“Koz Avek Kouraz Gras-a Pouvwar Zeova”

1, 2. Ki seri levennman arive kan Pol ek Barnabas dan List?

ENA enn gran exsitasion dan List. Enn zom pe sote dan lazwa, parski de zom ki li pa kone inn geri li, alor ki li ti andikape depi so nesans. Bann dimounn etone, ek zot panse ki sa de zom-la zot bann bondie. Alor, enn pret Zeis amenn bann girland pou zot. Pandan ki sa pret-la pe prepar bann toro pou fer enn sakrifis, kapav tann sa bann toro-la pe kriye. Pol ek Barnabas kriye bien for pou aret zot. Zot desir zot linz, ek sipliy lafoul pou aret ador zot. Finalman, zot reisi konvink lafoul, me avek boukou difikilte.

² Apre sa, bann Zwif ki sorti Antios dan Pisidi ek Ikoniom debark dan List pou met baton dan larou Pol ek Barnabas. Zot koumans koz manti lor sa de zom-la pou gat zot repitasion. Zot bann mansonz kouma enn pwazon ki gat lespri bann dimounn dan List. Sa lafoul ki ti pe anvi ador Pol la, aster-la pe antour li ek pe pil ros lor li ziska ki li perdi konesans. Zot trenn lekor Pol ki kas-kase ek ki pe sengne, andeor lavil, parski zot panse ki li’nn mor.

 3. Ki bann kestion nou pou examine dan sa sapit-la?

³ Kouma eski Pol ek Barnabas finn retrouv zot dan sa sitiasion-la? Azordi, ki kitsoz bann proklamater bon nouvel kapav aprann ar Barnabas, Pol, ek bann abitan List? Ek kouma bann ansien kapav imit lexanp Barnabas ek Pol, ki’nn kontign prese ek “koz avek kouraz gras-a pouvwar Zeova”?​—Zist. 14:3.

4, 5. Kifer Pol ek Barnabas al Ikoniom, ek ki arive laba?

⁴ De-trwa zour avan dan Antios dan Pisidi, bann Zwif ki pa ti dakor ar Pol ek Barnabas ti mont latet bann dimounn kont zot, ek bann-la ti zet sa de zom-la andeor sa lavil romin la. Me olie ki zot dekouraze, sa de zom-la ti “sakouy lapousier ki ti lor zot lipie” kont bann abitan sa lavil-la. (Zist. 13:50-52; Mat. 10:14) Pol ek Barnabas ti ale trankil, ek ti les sa bann dimounn-la sibir bann konsekans ki zot ti pou gagne ar Bondie. (Zist. 8:5, 6; 20:26) Eski Pol ek Barnabas perdi zot lazwa akoz sa? Non. Okontrer, sa de misioner-la kontign zot latourne predikasion. Zot al dan direksion sid-es, ek mars anviron 150 kilomet. Zot ariv dan enn landrwa ki plat ek ki bien ver, ki trouv ant bann ranze montagn Toris ek Siltan.

⁵ Premie plas kot Pol ek Barnabas arete se Ikoniom.a Sa lavil-la ankor bien inflianse par kiltir grek, mem si li enn parmi bann lavil inportan dan provins Galasi, ki enn provins romin. Dan sa lavil-la, ena enn gran kominote zwif ki ena enn gran linflians, ek ena osi boukou dimounn ki’nn konverti dan relizion zwif. Parey kouma Pol ek Barnabas abitie fer, zot rant dan sinagog ek koumans prese. (Zist. 13:5, 14) ‘Zot koz telman bien ki enn gran lafoul bann Zwif ek bann Grek toule-de vinn krwayan.’​—Zist. 14:1.

 6. Kifer Pol ek Barnabas zot bann bon ansegnan, ek kouma to kapav imit zot?

⁶ Kifer Pol ek Barnabas bann bon ansegnan koumsa? Pol enn bibliotek vivan, li konn bien bann Lekritir. Li ena enn don: Li kapav fer enn lien ant bann profesi, listwar, ek Lalwa Moiz pou montre ki Zezi limem Lemesi ki Bondie ti promet. (Zist. 13:15-31; 26:22, 23) Ek kan bann dimounn trouv Barnabas, zot trouve ki li ti vremem interese avek zot. (Zist. 4:36, 37; 9:27; 11:23, 24) Me selman, sa de zom-la pa fie lor zot prop lintelizans. Okontrer, zot koze “gras-a pouvwar Zeova.” Kouma to kapav imit lexanp sa de misioner-la kan to prese? Se kan to konn bien Parol Bondie. Servi bann verse Labib ki pou tous leker bann dimounn avek ki to pe prese. Reflesi kouma to kapav rekonfort bann dimounn ki pe ekout twa. Ek kan to pe ansegne, pa baz to lansegnman lor to prop konesans, me lor Parol Zeova.

