SAPIT 14

“Nou Tou Nou’nn Tom Dakor”

Fason ki komite santral reisi pran enn desizion ek gras-a sa, ena linite dan bann lasanble

1, 2. (a) Ki bann kestion bien inportan komite santral dan premie siek bizin reponn? (b) Ki kitsoz ed sa bann frer-la pou kone ki zot bizin fer?

ENA boukou sispans dan lasal kot bann zapot ek bann ansien inn reini dan Zerizalem. Sakenn pe get so kamarad. Zot kone ki zot ena enn desizion bien inportan pou pran. Problem konsernan sirkonsizion finn pous zot pou poz zot bann kestion inportan: Eski bann Kretien ankor bizin obeir Lalwa Moiz? Eski bizin fer enn diferans ant bann Kretien zwif ek bann Kretien non-zwif?

² Bann zapot ek bann ansien finn examinn plizir prev. Zot finn koz lor bann profesi ki ena dan Parol Bondie ek osi lor bann temwaniaz ki montre ki Zeova finn aksepte bann non-Zwif. Sakenn finn gagn lokazion pou dir seki zot panse lor sa size-la. Aster-la zot ena tou bann linformasion ki zot bizin pou pran enn desizion. Lespri sin Zeova pe montre dan enn fason kler ki direksion zot bizin pran. Eski sa bann zom-la pou swiv sa direksion-la?

3. Ki nou pou aprann dan Zistwar Bann Zapot sapit 15?

³ Sa bann zom-la pou bizin boukou lafwa ek kouraz pou aksepte direksion ki lespri sin pe done dan sa sitiasion-la. Si zot aksepte sa direksion-la, bann sef relizie zwif kapav ena plis laenn anver zot. Anplis, kitfwa sertin manb dan lasanble ki anvi ki pep Bondie kontign viv dapre Lalwa Moiz, pa pou aksepte sa desizion-la. Alor ki komite santral pou fer? Anou get sa ansam. Pandan ki nou fer sa, nou pou trouve kouma sa bann zom-la finn kit enn bon lexanp pou Komite Santral bann Temwin Zeova azordi. Nou osi nou kapav swiv zot lexanp, kan nou ena pou pran bann desizion, ouswa kan nou gagn bann problem.

“An-Akor Avek Parol Bann Profet” (Zist. 15:13-21)

4, 5. Ki bann verse dan “lansegnman bann Profet” Zak site?

⁴ Disip Zak,a Zezi so demi-frer, koumans koze. Li paret ki dan sa lokazion-la, se limem ki prezidan sa renion-la. So bann parol montre lor ki desizion kitfwa zot tou finn tom dakor. Zak dir ar bann frer ki la: “Simeon inn rakont an detay kouma Bondie pou premie fwa inn pran kont bann dimounn lezot nasion pou tir parmi zot enn pep pou so nom. Ek sa li an-akor avek parol bann Profet.”—Zist. 15:14, 15.

⁵ Diskour ki Simeon, ouswa Simon Pier, inn fer ek bann prev ki Pol ek Barnabas inn montre, sirman ed Zak pou rapel bann verse ek sa ed bann frer pou kone ki direksion Zeova pe done. (Zan 14:26) Apre ki Zak dir ki “sa li an-akor avek parol bann Profet,” li sit bann parol ki ena dan Amos 9:11, 12. Sa liv-la ti form parti bann Lekritir Ebre ki bann dimounn ti abitie apel “lansegnman bann Profet.” (Mat. 22:40; Zist. 15:16-18) To pou remarke ki bann parol ki Zak site, inpe diferan ar seki nou trouve dan liv Amos azordi. Kitfwa, se parski Zak finn sit sa bann verse-la apartir la Septante, enn tradiksion grek bann Lekritir Ebre.

6. Kouma bann Lekritir finn ed bann frer pou kone ki volonte Bondie?

⁶ Zeova ti servi profet Amos pou predir ki li ti pou remont “latant David,” setadir ki se enn desandan David ki ti pou vinn lerwa ek ki ti pou etabli Rwayom Mesianik. (Eze. 21:26, 27) Eski Zeova ankor enn fwa ti pou donn so faver zis nasion Izrael? Non. Parski sa profesi-la dir ki parmi “bann dimounn ki port [Bondie so] nom” ti pou ena osi “bann dimounn lezot nasion.” Rapel ki Pier ti fek temwagne ki Bondie “pa’nn fer okenn diferans ant zot [bann Kretien non-zwif] ek nou [bann Kretien zwif], me li’nn pirifie zot leker akoz zot lafwa.” (Zist. 15:9) Alor se volonte Bondie ki bann Zwif ek bann non-Zwif toule-de, vinn bann zeritie Rwayom Bondie. (Rom. 8:17; Efe. 2:17-19) Okenn par dan sa bann profesi-la dir ki bann Kretien non-zwif bizin sirkonsi, ouswa konverti dan relizion zwif avan ki zot vinn bann zeritie Rwayom Bondie.

