‘Ranpli ar Lespri Sin ek Lazwa’

1, 2. Kouma mision ki Barnabas ek Sol gagne diferan ar seki bann lezot misioner ti gagne, ek kouma sa pou ede pou realiz Zistwar Bann Zapot 1:8?

AZORDI bann frer ek ser dan lasanble Antios bien antouziast. Parmi tou bann profet ek bann ansegnan ki la, lespri sin swazir Barnabasa ek Sol pou amenn bon nouvel dan bann landrwa ki bien lwin. (Zist. 13:1, 2) Se vre ki dan lepase, finn deza avoy bann zom pou pres bon nouvel dan bann lezot landrwa. Ek bien souvan finn avoy zot dan bann landrwa kot ti deza ena bann Kretien. (Zist. 8:14; 11:22) Me sann-fwa la, Barnabas ek Sol pou al dan bann landrwa kot zame bann dimounn pa’nn tann bon nouvel. Zan, ki apel osi Mark, pou akonpagn zot pou ed zot.

² Anviron 14 an avan, Zezi ti dir so bann disip: “Zot pou vinn mo bann temwin dan Zerizalem, partou dan Zide ek Samari, ek ziska dan bann landrwa pli lwin lor later.” (Zist. 1:8) Kan pe avoy Barnabas ek Sol dan bann landrwa elwagne, sa pou ede pou realiz profesi ki Zezi ti anonse!b

 3. Kifer sa ti difisil pou fer bann long vwayaz dan premie siek?

³ Azordi, gras-a bann transpor ki nou ena kouma bann loto ouswa bann avion, bann dimounn kapav fer enn long distans dan zis enn er-d-tan ouswa de-z-er-d-tan. Me sa pa ti koumsa dan premie siek N.L. Sa lepok-la, bann dimounn ti vwayaz sirtou apie, ek souvan bann sime-la ti bann sime later ek ros. Kitfwa dan enn zourne, enn dimounn ti kapav mars anviron 30 kilomet, ek sa ti bien fatigan!c Alor, mem si Barnabas ek Sol ti bien anvi al dan zot afektasion, zot ti kone ki sa ti pou demann zot boukou zefor ek sakrifis.​—Mat. 16:24.

 4. (a) Kouma finn swazir Barnabas ek Sol, ek kouma bann lezot frer reazir? (b) Kouma nou kapav soutenir bann ki gagn bann responsabilite?

⁴ Me kifer lespri sin dir presizeman ki bizin “met Barnabas ek Sol enn kote pou travay”? (Zist. 13:2) Labib pa dir nou kifer. Me seki nou kone, se ki lespri sin inn swazir sa de zom-la. Labib pa dir si bann profet ek bann ansegnan dan Antios inn konteste sa desizion-la. Me seki nou kone, se ki zot soutenir Barnabas ek Sol. Mazine ki Barnabas ek Sol resanti kan zot trouve ki zot bann frer pa anvie zot, me ki okontrer bann-la gard karem, priye, ‘poz lame lor zot, ek fer zot ale.’ (Zist. 13:3) Nou osi nou bizin soutenir bann ki gagn bann responsabilite, parmi ena bann zom ki’nn nome kouma ansien. Olie ki nou anvie zot parski zot inn gagn sa bann responsabilite-la, nou bizin “donn zot enn gran konsiderasion ek kontan zot akoz travay ki zot pe fer.”​—1 Tes. 5:13.

 5. Explike kouma sa ti ete pou pres lor lil Sip.

⁵ Barnabas ek Sol marse ziska Selesi, enn lepor ki pre ar Antios. Laba, zot pran enn bato pou al lor lil Sip. Sa lil-la trouv anviron 200 kilomet ar Selesi.d Barnabas sorti Sip, alor sirman li bien kontan pou amenn bon nouvel dan so pei. Kan zot ariv Salamis, enn lavil ki lor lakot les sa lil-la, sa bann zom-la pa perdi letan. Deswit, zot “koumans anons parol Bondie dan bann sinagog zwif.”e (Zist. 13:5) Barnabas ek Sol travers lil Sip, ek sirman zot rann temwaniaz dan bann lavil inportan. Depandan bann sime ki zot ti pran, kitfwa sa bann misioner-la ti mars anviron 160 kilomet!

6, 7. (a) Kisann-la Serzis Polis, ek kifer Bar-Zezi esey anpes li ekout bon nouvel? (b) Ki Sol fer pou anpes Bar-Zezi inflians Serzis Polis?

