Bondié prouve so l’amour envers nou

“Faveur ki personne pa merité [pou] regné par la justice pou la vie eternel.”​—ROM. 5:21.

1, 2. Ki don ki ena enn grand valeur bann dimoune finn gagné?

ENN professeur dan l’Université Melbourne, dan l’Australie, ti ecrire ki bann la loi ki l’Empire Romain ti etabli, zot enn l’heritage pou bann civilisation ki vini apré, enn don ki contigne ena valeur. Mem si seki sa professeur-la inn ecrire li vrai, mais la Bible enseigne nou ki Bondié, dan so l’amour, inn faire nou enn don ki ena beaucoup plus valeur. Sa don-la c’est disposition ki Bondié inn prend pou ki Li considere nou couma bann dimoune juste, ek pou ki nou ena l’esperance pou gagne la vie sauve ek la vie eternel.

² Dan enn sens, fason ki Bondié ti offert sa don-la ti implik certain l’aspect legal. Dan Romains chapitre 5, Paul pa ti presente sa bann l’aspect legal-la zis couma bann la loi. Au contraire, li ti commence so raisonnement par sa l’assurance bien reconfortant-la: “Finn declare nou juste a cause la foi, [alors] anou profite la paix avek Bondié a travers nou Seigneur Jésus Christ.” Bann ki gagne sa don-la, zot senti-zot poussé pou montré zot l’amour zot aussi envers Bondié. Paul ti enn parmi sa bann dimoune-la. Li ti ecrire: “Finn rempli nou leker avek l’amour Bondié, a travers l’esprit saint.”​—Rom. 5:1, 5.

 3. Ki bann question nou pou examiné?

³ Mais, kifer eski sa don-la ti necessaire? Couma Bondié ti kapav offert sa dan enn fason juste, pou ki tou dimoune gagne bann benediction? Ek ki bann dimoune bizin faire pou zot gagne sa? Anou examine reponse sa bann question-la ek guetté couma zot mette l’accent lor l’amour Bondié.

L’amour Bondié ek peché

4, 5. (a) Dan ki fason extraordinaire Jéhovah ti manifesté so l’amour? (b) Ki permette nou comprend Romains 5:12?

⁴ Jéhovah inn montré nou so grand l’amour kan Li ti envoye so sel Garson ki Li finn crée direct, pou aide bann dimoune. Romains 5:8 dire: “Bondié prouve so prop l’amour envers nou kan Christ finn mort pou nou, alors ki nou ti encore bann dimoune ki faire peché.” Sa verset-la mette l’accent lor sa point-la: “Nou ti encore bann dimoune ki faire peché.” Couma sa finn arrivé? C’est seki nou tou nou bizin koné.

⁵ Paul faire enn resumé lor sa sujet-la. Li commencé avek sa point-la: “Par enn sel zom, peché finn rente dan le monde ek peché finn amenn la mort, ek coumsa tou dimoune passe par la mort parski zot tou ti’nn faire peché.” (Rom. 5:12) Nou kapav arrivé comprend sa parski Bondié finn faire ecrire couma la vie bann humain finn commencé. Jéhovah ti crée Adam ek Ève, ek pareil couma nou Createur, nou deux premier ancetre ti parfait. Ti ena enn sel kitsoz ki Bondié ti defann zot faire, ek Li ti dire zot ki si zot desobeir sa la loi-la zot pou mort. (Gen. 2:17) Mais, zot finn choisir pou agir dan enn fason ki faire zot-mem di-tort. Zot finn desobeir la loi Bondié, ki ti raisonnable, ek coumsa zot inn montré ki zot pa accepté Li couma sa Kikenn ki etabli bann la Loi-la ek couma Souverain l’univers.​—Deut. 32:4, 5.

 6. (a) Kifer eski bann descendant Adam ti mort avant ek mem apré ki Bondié ti’nn donne la Loi mosaïk? (b) L’exemple concernant hémophilie aide nou pou explik ki kitsoz?

