“Bondie Pa Fer Preferans”

1-3. Ki vizion Pier gagne, ek kifer nou bizin konpran sinifikasion sa vizion-la?

NOU lotonn lane 36 N.L. Enn ti soley pe sof Pier, pandan ki li pe priye lao enn lakaz ki pre ar lamer. Lakaz-la trouv dan lavil Zope kot ena enn lepor. Sa lakaz-la pou enn zom ki apel Simon, ek sa fer de-trwa zour aster-la ki Pier pe res laba. Simon enn zouvriye ki travay lapo, ek pena boukou Zwif ki ti pou aksepte res kot enn zom ki fer sa kalite travay-la.a Parski Pier aksepte pou res kot Simon, sa montre ki Pier pa get figir. Me malgre sa, Zeova anvi ansegn Pier enn leson inportan.

² Pandan ki Pier pe priye, li gagn enn vizion. Ek seki li trouve dan sa vizion-la ti pou sok ninport ki Zwif. Li trouv enn gran latwal ki pe desann depi lesiel, ek ladan ena bann zanimo ki bann Zwif pa gagn drwa manze. Pier tann enn lavwa depi lesiel ki dir li: “Touye ek manze!” Me Pier dir: “Zame mo pa’nn manz nanye ki pa gagn drwa manze ek ki inpir.” Sa lavwa-la koz ar Pier pa zis enn fwa, me trwa fwa. Li dir: “Aret apel inpir bann kitsoz ki Bondie inn pirifie.” (Zist. 10:13-16) Pier pa tro konpran sinifikasion sa vizion-la, me Zeova pa pou les li dan konfizion.

³ Azordi, li inportan ki nou konpran sinifikasion vizion ki Pier inn gagne, parski sa pou ed nou pou konpran kouma Zeova konsider bann dimounn. Ek antan-ki bann vre Kretien, nou pa pou kapav rann temwaniaz afon lor Rwayom Bondie, amwin ki nou trouv bann dimounn parey kouma Bondie trouv zot. Pou ki nou konpran sinifikasion vizion Pier, anou get bann levennman ki’nn arive avan ek apre ki Pier inn gagn sa vizion-la.

4, 5. Kisann-la Korney, ek ki arive pandan ki li pe priye?

⁴ Pier pa kone seki’nn arive lavey dan Sezare, enn lavil ki trouv anviron 50 kilomet ar lavil Zope. Dan Sezare, ena enn zom ki apel Korney, ek li osi li’nn gagn enn vizion. Korney, enn ofisie dan larme romin, me li enn zom ki “ador Bondie.”b Korney, pran bien swin so fami ek ‘li ansam avek so fami ena enn gran respe pou Bondie.’ Li ni enn Zwif ni enn kikenn ki pe swiv larelizion zwif. Me kanmem sa, li montre boukou konpasion anver bann Zwif ki bizin led, ek souvan, li donn zot kas ek bann lezot kitsoz pou ed zot. Sa zom sinser-la touletan “sipliy Bondie.”​—Zist. 10:2.

⁵ Li anviron trwa-z-er lapremidi, ek Korney pe priye. Li gagn enn vizion kot enn anz dir li: “Bondie inn tann to bann lapriyer ek inn trouv bann bon kitsoz ki to’nn fer pou bann pov ek inn gard sa dan so memwar.” (Zist. 10:4) Apre sa, anz-la dir li avoy bann zom pou al rod Pier, ek Korney fer exakteman seki sa anz-la dir li. Antan-ki enn non-Zwif ki pa’nn sirkonsi, Korney pou al ouver enn laport ki ziska ler ti ferme pou li. Ek biento, li pou gagn enn mesaz delivrans.

6, 7. (a) Rakont enn lexperyans ki montre ki Bondie reponn lapriyer bann dimounn sinser ki anvi konn laverite lor Li. (b) Ki bann lexperyans koumsa aprann nou?

