Mette zot l’espoir en Jéhovah, ek prend courage

“Mette to l’espoir en Jéhovah; prend courage ek faire to leker vinn ferme. Oui, mette to l’espoir en Jéhovah.”—PSAUME 27:14.

 1. Kifer l’esperance li important, ek ki sa mot-la vedir dan la Bible?

Enn l’esperance ki sur, li pareil couma enn la-lumiere ki brille bien fort. Li aide nou pou trouve pli loin ki bann problem ki nou pé gagné asterla ek pou faire face ar l’avenir avek courage ek la joie. Zis Jéhovah ki kapav donne nou enn l’esperance sur, ek Li faire sa a travers la Bible. (2 Timothée 3:16) En realité, bann mot ki associé avek “l’esperance” parette plus ki 160 fois dan la Bible, ek sa bann mot-la vedir: attann avek impatience ek avek confiance enn kitsoz ki bon, ou-soit sa kitsoz ki nou pé attann-la li-mem.a Sa l’esperance-la li pa enn simple desir ki kitfois pena okenn fondement ou-soit ki pena okenn chance pou realisé, li pli grand sa.

 2. Ki role l’espoir ti joué dan la vie Jésus?

² Kan Jésus ti bizin faire face ar bann l’epreuve ek bann difficulté, li ti trouve pli loin ki so situation ek li ti mette so l’espoir en Jéhovah. “A cause la joie ki ti pé attann li, li finn endure enn poteau souffrance, sans prend compte la honte, ek li finn assize dan coté droite trone Bondié.” (Hébreux 12:2) Seki ti pli important pou Jésus, c’est defann droit ki Jéhovah ena pou dirige l’univers ek sanctifié nom Bondié. A cause sa, jamais li ti desobeir Bondié, n’importe ki sa ti coute li.

 3. Ki place l’esperance ena dan la vie bann serviteur Bondié?

³ Le roi David ti montré ki ena enn rapport entre l’esperance ek courage. Li ti dire: “Mette to l’espoir en Jéhovah; prend courage ek faire to leker vinn ferme. Oui, mette to l’espoir en Jéhovah.” (Psaume 27:14) Si nou envie garde nou leker ferme, fodé jamais ki nou laisse nou l’esperance vinn flou. Au contraire, nou l’esperance bizin toujours clair dan nou l’esprit ek bien enraciné dan nou leker. Lerla, li pou pli facile pou imite Jésus ek montré courage ek zèle kan nou participe dan travail ki li’nn donne so bann disciple pou faire. (Matthieu 24:14; 28:19, 20) Oui, la Bible mentionne l’esperance ensam avek la foi ek l’amour couma enn qualité ki important, ki durable ek ki forme partie dan la vie bann serviteur Bondié.—1 Corinthiens 13:13.

Eski ou “ena l’esperance en abondance”?

 4. Ki bann chrétien oint ek bann membre “lezot brebis” pé attann avek impatience?

⁴ Ena enn l’avenir extraordinaire devant bann serviteur Bondié. Bann chrétien oint pé attann avek impatience pou al servi avek Jésus Christ dan le ciel. Bann membre “lezot brebis” zot, zot ena l’espoir ki zot ‘nepli pou esclave ar seki pé detruire zot ek zot pou gagne liberté extraordinaire en tant ki bann zenfant Bondié’ ki pou vive lor la terre. (Jean 10:16; Romains 8:19-21; Philippiens 3:20) Kan zot pou gagne sa ‘liberté extraordinaire-la,’ zot pou delivré ar peché ek ar tou so bann mauvais consequence. Oui, Jéhovah ki donne “tou joli don ek tou cadeau parfait,” pou donne so bann serviteur fidel bann pli bon kitsoz ki ena.—Jacques 1:17; Isaïe 25:8.