7, 8. (a) Ki Zak propoze? (b) Eski Zak pe montre ki li ena lotorite pou dir lezot frer seki zot bizin fer? Explike.

⁷ Apre ki Zak inn trouv bann prev ki ena dan bann Lekritir ek inn tann bann diferan temwaniaz, li fer sa propozision-la: “Alor, mo desizion se pa pou fatig bann dimounn lezot nasion ki anvi servi Bondie, me pou ekrir zot pou dir zot ki zot bizin rezet bann kitsoz ki’nn kontamine par bann zidol, rezet limoralite sexiel, pa manz bann zanimo ki’nn toufe, ek pa servi disan. Parski depi lepok lontan bann dimounn inn pres bann parol Moiz dan enn lavil apre lot, ek zot lir so bann parol for dan bann sinagog sak saba.”—Zist. 15:19-21.

⁸ Kan Zak, ki aparaman prezidan sa renion-la, dir: “Alor, mo desizion se,” eski li pe montre ki li ena lotorite pou dir bann lezot frer ki desizion zot bizin pran? Non! Lexpresion grek ki’nn servi pou “mo desizion se,” kapav osi vedir “mo panse,” ouswa “dapre mo lopinion.” Alor, isi Zak pa pe pran enn desizion pou tou bann frer. Okontrer, li pe zis fer enn propozision konsernan seki zot kapav fer dapre bann prev ki zot finn tande ek seki bann Lekritir dir konsernan sirkonsizion.

9. Ki bann bienfe Zak so propozision pou amene?

⁹ Eski propozision ki Zak fer, li enn bon propozision? Nou kapav dir wi, parski plitar bann zapot ek bann ansien pou aksepte sa propozision-la. Ki bienfe sa pou amene? Pou koumanse, sa propozision-la “pa pou fatig,” ouswa ‘pa pou rann lavi bann Kretien non-zwif difisil,’ parski pa pou inpoz Lalwa Moiz lor zot. (Zist. 15:19; Nouvo Testaman Dan Kreol Morisien) Anplis, sa desizion-la pou montre ki zot respekte konsians bann Kretien zwif, parski pandan boukou lane sa bann Kretien zwif la finn tann ‘bann dimounn lir bann parol Moiz for dan bann sinagog sak saba.’b (Zist. 15:21) Ek sirman, sa propozision-la pou ede pou ki bann Kretien zwif ek bann Kretien non-zwif vinn pli pros. Me pli inportan, sa propozision-la pou fer Zeova plezir, parski sa an-akor avek so proze. Li vremem enn bon fason pou regle enn problem ki menas lape ek linite parmi pep Bondie! Wi, se enn bon lexanp pou pep Bondie azordi!

Albert Schroeder pe koze pandan enn lasanble internasional 1998

10. Kouma Komite Santral azordi swiv lexanp komite santral dan premie siek?

¹⁰ Kouma nou ti trouve dan sapit avan, parey kouma komite santral dan premie siek, azordi Komite Santralc bann Temwin Zeova kont lor Zeova, Souverin Liniver, ek Zezi Kris, Sef lasanble, kan zot ena pou pran bann desizion. (1 Kor. 11:3) Kouma zot fer sa? Albert D. Schroeder, ki ti servi dan Komite Santral depi 1974 ziska ki li fini so lavi lor later an Mars 2006, ti dir: “Komite Santral zwenn toule Merkredi, zot koumans zot renion avek enn lapriyer ek demann Zeova pou diriz zot gras-a so lespri sin. Komite Santral fer sir ki tou bann kestion ki zot examine, ek ki tou bann desizion ki zot pran, zot an-akor avek Parol Bondie, Labib.” Milton G. Henschel, ki ti servi pandan boukou letan dan Komite Santral ek ki ti fini so lavi lor later an Mars 2003, ti poz bann etidian 101^em klas Lekol Galaad enn kestion bien inportan, li ti dir: “Eski ena enn lot lorganizasion lor later kot bann ki dirize examinn Parol Bondie, Labib, avan ki zot pran bann desizion inportan?” Non, pena okenn lorganizasion koumsa.