 7. (a) Kouma bann dimounn kapav reazir ar bon nouvel? (b) Ki to bizin rapel si ena bann problem dan to fami parski to pe ador Zeova?

⁷ Me selman, pa zot tou dan Ikoniom ki kontan pou tann seki Pol ek Barnabas ena pou dir. ‘Bann Zwif ki pa krwar, mont latet bann dimounn lezot nasion ek fer zot vir kont bann frer.’ Me Pol ek Barnabas konpran ki zot bizin reste, ek defann bon nouvel. Lerla, zot “pas boukou letan laba pou koz avek kouraz.” Ki rezilta sa done? ‘Bann dimounn dan sa lavil-la pa dakor ant zot; sertin soutenir bann Zwif me lezot soutenir bann zapot.’ (Zist. 14:2-4) Azordi, bon nouvel kapav ena sa bann mem rezilta-la. Dan sertin sitiasion, li kapav favoriz linite. Alor ki dan lezot sitiasion, li kapav kree divizion. (Mat. 10:34-36) Si sa pe kree bann problem dan to fami parski to pe ador Zeova, rapel ki souvan bann dimounn pa dakor avek nou, parski zot krwar dan bann fos rimer, ouswa parski bann dimounn inn koz manti lor nou. To bon konportman kapav enn remed pou sa kalite pwazon-la. Ek ki kone, avek letan sa kapav sanz leker bann ki pe persekit twa.​—1 Pier 2:12; 3:1, 2.

 8. Kifer Pol ek Barnabas kit Ikoniom, ek ki nou aprann ar zot lexanp?

⁸ Apre inpe letan, sertin dimounn dan Ikoniom mont enn plan pou avoy ros lor Pol ek Barnabas, pou touy zot. Kan sa de misioner-la tann sa, zot desid pou al pres dan enn lot teritwar. (Zist. 14:5-7) Azordi osi, bann proklamater Rwayom Bondie azir avek sazes. Kan bann dimounn dir bann move kitsoz lor nou ouswa lor nou mesaz, nou koz avek kouraz. (Fil. 1:7; 1 Pier 3:13-15) Me kan bann dimounn menas nou ouswa vinn violan, nou pa pou azir dan enn fason ki pou met nou lavi ouswa lavi nou bann frer ek ser an danze.​—Prov. 22:3.

9, 10. Kotsa List trouve, ek ki nou kone lor so bann abitan?

⁹ Pol ek Barnabas al List, enn koloni romin, ki trouv anviron 30 kilomet ar Ikoniom, dan sid-wes. Ena boukou pwin komin ant List ek Antios dan Pisidi. Me parkont dan List, pena enn gran kominote zwif. Mem si li paret ki bann abitan List koz Grek, zot lang maternel se Likaonien. Pol ek Barnabas koumans pres an piblik, kitfwa parski pena okenn sinagog dan sa lavil-la. Kan Pier ti dan Zerizalem, li ti geri enn zom ki ti andikape depi so nesans. Ek gras-a sa mirak-la, enn gran lafoul ti vinn krwayan. (Zist. 3:1-10) Dan List, Pol li osi geri enn zom ki andikape depi so nesans. (Zist. 14:8-10) Me mirak ki Pol fer ena enn rezilta ki zot pa atann.

¹⁰ Kouma nou’nn trouve dan koumansman sa sapit-la, kan sa misie ki ti andikape la sot lor so lipie, bann abitan List ki bann payin, tir enn move konklizion. Zot krwar ki Pol ek Barnabas bann bondie. Zot apel Barnabas, Zeis, sef bann bondie grek, ek zot apel Pol, Ermes, garson Zeis ek portparol bann bondie. (Get lankadre “List ek Ladorasion Zeis ek Ermes.”) Me Pol ek Barnabas determine pou fer lafoul konpran ki zot pa bann bondie, me ki Zeova, Li tousel vre Bondie. Se Li ki donn zot lotorite pou koze ek pouvwar pou fer bann mirak.​—Zist. 14:11-14.

11-13. (a) Ki Pol ek Barnabas dir bann abitan List? (b) Ki premie leson nou aprann ar seki Pol ek Barnabas ti dir?