⁶ Dan premie siek, bann dimounn dan Sip ti ador bann fos bondie. Barnabas ek Sol trouv sa bien kan zot ariv Pafos, ki trouv lor lakot lwes sa lil-la. Laba, zot zwenn Bar-Zezi, ki “enn longanis ek enn fos profet.” Ek Bar-Zezi ansam “avek gouverner Serzis Polis, enn zom intelizan.”f Dan premie siek, souvan bann Romin ki ti ena enn bon ledikasion, mem “enn zom intelizan” kouma Serzis Polis, ti demann enn longanis ouswa enn astrolog pou ed zot pran bann desizion inportan. Serzis Polis interese ar bon nouvel, ek “bien anvi tann parol Bondie.” Me Bar-Zezi, ki bann dimounn kone osi kouma Elimas, ki vedir “Longanis,” pa kontan sa ditou.​—Zist. 13:6-8.

⁷ Bar-Zezi vremem pa kontan mesaz lor Rwayom Bondie. Sel fason pou li protez so pozision kouma konseye Serzis Polis, se “anpes gouverner-la aksepte lafwa.” (Zist. 13:8) Me Sol pa pou dibout lebra krwaze ek les sa longanis-la inflians Serzis Polis. Alor, ki Sol fer? Labib dir: ‘Sol, ki osi apel Pol,g ranpli ar lespri sin, get Bar-Zezi fran ek dir: “Twa ki ranpli ar tou sort kalite tronpri ek tou sort kalite lemal, twa garson Lediab, twa lennmi tou kitsoz ki drwat, eski to pa pou aret deform bann semin drwat Zeova? Gete! Zeova pou pini twa, ek to pou vinn aveg. To pa pou trouv lalimier soley pandan enn tan.” Deswit li koumans trouv som ek li trouv li dan enn nwarte. Lerla, li tourn an-ron ek li rod kikenn pou trap so lame pou gid li.’ Kouma eski Serzis Polis reazir kan li trouv sa mirak-la? ‘Kan gouverner trouv seki’nn arive, li vinn enn krwayan, parski li inpresione avek lansegnman Zeova.’​—Zist. 13:9-12.

 8. Azordi, kouma nou kapav azir avek kouraz, parey kouma Pol?

⁸ Pol pa ti les Bar-Zezi inpresionn li. Dan mem fason, kan bann dimounn esey anpes bann ki interese pou ekout mesaz Rwayom Bondie, nou bizin ena kouraz ek defann laverite. Biensir, nou bann parol bizin ‘touzour fer plezir pou tande ek asezone ar disel.’ (Kol. 4:6) Me kanmem sa, nou pa pou aret ed bann dimounn ki anvi aprann konn plis lor Zeova, zis pou ki nou pa gagn problem. Parey kouma Bar-Zezi, bann fos relizion esey “deform bann semin drwat Zeova.” Alor, fode pa ki nou per pou koz lor tou bann move kitsoz ki zot dir ek fer. (Zist. 13:10) Parey kouma Pol, nou anvi koz lor laverite avek kouraz, ek ed bann dimounn ki anvi aprann plis. Ek mem si azordi Zeova pa pou donn nou kapasite pou fer bann mirak, parey kouma Li ti fer pou Pol, nou sir ki Li pou servi So lespri sin pou atir bann dimounn ki sinser ar laverite.​—Zan 6:44.

 9. Ki bon lexanp Pol ek Barnabas finn donn bann ki diriz lasanble azordi?

⁹ Aparaman, ena enn sanzman kan Pol, Barnabas, ek Mark kit Pafos ek pran enn bato pou al Perze. Perze, se enn lavil ki trouv anviron 250 kilomet ar Sip, ek ki lor lakot Lazi Miner. Dan Zistwar Bann Zapot 13:13, koz lor sa group-la kouma “Pol ek so bann konpagnon.” Kitfwa sa montre ki aster-la, se Pol ki pe diriz zot bann laktivite. Me selman, Labib pa montre ki Barnabas zalou Pol. Okontrer, sa de zom-la kontign travay ansam pou akonpli volonte Bondie. Pol ek Barnabas, bann bon lexanp pou bann frer ki ena bann responsabilite dan lasanble. Olie ki bann Kretien lager pou gagn plas ki pli inportan, zot bizin rapel bann parol ki Zezi ti dir: “Zot tou zot bann frer.” Li ti dir osi: “Bondie pou abes dimounn ki donn limem loner me li pou donn loner dimounn ki abes limem.”​—Mat. 23:8, 12.

