Comprend bien role ki Jésus tousel ena dan projet Bondié

“Mo-mem chemin, ek la verité ek la vie. Personne pa kapav vinn vers mo Papa sans passe par moi.”—JEAN 14:6.

1, 2. Kifer nou bizin interesse-nou ar role ki Jésus tousel ena dan projet Bondié?

PENDANT bann siecle ki’nn passé, beaucoup dimoune finn faire bann grand zeffort pou montré ki zot different ar bann dimoune tout autour zot, mais pa beaucoup ki finn reussi. Bien tigit dimoune encore kapav pretann ki pena personne couma zot dan certain domaine. Pourtant, en seki concerne Jésus Christ, Garson Bondié, pena personne ki couma li dan beaucoup domaine.

² Kifer role ki zis Jésus tousel ena bizin interesse nou? Parski nou relation avek Jéhovah, nou Papa ki dan le ciel, depann lor la! Jésus ti dire: “Mo-mem chemin, ek la verité ek la vie. Personne pa kapav vinn vers mo Papa sans passe par moi.” (Jean 14:6; 17:3) Anou examine certain domaine kot Jésus pa pareil couma lezot dimoune. Sa pou aide nou pou apprecié pli bien so role dan projet Bondié.

‘Sel Garson ki Bondié inn crée direct’

3, 4. (a) Kifer nou kapav dire ki en tant ki sel Garson ki Bondié inn crée direct, Jésus tousel ena sa role-la? (b) En rapport avek la creation, dan ki sens pena personne ki ena role ki Jésus tousel ti ena?

³ Jésus li pa zis “enn garson Bondié.” C’est coumsa ki Satan ti appel Jésus kan li ti tente li. (Mat. 4:3, 6) La Bible ena raison pou appel Jésus “sel Garson ki [Bondié] finn crée direct.” (Jean 3:16, 18) Mot grec ki’nn traduire par “crée direct” signifie “enn sel dan so qualité, zis enn tousel,” ou-soit “sel representant enn famille ou-soit enn groupe.” Jéhovah ena plusieurs centaine million garson spirituel. Dan ki sens alors, eski Jésus li sel representant “dan enn famille ou-soit enn groupe”?

⁴ Pena personne ki couma Jésus parski li tousel ki so Papa inn crée direct. Li Garson premier-né Bondié. En realité, li “premier-né dan tou creation.” (Col. 1:15) Li “commencement creation Bondié.” (Rév. 3:14) En rapport avek la creation, pena personne ki ena role ki sel Garson ki Bondié inn crée direct, ena. Li pa ti Createur, setadir sa Kikenn ki’nn crée tou kitsoz-la. Mais Jéhovah ti servi li couma enn moyen pou crée tou lezot kitsoz. (Lire Jean 1:3.) L’apotre Paul ti ecrire: “Avredir pou nou ena enn sel Bondié, nou Papa, ki’nn crée tou kitsoz, ek nou pou Li; ek ena enn sel Seigneur, Jésus Christ, par ki tou kitsoz existé, ek par ki nou existé.”—1 Cor. 8:6.

 5. Couma la Bible mette l’accent lor role ki Jésus tousel ena?

⁵ Pourtant, pena personne ki couma Jésus dan beaucoup lezot fason encore. La Bible donne Jésus beaucoup titre ou-soit nom ki mette l’accent lor sa role ki li tousel ena dan projet Bondié-la. Anou examine cinq titre ki bann Écritures grecques chrétiennes donne Jésus.

“La Parole”

 6. Kifer li approprié ki Jésus appel “la Parole”?

⁶ Lire Jean 1:14. Kifer la Bible appel Jésus “la Parole,” ou-soit Logos? Sa titre-la faire nou konn fonction ki li rempli depuis ki lezot creature intelligent inn commence existé. Jéhovah ti servi so Garson pou transmette bann renseignement ek bann instruction ar lezot creature spirituel. Li ti aussi servi li pou transmette So message ar bann zom lor la terre. Nou koné ki Jésus li la Parole, ou-soit Porte-Parole Bondié par seki li ti dire bann Juif ki ti pé ecoute li: “Seki mo enseigné pa sorti ar moi, mais ar sa Kikenn ki finn envoye moi-la. Si enn kikenn envie faire So volonté, li pou koné en seki concerne l’enseignement, si sa sorti kot Bondié ou-soit si seki mo pé enseigné sorti dan mo prop pensée.” (Jean 7:16, 17) Mem apré ki li’nn regagne la gloire kan li’nn retourne dan le ciel, Jésus contigne garde titre “La Parole Bondié.”—Rév. 19:11, 13, 16.