‘Avoy Sertin Zom Ki Zot Inn Swazire’ (Zist. 15:22-29)

11. Kouma komite santral fer bann lasanble konn zot desizion?

¹¹ Zot tou dan komite santral dan Zerizalem finn tom dakor lor enn desizion konsernan sirkonsizion. Me selman, pou ki kontign ena linite parmi bann frer dan tou bann lasanble, zot bizin anons sa desizion-la dan enn fason kler, pozitif, ek ankourazan. Ki pli bon fason pou fer sa? Labib dir: ‘Bann zapot ek bann ansien, ansam avek zot tou dan lasanble, desid pou avoy Antios, sertin zom ki zot inn swazire parmi zot, avek Pol ek Barnabas; zot avoy Zida ki osi apel Barsabas ek Silas, ki bann zom ki ena bann gran responsabilite parmi bann frer.’ Anplis, zot donn sa bann frer-la enn let pou ki zot lir sa ar tou bann lasanble dan Antios, Siri, ek Silisi.—Zist. 15:22-26.

12, 13. Kifer li ti bon ki komite santral ti avoy (a) Zida ek Silas? (b) enn let?

¹² Zida ek Silas kalifie pou reprezant komite santral, parski zot bann zom ki “ena bann gran responsabilite parmi bann frer.” Sa kat frer-la ti pou fer bann lasanble konpran, ki mesaz ki zot pe amene li pa zis enn repons lor kestion konsernan sirkonsizion, me ki li osi enn nouvo direksion ki komite santral pe done. ‘Sa bann zom ki’nn swazire la,’ Zida ek Silas, pou ede pou ki bann Kretien zwif dan Zerizalem ek bann Kretien non-zwif dan bann lasanble vinn pli pros ar komite santral. Kan komite santral ti desid pou avoy sa bann zom-la, sa ti enn desizion bien saz ki ranpli ar lamour! Nou sir ki sa finn favoriz lape ek linite parmi pep Bondie.

KOUMA KOMITE SANTRAL ORGANIZE AZORDI?

Parey kouma bann Kretien dan premie siek, azordi se Komite Santral ki diriz bann Temwin Zeova. Dan Komite Santral, ena bann frer fidel ki’nn swazir par lespri sin. Bann manb Komite Santral zwenn sak semenn, ek form parti sis lezot komite ki ena so prop responsabilite.

Komite Edision okip tou seki konsern inprim, pibliy, ek avoy bann piblikasion ki baze lor Labib. Zot siperviz bann linprimri, bann propriete ki pou bann diferan asosiasion ki bann Temwin Zeova servi, ek konstriksion bann Betel, bann Lasal Renion, ek bann Lasal Lasanble. Sa komite-la siperviz osi fason ki servi bann donasion.
Komite Bann Kordinater okip bann zafer legal ek kan bizin, li servi bann media pou donn bann linformasion exakt lor nou bann krwayans. Se sa komite-la ki ed bann Temwin Zeova partou dan lemond kan ena bann katastrof natirel, bann persekision, ek bann lezot sitiasion irzan.
Komite pou Lansegnman okip lansegnman ki gagne dan bann lasanble sirkonskripsion, rezional, bann renion, ek prepar bann program odio ek video. Li prepar bann kitsoz ki pou examine dan Lekol Galaad, Lekol Pionie, ek bann lezot lekol. Li prepar osi bann program spiritiel pou bann volonter ki travay pou Betel.
Komite pou Personel veye ki tou bann manb lafami Betel partou dan lemond, gagn seki zot bizin lor plan spiritiel ek materyel. Anplis, se sa komite lamem ki pou deside ki bann nouvo frer ek ser kapav vinn servi dan Betel.
Komite Redaksion siperviz preparasion bann piblikasion ki baze lor Labib pou servi dan bann lasanble ek osi pou bann lezot dimounn. Se sa komite-la osi ki reponn bann kestion Biblik, ki siperviz travay tradiksion ki pe fer partou dan lemond, ek ki donn so laprobasion pou bann skript fim, ek bann plan diskour.
Komite Servis siperviz travay predikasion ek osi bann kitsoz ki konsern bann ansien, bann responsab sirkonskripsion, bann pionie, ek bann misioner. Se sa komite-la osi ki invit bann frer ek ser pou asiste Lekol Galaad, ek ki swazir zot lafektasion pou ki zot kapav stabiliz ek fortifie bann lasanble partou dan lemond.

