Ed Lezot pu Aksepte Mesaz lor Rwayom Bondye

“Agripa ti dir Pol: ‘Ankor enn tipe, to pu konvink mwa pu vinn enn Kretyin.’”—AKT 26:28.

1, 2. Kuma lapot Pol finn arive retruv li devan Guverner Festus ek le Rwa Erod Agripa II?

AN L’AN 58 N.L., dan lavil Sezare, Guverner Romin Porcius Festus ti gayn vizit le Rwa Erod Agripa II ek so ser, Berenis. Lor linvitasyon Guverner Festus, ‘zot ti rant dan lasal lodyans avek enn seremoni grandyoz, ansam avek bann komandan larme ek bann zom byin inportan dan lavil.’ Festus ti donn lord pu amenn lapot Pol devan zot. Me kuma sa disip Zezi Kris-la, finn arive retruv li devan Guverner Festus?—Akt 25:13-23.

² Nu gayn enn repons pu sa kestyon-la dan seki Festus ti dir so bann invite. Li ti dir zot: “Le Rwa Agripa, ek zot tu ki prezan parmi nu, zot truv sa zom-la? Tu bann Zwif ki dan Zerizalem ek ki isi, inn demann mwa pu egzaminn so ka, ek zot inn kriye ki fode pa li kontiyn viv. Me mo’nn konpran ki li pa’nn fer nanyin ki merit la mor. Alor, kan li’nn fer apel ar So Mazeste (Sezar), mo’nn deside pu avoy li. Me mo pena okenn kitsoz sir pu ekrir mo Senyer lor sa zom-la. Akoz sa, mo’nn amenn li devan zot, ek sirtu devan twa le Rwa Agripa, pu ki kumsa, kan fini kestyonn li, mo pu ena kitsoz pu ekrir. Parski mo pa truv sa lozik pu avoy enn prizonye san indike ki sarz ena lor li.”—Akt 25:24-27.

 3. Kifer bann sef relizye ti met bann fos sarz lor Pol?

³ Bann parol Festus montre ki Pol ti viktim bann fos akizasyon ki so bann lennmi ti’nn invante kont li. Zot ti pretann ki swadizan li ti pe prepar enn rebelyon kont guvernman—enn sarz ki ti merit la mor. (Akt 25:11) Me, Pol ti inosan. Anrealite, bann sef relizye dan Zerizalem ti zalu li, se akoz sa ki zot ti met bann fos sarz lor li. Zot ti kont predikasyon ki Pol ti fer ek zot pa ti apresye ditu ki li ed lezot pu vinn bann disip Zezi Kris. Enn gran kantite solda ti eskort Pol depi Zerizalem ziska por Sezare, kot li ti fer apel ar Sezar. Depi sa por-la, bannla ti pu amenn li Rom.

 4. Ki deklarasyon etonan le Rwa Agripa ti fer?

⁴ Imazinn Pol dan pale guverner devan enn grup dimunn, ek sirtu an prezans dirizan enn parti inportan dan Lanpir Romin. Le Rwa Agripa turn ver Pol, li dir: “To kapav koze.” Amezir ki Pol pe koze, enn kitsoz extraordiner arive. Bann parol Pol kumans ena enn lefe lor sa le rwa-la, sibyin ki le Rwa Agripa dir li: “Ankor enn tipe, to pu konvink mwa pu vinn enn Kretyin.”—Akt 26:1-28.

 5. Kifer bann parol ki Pol ti dir Agripa, ti byin efikas?

⁵ Pans sa enn ku! Grasa bon defans ki Pol inn prezante, enn le rwa finn tuse par puvwar Parol Bondye. (Ebre 4:12) Ki Pol finn kapav dir kumsa pu rann so defans efikas? Ki nu kapav aprann ar Pol, an rapor avek nu laktivite pu fer bann disip? Si nu analiz defans ki Pol ti prezante, nu pu not de pwin byin inportan: (1) Pol ti konn konvink bann dimunn dan so prezantasyon. (2) Li ti konn servi konesans ki li ti ena lor Parol Bondye, parey kuma enn artizan kalifye byin konn servi enn zuti.

