Jésus Nourri Beaucoup a Travers enn Tigit

1-3. Decrire couma Jésus ti nourri enn grand la foule pré ar village Bethsaïda. (Guette zimage dan commencement lartik.)

MAZINN sa scene-la. (Lire Matthieu 14:14-21.) Nou zis avant la Pâque l’an 32 Nou Lepok. Enn la foule apepré 5,000 zom, sans compte bann femme ek bann zenfant, ti ensam avek Jésus ek so bann disciple dan enn l’endroit retiré, pré ar Bethsaïda, enn village lor la cote nord Lamer Galilée.

² Kan Jésus trouve sa la foule-la, li ena pitié pou zot, alors sa pousse li pou gueri bann ki malade parmi zot ek li enseigne zot beaucoup kitsoz lor Royaume Bondié. Kan inn arrive tard, bann disciple dire Jésus faire bann dimoune-la allé pou ki zot kapav al dan bann village tout autour pou acheté mangé. Mais Jésus dire so bann disciple: “Donne zot kitsoz pou mangé zot-mem.” Surement bann disciple etonné kan zot tann sa, parski tou seki ena pou mangé, c’est zis cinq di-pain ek deux ti poisson.

³ Jésus rempli ar compassion ek sa pousse li pou faire enn mirak​—sel mirak ki mentionné dan toulé-quatre Evangile. (Marc 6:35-44; Luc 9:10-17; Jean 6:1-13) Jésus demann so bann disciple pou dire la foule assize lor l’herbe par groupe 50 ek 100. Li faire enn la priere, apré sa, li commence casse bann di-pain ek bann poisson. Lerla, au lieu ki li donne mangé bann dimoune directement, Jésus distribué sa ‘ar bann disciple, ek bann disciple distribué sa ar la foule.’ Grace a sa mirak-la, ena mangé plis ki bizin pou tou dimoune! Maziné: Jésus inn nourri plusieurs millier dimoune a travers enn tigit dimoune​—so bann disciple.a

 4. (a) Ki qualité nourriture Jésus ti trouve pli important pou donné, ek kifer? (b) Ki nou pou examiné dan sa lartik letid-la ek dan prochain lartik letid?

⁴ Mais seki ti pli important pou Jésus c’est donne la nourriture spirituel so bann disciple. Li ti koné ki kan enn dimoune prend la nourriture spirituel, setadir bann verité ki trouve dan Parole Bondié, sa amenn li vers lavi eternel. (Jean 6:26, 27; 17:3) Jésus ti nourri bann la foule avek di-pain ek poisson parski li ti ena compassion pou zot. C’est sa mem compassion-la ki ti pousse li pou passe beaucoup le temps pou enseigne personnellement so bann disciple. (Marc 6:34) Mais li ti koné ki li pa ti pou passe beaucoup le temps lor later ek ki li ti pou retourne dan le ciel. (Mat. 16:21; Jean 14:12) Couma Jésus, dan le ciel, ti pou faire en sorte ki so bann disciple lor later bien nourri lor plan spirituel? Li ti pou suive mem modele​—li ti pou nourri beaucoup dimoune a travers enn tigit disciple. Kisannla ki ti pou sa tigit disciple-la? Anou guetté couma Jésus ti servi enn tigit disciple pou nourri beaucoup Chretien oint dan premier siecle. Apré sa, dan prochain lartik nou pou examine enn question ki bien important pou sakenn parmi nou: Couma nou kapav koné kisannla sa tigit disciple ki Christ servi pou nourri nou zordi-la?

5, 6. (a) Ki grand decision Jésus ti prend pou faire sur ki so bann disciple bien nourri lor plan spirituel apré so lamor? (b) Couma Jésus ti prepare so bann zapotre pou enn role bien important apré so lamor?

⁵ Enn chef famille ki prend so responsabilité, prend bann disposition pou ki so famille pa mank nanyé si jamais li mor. Li pareil aussi pou Jésus ki ti pou vinn Chef congregation Chretien, li ti prend bann disposition pou faire sur ki so bann disciple pa mank nanyé lor plan spirituel apré so lamor. (Éph. 1:22) Par exemple, apepré deux an avant so lamor, Jésus ti prend enn grand decision. Li ti choisir enn tigit disciple ki li ti pou servi plitar pou nourri beaucoup dimoune. Anou guetté ki ti arrivé.

