Zezi Ansegn Nikodem Aswar

Pandan ki li dan Zerizalem pou fet Pak lane 30 Nou Lepok, Zezi fer boukou mirak. Akoz sa, boukou dimounn koumans ena lafwa an li. Nikodem, enn Farizien, ki osi enn manb Sanedrin, setadir lakour siprem Zwif, bien inpresione ar Zezi ek li anvi konn plis. Alor, li al get Zezi enn aswar, kitfwa parski li per ki so repitasion gate si bann lezot Zwif trouv li.

Nikodem dir Zezi: “Rabi, nou kone ki to enn gran profeser ki sorti kot Bondie parski personn pa kapav fer bann sign kouma to fer, si Bondie pa ar li.” Lerla, Zezi dir li ki enn dimounn bizin “repran nesans” pou kapav rant dan Rwayom Bondie.​—Zan 3:2, 4.

Nikodem demann Zezi: “Kouma enn dimoun kapav repran nesans, kan li finn fini vinn vie? Eski li kapav rant dan vant so mama enn deziem fwa pou repran nesans?”​—Zan 3:4.

Me se pa sa ki Zezi pe rod dir. Zezi explike: “Personn pa kapav rant dan Rwayom Bondie, si li pa repran nesans dan dilo ek Lespri.” (Zan 3:5) Kan Zezi ti batize ek ki lespri sin ti desann lor li, Zezi ti ne “dan dilo ek Lespri.” Lerla, enn lavwa dan lesiel ti dir: “Limem mo Garson ki mo bien kontan ek ki mo finn aprouve.” (Matie 3:16, 17, NW.) Se koumsa ki Bondie ti fer kone ki Zezi finn vinn enn garson spiritiel ki ena posibilite pou rant dan Rwayom ki dan lesiel. Plitar, zour Lapantkot 33 Nou Lepok, lespri sin pou desann lor lezot disip ki’nn batize ek zot osi, zot pou repran nesans kouma bann garson ki’nn kree par lespri Bondie.​—Zistwar Bann Apot 2:1-4.

Pa fasil pou Nikodem konpran seki Zezi pe ansegn li lor Rwayom Bondie. Alor, Zezi donn li plis detay lor rol spesial ki li ena antan ki Garson imin Bondie. Zezi dir li: “Parey kouma Moiz ti met serpan an bronz lor enn poto dan dezer, dan mem manier pou bizin lev Garson Limanite lao, pou ki tou dimoun ki krwar dan li gagn lavi eternel.”​—Zan 3:14, 15.

Bien lontan, bann Izraelit ki ti gagn pike ar serpan ti bizin get sa serpan an bronz la pou zot pa mor. (Nonb 21:9) Dan mem fason, tou dimounn bizin ena lafwa dan Garson Bondie pou ki zot pa mor me gagn lavi pou touletan. Zezi atir latansion Nikodem lor lamour ki Bondie finn montre dan sa sitiasion-la. Li dir: “Bondie finn telman kontan lemonn, ki li finn donn so Sel Garson pouki tou dimoun ki krwar [“ena lafwa,” NW] dan Li, pa mor me gagn lavi eternel.” (Zan 3:16) Alor, se isi dan Zerizalem, anviron sis mwa apre ki Zezi inn koumans so minister, ki li explik dan enn fason bien kler ki se limem ki pou sov bann imin.

Zezi dir Nikodem: “Bondie pa finn avoy so Garson dan lemonn pou kondann lemonn.” Savedir ki Bondie pa’nn avoy Zezi lor later pou kondann lemond ek pou detrir li, me plito pou “sov lemonn.”​—Zan 3:17.

Nikodem inn vinn get Zezi kan fer nwar parski li per bann dimounn. Alor, remark bann parol interesan ki Zezi servi pou terminn sa konversasion-la. Li dir: “Ala zizman la: lalimier [Zezi avek so bann lansegnman] finn vinn dan lemonn me bann dimoun finn pli kontan teneb ki lalimier parski zot manier pa bon. Parski tou dimoun ki fer lemal deteste lalimier e li pa vinn dan lalimier pouki so bann move aksion pa paret okler. Me dimoun ki azir dan laverite vinn dan lalimier pouki tou dimoun trouve ki so bann aksion koresponn ar volonte Bondie.”​—Zan 3:19-21.

Asterla, se Nikodem, enn Farizien ek enn ansegnan dan Izrael, ki bizin bien reflesi lor tou seki li’nn tande konsernan rol ki Zezi ena dan proze Bondie.