Servi Kapasite pu Konvink Lezot

6, 7. (a) Ki mo “konvink” vedir dan Labib? (b) Ki rol kapasite pu konvink lezot, zwe, kan nu ed bann dimunn pu aksepte enn lanseynman Biblik?

⁶ Dan liv Akt, suvan servi bann term Grek pu ‘konvink’ an rapor avek laktivite Pol. Ki sinifikasyon sa mo-la ena an seki konsern nu laktivite pu fer bann disip?

⁷ Dan langaz orizinal Lekritir Grek Kretyenn, “konvink” vedir “fer enn kikenn aksepte enn lopinyon” uswa “fer enn kikenn sanz lide, apre ki’nn rezonn avek li uswa finn konsider [avek li] bann prinsip moral.” (Dictionnaire interprétatif des mots du Nouveau Testament an Angle, par W. Vine) Kan nu egzaminn sinifikasyon prinsipal sa mo-la, nu gayn ankor plis eklersisman; nu aprann ki li ena enn lyin avek konfyans. Donk, si u konvink enn dimunn pu aksepte enn lanseynman ki sorti dan Labib, u finn gayn so konfyans, sibyin ki li aksepte ki sa lanseynman-la vre. Byinsir, pu fer enn dimunn krwar dan Labib ek aplik sa dan so lavi, li pa sifi ki nu zis dir li seki’nn ekrir ladan. Ki dimunn-la li enn zanfan, enn vwazin, enn koleg travay, enn kamarad lekol uswa enn fami, li bizin ena konviksyon ki seki u pe dir, li vre.—2 Timote 3:14, 15.

 8. Pu konvink enn dimunn pu aksepte enn verite Biblik, ki sa inplike?

⁸ Kuma u kapav konvink enn dimunn ki seki u pe montre li dan Labib, se la verite? Pol ti fer tu seki li kapav pu sanz lopinyon bann dimunn ki ti pe ekut li. Li ti servi enn rezonnman lozik, bann largiman solid, ek li ti koz avek sinserite.a Donk, olye zis dir ki enn kitsoz vre, u bizin usi donn bann prev pu sutenir seki u pe dir. Kuma u kapav fer sa? Asir u ki seki u pe dir, baze antyerman lor Parol Bondye, ek non pa lor u lopinyon personel. Apiy u bann panse Biblik par bann lezot prev. (Proverb 16:23) Par egzanp, si u pe montre ki bann dimunn obeisan pu viv dan enn paradi lor later, apiy sa lide-la par enn pasaz Labib kuma Lik 23:43 uswa Izai 65:21-25. Ki bann prev ankor u kapav avanse pu sutenir u panse Biblik? U kapav servi bann legzanp ki dimunn-la kone. U kapav rapel li bann ti kitsoz sinp ki rann lavi agreab, ek ki dayer pa kut nu nanyin, par egzanp, enn zoli kuse soley, bon parfin enn fler, bon gu enn frwi, ubyin lazwa pu truv enn zwazo nuri so tipti. Ed dimunn-la pu konpran ki tusala pruve ki nu Kreater anvi ki nu profit lavi lor later.—Eklezyast 3:11, 12.