 7. Couma nou kapav imite l’humilité ki Jésus ena en tant ki “la Parole”?

⁷ Mazinn seki sa titre-la impliké. Mem si Jésus ena plus sagesse ki tou bann lezot creature Jéhovah, li pa compte lor so prop sagesse. Li dire seki so Papa inn donne li l’ordre pou dire. Li attire toujours l’attention lor Jéhovah, pa lor li-mem. (Jean 12:50) C’est vrai-mem enn bon l’exemple pou nou imité, pa vrai? Nou aussi nou finn gagne enn grand privilege pou “annonce bann bon nouvelle lor bann bon kitsoz.” (Rom. 10:15) Si nou apprecié l’exemple l’humilité ki Jésus inn donne nou, sa bizin pousse nou pou evité enseigne nou bann l’idée personnel. Nou pa envie “al pli loin ki seki finn ecrire,” kan nou pé partage message ki sorti dan la Bible ek ki kapav sauve la vie.—1 Cor. 4:6.

“Amen”

8, 9. (a) Ki mot “amen” vedir, ek kifer la Bible appel Jésus “Amen”? (b) Couma Jésus inn rempli so role en tant ki “Amen”?

⁸ Lire Révélation 3:14. Kifer la Bible appel Jésus “Amen”? Mot “amen” c’est enn mot hébreu ki vedir “ki sa realisé,” ou-soit “surement.” Racine sa mot hébreu kot li sorti-la vedir “reste fidele” ou-soit “ki kapav faire confiance.” Servi sa mem mot-la pou decrire fidelité Jéhovah. (Deut. 7:9; Is. 49:7) Alors, kan la Bible appel Jésus “Amen,” dan ki sens eski li tousel kapav ena sa titre-la? Guetté couma 2 Corinthiens 1:19, 20 reponn sa question-la: “Garson Bondié, Christ Jésus, ki nou, nou finn preché parmi zot . . . , pa’nn vinn Oui ek pourtant Non, mais Oui inn vinn Oui dan so cas. Parski, n’importe ki quantité promesse ki Bondié inn faire, zot inn vinn Oui par so moyen. Alors, c’est aussi grace a li ki dire Bondié ‘amen’ pou la gloire.”

⁹ Jésus li-mem “Amen” pou tou bann promesse Bondié. So la vie sans defaut lor la terre, ek so la mort en sacrifice, inn confirme ek inn rann possible realisation tou bann promesse Jéhovah. Kan Jésus inn reste fidele, li’nn prouvé aussi ki Satan enn menteur. Kan nou lire livre Job, nou trouvé ki Satan ti pretann ki bann serviteur Bondié pou renié Li si zot pena seki zot bizin pou vive, si zot souffert ek si zot passe par bann l’epreuve. (Job 1:6-12; 2:2-7) Dan tou bann creature Bondié, c’est so Garson premier-né ki ti pou donne enn reponse ki personne pa kapav dementi kont sa l’accusation-la. En plus, Jésus inn donne pli grand preuve ki kapav pou montré ki li soutenir so Papa concernant question pli important ki ena: eski Jéhovah ena droit pou dirige l’univers?

10. Couma nou kapav imite Jésus dan so role en tant ki “Amen,” role ki li tousel ena?

¹⁰ Couma nou kapav imite Jésus dan sa role ki li tousel ena-la en tant ki “Amen”? C’est kan nou reste fidele envers Jéhovah ek kan nou soutenir so droit pou dirige l’univers. Kan nou faire sa, nou pou donne enn reponse positif pou question ki posé dan Proverbes 27:11: “Montré ki to sage mo garson, ek faire mo leker content, pou ki mo kapav reponn celui ki pé provok moi.”

“Mediateur enn nouveau l’alliance”

11, 12. Dan ki sens eski pena personne ki enn Mediateur couma Jésus?

¹¹ Lire 1 Timothée 2:5, 6. Jésus li “sel mediateur entre Bondié ek bann dimoune.” Li “mediateur enn nouveau l’alliance.” (Héb. 9:15; 12:24) Selman, la Bible appel Moïse aussi enn mediateur—mediateur l’alliance la Loi. (Gal. 3:19) Alors, dan ki sens eski pena personne ki enn Mediateur pareil couma Jésus?

¹² Dan langue original, mot “mediateur” c’est enn terme legal. Li faire reference ar Jésus en tant ki enn Mediateur legal (ou-soit coumadir enn avocat) dan nouveau l’alliance ki’nn permette naissance enn nouveau nation, “Israël Bondié.” (Gal. 6:16) Dan sa nation-la ena bann chretien ki’nn oint ar l’esprit saint, ki forme enn ‘groupe pretre ki le roi’ dan le ciel. (1 Pierre 2:9; Ex. 19:6) L’alliance la Loi, ki ti ena Moïse en tant ki mediateur, pa ti kapav produire enn nation coumsa.

