibilité so bann zapotre pou retourne vers li. Li ti dire Pierre: “Mo finn suppliyé pou toi pou ki to pa perdi to la-foi; ek toi, enn fois ki to retourné, fortifié to bann frere.” (Luc 22:32) L’Israël spirituel inn bien fondé lor “bann zapotre ek bann prophete,” ek bann roche fondation muraille Nouvelle Jérusalem zot porte nom douze zapotre fidele Jésus Christ, l’Agneau Bondié. Ziska zordi, bann chretien oint ensam avek zot bann compagnon ki’nn voué zot la-vie ar Bondié, pé prosperé dan enn l’organisation ki preche le Royaume ki dirigé par la main puissant Bondié ek ki enba l’autorité so Garson ki Li bien content.—Éph. 2:20; Jean 10:16; Rév. 21:14.

So fason enseigné

14, 15. Couma l’enseignement Jésus ti bien different avek l’enseignement bann scribe ek bann Pharisien?

¹⁴ Couma Jésus ti servi formation ki li ti gagné kan li ti enseigne so bann disciple? Kan nou compare fason ki Jésus ti enseigné avek fason enseigné bann chef religieux juif, li clair ki fason enseigné Jésus ti pli superieur. Bann scribe ek bann Pharisien “[ti] faire parole Bondié perdi tou so valeur a cause zot tradition.” Mais Jésus li, li pa ti koz par so prop l’autorité; li ti enseigne toujours dapré parole ou-soit message Bondié. (Mat. 15:6; Jean 14:10) C’est seki nou aussi nou bizin faire.

¹⁵ Ena enn lot kitsoz encore ki ti faire Jésus bien different avek bann chef religieux. Concernant bann scribe ek bann Pharisien, li ti dire: “Tou seki bannla dire zot, faire li ek suive li, mais pa faire dapré zot action, parski zot dire mais zot pa faire.” (Mat. 23:3) Jésus li, li ti mette en pratik seki li ti enseigné. Anou examine enn l’exemple ki montré sa.

16. Kifer ou kapav dire ki Jésus ti vive en accord avek bann parole ki trouve dan Matthieu 6:19-21?

¹⁶ Jésus ti encourage so bann disciple pou “ramasse bann tresor dan le ciel.” (Lire Matthieu 6:19-21.) Eski Jésus li-mem li ti suive sa conseil-la? Oui, parski li ti kapav dire sans exageré lor li-mem: “Bann renard ena zot place kot zot resté ek bann zoiseau dan le ciel ena zot nik, mais Fils de l’homme pena okenn place pou pose so la-tête.” (Luc 9:58) Jésus ti amenn enn la-vie simple. Li ti surtout occupé pou preche la bonne nouvelle lor Royaume Bondié. Par so l’exemple li ti montré ki sa vedir vive enn la-vie sans tracas—bann tracas ki nou kapav gagné kan nou ramasse bann tresor lor la terre. Jésus ti montré ki li beaucoup pli bon pou ramasse bann tresor dan le ciel, “kot pena ni bebete ni la rouille pou rongé, ek kot bann voleur pa perce trou pou rentré ek kokin.” Eski ou pé suive conseil Jésus pou ramasse bann tresor dan le ciel?

Bann qualité ki ti faire bann dimoune content Jésus

17. Ki bann qualité ti faire Jésus vinn enn evangelisateur extraordinaire?

¹⁷ Ki bann qualité ti faire Jésus vinn enn evangelisateur extraordinaire? Enn parmi ti l’attitude ki li ti ena envers bann ki li ti aidé. Parmi bann qualité Jéhovah ki Jésus ti manifesté, ti ena l’humilité, l’amour ek compassion. Anou guetté couma sa bann qualité-la ti attire beaucoup dimoune vers Jésus.

18. Kifer nou kapav dire ki Jésus ti ena l’humilité?

¹⁸ Jésus ti accepté mission ki li ti gagné pou vinn lor la terre, a cause sa “li ti laisse tou, li ti prend forme enn esclave ek li ti vinn pareil couma bann zom.” (Phil. 2:7) Sa ti montré so l’humilité. En plus, Jésus pa ti meprise bann dimoune. Li pa ti ena sa l’attitude-la: ‘Mo’nn sorti direct dan le ciel, alors zot bizin ecoute moi.’ Li pa ti couma bann ki ti pé pretann ki zot bann messie mais ki en realité ti bann fausse messie. Li pa ti al sonne trompette partout pou faire koné ki li-mem vrai Messie. Parfois, li ti mem dire bann dimoune pa dire ki li été ek ki li ti faire. (Mat. 12:15-21) Jésus ti envie ki bann dimoune prend decision pou suive li dapré seki zot-mem zot ti trouvé. So bann disciple ti vrai-mem bien content ki zot Seigneur pa ti attann ki zot agir pareil couma bann ange parfait avek ki li ti associé kan li ti dan le ciel!

19, 20. Couma l’amour ek compassion ti pousse Jésus pou aide bann dimoune?

¹⁹ Jésus Christ ti aussi montré l’amour—enn qualité principal ki so Papa ena. (1 Jean 4:8) C’est l’amour ki ti pousse Jésus pou enseigne bann dimoune. Par exemple, guette sentiment ki li ti ena pou enn jeune chef riche. (Lire Marc 10:17-22.) Jésus “ti ressenti l’amour pou li,” ek li ti envie aide li, mais sa jeune chef-la pa ti quitte sa quantité di-bien ki li ti ena-la pou li kapav vinn enn disciple Jésus Christ.

²⁰ Jésus ti ena enn lot qualité ki ti attire bann dimoune vers li: li ti ena compassion. Pareil couma tou dimoune imparfait, bann ki ti ecoute so l’enseignement ti ena bann probleme. Jésus ti konn sa, c’est pou sa ki li ti enseigne zot avek compassion ek pitié. Par exemple, enn fois li ek so bann zapotre ti tellement occupé ki zot pa ti mem gagne le temps pou mangé. Pourtant, couma eski Jésus ti reagir kan li ti trouve enn la-foule ki ti’nn rassemblé? “Li ti ressenti enn grand pitié pou zot, parski zot ti couma bann mouton ki pena berger. Ek li ti commence enseigne zot beaucoup kitsoz.” (Marc 6:34) Jésus ti remarké ki bann dimoune dan so territoire ti dan enn situation bien triste ek li ti faire tou pou enseigne zot ek pou faire bann mirak pou zot bien. Certain ti attiré par so bann bon qualité, zot ti touché par so bann parole, ek zot ti vinn so bann disciple.

21. Ki nou pou examiné dan prochain lartik?

²¹ Ena beaucoup kitsoz encore ki nou kapav aprann lor ministere ki Jésus ti faire lor la terre. Nou pou examine sa dan prochain lartik. Dan ki lezot fason eski nou kapav imite Jésus, pli grand Missionnaire ki’nn existé lor la terre?

Couma ou pou reponn?

• Ki formation Jésus ti gagné avant li vinn lor la terre?

• Couma l’enseignement Jésus ti superieur ar l’enseignement bann scribe ek bann Pharisien?

• Ki bann qualité ki ti faire bann dimoune content Jésus?

[Zimage lor page 18]

Couma Jésus ti enseigne bann la-foule?