Ki To Panse lor Bann Dimounn Ki dan To Teritwar?

1-2. Ki Zezi ti pe rod dir dan Zan 4:35, 36?

ZEZI pe marse dan karo, kitfwa enn karo lorz. (Zan 4:3-6) Dan apepre kat mwa, bann karo lorz pou pare pou lakoup. Me Zezi dir enn kitsoz ki kapav paret bizar. Li dir so bann disip: “Lev zot lizie, gete kouma bann karo finn deza anfler, zot finn pare pou lakoup.” (Lir Zan 4:35, 36.) Ki li pe rod dir?

² Li kler ki Zezi pe koz lor enn rekolt sinbolik, setadir rekolt bann dimounn. Anou examine seki’nn arive zis avan. Normalman, bann Zwif pa frekant bann Samariten, me Zezi fek fini pres ar enn Samaritenn ek madam-la inn ekout li! Pandan ki Zezi pe koz lor bann karo ki “anfler” ek “pare pou lakoup,” enn lafoul Samariten pe vinn get li. Sa Samaritenn-la inn koz lor Zezi avek zot ek zot anvi ki Zezi ansegn zot. (Zan 4:9, 39-42) Konsernan sa zistwar-la, enn spesialis ki fer bann komanter lor Labib dir: “Bann dimounn ti degaze vinn get Zezi pou ekout li . . . sa montre ki zot ti parey kouma bann lagrin ki ti’nn pare pou rekolt.”

 3. Si to ena mem fason panse ki Zezi lor bann dimounn, kouma sa pou amelior fason ki to prese?

³ Ki to panse lor bann dimounn ki dan to teritwar? Eski to konsider zot kouma bann lagrin ki’nn pare pou rekolt? Si wi, trwa kitsoz pou montre sa: Premierman, to pou konsider predikasion kouma enn travay irzan. Lepok rekolt li zis pandan enn tan ek fode pa perdi letan. Deziemman, to pou zwaye kan to pou trouv bann dimounn ekout bonn nouvel. Labib dir: “Bann dimounn kontan kan ena lepok rekolt.” (Iza. 9:3) Trwaziemman, to pou konsider sak dimounn kouma enn kikenn ki kapav vinn enn disip Zezi, ek sa pou pous twa pou adapte to prezantasion ar zot.

 4. Dan sa lartik-la, ki nou pou aprann ar lexanp lapot Pol?

⁴ Sertin disip Zezi kitfwa ti panse ki bann Samariten zame pa ti pou aksepte bonn nouvel, me Zezi pa ti pans koumsa. Okontrer, li ti trouv zot kouma bann dimounn ki ti kapav vinn so bann disip. Kan nou get bann dimounn dan nou teritwar, nou osi nou bizin trouv zot kouma bann dimounn ki kapav vinn bann disip Zezi. Lapot Pol enn bon lexanp dan sa domenn-la. Ki nou kapav aprann ar so lexanp? Dan sa lartik-la, nou pou gete seki Pol ti fer (1) pou konn krwayans bann dimounn ar ki li ti prese, (2) pou esey kone seki ti interes zot, ek (3) pou konsider zot kouma bann dimounn ki kapav vinn bann disip Zezi.

 5. Kifer Pol ti konpran bann dimounn ki ti al dan bann sinagog?

⁵ Pol ti pres souvan dan bann sinagog Zwif. Par exanp, dan sinagog Tesalonik, pandan “trwa saba aswiv li ti diskit laparol ar [bann Zwif].” (Zist. 17:1, 2) Kitfwa Pol ti santi li alez dan bann sinagog parski li ti enn Zwif. (Zist. 26:4, 5) Pol ti konpran bann Zwif, akoz sa li ti alez pou pres ar zot.​—Fil. 3:4, 5, NW.

 6. Kifer nou kapav dir ki bann dimounn dan bazar Atenn ti diferan ar bann ki ti dan sinagog?

⁶ Pol ti bizin kit Tesalonik ek Bere parski bann dimounn ti pe persekit li laba. Lerla li ti al Atenn. Laba osi, dan sinagog li ti rezonn “ar bann Zwif ek bann dimoun ki ador Bondie.” (Zist. 17:17) Parkont, dan bazar Pol ti pres ar lezot kalite dimounn. Parmi bann dimounn ki ti ekout li ti ena bann filozof ek bann non-Zwif, ek seki zot ti tande ti enn “nouvo ansegnman” pou zot. Zot ti dir li: “Nou pe tann bann zafer drol.”​—Zist. 17:18-20.