⁶ C’est zis apré ki Adam ti faire peché ki li ti gagne bann zenfant ek coumsa li ti transmette zot tou, peché ek so bann consequence. Bien sur, so bann descendant pa ti desobeir la loi Bondié pareil couma Adam li, li ti faire. Alors zot pa ti coupable sa mem peché-la, ni zot ti desobeir enn code la loi, ki Bondié ti pou donné beaucoup plus tard. (Gen. 2:17) Malgré sa, bann descendant Adam inn herite peché. Alors, peché ek la mort finn dominé ziska ki Bondié ti donne bann Israélite code la loi, seki ti montré dan enn fason bien clair ki zot ti faire peché. (Lire Romains 5:13, 14.) Pou nou comprend consequence ki peché ena anou prend l’exemple certain maladie hereditaire, couma par exemple thalassémie (enn anemie bien grave), ek l’hémophilie. Kitfois ou finn deja lire concernant Alexis, garson enn empereur russe, Nicolas II, ek so madame Alexandra. Sa garson-la ti herite hémophilie, enn maladie ki ti faire li gagne bann hemorragie. Li kapav arrivé ki dan enn famille tou bann zenfant ena sa maladie-la dan zot gène, mais pa zot tou ki affecté. Mais pou peché li pa pareil. Tou bann descendant Adam herite sa ek ressenti so bann consequence, ek dan cent pour cent cas, li amenn la mort. Mais eski li possible ki enn jour sa situation difficile-la disparette?

Disposition ki Bondié inn prend a travers Jésus Christ

7, 8. Couma eski la vie ki deux zom parfait finn ena, finn amenn deux resultat bien different?

⁷ Dan so l’amour, Jéhovah finn prend enn disposition pou ki bann dimoune kapav gagne la victoire lor peché ki nou’nn herité. Paul ti expliké ki sa ti possible par moyen enn lot zom, enn zom parfait ki ti pou vini plitar​—enn deuxieme Adam. (1 Cor. 15:45) Mais la vie ki sa deux zom parfait-la finn ena, finn amenn deux resultat bien different. Ki sa deux resultat-la sa?​—Lire Romains 5:15, 16.

⁸ Paul ti ecrire: “Pena comparaison entre don Bondié ek faute Adam.” Adam ti coupable sa faute-la, ek li ti gagne enn mauvais condamnation ki li ti merité, setadir li ti mort. Mais, pa zis li tousel ki ti mort. Nou lire: “A cause faute [sa] enn sel zom[-la] beaucoup finn mort.” Dapré bann principe la justice Bondié, tou bann descendant Adam, parmi ena nou aussi, ti merite sa-mem condamnation ki Adam ti gagné-la. Mais selman, nou gagne reconfort kan nou koné ki Jésus, ki ti enn zom parfait, ti kapav produire enn resultat ki ti completement different. Ki sa resultat-la sa? Paul ti dire: “Resultat ki tou sorte qualité dimoune gagné, c’est ki declare zot juste pou gagne la vie.”​—Rom. 5:18.

 9. Couma mentionné dan Romains 5:16, 18, ki Bondié ti pé faire kan Li ti declare bann dimoune juste?

⁹ L’expression grec ki’nn traduire par “declare zot juste,” ki sens li ena? Enn traducteur la Bible ti ecrire: “[Sa bann mot-la] ena enn l’aspect legal ek servi zot pou faire enn comparaison dan domaine legal. Sa comparaison-la koz lor enn changement en rapport avek position ki enn dimoune ena devant Bondié, pa ar enn changement ki arrivé dan sa dimoune-la . . . Sa comparaison-la decrire Bondié couma enn juge ki finn prend enn decision dan faveur enn accusé. Sa dimoune-la finn retrouve li, dan enn certain sens, devant tribunal Bondié, parski ena sa charge-la lor li: li enn dimoune ki pa juste. Mais Bondié acquitte sa dimoune-la.”