⁶ Azordi, eski Bondie reponn lapriyer bann dimounn sinser ki anvi konn laverite lor Li? Anou get enn lexanp. Enn madam ki res Albani ti aksepte enn Latour Degard kot ti ena enn lartik ki koz lor kouma pou elve bann zanfan.c Li ti dir bann Temwin ki ti tap so laport: “Eski zot pou krwar ki mo ti pe fek priye Bondie pou ki Li ed mwa elve mo de tifi? Bondie inn avoy zot! Se exakteman seki mo ti bizin!” Sa madam-la ek so bann tifi inn koumans etidie Labib, ek apre, so misie osi inn koumans etidie.

⁷ Eski sa lexperyans-la inn arive enn sel fwa? Non! Ena telman boukou lexperyans koumsa partou dan lemond, ki nou pa kapav dir ki se zis enn kwinsidans. Ki sa aprann nou? Premie, Zeova reponn lapriyer bann dimounn sinser ki rod Li. (1 Ler. 8:41-43; Ps. 65:2) Deziem, bann anz pe soutenir nou dan travay predikasion.​—Rev. 14:6, 7.

8, 9. Ki lespri sin fer Pier konpran, ek kouma Pier reazir?

⁸ Kan bann zom ki Korney inn avoye ariv kot lakaz Simon, Pier ankor lao sa lakaz-la, ek “pe demann limem” ki sinifikasion sa vizion-la. (Zist. 10:17) Si Pier pa ti santi li alez pou manz bann manze ki bann Zwif pa ti gagn drwa manze, eski li ti pou aksepte pou al avek sa bann zom-la ek rant dan lakaz enn non-Zwif? Lespri sin ed Pier pou konpran seki Bondie anvi li fer. Lespri sin dir Pier: “Gete! Ena trwa zom ki pe rod twa. Alor leve, desann anba ek al avek zot. Pa bizin ena okenn dout parski mwa ki’nn avoy zot.” (Zist. 10:19, 20) Nou sir ki sa vizion ki Pier inn gagne la prepar li pou direksion ki lespri sin pe donn li.

⁹ Kan Pier aprann ki se enn anz ki’nn dir Korney avoy bann zom vinn rod li, Pier “invit zot pou rantre” ek pou reste. (Zist. 10:23a) Pier koumans sanz so fason panse kan li konpran seki Bondie anvi.

10. Kouma Zeova gid so pep, ek ki bann kestion li inportan nou demann noumem?

¹⁰ Mem azordi, tigit-tigit Zeova pe ankor ed so pep pou konpran so volonte. (Prov. 4:18) Li servi so lespri sin pou gid “esklav fidel ek saz.” (Mat. 24:45) Parfwa, ena bann sanzman dan fason ki nou ti pe konpran seki’nn ekrir dan Labib, ouswa ena bann sanzman dan fason ki nou fer bann kitsoz antan-ki enn lorganizasion. Alor, kan sa arive, li bon ki nou poz nou sa bann kestion-la: ‘Kouma mo reazir kan ena sa bann sanzman-la? Eski mo dispoze pou swiv direksion ki lespri done?’

11, 12. Ki Pier fer kan li ariv Sezare, ek ki leson li aprann?

¹¹ Landemin ki Pier inn gagn so vizion, li pran direksion Sezare ansam avek nef lezot dimounn, setadir trwa mesaze ki Korney ti avoye ek “sis frer [zwif]” ki sorti Zope. (Zist. 11:12) An-atandan ki Pier vini, Korney rasanble “so bann fami ek so bann kamarad pros,” ek aparaman zot tou bann non-Zwif. (Zist. 10:24) Kan Pier arive, li fer enn kitsoz ki zame li ti panse li ti pou fer avan: Li rant dan lakaz enn non-Zwif ki pa sirkonsi! Pier dir: “Zot bien kone ki li kont lalwa ki enn Zwif frekant ouswa mem vinn kot enn dimounn ki enn lot ras, ek pourtan Bondie inn montre mwa ki fode pa mo konsider okenn zom kouma inpir.” (Zist. 10:28) Aster-la, Pier konpran lobzektif vizion ki li’nn gagne: Sa pa konsern zis ki kalite manze li kapav manze, me osi ki fode pa ki li “konsider okenn zom [mem enn non-Zwif] kouma inpir.”

