Bann Konsey pou Viv Anpe Avek Lezot

“Kontign . . . pardonn sakenn zot kamarad avek tou zot leker mem si kikenn ena kitsoz kont enn lot.”​—KOLOSIEN 3:13, NW.

Nou tou nou fer bann erer. Lezot kapav ofans nou, ouswa nou, nou kapav ofans lezot. Alor, nou tou nou bizin pardonn lezot, ek nou bizin ki lezot pardonn nou. Kan nou pardone, nou nepli ena okenn santiman negatif anver dimounn-la. Nou pa “rann lemal pou lemal,” ek nou pa pou kontign dir dimounn-la ki erer li’nn fer. (Romin 12:17) Me ki nou bizin fer si nou pa pe kapav aret pans lor sa sitiasion-la parski sa finn bien bles nou? Avek respe, nou bizin koz ar dimounn-la an prive. Nou lobzektif kan nou pe koz ar dimounn-la, se pa pou prouve kisannla an-tor, me pou fer lape.​—Romin 12:18.

“Avek limilite, konsider lezot meyer ki zotmem.”​—FILIPIEN 2:3.

Kan nou ena limilite ek nou respekte lezot, bann dimounn pou kontan pas letan avek nou. Zot kone ki nou pou ena zantiyes ek konpasion ek ki nou pa pou bles zot par expre. Me si nou panse ki nou pli bon ki lezot, ouswa nou touletan anvi ki bann kitsoz pas kouma nou nou anvi, sa pou kree bann problem. Bann dimounn pou evit nou ek kitfwa nou pa pou ena okenn kamarad.

“Bondie tret tou dimoun parey lor mem baz. Bondie aksepte ninport ki dimoun dan ninport ki nasion si li ador li e fer seki drwat.”​—ZISTWAR BANN APOT 10:34, 35.

Nou Kreater pa prefer sertin dimounn akoz zot nasionalite, zot lang, zot ran sosial, ouswa akoz zot kouler lapo. “Avek enn sel zom Li’nn fer tou bann pep.” (Zistwar Bann Apot 17:26, NW) Alor, dan enn sertenn fason, tou bann imin zot frer ek ser. Kan nou tret lezot avek bonte ek dignite, nou rann zot ere, nou osi nou pli ere, ek nou fer leker nou Kreater kontan.

“Met dan zot leker . . . douser.”​—KOLOSIEN 3:12.

Kan nou ena douser, nou met lezot alez. Bann dimounn pa pou ezite pou koz avek nou, ouswa mem pou koriz nou parski zot kone ki nou pou res kalm. Anplis, si kikenn ankoler avek nou, sa kapav kalme li si nou reponn avek douser. Proverb 15:1 dir: “Enn repons, kan li dous, li fer lakoler disparet, me enn parol blesan fer lakoler monte.”

“Ena plis benediksion kan done, ki kan resevwar.”​—ZISTWAR BANN APOT 20:35.

Azordi, boukou dimounn gourma ek pans zis zotmem. Me nou pou konn vre boner kan nou montre nou zenere. (Lik 6:38) Bann dimounn ki zenere zot ere dan zot lavi parski zot kontan bann dimounn plis ki bann kitsoz materyel. Sa lamour-la pous zot pou ena rekonesans ek pou montre ki zot kontan kan enn dimounn zenere anver zot. (Kolosien 3:15) Demann oumem, ‘Eski mo kontan res avek bann dimounn ki ingra ek ki pa kontan partaze? Ouswa mo kontan res avek bann dimounn ki zenere ek ki ena rekonesans?’ Ki sa aprann nou? Nou bizin vinn sa kalite dimounn ki nou anvi lezot ete la.​—Matie 7:12.