13. En tant ki Mediateur, ki role Jésus ena?

¹³ En tant ki Mediateur, ki role Jésus ena? Jéhovah applik valeur di-sang Jésus ar bann ki Li pé faire rente dan sa nouveau l’alliance-la. Coumsa, dan enn fason legal, Jéhovah declare zot juste. (Rom. 3:24; Héb. 9:15) Lerla, Li kapav faire zot rente dan nouveau l’alliance avek l’esperance pou vinn bann le roi ek bann pretre dan le ciel! En tant ki zot Mediateur, Jésus aide zot pou reste pur devant lizié Bondié.—Héb. 2:16.

14. Kifer tou bann chretien, n’importe ki l’esperance zot ena, bizin apprecié role ki Jésus ena en tant ki Mediateur enn nouveau l’alliance?

¹⁴ Ki nou kapav dire lor bann ki pa dan sa nouveau l’alliance-la, bann ki ena l’esperance pou vive pou touletan lor la terre, pa dan le ciel? Mem si zot pa bann participant dan sa nouveau l’alliance-la, zot tire bann bienfait ladan. Zot gagne pardon pou zot bann peché ek Bondié declare zot juste couma so bann camarade. (Jacq. 2:23; 1 Jean 2:1, 2) Ki nou ena l’esperance pou al vive dan le ciel ou-soit pou vive lor la terre, sakenn parmi nou ena bann bon raison pou apprecié role ki Jésus ena en tant ki Mediateur enn nouveau l’alliance.

“Grand Pretre”

15. Couma fonction Grand Pretre ki Jésus ena li different ar fonction tou bann lezot zom ki’nn servi couma grand pretre?

¹⁵ Dan le passé, beaucoup zom finn servi couma grand pretre. Pourtant, pena personne ki pareil couma Jésus dan so role en tant ki Grand Pretre. Kifer? Paul expliké: “Li pa bizin chaque jour, couma sa bann grand pretre-la, offert bann sacrifice, d’abord pou so prop peché ek apré pou peché le peuple (parski sa, li’nn faire sa enn sel fois pou tou kan li’nn offert li-mem;) parski la Loi etabli bann zom ki ena bann defaut en tant ki grand pretre, mais Bondié ki’nn faire enn serment apré la Loi, etabli enn Garson, ki vinn parfait pou touletan.”—Héb. 7:27, 28.a

16. Kifer sacrifice Jésus li pa pareil couma tou lezot sacrifice?

¹⁶ Jésus ti enn zom parfait, exactement pareil couma Adam ti été avant li faire peché. (1 Cor. 15:45) Alors, dan sa position-la, Jésus ti sel dimoune ki ti kapav offert enn sacrifice parfait ek complet, enn sacrifice ki pa ti bizin renouvelé chaque fois. Enba la Loi mosaïk, ti bizin offert bann sacrifice toulé-jour. Mais tou sa bann sacrifice ek service ki bann pretre ti pé faire-la, ti zis enn l’ombrage seki Jésus ti pou faire. (Héb. 8:5; 10:1) Alors, parski Jésus kapav faire plus ki seki bann lezot grand pretre inn faire, ek li pou servi pou touletan, pena personne couma li en tant ki Grand Pretre.

17. Kifer nou bizin reconnaissant pou seki Jésus faire dan so role en tant ki Grand Pretre, ek couma nou kapav montré sa?

¹⁷ Nou bizin service Jésus en tant ki Grand Pretre pou ki Bondié considere nou couma bann dimoune juste. Nou ena enn Grand Pretre vrai-mem extraordinaire! Paul ti ecrire: “Grand pretre ki nou ena, li pa enn kikenn ki pa kapav comprend nou bann faiblesse, mais enn kikenn ki finn passe par l’epreuve dan tou kitsoz pareil couma nou, mais selman li pa ti ena okenn peché.” (Héb. 4:15) Oui, pena doute, nou reconnaissance pou sa, bizin pousse nou pou ‘nepli vive pou nou-mem, mais pou celui ki’nn mort pou nou.’—2 Cor. 5:14, 15; Luc 9:23.

Sa “Descendance” ki ti’nn annoncé-la

18. Ki prophetie Jéhovah ti donné apré peché Adam, ek plitar, ki Li’nn faire koné lor sa prophetie-la?

¹⁸ Dan jardin Éden, kan l’humanité ti’nn coumadir perdi tou—bann bon relation avek Bondié, la vie eternel, enn la vie heureux, ek Paradis—Jéhovah ti annoncé ki ti pou ena enn Sauveur. La Bible ti koz lor li couma enn “descendance.” (Gen. 3:15) Ti ena enn mystere autour sa Descendance-la ek sa ti vinn theme beaucoup prophetie biblik pendant plusieurs siecle. Li ti pou enn descendant Abraham, Isaac, ek Jacob. Li ti pou aussi sorti dan descendance le roi David.—Gen. 21:12; 22:16-18; 28:14; 2 Sam. 7:12-16.

