LARTIK LETID 40
“Amenn enn Kantite Dimounn ver Lazistis”
“Bann ki amenn enn kantite dimounn ver lazistis pou briye parey kouma bann zetwal, pou touletan.”—DAN. 12:3.
KANTIK 151 Li Pou Kriye
REZIMEa
1. Ki kitsoz extraordiner pou arive pandan Regn Mil An Zezi Kris?
SA POU enn lepok extraordiner kan bann dimounn pou koumans resisite lor later, pandan Regn Mil An Zezi Kris! Sirman nou tou nou inpasian pou trouv bann dimounn ki nou kontan resisite, pa vre! Zeova osi anvi trouv zot. (Zob 14:15) Mazinn lazwa ki pou ena lor later kan nou pou retrouv bann dimounn ki nou kontan! Kouma nou ti trouve dan lartik avan, “bann bon,” setadir bann dimounn ki zot nom inn ekrir dan liv lavi, zot pou “resisite pou gagn lavi.” (Zist. 24:15; Zan 5:29, NW) Kitfwa boukou dimounn ki nou kontan pou resisite zis apre Armagedon.b Anplis, “bann move,” setadir bann dimounn ki pa’nn gagn lokazion pou konn Zeova ouswa pou servi Li avan zot lamor, zot pou “resisite pou enn zizman.”
2-3. (a) Ki kitsoz Izai 11:9, 10 dir lor pli gran travay lansegnman ki pou ena dan listwar? (b) Ki nou pou examine dan sa lartik-la?
2 Pou bizin ansegn tou bann dimounn ki pou resisite. (Iza. 26:9; 61:11) Alor, pou bizin fer pli gran travay lansegnman ki finn ena dan listwar. (Lir Izai 11:9, 10.c) Kifer? Pou koumanse, “bann move” ki pou resisite pou bizin aprann konsernan Zezi, Rwayom Bondie, ek laranson. Zot pou bizin aprann osi ki nom Zeova bien inportan ek kifer Li tousel ena drwa pou dirize. Mem “bann bon” pou bizin aprann seki Zeova tigit-tigit inn ansegn so bann serviter konsernan so proze pou later. Sertin parmi sa bann fidel serviter Zeova la ti fini mor avan ki’nn ekrir Labib. Alor, “bann bon” ek “bann move” toulede pou ena boukou kitsoz pou aprann.
3 Dan sa lartik-la, nou pou reponn sa bann kestion-la: Kouma pou fer sa gran travay lansegnman-la? Ki lefe sa travay lansegnman la pou ena lor bann nom ki dan liv lavi? Repons pou sa bann kestion-la bien inportan pou nou azordi. Dan sa lartik-la, nou pou get bann profesi extraordiner ki ena dan liv Daniel ek liv Revelasion. Sa pou ed nou pou konpran pli bien seki pou arive kan bann mor pou resisite. Pou koumanse, anou get profesi ki ena dan Daniel 12:1, 2.
“BANN KI PE DORMI DAN LAPOUSIER . . . POU LEVE”
4-5. Ki kitsoz Daniel 12:1 dir konsernan lepok lafin?
4 Lir Daniel 12:1.d Liv Daniel explik nou dan ki lord bann kitsoz pou arive dan lepok lafin. Par exanp, Daniel 12:1 dir nou ki Misel, setadir Zezi Kris, “pe debout an faver” pep Bondie. Sa finn koumanse an 1914 kan Zezi inn vinn Lerwa dan Rwayom Bondie.
5 Selman, Daniel dir osi ki Zezi ti pou “debout” pandan “enn lepok detres kouma zame finn ena depi ki enn nasion inn existe ziska sa lepok-la.” Sa lepok detres la se gran detres ki mansione dan Matie 24:21. Zezi pe debout, setadir li pe defann bann serviter Bondie, alafin sa lepok detres la, setadir Armagedon. Liv Revelasion dir ki sa bann serviter Zeova la, zot enn gran lafoul ki “travers gran detres.”—Rev. 7:9, 14, NW.
6. Ki pou arive apre ki gran lafoul travers gran detres? Explike. (Dan sa nimero-la, get “Kestion Bann Lekter” ki koz lor bann ki pou resisite lor later.)