 5. Couma nou arrivé “ena l’esperance en abondance”?

⁵ Ki place l’esperance bizin ena dan la vie enn chrétien? Romains 15:13 dire: “Nou souhaité ki Bondié ki donne l’esperance, pou rempli zot avek la joie ek la paix, parski zot croire, pou ki zot kapav ena l’esperance en abondance par puissance l’esprit saint.” Oui, l’esperance li pa pareil couma enn la-bougie ki allumé dan noir. Mais li pareil couma bann rayon soleil ki brille fort dan gramatin, ki rempli nou la-vie ar la paix, bonheur, courage ek ki donne nou la-vie enn sens. Remarké ki nou “ena l’esperance en abondance” kan nou croire dan Parole ki Bondié inn faire ecrire, ek kan nou gagne l’esprit saint. Romains 15:4 dire: “Tou bann kitsoz ki finn ecrire longtemps finn ecrire pou nou l’instruction, pou ki par nou l’endurance ek par consolation ki nou gagné dan bann l’Écriture, nou ena enn l’esperance.” Alors, demann ou-mem: ‘Eski mo pé garde mo l’esperance vivant kan mo etudié la Bible bien ek kan mo lire li toulé-jour? Eski mo prié souvent pou gagne l’esprit saint Bondié?’—Luc 11:13.

 6. Pou nou garde nou l’esperance bien vivant, kont ki kitsoz nou bizin faire attention?

⁶ Jésus, nou l’Exemple parfait, ti gagne la force grace a Parole Bondié. Si nou reflechi bien lor so l’exemple, nou pa pou ‘fatigué ek nou pa pou perdi courage.’ (Hébreux 12:3) Ki pou arrivé si l’esperance ki Bondié inn donne nou, vinn flou dan nou l’esprit ek dan nou leker, ou-soit si nou laisse bann lezot kitsoz couma par exemple bann kitsoz materiel ek bann l’objectif dan sa lé-monde-la vinn priorité dan nou la-vie? Pena doute ki nou pou fatigué bien vite lor plan spirituel ek finalement nou pou perdi nou la-force moral ek nou courage. Ek lerla, li kapav arrivé ki nou ‘la-foi faire naufrage.’ (1 Timothée 1:19) Parkont, l’esperance veritable faire nou la-foi vinn fort.

L’esperance, li important pou nou la-foi

 7. Dan ki fason l’esperance li bien important pou nou la-foi?

⁷ La Bible dire: “La foi c’est kan nou sur ki seki nou pé attann pou arrivé, li enn preuve sur ki bann kitsoz ki pourtant nou pa trouvé, zot enn realité.” (Hébreux 11:1) Sa vedir ki l’esperance, li pa zis enn kitsoz ki nou ajouté ar nou la-foi, mais li enn kitsoz bien important ki forme partie dan nou la-foi. Anou prend l’exemple Abraham. Li ti parette impossible ki Abraham ek so femme Sara gagne enn zenfant, parski zot ti’nn fini depasse l’age; pourtant Jéhovah ti promette zot enn l’heritier. (Genèse 17:15-17) Ki reaction Abraham ti ena? La Bible dire: “Mem si pa ti ena okenn l’espoir, pourtant parski li ti base-li lor l’esperance, li ti ena la foi, pou li vinn papa beaucoup nation.” (Romains 4:18) Oui, l’esperance ki Bondié ti donne Abraham ti enn base solid ki ti faire li gagne la foi ek li ti sur ki li ti pou gagne enn descendant. Ki resultat sa ti ena? So la-foi en retour ti faire so l’esperance vinn pli fort ek pli sur. Oui, Abraham ek Sara ti mem ena courage pou quitte zot lakaz ek zot famille pou al vive dan bann la-tente, le reste zot la-vie, dan enn pays etranger!

 8. Couma l’endurance ki nou developpé grace a la foi, faire nou l’esperance vinn pli fort?

⁸ Abraham ti garde enn l’esperance solid kan li ti obeir tou seki Jéhovah ti demann li, mem kan sa ti difficile. (Genèse 22:2, 12) Nou aussi, si nou obeir ek nou enduré dan service Jéhovah, nou kapav sur ki nou pou gagne nou recompense. L’apotre Paul ti ecrire ki “l’endurance” produire “enn condition approuvé” ek sa condition-la en retour produire l’esperance, ek “dan l’esperance pena deception.” (Romains 5:4, 5) A cause sa Paul ti ecrire: “Nou envie ki sakenn parmi zot montré mem zèle pou ki ziska la fin, zot pena okenn doute concernant zot l’esperance.” (Hébreux 6:11) Sa l’attitude positif-la li basé lor bann relation bien proche ki nou ena avek Jéhovah. Sa kapav aide nou pou faire face ar n’importe ki difficulté avek courage ek mem avek la joie.

