Gagne Reconfort ek Reconforte Lezot

Enn kitsoz ki aide nou beaucoup c’est reconfort ki nou gagné ar nou bann famille, nou bann camarade, ek nou bann frere ek soeur Chretien.

Nou kapav compare bann parole gentil ki enn camarade dire nou ar enn medecine ki gueri nou ek ki donne nou la force. (Prov. 16:24; 18:24; 25:11) Mais bann vrai Chretien pa pensé ki touletan c’est zot ki bizin gagne reconfort. Zot prend l’initiative pou “console bann ki dan tou sorte qualité probleme, grace a consolation ki [zot-mem zot] gagné ar Bondié.” (2 Cor. 1:4; Luc 6:31) Enn surveillant district dan Mexique ki appel Antonio ti faire sa l’experience-la.

Kan Antonio ti aprann ki li ti ena enn forme cancer di-sang ki appel lymphome, li ti bien tracassé. Malgré sa, li ti faire bann grand zeffort pou controle so bann sentiment negatif. Couma? Li ti essaye rappel bann cantik ek li ti chante zot fort pou li kapav tann bann parole ki li ti pé chanté ek medite lor la. Kan li ti prié fort ek aussi kan li ti lire la Bible, sa ti faire li gagne enn grand reconfort.

Selman, asterla Antonio reconette ki enn parmi bann pli grand l’aide ki li ti gagné, c’est l’aide so bann frere ek soeur Chretien. Li dire: “Kan mo madame ek moi nou ti bien tracassé, nou ti demann enn nou famille, ki enn ancien dan congregation, pou vini ek pou prié ensam avek nou. Sa ti reconforte nou ek nou ti senti-nou pli calme.” Li ajouté: “Grace a soutien nou famille ek nou bann frere ek soeur Chretien, bien vite nou ti kapav faire face ar sa bann sentiment negatif-la.” Li ti bien reconnaissant ki li ti ena bann bon camarade coumsa ek ki ti prend li bien compte!

Enn lot l’aide ki nou gagné dan bann moment difficile, c’est l’esprit saint. L’apotre Pierre ti dire ki l’esprit saint ki Bondié donné, li enn “don gratuit.” (Actes 2:38) Nou trouve sa kan beaucoup Chretien ti oint ar l’esprit saint jour la Pentecôte l’an 33 nou lepok. Mem si Pierre ti pé faire reference ar bann Chretien oint, nou tou nou kapav gagne l’esprit saint. Sa don-la jamais pa pou manké, alors kifer ou pa demann Bondié pou donne ou so l’esprit saint en abondance?​—Is. 40:28-31.

L’apotre Paul ti endure beaucoup l’epreuve, parfois li ti mem faire face ar la mort. (2 Cor. 1:8-10) Pourtant, la mort pa ti faire li peur. Paul ti gagne reconfort parski li ti koné ki Bondié ti pé soutenir li. Li ti ecrire: “Anou beni Bondié ek Papa nou Seigneur Jésus Christ, Papa ki ena beaucoup misericorde ek Bondié ki donne tou consolation, ki console nou dan tou nou bann probleme.” (2 Cor. 1:3, 4) Paul pa ti laisse bann probleme accablé li. Au contraire, bann difficulté ki li ti enduré ti aide li pou comprend sentiment lezot ek sa ti permette li reconforte zot pli bien kan zot ti bizin.

Apré ki li ti’nn trouve so guerison, Antonio ti recommence so service. Mem si avant, Antonio ti interesse-li regulierement ar so bann frere ek soeur, mais apré ki li’nn passe par sa situation-la, li ek so madame ti faire enn zeffort special pou rann visite ek pou encourage bann ki malade. Par exemple, apré ki li ti visite enn frere ki ti pé lutté kont enn maladie bien grave, Antonio ti aprann ki sa frere-la pa ti envie assisté reunion. Antonio expliké: “Sa pa ti vedir ki li pa ti content Jéhovah ou-soit so bann frere, mais so maladie ti tellement affecté so bann sentiment ki li ti senti-li inutile.”

Enn kitsoz ki Antonio ti faire pou encourage sa frere malade-la, li ti demann li pou faire la priere dan enn ti fête ki ti organisé. Mem si frere-la pa ti senti-li capable, li ti accepté. Antonio dire: “Li ti faire enn joli la priere, ek apré sa, li ti couma enn lot dimoune. Li ti recommence senti-li utile.”

Oui, nou tou nou finn bizin endure bann souffrance dan enn certain fason, ki li grand ou-soit tipti. Mais couma Paul ti dire, sa permette nou pou reconforte lezot pli bien kan zot bizin. Alors, anou montré ki nou sensible ar souffrance nou bann frere ek soeur. Si nou enn Chretien ki touletan pé reconforte lezot, lerla nou montré ki nou imite Jéhovah, nou Bondié.