¹² Tou bann dimounn ki dan lakaz Korney bien interese pou kone ki Pier pou dir zot. Korney dir: “Nou tou la devan Bondie pou ekout bann kitsoz ki Zeova inn donn twa lord pou dir.” (Zist. 10:33) Ki to pou resanti si enn kikenn ki interese dir twa sa bann parol-la? Pier koumans koze ek dir enn kitsoz ki bien for: “Aster-la, mo konpran vremem ki Bondie pa fer preferans, me dan tou nasion dimounn ki ena enn gran respe pou li ek ki fer seki drwat gagn so faver.” (Zist. 10:34, 35) Pier konpran ki, pou ki enn dimounn gagn faver Bondie sa pa depann lor so ras, so nasionalite, so laparans, ouswa mem so kouler lapo. Apre sa, Pier koumans rann zot temwaniaz lor predikasion Zezi, so lamor, ek so rezireksion.

13, 14. (a) Kan Korney ek bann lezot non-Zwif konverti lane 36 N.L., ki sa montre? (b) Kifer fode pa nou ziz bann dimounn dapre zot laparans?

¹³ Ek la, enn kitsoz extraordiner arive, ki zame pa’nn arive avan: Letan Pier “ankor pe koz lor sa bann kitsoz-la,” lespri sin vinn lor “bann dimounn lezot nasion.” (Zist. 10:44, 45) Se sel ka dan Labib kot bann dimounn gagn lespri sin avan ki zot pran batem. Pier konpran ki Bondie finn aksepte sa bann dimounn-la kouma So bann serviter. Lerla, Pier “donn zot [sa group non-zwif la] lord pou pran batem.” (Zist. 10:48) Kan sa bann non-Zwif-la vinn bann Kretien pandan lane 36 N.L., sa montre ki aster-la Bondie nepli konsider bann Zwif kouma enn nasion spesial. (Dan. 9:24-27) Se lerla ki Pier servi trwaziem ek dernie lakle dan “bann lakle Rwayom.” (Mat. 16:19) Sa lakle-la ouver enn laport pou bann non-Zwif ki pa sirkonsi ek permet zot vinn bann Kretien ki’nn swazir par lespri sin Bondie.

¹⁴ Azordi, antan-ki bann proklamater Rwayom Bondie nou rekonet ki “Bondie pa fer preferans.” (Rom. 2:11) Li anvi ki “tou sort kalite dimounn gagn lavi sov.” (1 Tim. 2:4) Fode zame ki nou ziz bann dimounn dapre zot laparans. Zezi finn donn lord pou rann temwaniaz afon konsernan Rwayom Bondie, ek savedir ki nou bizin pres avek tou dimounn, ek sa ninport ki ras, nasionalite, laparans, kouler lapo, ouswa mem krwayans ki zot ena.

15, 16. Kifer sertin Kretien zwif agase ar Pier, ek kouma Pier explik seki li’nn fer?

¹⁵ Pena dout ki Pier bien anvi al Zerizalem pou fer bann frer kone ki bann non-Zwif ki pa sirkonsi inn “aksepte parol Bondie.” Me selman, koze-la inn fini marse, parski kouma Pier arive, ‘bann ki an faver sirkonsizion koumans kritik li.’ Bann-la pa agase parski bann non-Zwif inn vinn bann disip Lekris, me zot agase parski Pier inn rant dan “lakaz bann zom ki pa’nn fer sirkonsizion” ek inn “manz avek zot.” (Zist. 11:1-3) Pou zot, bann non-Zwif bizin obeir Lalwa Moiz pou ki Zeova aksepte zot kouma So bann serviter. Li kler ki sa bann Kretien zwif la, gagn difikilte pou aksepte ki zot nepli bizin obeir Lalwa Moiz.