Komite Santral kont lor lespri sin Bondie pou diriz zot. Bann manb ki dan Komite Santral pa panse ki se zot ki bann sef bann Temwin Zeova. Okontrer, parey kouma bann Kretien ki ena lesperans pou al viv dan lesiel ek ki ankor lor later, zot “kontign swiv Lagno [Zezi Kris] partou kot li ale.”—Rev. 14:4.

¹³ Sa let-la donn bann Kretien non-zwif enn direksion bien kler, pa zis konsernan sirkonsizion, me osi konsernan seki zot bizin fer pou gagn Zeova so faver ek so benediksion. Parti pli inportan dan sa let-la dir: “Lespri sin ek noumem finn trouv bon pou pa azout bann lezot fardo ankor lor zot apart sa bann kitsoz ki neseser la: kontign rezet bann kitsoz ki’nn sakrifie ar bann zidol, pa servi disan, pa manz zanimo ki’nn toufe, ek rezet limoralite sexiel. Si zot fer bien atansion pou rezet sa bann kitsoz-la, tou pou pas bien pou zot. Orevwar!”—Zist. 15:28, 29.

14. Kouma li posib ki ena linite parmi pep Zeova, alor ki nou pe viv dan enn lemond ki divize?

¹⁴ Azordi, ena enn vre linite parmi bann Temwin Zeova. Zot ena bann mem krwayans ek zot fer mem travay, alor ki zot plis ki 8,000,000 dan plis ki 100,000 lasanble partou lor later. Kouma sa kalite linite-la li posib, alor ki nou pe viv dan enn lemond ki anba-lao ek divize? Ena linite parmi nou sirtou parski Zezi Kris, Sef lasanble, donn nou bann direksion ki kler gras-a “esklav fidel ek saz,” setadir Komite Santral. (Mat. 24:45-47) Anplis, nou ini parski tou bann frer ek ser dan lemond antie dispoze pou aksepte direksion ki Komite Santral done.

‘Sa Ankouraz Zot ek Zot Bien Kontan’ (Zist. 15:30-35)

15, 16. Kouma bann lasanble reazir ar direksion ki komite santral done, ek kifer?

¹⁵ Apre sa, liv Zistwar Bann Zapot rakonte ki kan sa kat frer ki sorti Zerizalem la ariv Antios, ‘zot rasanble tou bann disip ansam ek zot donn bann-la sa let-la.’ Kouma bann frer ki laba reazir ar direksion ki komite santral done? ‘Apre ki zot lir let-la, sa ankouraz zot ek zot bien kontan.’ (Zist. 15:30, 31) Anplis, Zida ek Silas “fer boukou diskour pou ankouraz bann frer ek pou fortifie zot.” Parski sa bann frer-la ti anons ouswa ti fer konn volonte Bondie, ti apel zot “bann profet” parey kouma Barnabas, Pol, ek lezot ankor.—Zist. 13:1; 15:32; Ex. 7:1, 2.

¹⁶ Li kler ki Zeova inn beni desizion ki komite santral inn pran, parski sa ti ankouraz tou bann lasanble. Kifer? Parski komite santral ti donn bann direksion bien kler ek dan bon moman. Anplis, zot bann instriksion ti baze lor Parol Bondie ek direksion ki lespri sin ti done. Ek fason ki zot ti fer konn zot desizion ar bann lasanble ti montre ki zot ti ena boukou lamour.

17. Azordi, kouma bann responsab sirkonskripsion imit lexanp Pol, Barnabas, Zida, ek Silas?

¹⁷ Azordi, Komite Santral bann Temwin Zeova swiv lexanp komite santral dan premie siek, parski zot donn bann frer ek ser dan lemond antie bann instriksion dan bon moman. Kan zot pran bann desizion, zot fer bann lasanble konn zot bann desizion dan enn fason kler ek fran. Parfwa, Komite Santral servi bann responsab sirkonskripsion pou fer konn sa bann desizion-la. Sa bann responsab sirkonskripsion-la fer boukou sakrifis, zot al dan enn lasanble apre lot pou donn bann frer ek ser bann direksion ki kler ek bann lankourazman. Parey kouma Pol ek Barnabas, zot pas boukou letan dan predikasion “ansam avek boukou lezot frer,” pou “ansegn ek anons bon nouvel lor parol Zeova.” (Zist. 15: 35) Parey kouma Zida ek Silas, zot “fer boukou diskour pou ankouraz bann frer ek pou fortifie zot.”