10. Dekrir kouma vwayaz depi Perze ziska Antios dan Pisidi ete.

¹⁰ Kan zot ariv Perze, Mark kit Pol ek Barnabas ek retourn Zerizalem. Nou pa kone kifer li’nn desid pou ale enn kout koumsa. Me selman, Pol ek Barnabas kontign zot vwayaz. Zot kit Perze ek al Antios dan Pisidi, enn lavil dan provins Galasi. Se pa enn vwayaz ki fasil, parski Antios dan Pisidi trouv anviron 1,100 met lao nivo lamer. Zot bizin pas kot bann montagn, me selman bann sime-la bien danzere parski souvan ena bann voler ki atak bann dimounn. Ek koumadir sa pa ti ase, li paret ki se aster-la ki Pol koumans gagn bann problem lasante.h

11, 12. Kouma Pol kapte latansion bann dimounn ki dan sinagog ki dan Antios dan Pisidi?

¹¹ Kan zot ariv Antios dan Pisidi, Pol ek Barnabas rant dan sinagog zour Saba. Labib dir: ‘Kan fini lir Lalwa ek liv bann Profet an piblik, bann prezidan sinagog dir zot: “Mo bann frer, si zot ena kit parol ankourazan pou dir bann dimounn, koze.”’ (Zist. 13:15) Lerla, Pol leve ek koumans koze.

¹² Kan Pol koumans koze, li dir: “Bann zom Izrael ek tou lezot ki ena enn gran respe pou Bondie.” (Zist. 13:16) Pol pe koz ar bann Zwif ek bann ki’nn konverti dan relizion zwif, me sa bann zom-la pankor aksepte Zezi kouma Lemesi. Alor, kouma Pol pou kapte zot latansion? Pou koumanse, Pol koz lor seki Zeova ti fer pou nasion Izrael. Li explike kouma Zeova “ti fer zot vinn enn gran nasion kan zot ti pe res kouma bann etranze dan pei Lezip,” ek kouma apre ki Bondie ti liber zot, pandan 40 an Li “ti siport zot dan dezer.” Pol explike osi kouma Zeova ti ed zot pou gagn Later Promiz, ek kouma Zeova “ti donn zot sa pei-la an eritaz.” (Zist. 13:17-19) Sertin dimounn ti dir ki Pol ti koz lor bann kitsoz ki ti fek lir sa zour-la pandan Saba. Si seki sa bann dimounn-la ti dir li vre, sa montre ki Pol ti kone kouma pou “vinn tou kitsoz pou tou sort kalite dimounn.”​—1 Kor. 9:22.

13. Kouma nou kapav ankouraz bann dimounn pou anvi aprann plis lor Zeova?

¹³ Nou osi nou bizin fer zefor pou kapte latansion bann dimounn ar ki nou prese. Par exanp, si nou kone si dimounn-la krwar dan Bondie ouswa non, ouswa ki relizion li ete, sa kapav ed nou pou koz lor bann size ki vremem interes li. Nou kapav osi sit enn verse Labib ki dimounn-la kitfwa deza kone. Ek bien souvan, li pli bon ki nou fer dimounn-la lir verse-la dan so prop Labib ouswa dan nou Labib. Reflesi kouma to kapav ankouraz bann dimounn ki ekout twa, pou ki zot anvi aprann plis lor Zeova.

14. (a) Kouma Pol koumans koz lor bon nouvel lor Zezi, ek ki lavertisman li done? (b) Ki lefe diskour Pol ena lor bann ki ekout li?

¹⁴ Apre sa, Pol explike ki bann lerwa dan Izrael ti bann anset Zezi. Li osi explike kouma Zan Batis ti prepar bann dimounn pou ki zot aksepte ‘Zezi, zot sover.’ Lerla, Pol explike kouma Zezi finn mor ek resisite. (Zist. 13:20-37) Lerla Pol dir: “Mo pe anons zot ki gras-a sa kikenn-la zot gagn pardon zot bann pese. . . . Par mwayin sa kikenn-la, Bondie konsider tou bann ki krwar kouma inosan.” Apre sa, Pol donn zot sa lavertisman-la: “Fer atansion ki seki finn ekrir dan liv bann Profet pa ariv zot: ‘Gete, zot, bann dimounn meprizan, zot bizin etone ek zot bizin mor, parski mo pe fer enn travay dan zot lepok, enn travay ki zame zot pa pou krwar mem si enn kikenn rakont zot sa an detay.’” Kitfwa Pol etone ar reaksion ki bann dimounn ena apre so diskour. Labib dir: ‘Bann dimounn sipliy zot pou koz lor sa bann kitsoz-la pou prosin Saba.’ Kan renion dan sinagog fini, ‘boukou Zwif ek bann ki’nn konverti dan relizion zwif swiv Pol ek Barnabas.’​—Zist. 13:38-43.