⁶ Apré ki li ti prié toute la nuit, Jésus ti rassemblé so bann disciple ek parmi zot li ti choisir 12 zapotre. (Luc 6:12-16) Pendant deux l’année ki ti suive, li ti surtout bien proche avek sa 12 zapotre-la, li ti enseigne zot par so bann parole ek par so l’exemple. Li ti koné ki zot ti ena beaucoup pou aprann; en realité, zot ti toujours bann “disciple.” (Mat. 11:1; 20:17) Li ti donne zot personnellement bann bon conseil ek enn bon formation dan zot ministere. (Mat. 10:1-42; 20:20-23; Luc 8:1; 9:52-55) Li clair ki li ti pé prepare zot pou enn role bien important apré so lamor ek kan li ti pou retourne dan le ciel.

 7. Couma Jésus ti donne enn detail important lor priorité ki so bann zapotre ti pou ena?

⁷ Ki role bann zapotre ti pou ena? A mesure ki la Pentecôte l’an 33 Nou Lepok ti pé kosté, li ti clair ki bann zapotre ti pou “travail en tant ki surveillant.” (Actes 1:20) Mais, ki priorité zot ti pou ena? Apré so resurrection, Jésus ti donne enn detail important lor-la dan enn conversation ki li ti gagné avek l’apotre Pierre. (Lire Jean 21:1, 2, 15-17.) Devant certain zapotre, Jésus ti dire Pierre: “Nourri mo bann ti brebis.” Jésus ti montré par la ki bann zapotre ti pou parmi sa tigit disciple ki li ti pou servi pou donne nourriture spirituel beaucoup dimoune. C’est vrai-mem enn preuve bien touchant ek bien clair ki montré sentiment ki Jésus ena pou so “bann ti brebis,” pa vrai?b

 8. Couma jour la Pentecôte, bann nouveau croyant ti montré ki zot reconette ek accepté sa moyen ki Christ ti pé servi-la?

⁸ A partir jour la Pentecôte l’an 33 Nou Lepok, Jésus ki ti ressuscité, ti servi so bann zapotre couma enn moyen pou nourri le reste bann disciple ki oint. (Lire Actes 2:41, 42.) Bann Juif ek bann prosélyte ki ti vinn bann Chretien oint sa jour-la pa ti ena okenn probleme pou accepté ek reconette sa moyen-la. Sans hesité, zot “ti contigne consacré zot le temps pou ecoute l’enseignement bann zapotre.” Dapré enn bibliste, li possible ki verbe Grec ki finn traduire par “contigne consacré zot le temps” vedir “zot ti bien ferme ek fidele dan zot l’objectif pou faire enn certain kitsoz.” Bann nouveau croyant ti ena enn grand desir pou gagne la nourriture spirituel, ek zot ti koné exactement ki coté pou gagne sa. Avek enn grand fidelité, zot ti tourne vers bann zapotre pou gagne bann l’explication lor bann parole ek bann action ki Jésus ti faire ek pou gagne bann l’eclaircissement lor signification bann verset ki ti concerne li.c​—Actes 2:22-36.

 9. Couma bann zapotre ti montré ki zot ti fixé zot l’attention lor zot responsabilité pou nourri bann brebis Jésus?

⁹ Bann zapotre ti fixé zot l’attention lor zot responsabilité pou nourri bann brebis Jésus. Par exemple, remarké couma zot ti reglé enn probleme bien sensible ki ti kapav faire division dan congregation ki ti’nn fek formé. Par coincidence, sa probleme-la ti ena enn rapport avek mangé. Ti pé neglige bann veuve ki ti koz Grec dan distribution mangé ki ti faire toulé-jour, mais bann veuve ki ti koz Hébreu pa ti negligé. Couma bann zapotre ti reglé sa probleme delicat-la? “Bann douze zapotre” ti etabli sept frere qualifié pou supervise sa “travail important-la”​—distribué mangé. Surement, la plupart parmi bann zapotre ti participé pou distribué mangé ar la foule ki Jésus ti nourri par enn mirak. Mais zot ti trouvé ki li ti pli important pou zot fixé zot l’attention pou nourri bann disciple lor plan spirituel. Alors, zot ti consacré zot-mem ar “ministere ki concerne la parole.”​—Actes 6:1-6.