18. Ki pep Bondie bizin fer pou ki Zeova beni zot?

¹⁸ Ki nou kapav dir konsernan bann lasanble? Azordi, ki kitsoz permet ki ena lape ek linite dan tou bann lasanble, alor ki lemond divize? Rapel ki de-trwa lane apre, disip Zak ti ekrir: “Sazes ki sorti lao, avan tou li san tas, apre sa li kontan lape, li rezonab, li dispoze pou obeir . . . Anplis, sem frwi lazistis dan lape pou bann ki fer lape.” (Zak 3:17, 18) Eski disip Zak ti pe pans sa renion ki ti ena dan Zerizalem la, kan li’nn ekrir sa bann parol-la? Nou pa kone. Kanmem sa, liv Zistwar Bann Zapot sapit 15 montre nou ki se selman kan nou prezerv lape ek obeir bann ki diriz nou, ki Zeova pou beni nou.

19, 20. (a) Ki kitsoz montre ki ena lape ek linite dan lasanble Antios? (b) Lor ki kitsoz Pol ek Barnabas kapav konsantre aster-la?

¹⁹ Li kler ki aster-la ena lape ek linite dan lasanble Antios. Olie ki zot tini tet ar bann frer ki sorti Zerizalem, bann frer dan Antios bien rekonesan ki Zida ek Silas inn vinn vizit zot. Labib dir: ‘Apre ki zot inn pas inpe letan laba, bann frer swet zot bon vwayaz ek les zot retourn kot bann frer ki’nn avoy zot,’ setadir zot retourn Zerizalem.d (Zist. 15:33) Nou sir osi ki bann frer dan Zerizalem inn bien kontan kan zot inn tann Zida ek Silas rakont seki’nn pase pandan zot vwayaz. Wi, gras-a bonte extraordiner Zeova, sa bann frer-la inn reisi akonpli zot mision!

²⁰ Pol ek Barnabas res Antios, koumsa zot kapav diriz travay predikasion ek motiv bann frer ek ser, parey kouma bann responsab sirkonskripsion fer azordi kan zot vizit bann lasanble. (Zist. 13:2, 3) Wi, parey kouma Pol ek Barnabas, bann responsab sirkonskripsion vremem enn benediksion pou pep Zeova! Me kouma Zeova pou servi ek beni sa de predikater ki bien devwe la? Anou get sa dan prosin sapit.

Enn mama ek so tifi pe get liv « Les jeunes s’interrogent. Réponses pratiques » Volim 2 pandan enn lasanble. — Bann Kretien azordi gagn bann bienfe ar manze spiritiel ki zot gagne gras-a Komite Santral ek so bann reprezantan

ZAK—“FRER LESEGNER”

Zak ti garson Zozef ek Mari. Parmi tou bann demi-frer Zezi, se nom Zak ki aparet an premie. (Mat. 13:54, 55) Alor, kitfwa se limem deziem zanfan ki Mari ti gagne. Zak ti grandi avek Zezi, ti trouv li prese, ek ti kone ki Zezi ti fer “bann mirak.” Me nou pa kone si li ti trouv Zezi fer sa bann mirak-la. Selman, pandan ki Zezi ti pe prese lor later, Zak ek so bann frer “pa ti ena lafwa dan li [zot pli gran frer, Zezi].” (Zan 7:5) Kan bann lezot fami Zezi ti dir ki Zezi inn “vinn fou,” kitfwa Zak ti ena mem santiman ki zot.—Mark 3:21.

Me tou inn sanze apre ki Zezi inn mor ek inn resisite. Dan bann Lekritir Grek, mansionn trwa Zak. Me selman, li paret ki se avek so demi-frer Zak ki Zezi ti aparet personelman, pandan sa 40 zour ki li ti lor later la apre so rezireksion. (1 Kor. 15:7) Kitfwa se samem ki’nn ed Zak pou konpran ki so pli gran frer ti Lemesi. Antouka, mwins ki dis zour apre ki Zezi inn mont dan lesiel, Zak, so mama, ek so bann frer, ti rasanble ansam avek bann zapot dan enn lasam lor letaz pou priye.—Zist. 1:13, 14.