“Trouve la joie dan l’esperance”

 9. Ki nou bizin faire regulierement pou ki nou kapav “trouve la joie dan l’esperance”?

⁹ L’esperance ki Bondié donne nou ena beaucoup plus valeur ki n’importe ki kitsoz ki sa lé-monde-la kapav offert nou. Psaume 37:34 dire: “Mette to l’espoir en Jéhovah ek obeir Li, ek Li pou donne toi grandeur pou ki to herite la terre. Kan bann mauvais dimoune pou detruire, to pou trouvé.” Oui, nou ena bann bon raison pou nou “trouve la joie dan l’esperance.” (Romains 12:12) Mais pou nou kapav faire sa, nou bizin garde nou l’esperance bien clair dan nou l’esprit. Eski souvent ou reflechi lor l’esperance ki Bondié inn donne ou? Eski ou faire vision ki ou dan Paradi, avek enn bon la-santé, sans tracas, entouré avek bann dimoune ki ou content, ek ou ena enn travail ki donne ou enn grand satisfaction? Eski ou medite lor bann zimage Paradi ki ena dan nou bann publication? Kan nou medite regulierement lor la, li pareil coumadir nou pé nettoye enn la-fenetre kot nou kapav trouve enn joli vue. Si nou pa prend la peine pou nettoye vitre-la, avek le temps li pou vinn sale ek nou pa pou kapav trouve sa joli vue-la bien. Lezot kitsoz pou kapav lerla attire nou l’attention. Fodé jamais nou laisse sa arrivé!

10. Kifer nou relation avek Jéhovah amelioré kan nou pense nou recompense?

¹⁰ Bien-sur, raison principal kifer nou servi Jéhovah, c’est parski nou content Li. (Marc 12:30) Mais kan-mem, nou bizin attann nou recompense avek impatience. En realité, c’est Jéhovah ki demann nou pou faire sa! Hébreux 11:6 dire: “Sans la foi li impossible pou faire Li plaisir, parski enn dimoune ki approche ar Bondié, bizin croire ki Li existé, ek ki Li vinn celui ki recompense bann ki rod Li vrai-mem.” Kifer Jéhovah envie ki nou considere Li couma enn kikenn ki recompense bann dimoune? Parski kan nou faire sa, nou montré ki nou konn nou Papa ki dan le ciel bien. Li enn Bondié ki content donné ek Li ena l’amour pou so bann zenfant. Nou ti pou bien triste ek nou ti pou decourage vite si nou pa ti ena “enn l’avenir ek enn l’espoir,” pa vrai?—Jérémie 29:11.

11. Couma l’esperance ki Bondié ti donne Moïse ti aide li pou prend bann bon decision?

¹¹ Moïse finn donne nou enn bon l’exemple: li finn garde so l’esprit fixé lor l’esperance ki Bondié donné. Parski li ti “garson tifi Pharaon,” li ti ena pouvoir, enn grand position, ek richesse l’Égypte ek li ti kapav servi sa couma li ti envie. Eski li ti pou contigne profite sa bann kitsoz-la, ou-soit eski li ti pou servi Jéhovah? Avek courage Moïse ti choisir pou servi Jéhovah. Kifer? Parski li “ti garde so-lizié fixé lor recompense.” (Hébreux 11:24-26) Oui, Moïse pa ti considere l’esperance ki Jéhovah ti mette devant li couma enn kitsoz banal.

12. Kifer nou kapav compare nou l’esperance ar enn helmet?

¹² L’apotre Paul ti compare nou l’esperance avek enn helmet. Nou helmet symbolik protege nou capacité mental, li aide nou pou prend bann bon decision, pou fixé bann bon priorité, ek pou garde nou fidelité. (1 Thessaloniciens 5:8) Eski ou ena ou helmet symbolik touletan lor ou la-tête? Si oui, alors pareil couma Moïse ek Paul, ou pa pou mette ou l’esperance dan “bann richesse ki pa durable, mais plutot dan Bondié, ki donne nou tou kitsoz en abondance pou nou plaisir.” Li vrai ki ou bizin ena courage pou rejette bann tendance ki populaire ek bann l’objectif egoïste, mais li vaut la peine faire sa zeffort-la! Apré tou, kifer eski nou pou accepté enn kitsoz ki vaut moins ki “vrai la-vie”—la vie ki Jéhovah pou donne bann dimoune ki content Li ek ki mette zot l’espoir en Li?—1 Timothée 6:17, 19.