6 Lir Daniel 12:2.e Ki pou arive apre ki gran lafoul travers sa lepok detres la? Dan lepase, nou ti panse ki sa profesi-la ti pe koz lor enn rezireksion spiritiel, ouswa sinbolik, ki ti pou arive dan bann dernie zour.f Me aster-la, nou’nn konpran ki sa profesi-la pe koz lor rezireksion ki pou arive dan lemond nouvo. Kifer nou dir sa? Parski dan Zob 17:16, nou retrouv sa lexpresion “lapousier” la ek li reprezant “Tom.” Savedir ki Daniel 12:2 pe koz lor rezireksion ki pou arive apre bann dernie zour ek Armagedon.
7. (a) Ki savedir resisite pou gagn “lavi pou touletan”? (b) Dan ki sans se “enn pli bon rezireksion”?
7 Kan Daniel 12:2 dir ki sertin pou resisite ek pou gagn “lavi pou touletan,” kouma nou bizin konpran sa verse-la? Savedir ki pandan Regn Mil An Zezi Kris, bann ki pou resisite ek ki pou kontign aprann konn Zeova ek Zezi, ek ki pou obeir zot, sa bann-la pou gagn lavi pou touletan. (Zan 17:3) Sa rezireksion-la pou “enn pli bon rezireksion” ki bann ki’nn resisite dan lepase. (Ebre 11:35; NW) Kifer? Parski sa bann dimounn ki ti resisite dan lepase la, avek letan zot ti re-mor.
8. Ki savedir resisite “pou gagn laont ek dezoner pou touletan”?
8 Me pa tou bann ki pou resisite ki pou aksepte lansegnman Zeova. Profesi Daniel dir ki sertin parmi bann ki pou resisite “pou gagn laont ek dezoner pou touletan.” Zot nom pa pou ekrir dan liv lavi ek zot pa pou gagn lavi eternel, parski zot pou rebel kont Zeova. Akoz sa, zot pou gagn “dezoner pou touletan,” setadir ki zot pou detrir net. Alor, Daniel 12:2 pe koz lor seki pou ariv tou bann dimounn ki’nn resisite, kan pou ziz zot dapre seki zot inn fer apre zot rezireksion.g (Rev. 20:12) Sertin pou gagn lavi eternel; lezot pou detrir net.
“AMENN ENN KANTITE DIMOUNN VER LAZISTIS”
9-10. Ki kitsoz ankor pou arive apre gran detres, ek kisannla “pou briye parey kouma lesiel”?
9 Lir Daniel 12:3.h Ki kitsoz ankor pou arive apre sa “lepok detres” la? Daniel 12:3 koz lor enn kitsoz ki pou arive apre gran detres.
10 Kisannla “pou briye parey kouma lesiel”? Matie 13:43 ed nou pou kone kisannla zot ete. Sa verse-la dir: “Lerla, bann ki finn res fidel pou briye kouma lalimier soley dan rwayom zot Papa.” Dan bann verse avan, Zezi dir ki se “bann zanfan Rwayom Bondie,” setadir bann Kretien ki ena lesperans pou al dan lesiel ek ki pou regn ansam avek li. (Mat. 13:38) Alor, nou konpran ki Daniel 12:3 pe koz lor bann Kretien ki ena lesperans pou al dan lesiel ek lor travay ki zot pou fer pandan Regn Mil An Zezi Kris.
Bann 144,000 pou travay ansam ar Zezi pou diriz travay lansegnman ki pou ena pandan Regn Mil An (Get paragraf 11)
11-12. Ki travay bann 144,000 pou fer pandan Regn Mil An Zezi Kris?
11 Kouma bann Kretien ki ena lesperans pou al dan lesiel pou “amenn enn kantite dimounn ver lazistis”? Sa bann Kretien-la pou travay ansam avek Zezi, pou diriz travay lansegnman ki pou fer lor later pandan Regn Mil An. Bann 144,000 pa pou zis regne kouma bann lerwa, me zot pou osi servi kouma bann pret. (Rev. 1:6; 5:10; 20:6) Lerla, zot pou ede pou “geri lepep,” setadir pou fer bann dimounn vinn parfe. (Rev. 22:1, 2; Eze. 47:12) Sa pou enn lepok bien zwaye pou bann 144,000!
12 Kisannla pou form parti sa “kantite dimounn” ki pou vinn ver lazistis la? Parmi zot pou ena bann ki’nn travers Armagedon, bann ki’nn resisite, ek bann zanfan ki kitfwa pou ne dan lemond nouvo. Alafin Regn Mil An, tou dimounn ki pou lor later pou parfe. Me kan eski zot nom pou ekrir dan enn fason permanan dan liv lavi?