10. Ki Jésus ti faire pou ki Bondié declare bann dimoune juste?

¹⁰ Lor ki base “Juge lor la terre entier” ki juste, ti kapav acquitte enn dimoune ki pa juste? (Gen. 18:25) Enn premier kitsoz bien important ki Bondié finn faire c’est ki, dan so l’amour, Li finn envoye so sel Garson ki Li finn crée direct, lor la terre. Jésus ti faire volonté so Papa dan enn fason parfait, malgré ki li ti gagne bann tentation, ki bann dimoune ti bien bouffonne li, ek maltraite li. Li ti garde so l’integrité ziska enn point kot li’nn mem mort lor enn poteau souffrance. (Héb. 2:10) Kan li ti sacrifié so la vie humain parfait, Jésus ti offert enn ranson ki ti kapav delivré bann descendant Adam ar peché ek la mort.​—Mat. 20:28; Rom. 5:6-8.

11. La ranson ti basé lor ki deux kitsoz ki ti corresponn?

¹¹ Enn lot place, Paul ti appel sa “enn ranson ki corresponn.” (1 Tim. 2:6) Mais ar ki li ti corresponn? Adam ti amenn l’imperfection ek la mort lor plusieurs milliard dimoune. Li vrai ki grace a Jésus, ki ti enn zom parfait, ti kapav ena plusieurs milliard descendant parfait.a Alors, avant nou ti comprend ki la vie Jésus ensam avek la vie tou so bann descendant parfait, ki li ti kapav gagné, ti forme enn sacrifice ki ti egal ar la vie Adam ek so bann descendant ki pa ti parfait. Mais, la Bible pa dire ki bann descendant ki Jésus ti kapav gagné ti forme partie la ranson. Romains 5:15-19 montré bien ki la mort zis “enn sel zom” finn amenn enn delivrance. Oui, la vie Jésus, ki ti parfait, so la vie tousel, ki ti corresponn ar la vie Adam. Grace a “enn sel action justification” ki Jésus finn faire, setadir so l’obeissance ek so l’integrité mem ziska la mort, ki tou sorte qualité dimoune finn gagne possibilité pou gagne sa don gratuit-la ek la vie. (2 Cor. 5:14, 15; 1 Pierre 3:18) Couma finn gagne sa resultat-la?

Lor base la ranson nou finn acquitté

12, 13. Kifer eski bann ki Bondié declare couma bann dimoune juste, zot bizin misericorde ek l’amour Bondié?

¹² Jéhovah ti accepté sacrifice ki so Garson ti offert. (Héb. 9:24; 10:10, 12) Malgré sa, bann disciple Jésus lor la terre, parmi ti ena so bann zapotre ki ti fidele, ti reste toujours imparfait. Mem si zot ti faire zeffort pou evite faire seki mauvais, pa touletan ki zot ti reussi. Kifer? Parski zot ti’nn herite peché. (Rom. 7:18-20) Mais Bondié ti kapav faire kitsoz pou sa, ek Li ti faire li. Li ti accepté sa “ranson ki corresponn[-la]” ek Li ti disposé pou applik sa en faveur so bann serviteur ki lor la terre.

¹³ Sa pa vedir ki Bondié ti obligé applik sa ranson-la en faveur bann zapotre ek lezot dimoune parski zot ti’nn faire certain bon action. Au contraire, Bondié ti applik la ranson dan zot faveur a cause so misericorde ek so grand l’amour. Li ti choisir pou tire sa condamnation ki ti pese lor bann zapotre ek lezot-la, ek coumsa Li ti considere zot couma bann dimoune ki nepli coupable peché ki zot ti’nn herité. Paul ti explik sa dan enn fason bien clair kan li ti dire: “En realité, c’est par sa faveur ki personne pa merité-la ki zot finn sauvé par la foi; ek c’est pa par zot-mem, mais c’est don ki Bondié donné.”​—Éph. 2:8.

