Fodé voir pou croire

“Enn agnostique, c’est enn dimoune ki croire ki li impossible pou konn la verité lor bann sujet couma Bondié ek la vie dan l’avenir, bann sujet ki interesse religion chretien ek lezot religion. Ou-soit, si li pa impossible pou touletan, en tou cas li impossible asterla.”—PHILOSOPHE BERTRAND RUSSELL, 1953.

C’EST Thomas Huxley ki ti invente mot “agnostique.” Li ti enn scientifik ki ti etudié bann zanimo. Huxley ti né en 1825, li ti vive mem lepok ki Charles Darwin ek li ti defann l’enseignement l’evolution. En 1863, Huxley ti ecrire ki li pa ti kapav trouve okenn preuve ki ena enn Bondié ki “content nou ek ki interessé ar nou pareil couma religion chretien dire.”

Zordi beaucoup dimoune pou d’accord avek fason pensé sa bann zom ki’nn ena enn grand l’influence-la—zot dire ki zot pou croire zis dan seki zot kapav trouvé. Kitfois zot dire ki li bien bete pou croire dan enn kikenn ou-soit dan enn kitsoz sans ki nou ena okenn preuve.

Eski la Bible demann nou croire dan Bondié sans ki nou ena okenn preuve ki Li existé? Non. Au contraire, la Bible montré nou ki li bete pou croire dan bann kitsoz ki bann dimoune dire sans ki nou ena okenn preuve. Li dire: “Enn kikenn ki mank l’experience, croire tou seki li tendé, mais enn dimoune ki ena enn bon jugement, faire attention kot li mette so lipié.”—Proverbes 14:15.

Alors, ki nou kapav dire concernant croyance dan Bondié? Eski nou vrai-mem ena kit preuve ki Bondié existé, ek ki en plus, Li content nou ek Li interessé ar nou?

Bondié faire nou trouve so bann qualité

Alors ki li ti pé koz avek enn groupe habitant la ville Athènes ki ti bien eduqué, ecrivain la Bible, Paul, ti dire ki Bondié “finn faire le monde ek tou bann kitsoz ki ena ladan.” Li ti dire sa groupe ki ti ena doute-la ki Bondié interessé ar bann dimoune ek ki, en realité, “Li pa loin ar sakenn parmi nou.”—Actes 17:24-27.

Kifer Paul ti sur ki Bondié existé ek ki Li interessé avek bann dimoune ki Li’nn crée? Paul ti faire konn enn raison kan li ti ecrire so bann compagnon chretien ki ti reste dan la ville Rome. Li ti dire concernant Bondié: “Nou trouve so bann qualité invisible dan enn fason clair depuis creation le monde, parski nou kapav trouve zot a travers bann kitsoz ki Li’nn faire.”—Romains 1:20.

Dan bann prochain lartik nou pou guette trois qualité ki Bondié ena ek ki nou trouve dan enn fason clair a travers bann kitsoz ki Li’nn crée. A mesure ki ou examine sa bann l’exemple-la, demann-ou: ‘Ki l’effet seki mo aprann concernant sa bann qualité-la, ena lor moi?’

[L’encadré lor page 3]

La Bible pa demann nou croire dan Bondié sans ki nou ena okenn preuve ki Li existé