¹¹ Malgre reaksion lafoul, Pol ek Barnabas esey fer zot maximum pou pres avek zot. Seki Lik ekrir lor sa sitiasion-la, aprann nou kouma nou kapav pres dan enn bon fason avek bann dimounn ki pa bann Kretien. Anou gete kouma Pol ek Barnabas fer lafoul reflesi: “Bann kamarad, kifer zot pe fer sa bann kitsoz-la? Nou osi nou bann dimounn ki ena bann mem febles ki zot. Ek nou pe anons zot bon nouvel, pou ki zot vir ledo ar sa bann kitsoz initil la ek ki zot ador Bondie vivan, ki’nn fer lesiel, later, lamer, ek tou seki ladan. Dan lepase, li ti permet tou bann nasion swiv zot prop semin, mem si li’nn touletan rann temwaniaz lor li kan li’nn fer bann bon kitsoz. Li’nn donn zot lapli depi lesiel ek bann rekolt an-abondans pandan sak sezon, li’nn donn zot manze an-abondans ek li’nn ranpli zot leker ar lazwa.”​—Zist. 14:15-17.

¹² Ki nou kapav aprann ar seki Pol ek Barnabas dir sa bann dimounn-la? Pou koumanse, Pol ek Barnabas pa panse ki zot pli bon ki bann dimounn ar ki zot pe koze-la. Ek zot pa fer bann-la krwar ki zot bann siper ero, parski zot inn geri enn zom. Okontrer, avek limilite, zot rekonet ki zot osi zot ena bann pwin feb. Pol ek Barnabas kone ki, parey kouma zot, bann abitan List kapav gagn lespri sin, kapav libere ar bann fos lansegnman, ek kapav gagn lespwar pou regn avek Lekris, si zot obeir Lekris.

¹³ Ki latitid nou ena anver bann dimounn avek ki nou prese? Eski nou panse ki nou pli siperyer ki zot, ouswa nou trouv zot parey kouma nou? Eski parey kouma Pol ek Barnabas, nou pa pou rod laglwar kan nou ed zot pou konn laverite lor Bondie? Charles Taze Russell, ki ti diriz travay predikasion ver bann lane 1870 a 1916, ti enn bon ansegnan ek li’nn les nou enn bon lexanp. Li ti ekrir: “Nou pa pe rod laglwar pou noumem, ouswa pou bann kitsoz ki nou pibliye; nou pa anvi ki bann dimounn apel nou Reveran ouswa Rabi.” Frer Russell ti ena boukou limilite parey kouma Pol ek Barnabas. Nou osi, nou prese pa pou rod laglwar pou noumem, me pou ed bann dimounn ador “Bondie vivan.”

14-16. Ki deziem ek trwaziem leson nou kapav aprann ar seki Pol ek Barnabas ti dir bann abitan List?

¹⁴ Anou get enn deziem leson ki nou kapav aprann avek seki Pol ek Barnabas ti dir. Sa de misioner-la ti adapte zot. Konpare ar Ikoniom, kot bann abitan ti sirtou bann Zwif ek bann ki ti konverti dan relizion zwif, bann abitan List pa ti tro konn ouswa pa ti konn ditou bann Lekritir, ouswa mem ki kalite relasion Bondie ti ena avek nasion Izrael. Parkont, Pol ek Barnabas ti kone ki bann abitan List ti gagn zot lavi gras-a lagrikiltir. List ti enn plas kot ti ena bien lapli ek so bann later ti bien prodiktif. Bann abitan List ti kapav trouv bien bann kalite nou Kreater dan bann kitsoz ki otour zot, sirtou pandan bann sezon rekolt. Ek sa de misioner-la ti servi sa linformasion-la pou pres avek zot.​—Rom. 1:19, 20.

¹⁵ Eski nou osi nou kapav adapte nou? Mem si enn fermie pou plant mem lagrin dan diferan karo, bann metod ki li pou servi pou prepar bann later, pa pou parey. Par exanp, sertin later deza mou ek inn pare pou plante. Alor ki kitfwa pou lezot later, sa pou demann li plis letan pou prepar zot. Dan mem fason, nou osi nou touletan plant mem lagrin, setadir mesaz lor Rwayom Bondie ki sorti dan Labib. Me parkont, si nou fer parey kouma Pol ek Barnabas, nou pou esey konpran dan ki sitiasion bann dimounn dan nou teritwar ete, ek ki zot bann krwayans. Lerla, nou pou kapav servi sa bann ransegnman-la pou adapte fason ki nou pres avek zot.​—Lik 8:11, 15.