 9. Kuma nu kapav montre nu rezonab kan nu pres avek bann dimunn?

⁹ Kan u esey konvink enn dimunn pu aksepte enn lanseynman Biblik, fer atansyon ki u lantuzyas pa fer seki u dir paret derezonab. Sinon lerla, li riske rezet u mesaz. Liv École du ministère averti nu: “Si nu dir enn dimunn, dan enn fason tro direk, ki enn krwayans avek ki li byin atase, fos, an zeneral li pa pu pran sa byin, mem si nu resit plizir tex Labib pu apiy seki nu pe dir. Par egzanp, si nu dir kri-kri ki bann fet byin popiler, zot bann fet payin, kitfwa sa pa pu sanz seki bann dimunn panse zot, lor sa bann fet-la. Donk, nu pu pli efikas si nu rezonn avek zot.” Kifer nu bizin fer zefor pu rezonn avek bann dimunn dan enn fason rezonab? Liv-la dir: “Kan nu rezonn avek bann dimunn, sa ankuraz zot pu exprim seki zot panse. Sa donn zot enn kitsoz lor ki zot kapav reflesi plitar, ek sa les enn laport uver pu lezot konversasyon ankor. Sa fason fer-la, kapav konvink bann dimunn pli byin.”—Kolosyin 4:6.

Konvink Dimunn dan enn Fason Ki Tus Zot Leker

10. Dan ki fason Pol ti kumans prezant so defans devan Agripa?

¹⁰ Asterla, anu egzaminn an detay bann parol ki Pol ti dir pu so defans, mansyone dan Akt sapit 26. Remarke kuma li ti kumans so diskur. Dan so lintrodiksyon, li ti truv enn rezon valab pu felisit Agripa, mem si sa le Rwa-la ti ena enn relasyon imoral avek so ser, Berenis. Pol ti dir li: “Konsernan tu bann kitsoz ki bann Zwif pe akiz mwa, le Rwa Agripa, mo kontan ki se devan twa ki mo pe prezant mo defans zordi, sirtu ki to konn byin tu bann kutim ek bann diferans lopinyon ki ena parmi bann Zwif. Donk, mo sipliy twa pu ekut mwa avek pasyans.”—Akt 26:2, 3.

11. Kuma par so parol, Pol ti montre so respe anver le Rwa Agripa, ek ki bon rezilta sa finn done?

¹¹ Eski u’nn remarke ki Pol ti rekonet gran pozisyon Agripa? Li ti apel li par so tit, le Rwa. Sa ti enn siyn respe, ek Pol ti usi onor Agripa par bann parol ki li ti byin swazir. (1 Pyer 2:17) Pol ti rekonet ki Agripa ti konn byin bann kutim ek lalwa bann Zwif, lor ki li ti pe reyne. Ek li ti dir usi ki li kontan ki se devan enn dirizan byin informe kumsa, ki li ti pe prezant so defans. Se pa parski li ti enn Kretyin, ki Pol ti azir kumadir li ti pli siperyer ki Agripa. (Filipyin 2:3) Plito, Pol ti sipliy Agripa pu ekut li avek pasyans. Dan sa fason-la, Pol ti kre enn latmosfer pu ki Agripa ek tu seki ti pe ekut li, aksepte pli fasilman seki li ti ena pu dir. Li ti prepar terin pu ki li kapav prezant so bann largiman.

12. Kuma eski nu kapav esey tus leker bann dimunn dan predikasyon?

¹² Kan nu al prese, anu swiv legzanp Pol kan li ti devan Agripa. Depi kumansman ziska la fin nu prezantasyon, anu esey tus leker bann dimunn. Nu kapav fer sa kan nu respekte sinserman dimunn-la, ek kan nu montre ki nu interese vremem ar so kiltir, so lanvironnman ek so fason panse.—1 Korintyin 9:20-23.

Servi Parol Bondye dan enn Fason Efikas

13. Kuma u kapav motiv bann dimunn ki ekut u, parey kuma Pol ti fer?

¹³ Pol ti anvi motiv bann dimunn pu zot azir an akor avek la bonn nuvel. (1 Tesalonisyin 1:5-7) Pu fer sa, li ti esey tus zot leker sinbolik ki lasurs tu motivasyon. Kan nu re-egzaminn defans ki Pol ti prezante devan Agripa, nu remarke kuma li ti ‘servi Parol Bondye kuma bizin,’ kan li ti fer referans ar bann kitsoz ki Moiz ek bann profet ti deklare.—2 Timote 2:15.