 7. Dapre Zistwar Bann Apot 17:22, 23, kouma Pol ti adapte so prezantasion ar bann dimounn?

⁷ Lir Zistwar Bann Apot 17:22, 23. Pol pa ti pres ar bann non-Zwif dan mem fason ki li ti pres ar bann Zwif dan sinagog. Sirman Pol ti reflesi lor krwayans bann dimounn dan Atenn. Li ti obzerv bien seki ti ena otour li ek li ti pran an konsiderasion bann dimounn zot koutim relizie. Apre sa, Pol ti rod bann pwin komin ki ena ant zot ladorasion ek laverite ki ena dan Lekritir. Enn spesialis ki fer bann komanter lor Labib dir: “Pol ti enn Kretien ki ti ne dan nasion Zwif, ek li ti remarke ki bann Grek pa ti ador Bondie ki bann Zwif ek bann Kretien ti konsider kouma ‘vre’ Bondie. Me li ti esey montre zot ki sa Bondie lor ki li ti pe koze la pa ti enn Bondie etranze pou zot.” Pol ti adapte so prezantasion ar bann dimounn ki ti ekout li. Li ti explik bann abitan Atenn ki so mesaz ti sorti kot sa “bondie inkoni” ki zot ti pe esey adore la. Mem si bann non-Zwif pa ti konn bann Lekritir, Pol pa ti panse ki zot pa ti kapav vinn bann Kretien. Okontrer, li ti konsider zot kouma bann lagrin ki pare pou rekolte, ek li ti adapte so prezantasion ar zot.

 8. (a) Kouma to kapav konn krwayans bann dimounn dan to teritwar? (b) Si enn kikenn dir ki li deza ena so relizion, ki to kapav dir li?

⁸ Parey kouma Pol, obzerv bien. Esey konn krwayans bann dimounn dan to teritwar. Kouma dimounn-la inn dekor so lakaz ouswa so loto? Eski to kapav kone ki relizion li ete gras-a so nom, so labiyman, ouswa fason ki li koze? Kitfwa li’nn dir twa ki li deza ena so relizion. Kan enn kikenn dir enn kitsoz koumsa, Flutura, enn pionie spesial, abitie reponn: “Mo pa la pou inpoz mo bann krwayans lor ou. Mo’nn vini pou koz lor enn size . . . ”

 9. Ki pwin komin nou kapav ena avek enn kikenn ki relizie?

⁹ Lor ki kitsoz to kapav koze avek enn kikenn ki relizie? Esey rod bann pwin komin: Kitfwa li ador enn sel Bondie, ouswa li rekonet ki Zezi limem Sover limanite, ouswa li krwar ki biento Bondie pou detrir tou bann move kitsoz ki ena dan nou lepok. Kan to’nn konpran ki kitsoz twa ek li zot ena an komin, partaz mesaz ki ena dan Labib dan enn fason ki pou interes li.

10. Ki nou bizin esey fer, ek kifer?

¹⁰ Pa bliye ki bann dimounn pa touzour krwar dan tou seki zot relizion ansegn zot. Alor, mem apre ki to’nn konn relizion enn kikenn, esey kone seki li panse vremem. David, enn pionie spesial dan l’Australie, dir: “Azordi, boukou dimounn melanz filozofi avek zot krwayans relizie.” Donalta ki res dan l’Albanie dir: “Sertin dimounn ki nou zwenn zot dir ki zot ena enn relizion, me apre zot rekonet ki zot pa krwar dan Bondie.” Enn misioner dan l’Argentine inn remarke ki sertin dimounn ki krwar dan Trinite an realite zot pa krwar ki Bondie, so Garson, ek lespri sin zot enn sel Bondie. Li explike: “Kan mo rapel ki pa tou dimounn ki vremem krwar dan tou seki zot relizion ansegne, li pli fasil pou mo trouv enn size lor ki nou kapav tom dakor.” Alor, esey konpran seki bann dimounn krwar vremem. Lerla, parey kouma Pol, to pou kapav “vinn tou kitsoz pou tou sort kalite dimounn.”​—1 Kor. 9:19-23, NW.