Avek letan, Zak ti vinn enn kikenn inportan dan lasanble Zerizalem. Li paret ki dan lasanble Zerizalem bann-la ti konsider li kouma enn zapot, ouswa “enn kikenn ki’nn avoye.” (Gal. 1:18, 19) Apre ki Pier ti libere dan prizon gras-a enn mirak, li ti dir bann disip: “Al dir sa bann kitsoz-la Zak ek bann frer.” Seki Pier ti dir montre ki Zak ti enn kikenn ki inportan dan lasanble. (Zist. 12:12, 17) Kan ti amenn problem sirkonsizion devan “bann zapot ek bann ansien” dan Zerizalem, li paret ki se Zak ki ti prezidan sa renion-la. (Zist. 15:6-21) Ek lapot Pol ti dir ki Zak, Sefas (Pier), ek lapot Zan “ti kouma bann kolonn” dan lasanble Zerizalem. (Gal. 2:9) Mem plizir lane apre, kan Pol ti retourn Zerizalem apre so trwaziem vwayaz misioner, se avek Zak ek ‘tou bann ansien ki ti la,’ ki li ti fer enn rapor lor so vwayaz.—Zist. 21:17-19.

Pol ti apel Zak “frer Lesegner,” ek se limem ki’nn ekrir let, ouswa liv Labib, ki port so nom. (Gal. 1:19) Dan sa let-la, avek limilite Zak pa koz lor li kouma enn zapot ouswa kouma frer Zezi, me li dir ki li “enn esklav Bondie ek Lesegner Zezi Kris.” (Zak 1:1) Let Zak montre ki parey kouma Zezi, Zak ti obzerv bien lanatir, ek fason ki bann dimounn konport zot. Pou explik bann verite ki sorti kot Bondie, Zak ti servi bann kitsoz ki ti ena dan lanatir, kouma par exanp, divan lor lamer, lekleraz lalinn ek bann zetwal, saler soley, frazilite bann fler, bann gran dife, ek bann zanimo ki’nn drese. (Zak 1:6, 11, 17; 3:5, 7) Bondie ti donn li sazes pou konpran fason ki bann dimounn panse ek azir. Anplis, sazes ek konsey ki ena dan liv Zak, ed nou pou ena bann bon relasion avek lezot.—Zak 1:19, 20; 3:2, 8-18.

Seki Pol inn ekrir dan 1 Korintien 9:5 fer nou konpran ki kitfwa Zak ti marye. Labib pa dir nou kan ek kouma Zak inn mor. Me selman Flavis Zozef, enn istorien zwif, ti ekrir ki inpe apre lamor Gouverner romin Porsis Festis, ver 62 N.L., ek avan ki Albinis vinn gouverner, gran pret Ananis (Ananias) “ti rasanble bann ziz Sanedrin ek ti amenn devan zot enn zom ki apel Zak, frer Zezi ki ti apel Lekris, ek lezot ankor.” Ek dapre Flavis Zozef, Ananis “ti dir ki sa bann zom-la ti fer enn krim kont lalwa ek ti donn lord ki avoy ros lor li pou touy li.”

a Get lankadre “Zak—‘Frer Lesegner.’”

b Avek sazes Zak ti koz lor seki Moiz ti ekrir. Parmi bann kitsoz ki Moiz ti ekrir, pa ti ena zis Lalwa me osi bann zistwar ki montre kouma Bondie ti azir avek bann dimounn, ek tousala ti montre ki volonte Bondie pou bann dimounn. Bondie ti fer tousala avan mem ki Lalwa Moiz existe. Par exanp, dan liv Zenez nou kapav trouv bien kouma Bondie konsider disan, ladilter, ek lidolatri. (Zen. 9:3, 4; 20:2-9; 35:2, 4) Alor, Zeova ti fini montre ki bann prinsip tou bann dimounn ti bizin obeir, ki li enn Zwif ouswa enn non-Zwif.

c Get lankadre “Kouma Komite Santral Organize Azordi?”

d Dan sertin tradiksion Labib, bann-la inn met enn fraz dan verse 34 ki dir ki Silas ti swazir pou res Antios. (Nouvo Testaman Dan Kreol Morisien) Me li paret ki’nn azout sa fraz-la apre ki’nn ekrir liv Zistwar Bann Zapot.