10. Couma Christ ti servi bann zapotre ek bann ancien dan Jérusalem?

¹⁰ Vers l’an 49 Nou Lepok, lezot ancien qualifié ti associé-zot ar bann zapotre ki ti ankor vivant. (Lire Actes 15:1, 2.) “Bann zapotre ek bann ancien ki ti Jérusalem” ti forme enn college central. En tant ki Chef congregation, Christ ti servi sa ti groupe zom qualifié-la pou reglé bann question ki ti concerne bann doctrine ek pou supervise l’activité predication ek l’enseignement concernant la bonne nouvelle lor Royaume Bondié.​—Actes 15:6-29; 21:17-19; Col. 1:18.

11, 12. (a) Ki montré ki Jéhovah ti beni disposition ki so Garson ti prend pou nourri bann congregation dan premier siecle? (b) Kifer li ti fasil pou reconette moyen ki Christ ti servi pou donne nourriture spirituel?

¹¹ Eski Jéhovah ti beni disposition ki so Garson ti prend pou nourri bann congregation dan premier siecle? Pena okenn doute lor la! Couma nou konn sa? Livre Actes dire: “A mesure ki zot [l’apotre Paul ek so bann compagnon ki ti voyage avek li] ti passe par bann lavil, zot ti faire bann ki ti la konn bann decision ki bann zapotre ek bann ancien dan Jérusalem ti’nn prend, pou ki lerla bannla mette sa en pratik. Alors vrai-mem, bann congregation ti pé contigne vinn fort dan la foi ek zot ti pé augmenté jour apré jour.” (Actes 16:4, 5) Remarké ki sa bann congregation-la ti pé progressé parski avek fidelité, zot ti coopere ar college central dan Jérusalem. Eski sa c’est pa enn preuve ki Jéhovah ti beni disposition ki so Garson ti prend pou nourri bann congregation? Nou bizin rappel ki c’est zis avek benediction Jéhovah ki nou kapav progressé lor plan spirituel.​—Prov. 10:22; 1 Cor. 3:6, 7.

¹² Ziska ler nou finn trouvé ki Jésus ti suive enn modele pou nourri so bann disciple: Li ti nourri beaucoup dimoune a travers enn tigit disciple. Li ti fasil pou reconette moyen ki li ti servi pou donne nourriture spirituel. Apré tou, bann zapotre​—bann premier membre college central​—ti kapav donne bann preuve ki tou dimoune ti trouvé, ki Bondié ti soutenir zot. Actes 5:12 dire: “Par la main bann zapotre ti contigne ena beaucoup signe ek prediction parmi le peuple.”d Alors, pa ti ena okenn raison pou bann ki ti vinn Chretien pou demann-zot-mem: ‘Kisannla vrai-mem Christ pé servi pou nourri so bann brebis?’ Mais vers lafin premier siecle, situation ti’nn changé.

13, 14. (a) Ki l’avertissement Jésus ti donné concernant l’opposition ki congregation ti pou gagné, ek kan so bann parole ti commence realisé? (b) Ki deux groupe ti pou opposé ar congregation? (Guette note.)