14. Explike kuma Pol ti servi so kapasite pu esey konvink Agripa.

¹⁴ Pol ti kone ki Agripa ti enn Zwif de non. Alor, Pol inn baz li lor konesans ki Agripa ti ena lor la relizyon Zwif, pu rezonn avek li. Li ti dir ki li pa pe pres nanyin, ‘eksepte bann kitsoz ki bann Profet ek Moiz ti deklare pu bizin arive’ konsernan la mor ek rezireksyon Mesi. (Akt 26:22, 23) Lerla, Pol ti adres li direkteman ar Agripa, li ti demann li: “Le Rwa Agripa, eski to krwar bann Profet?” Agripa ti nepli kone ki pu reponn. Si li ti dir ki li pa krwar bann profet, li ti pu perdi so repitasyon antan ki enn krwayan Zwif. Me asterla, si li ti aksepte rezonnman Pol, li ti pu montre an piblik ki li pe pran so par, ek li ti pu riske lerla pas pu enn Kretyin. Ebyin lerla, avek sazes, Pol limem ti reponn so prop kestyon, li ti dir: “Mo kone to krwar.” Ki Agripa ti reponn? So leker ti pus li pu dir: “Ankor enn tipe, to pu konvink mwa pu vinn enn Kretyin.” (Akt 26:27, 28) Mem si Agripa pa ti vinn enn Kretyin, pena dut ki dan enn sertenn degre, mesaz Pol ti’nn tus so leker.—Ebre 4:12.

15. Kuma Pol ti reysi etabli enn kongregasyon dan lavil Tesalonik?

¹⁵ Eski u remarke ki Pol ti fer de kitsoz kan li ti prezant la bonn nuvel? Li ti prese ek li ti usi konvink bann dimunn. Pol ti anplway sa teknik-la amezir ki li ti ‘servi Parol Bondye kuma bizin.’ Rezilta: sertin ki ti pe zis ekut li, ti kumans krwar. Se seki ti arive dan enn sinagog dan lavil Tesalonik, kan Pol ti adres li ar enn grup Zwif ek non-Zwif ki ti ena la krint pu Bondye. An Akt 17:2-4, Labib dir: “Kuma li ti abitye fer, Pol ti rant kot zot, ek pandan trwa saba, li ti rezonn avek zot lor bann Lekritir. Li ti sit bann pasaz pu explike ek pruve ki li ti neseser ki Kris sufer ek resisite parmi bann mor . . . Lerla, sertin parmi zot ti vinn krwayan.” Pol ti konn konvink bann dimunn. Avek led Lekritir, li ti rezonn avek zot, li ti explike ek pruve ki Zezi, limem Mesi ki ti’nn promet depi lontan. Ki rezilta sa finn done? Enn kongregasyon bann krwayan fi’nn etabli.

16. Kuma u kapav truv plis lazwa kan u pres Rwayom Bondye?

¹⁶ Eski u kapav amelyor u kapasite pu konvink dimunn kan u explik zot Parol Bondye? Si wi, u pu retir plis lazwa ek satisfaksyon kan u prese ek anseyn bann dimunn lor Rwayom Bondye. Se lexperyans ki bann proklamater inn fer kan zot inn aplik bann sigzesyon pu servi Labib pli suvan dan predikasyon.

17. Pu montre profi ki ena kan servi Labib dan nu minister, rakont enn lexperyans ki u’nn fer personelman, uswa sit seki ena dan paragraf.