LEPREV FINAL
13-14. Ki kitsoz tou bann dimounn lor later pou bizin fer pou ki zot kapav viv pou touletan?
13 Fode pa nou bliye ki, mem si enn kikenn li parfe, sa pa vedir ki li pou viv pou touletan. Mazinn lexanp Adan ek Ev. Zot ti parfe, me zot ti bizin kontign obeir Zeova pou ki zot kapav viv pou touletan. Me malerezman, zot ti dezobeir Zeova.—Rom. 5:12.
14 Apre Regn Mil An, ki pou ariv bann dimounn ki pou lor later? Zot tou pou fini vinn parfe. Me eski zot pou kontign aksepte Zeova kouma zot Dirizan? Ouswa eski sertin pou fer parey kouma Adan ek Ev, setadir pou dezobeir Zeova mem si zot parfe? Anou reponn sa bann kestion-la.
15-16. (a) Kan eski tou bann dimounn lor later pou gagn lokazion pou montre ki zot anvi res fidel anver Zeova? (b) Ki pou arive alafin leprev final?
15 Satan pou anprizone pandan 1,000 an. Pandan sa moman-la, li pa pou kapav inflians personn. Selman, alafin sa 1,000 an-la, kan tou dimounn pou fini vinn parfe, Satan pou libere ek li pou esey inflians zot. Pandan sa leprev-la, tou dimounn lor later pou gagn lokazion pou montre ki zot anvi soutenir Zeova ek so drwa pou dirize. (Rev. 20:7-10) Se par fason ki bann dimounn pou reazir dan sa moman-la, ki pou kone si zot nom pou ekrir dan liv lavi dan enn fason permanan.
16 Labib dir nou ki pou ena sertin dimounn, ki parey kouma Adan ek Ev, pa pou aksepte Zeova kouma zot Dirizan. Ki pou ariv sa bann dimounn-la? Revelasion 20:15 dir: “Dimoun ki so nom pa ti ekrir dan liv lavi, ti zet li dan basin dife.” Savedir ki zot pou detrir net. Me laplipar bann dimounn pou reisi pas sa leprev final la. Lerla, zot nom pou ekrir dan enn fason permanan dan liv lavi.
PANDAN “LEPOK LAFIN”
17. Ki kitsoz enn anz ti dir Daniel konsernan nou lepok? (Daniel 12:4, 8-10)
17 Li extraordiner ki nou kone seki pou arive dan lavenir, pa vre! Anplis, enn anz ti donn Daniel bann linformasion inportan konsernan seki ti pou arive dan nou lepok, setadir dan “lepok lafin.” (Lir Daniel 12:4, 8-10;i 2 Tim. 3:1-5) Sa anz-la ti dir Daniel: “Vre konesans pou an-abondans.” Sa bann parol-la bien vre, parski pep Zeova pe konpran pli bien bann profesi ki ena dan liv Daniel. Anz-la ti dir osi ki, dan lepok lafin, “bann move dimounn pou fer seki move, ek okenn move dimounn pa pou konpran.”
18. Ki pou ariv bann dimounn ki pa obeir Zeova?
18 Azordi, nou kapav ena linpresion ki bann move dimounn pe prospere. (Mal. 3:14, 15) Me biento, Zezi pou ziz zot kan li pou separ bann kabri ek bann mouton. (Mat. 25:31-33) Bann dimounn ki pa obeir Zeova, zot pa pou travers Armagedon ek zot pa pou resisite dan lemond nouvo. Zot nom pa pou dan “liv souvenir” ki mansione dan Malaki 3:16.
19. Ki nou bizin fer depi aster-la mem, ek kifer? (Malaki 3:16-18)
19 Azordi, inn ler pou nou montre Zeova ki nou anvi res fidel anver li. (Lir Malaki 3:16-18.) Zeova pe rasanble bann dimounn ki ena valer pou Li ek Li konsider zot kouma “enn dibien spesial.” Nou bien anvi parmi zot, pa vre!
