Kifer Nou Linz ek Nou Stil Inportan?

Nou tou nou ena diferan gou konsernan nou labiyman ek nou stil. Me ena bann prinsip Labib ki kapav ed nou pou bien swazir seki nou anvi mete ek anmemtan fer Zeova kontan. Anou get sertin parmi sa bann prinsip-la.

1. Ki bann prinsip kapav ed nou pou swazir nou linz ek nou stil?

Nou bizin swazir enn ‘teni korek, avek respe ek sinplisite,’ ek nou bizin touletan prop pou montre ki nou “respekte Bondie.” (1 Timote 2:9, 10) Anou get sa kat prinsip-la: (1) Nou linz bizin “korek.” Sirman ou finn remarke dan nou bann renion ki pep Zeova ena diferan gou. Me nou fason abiye ek kwafe montre ki nou respekte Bondie ki nou adore. (2) Abiy “avek respe” vedir ki nou pa pou abiy dan enn fason sexi, ouswa ki atir tro boukou latansion lor noumem. (3) Nou abiy avek “sinplisite” kan nou pa swiv tou lamod konsernan linz ek seve. (4) Stil ki nou swazir bizin touletan montre ki nou “respekte Bondie,” ek sa pou montre lezot ki nou ador vre Bondie.​—1 Korintien 10:31.

2. Ki lefe nou stil kapav ena lor bann frer ek ser?

Li vre ki nou lib pou swazir seki nou anvi mete, me nou bizin reflesi lor lefe ki sa kapav ena lor lezot. Nou bizin fer nou maximum pou pa ofans personn, me “fer [nou] prosin plezir pou so prop bien, pouki li progrese dan lafwa.”​—Lir Romin 15:1, 2.

3. Kouma nou stil kapav fer lezot anvi aprann konn Zeova?

Nou bizin fer zefor pou touletan abiy bien, me selman nou bizin fer plis atansion kan nou asiste bann renion ek kan nou prese. Nou pa anvi ki akoz nou stil bann dimounn pa konsantre lor mesaz inportan ki nou pe anons zot. Okontrer, nou stil kapav fer lezot anvi aprann konn plis lor laverite ek “onor lansegnman Bondie nou Sover.”​—Tit 2:10.

ANOU GET INPE PLIS

4. Nou stil montre respe ki nou ena pou Zeova

Kifer li bien inportan ki nou vey bien lor nou stil? Lir Psom 47:2, ek apre sa, get sa bann kestion-la ansam:

• Parski nou reprezant Zeova, kouma sa kapav ed nou pou pran bann bon desizion konsernan linz ki nou mete?

• Eski ou panse ki li vremem inportan ki nou vey bien lor nou stil kan nou asiste bann renion ek prese? Kifer ou pans koumsa?

5. Kouma nou kapav fer bann bon swa konsernan nou linz ek nou stil?

Zwe VIDEO-la.

VIDEO: ‘Fer Tou pou Laglwar Bondie’ (10:18)

Ki nou linz ser ouswa bomarse, li bizin prop ek adapte avek seki nou pe fer. Lir 1 Korintien 10:24 ek 1 Timote 2:9, 10. Apre sa, get ansam kifer nou bizin evit met bann linz ki . . .

• sifone, sal, ouswa ki tro dekontrakte.

• kole, transparan, dekolte, ouswa tro sexi.

Mem si bann Kretien nepli swiv Lalwa Moiz, zot kapav aprann boukou lor seki Zeova panse gras-a seki ena dan sa Lalwa-la. Lir Deteronom 22:5, ek apre sa, get sa kestion-la ansam:

• Kifer bann madam bizin evit ena mem stil ki bann zom, ek bann zom bizin evit ena mem stil ki bann madam?

Lir 1 Korintien 10:32, 33 ek 1 Zan 2:15, 16, ek apre sa, get sa bann kestion-la ansam:

• Kifer nou bizin veye ki nou stil pa sok sertin dimounn dan nou landrwa ouswa sertin frer ek ser dan nou lasanble?

• Ki bann stil ki popiler dan ou landrwa?

• Eski ou panse ki sertin sa bann stil-la pa adapte pou enn Kretien? Kifer ou dir sa?

SEKI NOU’NN APRANN

Kan nou fer bann bon swa konsernan nou stil, nou montre ki nou respekte Zeova ek lezot.

Eski Ou Rapel?

• Kifer nou linz ek nou stil inportan pou Zeova?

• Ki sertin prinsip bizin gid nou kan nou ena pou swazir nou stil?

• Kouma nou stil kapav ena enn lefe lor fason ki lezot konsider vre ladorasion?

DEKOUVER

Gete seki lezot kapav panse lor ou par fason ki ou abiye.

“Ki Mo Stil Dir lor Mwa?” (Lartik lor jw.org)

Aprann kifer li bien inportan pou reflesi avan ki ou fer enn tatwaz.

“Ki Labib Dir lor Tatwaz?” (Lartik lor jw.org)

Get bann lezot prinsip ki kapav ed ou pou pran bann bon desizion.

“Eski To Stil Abiye Donn Laglwar Bondie?” (Latour Degard, Septam 2016)

Enn madam ki ti anvi fer Bondie kontan ti aprann pou aksepte fason ki lezot abiye ek kwafe.

« Je croyais que la coquetterie était condamnable » (Leve!, 22 Desam 2003, an Franse)