11. Dapre Zistwar Bann Apot 14:14-17, kouma Pol ti adapte so prezantasion ar bann dimounn ki ti res dan List?

¹¹ Lir Zistwar Bann Apot 14:14-17. Pol ti esey kone ki kitsoz ti interes bann dimounn, ek lerla li ti adapte so prezantasion ar zot. Par exanp, dan List, Pol ti koz ar enn lafoul ki pa ti konn nanye lor Labib ouswa ki ti konn bien tigit kitsoz. Akoz sa, li ti dir zot bann kitsoz ki zot ti kapav konpran. Li ti koz lor bann bon rekolt ek lor kouma nou kapav profit nou lavi. Li ti servi bann mo ek bann lexanp ki bann dimounn ti kapav konpran.

12. Kouma to kapav kone seki interes bann dimounn ek adapte to prezantasion ar zot?

¹² Twa osi, esey kone seki interes bann dimounn dan to teritwar ek adapte to prezantasion ar zot. Kan to al prese, kouma to kapav kone seki interes bann dimounn? Ankor enn fwa, obzerv bien. Kitfwa li pe okip so zardin, li pe lir enn liv, li pe repar so transpor, ouswa li pe fer enn lot kitsoz. Pou koumans enn konversasion, kitfwa to kapav koz lor seki li pe fer. (Zan 4:7) Fason ki enn dimounn abiye osi kapav aprann twa boukou lor li, par exanp so nasionalite, so travay, ouswa so lekip prefere. Gustavo dir: “Mo’nn koumans enn konversasion avek enn garson 19 an ki ti ena foto enn santer seleb lor so t-shirt. Mo’nn poz li bann kestion lor santer-la ek li’nn explik mwa kifer li kontan li. Gras-a sa konversasion-la, mo’nn koumans enn letid Labib ek azordi sa garson-la inn vinn enn frer.”

13. Kouma to kapav propoz enn kikenn enn letid Labib dan enn fason ki pou interes li?

¹³ Kan to propoz enn kikenn enn letid Labib, fer sa dan enn fason ki pou interes li ek montre li kouma sa kapav ed li personelman. (Zan 4:13-15) Par exanp, enn ser ki apel Poppy ti zwenn enn madam ki ti interese ek ki ti invit li pou rant kot li. Dan so lakaz, Poppy ti trouv enn diplom lor so miray. Sa diplom-la ti montre ki sa madam-la ti enn profeser. Alor, Poppy ti explik li ki nou osi nou ansegn bann dimounn gras-a nou bann letid Labib ek nou bann renion. Madam-la ti aksepte enn letid, li ti al renion so landemin, ek inpe apre li ti asiste enn lasanble sirkonskripsion. Enn an plitar, li ti pran batem. Demann tomem: ‘Ki kitsoz interes mo bann vizit? Eski mo kapav propoz zot enn letid Labib dan enn fason ki pou interes zot?’

14. Kouma to kapav adapte to fason ansegne ar sak etidian?

¹⁴ Kan to fer bann letid Labib, prepar bien sak letid ki to fer. Reflesi lor seki pou interes to etidian, so ledikasion, so lavi fami, ek so bann lexperyans. Kan to prepar twa, swazir ki verse to pou lir, ki video to pou montre, ek ki lexanp to pou servi pou explik bann verite ki ena dan Labib. Demann tomem: ‘Ki kitsoz pou interes li ek pou tous so leker?’ (Prov. 16:23) Dan l’Albanie, enn madam ki ti pe etidie avek enn pionie ki apel Flora ti dir: “Mo pa dakor ar lansegnman lor rezireksion.” Flora pa ti insiste. Li dir: “Dabor, li ti bizin konn Bondie ki’nn fer sa promes lor rezireksion la.” Lerla, depi sa zour-la, dan sak letid, Flora ti met laksan lor Zeova so lamour, so sazes, ek so pwisans. Avek letan, etidian-la ti koumans ena lafwa dan rezireksion. Azordi, li enn ser ki ena boukou lamour pou Zeova.