Nou pou bien kontan pou trouv Daniel ek bann dimounn ki nou kontan, resisite dan lemond nouvo! (Get paragraf 20)
20. Ki promes Zeova ti fer ar Daniel, ek kifer to pe atann sa promes-la realize?
20 Nou pe viv enn lepok extraordiner! Me ena bann kitsoz ki pli zoli, ki pe atann nou dan lavenir. Biento, bann move dimounn pou detrir net. Apre sa, nou pou trouv promes ki Zeova ti fer ar Daniel realize: “To pou leve pou gagn to par kan lafin bann zour vini.” (Dan. 12:13) Eski to anvi trouv Daniel ek bann dimounn ki to kontan resisite? Si wi, fer to maximum pou to res fidel anver Zeova. Lerla, to kapav sir ki to nom pou res dan liv lavi.
KANTIK 80 ‘Goute, Gete Ki Zeova Li Bien Bon’
a Dan sa lartik-la, nou’nn sanz fason ki nou ti konpran Daniel 12:2, 3, ki koz lor enn gran travay lansegnman ki pou ena dan listwar. Nou pou gete kan sa pou arive ek kisannla ki pou partisip ladan. Nou pou gete osi kouma sa travay lansegnman-la pou prepar bann dimounn ki lor later, pou leprev final ki pou ena alafin Regn Mil An Zezi Kris.
b Kitfwa bann premie dimounn ki pou resisite se bann fidel serviter Zeova ki’nn mor pandan bann dernie zour, ek apre sa bann dimounn ki’nn mor avan zot, pou resisite enn zenerasion apre lot. Si sa pas koumsa, sak zenerasion pou gagn lokazion pou retrouv bann dimounn ki zot inn kone. Me ninport kouma sa pase, Labib dir ki bann ki pou al dan lesiel, zot pou resisite dan enn “lord.” Alor, kitfwa pou ena enn lord osi pou bann ki pou resisite lor later.—1 Kor. 14:33; 15:23, NW.
c Izai 11:9, 10: “9 Personn pa pou fer okenn ditor ni okenn ravaz dan tou mo montagn ki sin, parski vremem later pou ranpli avek konesans Zeova, parey kouma delo kouver lamer. 10 Sa zour-la, rasinn Zese pou leve kouma enn sign pou bann pep. Bann nasion pou tourn ver li pou ki li gid zot, ek plas kot li repoze pou ranpli ar laglwar.”
d Daniel 12:1: “Pandan sa lepok-la, Misel pou leve, sa gran prins ki pe debout an faver to pep la. Ek pou ena enn lepok detres kouma zame finn ena depi ki enn nasion inn existe ziska sa lepok-la. Ek dan sa lepok-la, to pep pou sape, tou bann ki ena zot nom ekrir dan liv-la.”
e Daniel 12:2: “Ek boukou parmi bann ki pe dormi dan lapousier later pou leve, sertin pou gagn lavi pou touletan ek lezot pou gagn laont ek dezoner pou touletan.”
f Sa lexplikasion-la sanz fason ki nou ti konpran ek explik sa verse-la dan liv Prêtons attention à la prophétie de Daniel ! sapit 17, ek dan Latour Degard 1e Ziliet 1987 p. 21-25, an Franse.
g Parkont, lexpresion “bon” ek “move” ki trouv dan Zistwar Bann Apot 24:15, ek lexpresion “bann dimounn ki finn fer bann bon kitsoz” ek “bann ki finn fer lemal,” ki trouv dan Zan 5:29, pe met laksan lor bann aksion ki bann resisite inn fer avan zot lamor.
h Daniel 12:3: “Bann ki ena disernman pou briye parey kouma lesiel, ek bann ki amenn enn kantite dimounn ver lazistis pou briye parey kouma bann zetwal, pou touletan.”
i Daniel 12:4, 8-10: “4 Me twa, Daniel, gard sa bann parol-la sekre ek met enn sele lor sa liv-la ziska lepok lafin. Boukou pou rod parsi-parla, ek vre konesans pou an-abondans. 8 Me mwa, mo ti tande, me mo pa ti arive konpran; alor mo ti dir: ‘A! mo segner, kouma tousala pou fini?’ 9 Lerla, li ti dir mwa: ‘Ale, Daniel, parski sa bann parol-la pou bizin res sekre ek sele ziska lepok lafin. 10 Boukou dimounn pou pirifie zotmem. Zot pou fer seki drwat ek zot pou ena enn lavi ki prop net. Bann move dimounn pou fer seki move, ek okenn move dimounn pa pou konpran; me bann ki ena disernman pou konpran.’”