¹⁶ Kouma Pier pou explik zot kifer li’nn batiz sa bann non-Zwif-la? Dapre Zistwar Bann Zapot 11:4-16, li koz lor kat prev ki’nn konvink li ki sa ti volonte Bondie: (1) Bondie ti fer li gagn enn vizion dan lakaz Simon (Verse 4-10); (2) lespri sin ti donn li enn lord (Verse 11, 12); (3) enn anz ti vizit Korney (Verse 13, 14); ek (4) sa bann non-Zwif-la ti gagn lespri sin. (Verse 15, 16) Pier terminn so lexplikasion avek enn rezonnman bien konvinkan: “Alor si Bondie inn donn bann-la [bann non-Zwif ki ti bann krwayan] gratwitman sa mem kado [lespri sin] ki li ti donn nou [bann Zwif] ki’nn krwar dan Lesegner Zezi Kris, ki mo ete mwa pou anpes Bondie azir?”​—Zist. 11:17.

17, 18. (a) Apre temwaniaz Pier, ki desizion inportan bann Kretien zwif bizin pran? (b) Kifer li kapav difisil pou ki ena linite dan lasanble, ek ki bann kestion nou bizin poz noumem?

¹⁷ Apre ki bann Kretien zwif inn ekout temwaniaz Pier, zot ena enn desizion bien inportan pou pran. Eski zot pou kapav tir tou ti tras prezize ki zot ena, ek aksepte bann non-Zwif ki’nn batize kouma zot bann frer ek ser? Labib dir nou: ‘Kan zot, setadir bann zapot ek bann Kretien zwif, tann sa bann kitsoz-la, zot aret diskite, ek zot donn laglwar Bondie. Zot dir: “Alor vremem, Bondie inn donn bann dimounn lezot nasion posibilite pou repanti pou ki zot kapav gagn lavi.”’ (Zist. 11:18) Sa bon latitid-la permet ki kontign ena linite dan lasanble.

¹⁸ Azordi osi, li kapav difisil pou ki ena linite parmi bann serviter Zeova, parski nou “sorti dan tou nasion, tribi, pep, ek lang.” (Rev. 7:9) Dan boukou lasanble, ena bann frer ek ser diferan ras, kiltir, ki’nn grandi dan diferan fason, ek ki’nn konn diferan sitiasion. Alor li bon ki nou demann nou: ‘Eski mo enn kikenn ki ziz lezot vit parski zot diferan? Eski mo determine pou pa les bann kitsoz ki diviz sa lemond-la, kouma fierte mo pei, landrwa kot mo sorti, lang ki mo koze, mo kiltir, ek mo ras, inflians fason ki mo tret mo bann frer ek ser?’ Rapel erer ki Pier (Sefas) ti fer de-trwa lane apre ki bann premie non-Zwif ti’nn konverti. Li ti les li inflianse par bann prezize ki lezot ti ena, ek li ti “separ li” ar bann Kretien non-zwif. Lerla, Pol ti bizin koriz li. (Gal. 2:11-14) Nou bizin fer bien atansion ki nou pa les bann prezize inflians nou.

19. Ar kisann-la bann Kretien zwif prese dan Antios, ek ki rezilta zot gagne?

¹⁹ Eski bann disip Zezi pou koumans pres avek bann non-Zwif ki pa sirkonsi? Anou get seki arive dan Antios dan Siri.d Dan sa lavil-la, mem si ena enn gran kominote zwif, ena enn bon relasion ant bann Zwif ek bann non-Zwif. Alor Antios se enn bon teritwar pou koumans pres avek bann non-Zwif, ek se laba ki bann disip zwif koumans pres bon nouvel ‘avek bann dimounn ki koz Grek.’ (Zist. 11:20) Zot pa pres zis avek bann Zwif ki koz Grek me osi avek bann non-Zwif ki pa sirkonsi. Zeova beni zot travay ek ‘enn gran kantite dimounn vinn krwayan.’​—Zist. 11:21.

20, 21. Kouma Barnabas montre ki li ena limilite, ek kouma nou osi nou kapav montre ki nou ena limilite kan nou prese?