14, 15. Ki recompense ti ena devant bann ki Bondié ti declare juste, mais ki zot ti bizin contigne faire?

¹⁴ Reflechi lor la: eski c’est pa vrai-mem enn don extraordinaire ki Tout-Puissant pardonne peché ki enn dimoune finn herité ek aussi bann mauvais kitsoz ki li’nn faire? Ou pa pou kapav compté ki quantité peché bann dimoune inn faire avant ki zot vinn bann chretien. Pourtant, lor base la ranson, Bondié kapav pardonne sa bann peché-la. Paul ti ecrire: “Don ki bann dimoune finn gagné pou beaucoup faute c’est ki finn declare zot juste.” (Rom. 5:16) Bann zapotre ek lezot dimoune ki ti gagne sa joli don-la (finn declare zot juste) ti pou bizin contigne adore vrai Bondié avek la foi. Ki recompense zot ti pou gagné? “Bann ki gagne faveur ki personne pa merité en abondance ek don gratuit la justice [pou] regné dan la vie a travers enn sel dimoune, Jésus Christ.” Oui vrai-mem, don la justice amenn la vie, enn resultat ki contraire ar seki peché amené.​—Rom. 5:17; lire Luc 22:28-30.

¹⁵ Bann ki gagne sa don-la zot vinn bann garson spirituel Bondié. En tant ki bann coheritier avek Christ, zot ena l’esperance pou ressuscité pou al dan le ciel couma bann vrai garson Bondié pou zot “regné” ensam avek Jésus Christ.​—Lire Romains 8:15-17, 23.

Bondié manifesté so l’amour envers lezot

16. Ki don bann ki ena l’espoir pou vive lor la terre kapav gagné mem asterla?

¹⁶ Pa tou dimoune ki ena la foi ek ki servi Bondié couma bann chretien fidele ki ena l’esperance pou “regné couma bann le roi” avek Christ dan le ciel. Beaucoup ena enn l’espoir ki basé lor la Bible ki pareil couma l’espoir ki bann serviteur Bondié ki’nn vive avant Jésus, ti ena. Zot ena l’espoir pou vive pou touletan dan enn paradis lor la terre. Mais eski mem asterla zot kapav gagne enn joli don, setadir ki Bondié considere zot couma bann dimoune juste ki ena l’esperance pou vive lor la terre? Kan nou base nou lor seki Paul ti ecrire bann Romain, reponse ki nou gagné ek ki rassure-nou c’est: oui!

17, 18. (a) Parski Abraham ti ena la foi, couma eski Bondié ti considere li? (b) Couma eski Jéhovah ti kapav considere Abraham couma enn dimoune ki juste?

¹⁷ Paul ti koz lor bon l’exemple Abraham, enn zom ki ti ena la foi, ki ti vive avant ki Jéhovah ti donne Israël code la loi ek bien avant ki Christ ti donne bann dimoune possibilité pou vive dan le ciel. (Héb 10:19, 20) Nou lire: “Parski c’est pa grace a la loi ki Abraham ou-soit so descendance ti gagne promesse ki li pou herite enn le monde, mais grace a la justice par la foi.” (Rom. 4:13; Jacq. 2:23, 24) Alors Bondié ti considere Abraham couma enn dimoune juste.​—Lire Romains 4:20-22.

¹⁸ Eski sa vedir ki pendant bann dizaine l’année ki li ti servi Jéhovah, Abraham pa ti faire okenn peché? Non, c’est pa dan sa sens-la ki li ti juste. (Rom. 3:10, 23) Mais, dan so sagesse ki pena limite, Jéhovah ti prend en consideration la foi extraordinaire ki Abraham ti ena ek bann action ki so la foi ti pousse li pou faire. Abraham ti ena la foi surtout dan “descendance” ki Bondié ti’nn promette pou sorti dan so lignée. Sa Descendance-la li-mem ti le Messie, ou-soit Christ. (Gen. 15:6; 22:15-18) A cause sa, lor base “ranson ki Christ Jésus inn payé,” Jéhovah, nou Juge, kapav pardonne bann peché ki bann dimoune inn faire dan le passé. Ala kifer, Abraham ek lezot zom ki ti ena la foi, ki ti vive avant Jésus, pou gagne enn resurrection.​—Lire Romains 3:24, 25; Ps. 32:1, 2.