“Jamais mo pou quitte toi”

13. Ki l’assurance Jéhovah donne so bann fidel serviteur?

¹³ Bann dimoune ki mette zot l’espoir dan sa lé-monde-la, surement peur kan zot mazinn l’avenir, parski “bann douleur” pé augmenté dan le monde. (Matthieu 24:8) Mais bann ki mette zot l’espoir en Jéhovah pena sa la-peur-la. Zot pou contigne ‘reste en securité ek pou vive trankil sans ki zot peur malheur vinn lor zot.’ (Proverbes 1:33) Zot pa mette zot l’espoir dan sa lé-monde-la, a cause sa, zot content pou suive conseil ki Paul ti donné: “Pa laisse l’amour pou l’argent domine zot la-vie, alors ki zot contente-zot ar seki zot ena. Parski Li’nn dire: ‘Jamais mo pou quitte toi, ni mo pou abandonne toi.’ ”—Hébreux 13:5.

14. Kifer fodé pa ki bann chrétien tracassé pou seki zot bizin lor plan materiel?

¹⁴ Kan sa verset-la dire ki “jamais” Jéhovah pa pou quitte nou, sa montré ki Li pou prend nou bien soin. Jésus aussi ti donne nou l’assurance ki Bondié prend nou soin, li ti dire: “Contigne rod le royaume ek so justice, ek zot pou gagne aussi tou sa bann lezot kitsoz-la [setadir bann kitsoz materiel ki necessaire dan la vie.] Alors, jamais pa tracassé pou demain, parski demain pou ena so prop tracas.” (Matthieu 6:33, 34) Jéhovah koné ki quantité li difficile pou nou montré-nou zelé dan bann activité ki ena enn rapport avek so Royaume ek en mem temps rempli nou grand responsabilité pou gagne seki nou bizin pou vive. Alors, anou mette tou nou confiance dan capacité ek desir ki Jéhovah ena pou donne nou seki nou bizin.—Matthieu 6:25-32; 11:28-30.

15. Couma bann chrétien garde zot “lizié simple”?

¹⁵ Nou montré ki nou compte lor Jéhovah kan nou garde nou “lizié simple.” (Matthieu 6:22, 23) Kan nou ena enn lizié simple sa vedir ki nou sincere, nou ena bann bon mobile, nou pa rod touletan gagne plus ki seki nou bizin ek nou pena bann l’ambition egoïste. Mais sa pa vedir ki nou bizin vive dan enn grand la-misere ou-soit ki nou neglige nou responsabilité pou gagne seki nou bizin lor plan materiel. Au contraire, sa vedir montré enn “bon jugement” ek en mem temps garde nou service pou Jéhovah dan premier place dan nou la-vie.—2 Timothée 1:7.

16. Kifer nou bizin ena la foi ek courage pou garde nou lizié simple?

¹⁶ Nou bizin ena la foi ek courage pou nou kapav garde nou lizié simple. Par exemple, ki pou arrivé si ou patron insisté pou ki souvent ou travail dan l’heure reunion? Eski ou pou ena courage pou reste fidel ar ou bann priorité spirituel? Si enn chrétien douté ki Jéhovah pou tini So promesse pou prend soin So bann serviteur, alors Satan nek ena zis pou augmente inpé pression, pou ki kitfois sa chrétien-la arrete assisté tou bann reunion. Oui, si nou mank la foi, nou kapav laisse Satan control nou ek lerla, c’est li ek pa Jéhovah ki pou fixé nou bann priorité. Li pou enn grand malheur si sa arrivé, pa vrai?—2 Corinthiens 13:5.