19, 20. (a) Kisannla ki sa Descendance ki Bondié ti’nn promette-la? (b) Kifer nou kapav dire ki pena zis Jésus ki forme partie dan sa descendance ki ti’nn annoncé-la?

¹⁹ Kisannla ki ti sa Descendance ki Bondié ti’nn promette-la? Nou trouve reponse sa question-la dan Galates 3:16. (Lire.) Selman, pli loin dan mem chapitre, l’apotre Paul ti dire bann chretien oint: “En plus, si zot pou Christ, zot vrai-mem descendance Abraham, heritier en rapport avek enn promesse.” (Gal. 3:29) Si c’est Christ ki sa Descendance ki Bondié ti’nn promette-la, alors, couma eski lezot chretien aussi forme partie dan sa Descendance-la?

²⁰ Plusieurs million dimoune pretann ki zot bann descendant Abraham, certain mem agir couma bann prophete. Certain religion bien fiere pou dire ki zot bann prophete c’est bann descendant Abraham. Mais eski tou sa bannla zot sa Descendance ki ti’nn promette-la? Non. Pareil couma l’apotre Paul ki ti inspiré ti dire, pa tou bann descendant Abraham ki kapav pretann ki zot sa Descendance ki Bondié ti’nn promette-la. Bondié pa’nn servi bann descendant lezot garson Abraham pou beni l’humanité. Zis descendance Isaac ki ti pou amenn sa benediction-la. (Héb. 11:18) A la fin, c’est zis enn zom, Jésus Christ, ki partie principal sa descendance ki ti annoncé-la. Dan la Bible, nou kapav trouve enn la liste so bann ancetre depuis Abraham.b Tou bann ki plitar vinn partie secondaire descendance Abraham, zot gagne sa position-la parski zot “pou Christ.” Oui, role ki Jésus ena dan realisation sa prophetie-la, li vrai-mem enn role ki zis li tousel ena.

21. Ki impressionne ou dan fason ki Jésus inn realise role ki li tousel ena dan projet Bondié?

²¹ Ki nou finn aprann ar sa ti resumé ki nou’nn faire lor role ki Jésus tousel ena dan projet Jéhovah? Depuis so creation ziska zordi, pa finn ena personne ki couma sa Garson ki Bondié inn crée direct-la, pena enn lot couma li. Pourtant, sa sel Garson Bondié ki’nn vinn Jésus-la, finn toujours servi so Papa avek humilité en accord avek So volonté, ek jamais li pa’nn rod so prop la gloire. (Jean 5:41; 8:50) C’est vrai-mem enn bon l’exemple pou nou zordi! Pareil couma Jésus, anou fixé l’objectif pou “faire tou pou la gloire Bondié.”—1 Cor. 10:31.

[Note]

Eski ou rappel?

• Ki ou finn aprann lor role ki Jésus tousel ena par bann titre ek bann nom ki la Bible donne li? (Guette l’encadré.)

• Couma ou kapav imite l’exemple sel Garson Jéhovah?

[L’encadré lor page 23]

Certain titre ki mette l’accent lor role ki Jésus tousel ena dan projet Bondié

◼ Sel Garson ki Bondié inn crée direct. (Jean 1:3) Jésus tousel inn crée direct par so Papa.

◼ La Parole. (Jean 1:14) Jéhovah servi so Garson couma enn Porte-Parole pou transmette bann renseignement ek bann instruction ar lezot creature.

◼ Amen. (Rév. 3:14) La vie sans defaut ki Jésus inn amené lor la terre ek so la mort en sacrifice, inn confirme ek inn rann possible realisation tou bann promesse Jéhovah.

◼ Mediateur nouveau l’alliance. (1 Tim. 2:5, 6) En tant ki enn Mediateur legal, Jésus inn permette naissance enn nouveau nation, “Israël Bondié,” kot ena bann chretien oint ki pou forme enn “groupe pretre ki pou vinn le roi” dan le ciel.—Gal. 6:16; 1 Pierre 2:9.

◼ Grand Pretre. (Héb. 7:27, 28) Jésus ti sel dimoune ki ti kapav donne enn sacrifice parfait, enn sacrifice ki pa ti bizin renouvelé chaque fois. Jésus kapav purifié nou ar nou bann peché ek delivré nou ar so bann consequence ki amenn vers la mort.

◼ Sa Descendance ki ti’nn promette-la. (Gen. 3:15) Zis enn sel zom, Jésus Christ, ki partie principal sa descendance ki ti’nn annoncé-la. Tou bann ki plitar forme partie secondaire descendance Abraham, zot “pou Christ.”—Gal. 3:29.