15. Pandan prosin Saba, ki arive apre diskour Pol?

¹⁵ Pandan prosin Saba, “preske tou dimounn dan lavil” rasanble pou ekout Pol. Me sertin Zwif pa kontan, ek zot ‘koumans kontredir Pol ek koz kont bann kitsoz ki li pe dir.’ Lerla, Pol ek Barnabas dir zot avek kouraz: “Li ti neseser ki anons zot an premie parol Bondie. Me parski zot pe rezet sa ek zot pa konsider zotmem dign pou gagn lavi pou touletan, gete! nou pe al anons sa ar bann dimounn lezot nasion. Parski Zeova inn donn nou lord par sa bann parol-la: ‘Mo finn etabli twa kouma enn lalimier pou bann nasion, pou ki to amenn delivrans ziska landrwa pli lwin lor later.’”​—Zist. 13:44-47; Iza. 49:6.

16. Kouma bann Zwif reazir ar bann parol bien fran ki Pol ek Barnabas dir zot, ek ki Pol ek Barnabas fer kan bann Zwif zet zot andeor lavil?

¹⁶ Kan bann non-Zwif tann sa, zot extra kontan, ek ‘tou bann ki ena enn bon kondision leker pou gagn lavi eternel vinn bann krwayan.’ (Zist. 13:48) Parol Zeova koumans fane inpe partou dan pei. Me bann Zwif pa reazir kouma bann non-Zwif. Ofet, Pol ek Barnabas ti dir zot ki zot ti bann premie pou tann bon nouvel lor Lemesi. Me zot inn rezet li, se akoz sa ki Bondie ti nepli aksepte zot ladorasion. Lerla, bann Zwif mont latet bann madam inportan dan lasosiete ek bann zom inportan dan lavil. Lerla, zot “provok enn persekision kont Pol ek Barnabas” ek “zet zot andeor zot teritwar.” Kouma Pol ek Barnabas reazir? ‘Zot sakouy lapousier ki lor zot lipie kont bann-la ek al Ikoniom.’ Eski savedir ki pou nepli ena bann Kretien dan Antios dan Pisidi? Non! Bann disip dan sa lavil-la, ‘kontign ranpli ar lespri sin ek zot leker ranpli ar lazwa.’​—Zist. 13:50-52.

17-19. Kouma nou kapav imit lexanp Pol ek Barnabas, ek kouma sa pou ed nou pou gard nou lazwa?

¹⁷ Nou kapav aprann boukou kitsoz ar fason ki Pol ek Barnabas ti reazir kan zot inn gagn persekision. Nou pa pou aret prese, mem kan bann dimounn ki ena lotorite esey anpes nou pou koz lor Rwayom Bondie. Remarke osi ki kan bann dimounn dan Antios ti rezet mesaz Pol ek Barnabas, zot “ti sakouy lapousier ki ti lor zot lipie.” Pol ek Barnabas pa fer sa parski zot ankoler kont bann dimounn ki res dan Antios. Me zot fer sa pou montre ki zot, zot inn asim zot responsabilite devan Zeova, ek ki aster-la zot nepli responsab seki pou ariv sa bann dimounn-la. Sa bann misioner-la ti konpran ki zot pena kontrol lor fason ki bann dimounn ti pou reazir. Parkont, sel kitsoz lor ki zot ti ena kontrol, se eski zot ti pou kontign prese ouswa non. Ek se seki zot fer, parski zot al prese Ikoniom!

¹⁸ Aster-la, bann nouvo frer dan Antios nepli ena Pol ek Barnabas avek zot. Ek zot bizin viv parmi bann dimounn ki pe persekit zot. Me zot lazwa pa depann lor kantite dimounn ki pou aksepte zot mesaz. Zezi ti dir: “Ere bann ki tann parol Bondie ek ki obeir li!” (Lik 11:28) Ek se samem ki bann disip dan Antios dan Pisidi determine pou fer.

¹⁹ Parey kouma Pol ek Barnabas, nou bizin rapel ki nou nou responsabilite, se pou pres bon nouvel. Se bann dimounn ki deside si zot pou aksepte nou mesaz ouswa non. Mem si bann dimounn pa interese ar laverite, nou kapav aprann ar lexanp bann disip dan premie siek. Si nou kontign donn valer laverite ek les lespri sin gid nou, nou osi nou pou ena lazwa, mem kan bann dimounn persekit nou.​—Gal. 5:18, 22.