¹⁷ Par egzanp, enn sirveyan sirkonskripsyon ti ekrir: “Asterla, enn bon kantite frer ek ser sarye zot Labib dan lamin kan zot pres lakaz-lakaz. Sa inn permet zot lir enn pasaz Labib ar buku dimunn ki zot inn zwenn. Sa finn ed bann dimunn ek bann proklamater-la usi pu asosye nu minister avek Labib, ek pa zis avek bann peryodik ek bann liv ki nu plase.” Byinsir, nu bizin pran an konsiderasyon bann kutim lokal avan ki nu desid sarye Labib dan nu lamin dan predikasyon. Me selman, nu anvi ki dimunn konn nu kuma bann ki konn servi Parol Bondye kuma bizin pu fer dimunn aksepte mesaz lor Rwayom Bondye.

Anu Ena Mem Latitid Ki Zeova lor Nu Minister

18, 19. (a) Kuma Bondye konsider nu minister, ek kifer nu bizin devlop mem latitid ki Li? (b) Ki pu ed nu pu gayn bann bon rezilta kan nu fer vizit? (Get lankadre “Kuma Nu Kapav Gayn Bann Bon Rezilta kan Nu Fer Vizit,” dan paz 14.)

¹⁸ Enn lot fason pu tus leker bann dimunn ki ekut nu, se kan nu ena mem latitid ki Zeova lor nu minister ek kan nu ena pasyans. Bondye anvi ki tut sort kalite dimunn “gayn enn konesans egzak lor la verite.” (1 Timote 2:3, 4) Eski se pa usi nu dezir? Zeova ena pasyans usi, ek so pasyans donn posibilite buku dimunn pu gayn lokazyon repanti. (2 Pyer 3:9) Donk, kan nu zwenn enn dimunn ki dispoze pu ekut nu mesaz, li posib ki nu bizin returne plizir fwa pu nu kapav devlop so lintere. Sa demann letan ek pasyans pu truv bann la grin la verite puse. (1 Korintyin 3:6) Dan sa lartik-la ena enn lankadre, “Kuma Nu Kapav Gayn Bann Bon Rezilta kan Nu Fer Vizit.” U pu truv bann bon sigzesyon ladan pu devlop lintere bann dimunn. Rapel enn kitsoz, lavi bann dimunn—zot problem ek zot sityasyon—pe tuletan sanze. Kitfwa nu pu bizin vizit zot plizir fwa pu reysi zwenn zot, me li vo lapenn fer sa zefor-la. Nu anvi donn zot lokazyon pu tann mesaz lor delivrans ki Bondye pu amene. Alor, priye Zeova pu u gayn la sazes pu amelyor u kapasite pu konvink dimunn, amezir ki u ed zot pu aksepte mesaz lor Rwayom Bondye.

¹⁹ Kan nu’nn reysi zwenn enn dimunn ki anvi konn plis lor Rwayom Bondye, ki nu kapav fer ankor antan ki bann travayer Kretyin? Nu pu gayn lezot konsey dan prosin lartik.

[Notes]

Eski U Rapel?

• Kifer defans ki Pol ti fer devan le Rwa Agripa, ti efikas?

• Kuma nu mesaz kapav tus leker bann dimunn?

• Ki pu ed nu servi Parol Bondye dan enn fason efikas, pu tus leker bann dimunn?

• Kuma nu kapav ena mem latitid ki Bondye lor nu minister?

[L’encadré page 14]

Kuma Nu Kapav Gayn Bann Bon Rezilta kan Nu Fer Vizit

• Montre enn lintere sinser pu bann dimunn.

• Swazir enn size interesan dan Labib, pu diskit avek li.

• Sak fwa, prepar terin pu enn prosenn vizit.

• Kontiyn pans dimunn-la, apre ki u’nn kit li.

• Pa tarde pu returne pu u kapav kontiyn devlop lintere dimunn-la; si posib returne dan enn uswa de zur.

• Rapel u lobzektif: se pu kumans enn letid Labib.

• Priye Zeova pu Li fer lintere dimunn-la grandi.

[Zimage page 15]

Kan li ti devan Guverner Festus ek le Rwa Agripa, Pol ti servi so kapasite pu konvink dimunn