¹⁶ Nou kapav aprann enn trwaziem leson ar seki’nn ariv Pol, Barnabas, ek bann abitan List. Mem si nou fer boukou zefor, li kapav arive ki bann lagrin ki nou plante, tom lor bann ros ouswa ki bann dimounn ras zot. (Mat. 13:18-21) Si sa arive, fode pa ki nou dekouraze. Parey kouma plitar Pol pou rapel bann disip dan Rom, “sakenn parmi nou [mem sak dimounn avek ki nou koz lor Parol Bondie] pou bizin rann kont pou limem devan Bondie.”​—Rom. 14:12.

17. Kotsa Pol ek Barnabas ale apre ki zot kit Derbe, ek kifer?

¹⁷ Bann abitan List trenn Pol andeor lavil, parski zot panse ki li’nn mor. Apre sa, bann disip dan lavil vini, antour li, lev li, ek donn li enn plas pou li repoze. Le-landemin Pol ek Barnabas pran direksion Derbe, ki trouv 100 kilomet ar List. Nou kapav sey mazine ki kantite sa vwayaz-la bien difisil pou Pol, parski sa fer zis de-trwa lertan ki bann dimounn inn avoy ros lor li. Me kanmem sa, Barnabas ek li persevere, ek kan zot ariv Derbe zot fer “boukou disip.” Me apre, olie ki zot pran sime ki pli kourt pou retourn kot zot reste dan Antios dan Siri, zot “retourn List, Ikoniom, ek Antios [dan Pisidi].” Kifer zot fer sa? Pou fortifie ‘bann disip ek ankouraz zot pou res ferm dan lafwa.’ (Zist. 14:20-22) Sa de zom-la inn vremem kit enn bon lexanp pou nou! Zot inn fer lintere bann frer ek ser pas avan zot prop lintere. Azordi, bann responsab sirkonskripsion ek bann misioner swiv zot lexanp.

18. Kouma nomm enn ansien?

¹⁸ Pol ek Barnabas pa zis fortifie bann disip par zot bann parol ek zot lexanp, me zot osi etabli “bann ansien dan sak lasanble.” Mem si se ‘lespri sin ki’nn avoy sa bann zom-la’ pou sa vwayaz misioner la, kanmem sa, Pol ek Barnabas priye ek gard karem kan zot “konfie sa bann ansien-la Zeova.” (Zist. 13:1-4; 14:23) Azordi osi nou swiv mem metod. Avan ki rekomann enn frer kouma ansien, bann ansien dan lasanble pou priye pou gete si sa frer-la ranpli bann kondision ki’nn ekrir dan Labib. (1 Tim. 3:1-10, 12, 13; Tit 1:5-9; Zak 3:17, 18; 1 Pier 5:2, 3) Seki pli inportan, se pa depi komie letan sa frer-la li enn Kretien. Me seki pli inportan se ki kantite sa frer-la les lespri sin azir dan so lavi. Bann ansien pou trouv sa dan so konportman, so fason koze, ek repitasion ki li ena. Li pou kapav servi kouma enn berze si li ranpli bann kondision ki’nn ekrir dan Labib pou bann ansien. (Gal. 5:22, 23) Se bann responsab sirkonskripsion ki ena responsabilite pou nomm sa bann frer-la.​—Konpar ar 1 Timote 5:22.

19. Ar kisann-la bann ansien ena pou rann kont, ek kouma zot imit Pol ek Barnabas?

¹⁹ Bann ansien kone ki zot bizin rann kont Bondie pou fason ki zot tret bann frer ek ser dan lasanble. (Ebre 13:17) Parey kouma Pol ek Barnabas, bann ansien pran latet dan travay predikasion. Zot fortifie zot bann frer ek ser par zot bann parol. Ek zot dispoze pou fer lintere lasanble pas avan zot prop lintere.​—Fil. 2:3, 4.

20. Kouma sa ankouraz nou kan nou tann bon travay ki nou bann frer ek ser pe fer?

²⁰ Kan Pol ek Barnabas retourn dan Antios dan Siri, zot “rakont tou bann kitsoz ki Bondie ti’nn fer par zot, ek kouma li’nn ouver laport pou bann nasion pou ki zot kapav ena lafwa.” (Zist. 14:27) Azordi, kan nou tann bann bon travay ki nou bann frer ek ser pe fer ek trouve kouma Zeova pe beni zot, sa ankouraz nou pou “koz avek kouraz gras-a pouvwar Zeova.”