15. Dapre Zistwar Bann Apot 17:16-18, ki move kitsoz bann abitan Atenn ti fer, ek kifer Pol ti kontign pres avek zot?

¹⁵ Lir Zistwar Bann Apot 17:16-18. Atenn ti enn lavil ki ti ranpli ar lidolatri, limoralite sexiel, ek so bann abitan ti krwar dan bann filozofi payin. Kanmem sa, Pol ti kontign pres avek zot, mem si bannla ti boufonn li. Lontan, Pol limem ‘ti pe blasfeme, ti enn persekiter e ti fer violans,’ me pourtan li ti vinn enn Kretien. (1 Tim. 1:13) Zezi ti trouve ki Pol ti kapav vinn so disip. Dan mem fason, Pol ti trouve ki bann dimounn dan Atenn ti kapav vinn bann disip Zezi. Pol ti ena rezon pou pans koumsa, parski plizir dimounn dan Atenn ti vinn Kretien.​—Zist. 9:13-15; 17:34.

16-17. Donn enn lexanp ki montre ki tou sort kalite dimounn kapav vinn bann disip Zezi.

¹⁶ Dan premie siek, bann dimounn ki ti ena diferan lorizinn ti vinn bann disip Zezi. Kan Pol ti ekrir bann Kretien dan lavil Korint, li ti dir ki sertin parmi zot avan ti bann kriminel ouswa ti bien imoral. Apre sa, li ti dir: “Ala kouma sertin parmi zot ti ete. Me . . . finn pirifie zot.” (1 Kor. 6:9-11) Si to ti viv dan sa lepok-la, eski to ti pou dir ki bann dimounn koumsa ti pou kapav vinn bann disip Zezi?

¹⁷ Azordi, boukou dimounn dispoze fer bann sanzman ki bizin pou vinn bann disip Zezi. Par exanp, dan l’Australie, enn pionie spesial ki apel Yukina ti rekonet ki tou sort kalite dimounn kapav aksepte mesaz ki ena dan Labib. Enn zour, dan enn biro, li ti remark enn zenn madam ki ti ena bann tatwaz ek ki ti met bann linz bagi lor li. Yukina dir: “Mo ti ezite pandan enn moman, me apre mo ti koz avek li. Mo ti rann mwa kont ki li ti bien interese avek Labib ek ki sertin so bann tatwaz ti bann Psom!” Sa madam-la ti koumans etidie Labib ek li ti asiste bann renion.b

18. Kifer fode pa nou ziz bann dimounn?

¹⁸ Zezi ti dir ki bann karo ti pare pou rekolt. Eski li ti dir sa parski li ti panse ki laplipar dimounn ti pou swiv li? Non. Labib ti fini predir ki zis enn tigit dimounn ti pou ena lafwa dan li. (Zan 12:37, 38) Ek anplis, Zezi ti ena kapasite pou lir dan leker. (Mat. 9:4) Me mem si li ti donn pli boukou latansion enn ti group dimounn ki ti ena lafwa an li, Zezi ti fer tou seki li kapav pou pres avek tou dimounn. Me nou, nou pa kapav lir dan leker bann dimounn, alor fode pa nou ziz nou teritwar ouswa bann dimounn! Okontrer, nou bizin konsider zot kouma bann dimounn ki kapav vinn bann disip Zezi. Marc, enn misioner dan Burkina Faso, ti dir: “Bann dimounn ki mo panse pou progrese, souvan zotmem ki aret etidie. Me bann dimounn ki mo panse pa pou progrese, zotmem ki fer boukou progre. Mo’nn aprann ki li pli bon ki nou les lespri sin gid nou.”

19. Kouma nou bizin konsider bann dimounn dan nou teritwar?

¹⁹ Kitfwa to panse ki pena boukou dimounn dan to teritwar ki kouma bann lagrin ki’nn pare pou rekolt. Me rapel seki Zezi ti dir so bann disip: Bann karo anfler, setadir zot pare pou lakoup. Bann dimounn kapav sanze ek vinn bann disip Zezi. Zeova trouv zot kouma bann dimounn ki kapav vinn bann disip ek zot “ena valer” pou Li. (Aze 2:7) Si nou konsider bann dimounn parey kouma Zeova ek Zezi konsider zot, nou pou esey konn zot krwayans ek seki interes zot. Nou pa pou konsider zot kouma bann etranze, okontrer nou pou trouv zot kouma bann dimounn ki kapav vinn nou bann frer ek ser.