¹³ Jésus ti annoncé ki congregation Chretien ti pou gagne l’opposition. Nou rappel ki dan parabole di-blé ek mauvais l’herbe, Jésus ti averti ki sa bann di-blé ki ti’nn fek planté-la (bann Chretien oint) ti pou couvert avek mauvais l’herbe (bann soi-disant Chretien). Li ti dire ki sa deux groupe-la ti pou pousse ensam​—sans ki nanyé derange zot ziska recolte, kan “conclusion enn systeme” ti pou commencé. (Mat. 13:24-30, 36-43) Bann parole Jésus pa ti tardé pou realisé.e

¹⁴ L’apostasie ti pé commence developpé dan premier siecle, mais bann zapotre Jésus ki ti fidele ti “faire obstacle,” zot ti empeche bann fausse l’enseignement contamine ek influence congregation. (2 Thess. 2:3, 6, 7) Mais, enn fois ki dernier zapotre ti’nn mor, l’apostasie ti plis developpé ek ti prosperé lor enn longue periode ki’nn duré pendant plusieurs siecle. En plis, pendant sa periode-la, di-blé ek mauvais l’herbe toulé-deux ti pé pousse ensam ek bann ti-pié di-blé ti bien tigit. Pa ti ena okenn moyen regulier ek organisé pou donne nourriture spirituel. Sa ti pou changé, mais kan?

15, 16. Ki resultat letid profond ki bann Etudiant la Bible ti faire lor la Bible, ti produire, ek ki question sa soulevé?

¹⁵ Kan lepok recolte ti pré pou commencé, bann dimoune ti montré enn grand l’interet pou bann verité ki ena dan la Bible. Nou rappel ki en 1870, enn ti groupe dimoune sincere ki ti pé rod la verité, ti rassemblé ek ti forme bann classe Biblik, separé ar bann mauvais l’herbe​—bann soi-disant Chretien ki dan bann religion ek bann secte la Chretienté. Bann Etudiant la Bible ti sincere, zot ti ena enn leker humble ek enn l’esprit ouvert. Avek l’aide la priere, zot ti faire bann recherche profond lor la Bible.​—Mat. 11:25.

¹⁶ Letid profond ki bann Etudiant la Bible ti faire lor la Bible, ti produire bann bon resultat. Sa bann zom ek femme fidele-la ti denonce bann fausse doctrine ek ti faire konn bann verité spirituel. Zot ti publié ek ti distribué bann publication ki basé lor la Bible, partout. Zot travail ti touche leker ek ti convaink beaucoup dimoune ki ti pé rod la verité. Alors, enn question interessant c’est: Dan bann l’année avant 1914, eski bann Etudiant la Bible c’est zot ki ti moyen ki Jésus Christ ti etabli pou nourri so bann brebis? Non. Zot ti ankor dan lepok kot di-blé ek mauvais l’herbe ti pé pousse ensam. Sa moyen ki Jésus ti pou servi pou donne nourriture spirituel-la ti pé formé. Pa ti ankor arrive lepok pou separe bann soi-disant Chretien ki comparé ar mauvais l’herbe ar bann vrai Chretien ki comparé ar di-blé.

17. Ki bann evenement ti commencé en 1914?

¹⁷ Pareil couma nou ti aprann dan lartik avant, lepok recolte ti commencé en 1914. Sa l’année-la ti commence ena plusieurs evenement important. Jésus ti vinn le Roi, ek bann dernier jour ti commencé. (Rév. 11:15) Depuis 1914 ziska commencement 1919, Jésus ti accompagne so Papa dan temple spirituel pou faire enn inspection ek enn purification ki ti bien necessaire.f (Mal. 3:1-4) A partir 1919 ti’nn arrive ler pou commence ramasse di-blé. Eski ler ti’nn finalement arrivé pou ki Christ etabli enn moyen organisé pou donne nourriture spirituel? Oui!

18. Ki Jésus ti annoncé li ti pou etabli, ek ki question important ti soulevé alors ki bann dernier jour ti’nn commencé?

¹⁸ Dan so prophetie lor lepok lafin, Jésus ti annoncé ki li ti pou etabli enn moyen pou donne la ‘nourriture spirituel dan ler ki bizin.’ (Mat. 24:45-47) Ki moyen li ti pou servi? Pareil couma modele ki li ti etabli dan premier siecle, ankor enn fois Jésus ti pou nourri beaucoup a travers enn tigit. Mais alors ki bann dernier jour ti fek commencé, kisannla ki ti pou sa tigit disciple-la? Nou pou examine sa question-la ek lezot question lor prophetie Jésus dan prochain lartik.