²⁰ Antios pare pou rekolt, alor bann lasanble dan Zerizalem avoy Barnabas laba. Ena telman boukou dimounn ki interese, ki Barnabas pa kapav fer sa travay-la tousel. Kisann-la ki pli bien plase pou ed li ki Sol, ki pou vinn zapot bann nasion? (Zist. 9:15; Rom. 1:5) Eski Barnabas pou konsider Sol kouma enn rival? Non. Okontrer, Barnabas ena limilite ek rekonet ki li bizin led. Alor, li pran linisiativ pou al Tars, li al rod Sol, ek Sol vinn ed li dan Antios. Zot toule-de pas enn an laba pou ankouraz bann disip dan sa lasanble-la.​—Zist. 11:22-26a.

²¹ Kouma nou kapav montre ki nou ena limilite kan nou prese? Sa kalite-la pous nou pou rekonet ki nou ena bann limit. Nou tou nou ena bann diferan pwin for ek kapasite. Par exanp, sertin kapav bien efikas pou prese dan enn fason informel ouswa pou prese lakaz-lakaz, me gagn difikilte pou fer bann vizit ouswa koumans bann letid Labib. Si to anvi amelior twa dan enn form predikasion, kifer to pa demann enn kikenn pou ed twa? Si to pran sa linisiativ-la, to pou vinn enn pli bon ansegnan Labib, ek to pou gagn plis lazwa dan predikasion.​—1 Kor. 9:26.

22, 23. Kouma bann frer dan Antios montre ki zot kontan zot bann frer ek ser, ek azordi, kouma pep Bondie azir dan mem fason?

²² Se dan Antios ki pou premie fwa apel ‘bann disip “Kretien,” gras-a direksion Bondie.’ (Zist. 11:26b) Sa nom ki Bondie donn zot la dekrir bien bann ki swazir pou swiv Lekris. Amezir ki bann non-Zwif vinn bann Kretien, eski zot ek bann Kretien zwif pou kontan sakenn zot kamarad? Anou gete seki arive lane 46 N.L.e kan ena enn gran lafaminn. Dan lepok lontan, se sirtou bann pov ki ti afekte ar lafaminn, parski zot pa ti ena enn stok manze ouswa inpe kas de-kote. Pandan sa lafaminn-la, li paret ki boukou parmi bann Kretien zwif ki res dan Zide zot pov, ek zot bizin manze ek bann lezot kitsoz. Kan bann frer dan Antios ek mem bann Kretien non-zwif tann sa, zot ‘avoy bann sekour pou bann frer ki res dan Zide.’ (Zist. 11:29) Sa montre ki zot vremem kontan sakenn zot kamarad!

²³ Nanye pa’nn sanze parmi pep Bondie azordi. Kan nou aprann ki nou bann frer dan bann lezot pei ouswa dan nou pei mem, pe bizin led, nou pa ezite pou ed zot. Kan nou bann frer ek ser afekte par bann katastrof natirel, kouma bann siklonn, bann tranbleman-de-ter, ek bann tsunami, bann manb Komite Biro Nasional pa tarde pou organiz bann Komite Sekour pou pran swin nou bann frer ek ser. Kan nou ed nou bann frer ek ser partou dan lemond, sa montre ki nou vremem kontan sakenn nou kamarad.​—Zan 13:34, 35; 1 Zan 3:17.

24. Kouma nou kapav montre ki nou osi nou konpran leson inportan ki Zeova ti ansegn Pier?

²⁴ Vizion ki Pier ti gagne lor lakaz Simon dan Zope, bien inportan pou nou antan-ki bann vre Kretien. Nou ador enn Bondie ki pa fer preferans. Zeova anvi ki nou rann temwaniaz afon lor so Rwayom, ek savedir ki nou bizin pres avek bann dimounn ninport ki ras zot ete, ki pei zot sorti, ouswa ki ran sosial zot ena. Alor, anou determine pou donn tou bann dimounn ki anvi ekout nou, lokazion pou aprann plis lor Zeova.​—Rom. 10:11-13.