Asterla-mem nou kapav profite enn position ki juste devant Bondié

19. Kifer eski fason ki Bondié ti considere Abraham bizin encourage beaucoup zordi?

¹⁹ Nou finn trouvé ki Bondié ki content nou finn considere Abraham couma enn dimoune juste. Sa pensée-la bizin encourage bann vrai chretien zordi. Jéhovah pa ti declare Abraham enn dimoune juste dan mem sens ki Li declare juste bann ki Li oint ar l’esprit pou vinn bann “coheritier Christ.” Bondié “finn choisir [sa ti groupe dimoune-la] pou vinn bann saint” ek finn accepté zot couma “bann garson Bondié.” (Rom. 1:7; 8:14, 17, 33) Mais, Abraham li, li ti vinn “camarade Jéhovah,” ek sa bien avant ki Jésus ti offert la ranson. (Jacq. 2:23; Is. 41:8) Alors, ki nou kapav dire concernant bann vrai chretien ki ena l’esperance pou vive dan Paradis ki pou retabli lor la terre?

20. Ki Bondié demann bann ki Li considere couma bann dimoune juste, pareil couma li ti considere Abraham?

²⁰ Sa bann dimoune-la pa finn gagne “don gratuit la justice” avek l’esperance pou vive dan le ciel “grace a liberation par ranson ki Christ Jésus inn payé.” (Rom. 3:24; 5:15, 17) Mais, zot ena enn grand la foi dan Bondié ek dan bann disposition ki Li’nn prend, ek zot montré zot la foi par bann bon travail, couma par exemple, ’preche royaume Bondié ek enseigne bann kitsoz concernant nou Seigneur Jésus Christ.’ (Actes 28:31) C’est pou sa raison-la ki Jéhovah kapav considere zot couma bann dimoune ki juste dan mem sens ki Li ti considere Abraham. Don ki sa bann dimoune-la gagné c’est l’amitié avek Bondié ki different avek “don gratuit” ki bann oint gagné. Mais malgré sa, c’est vrai-mem enn don ki zot accepté avek enn grand reconnaissance.

21. Grace a l’amour ek justice Jéhovah, ki bann bienfait nou kapav gagné?

²¹ Bann dirigeant humain promette beaucoup kitsoz mais ou bizin realisé ki c’est pa zot ki donne ou l’esperance pou vive pou touletan lor la terre. Au contraire, sa l’esperance-la li basé lor projet rempli ar sagesse ki Souverain l’univers ena. Jéhovah agir l’etape par l’etape pou realise so projet. Sa bann l’etape-la finn toujours en accord avek so vrai justice ek en plus, zot finn reflecté grand l’amour Bondié. C’est pou sa ki Paul ti kapav dire: “Bondié prouve so prop l’amour envers nou kan Christ finn mort pou nou, alors ki nou ti encore bann dimoune ki faire peché.”​—Rom. 5:8.

[Note]

Eski ou rappel?

• Descendance Adam inn herite ki kitsoz, ek avek ki consequence?

• Couma eski Bondié finn donne enn ranson ki corresponn, ek ar ki li ti corresponn?

• Parski Bondié declare bann dimoune juste, ki l’esperance ou ena?

[Zimage page 21]

Adam ki ti parfait ti faire peché. Jésus ki ti parfait ti offert “enn ranson ki corresponn”

[Zimage page 23]

Par moyen Jésus kapav declare nou juste. Oui, sa c’est vrai-mem enn “bon nouvelle”!