“Mette to l’espoir en Jéhovah”

17. Couma bann ki mette zot l’espoir en Jéhovah gagne bann benediction depuis asterla-mem?

¹⁷ La Bible montré nou plusieurs fois ki bann dimoune ki mette zot l’espoir en Jéhovah ek ki ena confiance en Li, jamais pa pou sorti perdant. (Proverbes 3:5, 6; Jérémie 17:7) Li vrai ki parfois zot pou bizin contente-zot avek enn tigit kitsoz materiel, mais zot considere sa couma enn ti sacrifice comparé avek benediction ki’nn reservé pou zot. Kan zot faire sa, zot montré ki zot mette zot “l’espoir en Jéhovah.” Zot montré aussi ki zot ena confiance ki finalement Li pou donne so bann serviteur fidel bann kitsoz ki zot leker envie ek ki en accord avek so volonté. (Psaume 37:4, 34) C’est a cause sa ki zot bien heureux depuis asterla-mem. “L’esperance bann juste, li enn la-joie, mais l’espoir bann mauvais dimoune pou fini net.”—Proverbes 10:28.

18, 19. (a) Ki l’assurance Jéhovah donne nou? (b) Couma eski nou garde Jéhovah dan nou “coté droite”?

¹⁸ Kan enn papa attrape la main so ti-garson kan zot pé marché, ti-garson-la senti-li en securité. Li pareil aussi pou nou kan nou marche avek nou Papa ki dan le ciel. Jéhovah ti dire bann Israélite: “Pa peur, parski mo avek toi. . . . Oui mo pou aide toi. . . . Parski moi, Jéhovah to Bondié, mo pé attrape to la-main droite bien fort, Celui ki dire toi: ‘Pa peur. Moi, mo pou aide toi.’ ”—Isaïe 41:10, 13.

¹⁹ Sa donne nou enn joli zimage: Jéhovah pé attrape nou la-main! David ti ecrire: “Mo finn mette Jéhovah touletan devant moi. Parski Li dan mo coté droite, nanyin pa pou kapav faire moi tombé.” (Psaume 16:8) Couma eski nou garde Jéhovah dan nou “coté droite”? Nou faire sa dan au moins deux fason. Premierement, kan nou laisse so Parole guide nou dan tou bann domaine nou la-vie ek deuxiemement, kan nou pense sa grand recompense ki Jéhovah inn mette devant nou-la. Guette ki Asaph ti chanté dan enn psaume: “Mo avek toi touletan; to finn attrape mo la-main droite. To pou guide moi avek to conseil, ek apré sa, to pou amenn moi vers la gloire.” (Psaume 73:23, 24) Kan nou sur ki Jéhovah pou aide nou, nou kapav vrai-mem faire face ar l’avenir avek confiance.

“Zot delivrance pé kosté”

20, 21. Ki l’avenir pé attann bann dimoune ki mette zot l’espoir en Jéhovah?

²⁰ Plus le temps passé, plus li pé vinn necessaire pou garde Jéhovah dan nou coté droite. Bientot, le monde Satan pou konn enn tribulation ki jamais li pa finn koné avant. Sa tribulation-la pou commence avek destruction fausse religion. (Matthieu 24:21) Bann dimoune ki pa croire, pou bien peur. Pourtant, pendant sa period difficile-la, bann ki’nn servi Jéhovah avek courage, pou ena la joie a cause zot l’esperance! Jésus ti dire: “Kan sa bann kitsoz-la commence arrivé, redresse-zot ek leve zot la-tête, parski zot delivrance pé kosté.”—Luc 21:28.

²¹ Alors, anou trouve la joie dan l’esperance ki Bondié donne nou. Satan konn servi bann distraction bien attirant pou piege nou. Fodé pa nou laisse li embete nou ou-soit tente nou par sa bann distraction-la. En mem temps, anou travail dur pou developpe la foi, l’amour, ek la crainte pou Bondié. Si nou faire sa, nou pou ena courage pou obeir Jéhovah dan tou situation ek pou oppose-nou kont Satan le Diable. (Jacques 4:7, 8) Oui, “prend courage ek faire zot leker vinn ferme, zot tou ki pé attann Jéhovah.”—Psaume 31:24.

[Note]

Ki ou pou reponn?

• Couma l’esperance inn aide Jésus pou ena courage?

• Ki rapport ena entre la foi ek l’esperance?

• Couma l’esperance ensam avek la foi, kapav donne enn chrétien courage pou fixé bann bon priorité dan so la-vie?

• Kifer bann ki mette zot “l’espoir en Jéhovah” kapav faire face ar l’avenir avek confiance?

[Zimage, page 26]

Ki ou jeune ou-soit ou inpé pli agé, eski ou faire vision ki ou dan Paradi?