Servi Parole Bondié pou Aide Ou-mem ek pou Aide Lezot

 1. Kifer nou bizin ena enn grand confiance dan Parole Bondié?

KAN bann ancien guetté si enn etudiant la Bible rempli bann condition pou preché, zot demann-zot-mem: ‘Eski sa dimoune-la montré ki li croire ki la Bible inspiré par Bondié?’a Pou enn dimoune ki envie vinn enn proclamateur​—en realité, pou tou bann serviteur Bondié​—reponse sa question-la bizin enn oui bien clair. Kifer? Kan nou ena confiance dan Parole Bondié ek kan nou aprann pou servi li bien dan nou ministere, nou pou kapav aide lezot pou konn Jéhovah ek pou gagne la vie sauve.

 2. Kifer fodé pa nou ‘abandonne bann kitsoz ki nou finn aprann’?

² L’apotre Paul ti montré l’importance ki Parole Bondié ena, kan li ti ecrire Timothée sa bann parole-la: “Pa abandonne bann kitsoz ki to’nn aprann ek ki finn convaink toi pou croire.” Sa “bann kitsoz” ki Paul ti mentionné-la c’est bann verité ki ena dan la Bible ek ki ti pousse Timothée pou ena la foi dan la bonne nouvelle. Sa bann verité-la finn ena mem l’effet lor nou zordi, ek zot contigne aide nou pou reste ‘sage pou nou gagne la vie sauve.’ (2 Tim. 3:14, 15) Souvent, nou servi seki Paul ti dire pou montré lezot ki la Bible c’est enn livre ki’nn inspiré par Bondié, mais nou kapav personnellement gagne bann lezot bienfait ar bann parole ki trouve dan 2 Timothée 3:16. (Lire.) Anou examine sa verset-la plus en detail. Sa pou fortifié nou confiance ki tou bann l’enseignement Jéhovah zot “droite.”​—Ps. 119:128.

3-5. (a) Couma enn la foule ti reagir kan zot ti tann discours Pierre, jour la Pentecôte, ek kifer? (b) Kifer beaucoup dimoune dan Thessalonique ti accepté la verité? (c) Ki kitsoz dan nou ministere kapav impressionne bann dimoune zordi?

³ Jésus ti dire nation Israël: “Mo pé envoye zot mo bann prophete, bann dimoune sage ek bann ki enseigne en publik.” (Mat. 23:34) Jésus ti pé koz lor so bann disciple. Li ti enseigne zot pou servi bann l’Ecriture dan zot ministere. Jour la Pentecôte l’an 33 nou lepok, l’apotre Pierre, ki ti enn parmi sa “bann ki enseigne en publik[-la],” ti faire enn discours devant enn grand la foule dan Jérusalem. Li ti cite plusieurs passage ki trouve dan bann l’Écritures Hébraïques. Parmi bann ki ti pé ecoute Pierre explik sa bann verset-la, ti ena beaucoup ki “zot leker ti dechiré.” Zot ti repenti pou bann peché ki zot ti’nn faire. Apepré trois mille parmi zot ti rod pardon Bondié ek ti vinn bann Chretien.​—Actes 2:37-41.

⁴ Enn lot zapotre ki ti enseigne en publik, c’est l’apotre Paul. Li ti preche la bonne nouvelle en dehors Jérusalem. Par exemple, dan la ville Thessalonique, en Macédoine, li ti koz ar bann dimoune ki ti pé adore Bondié dan enn synagogue. Pendant trois sabbat, Paul “ti raisonne avek zot lor bann l’Ecriture. Li ti cite bann passage pou expliké ek pou prouvé ki Christ ti bizin souffert ek ressuscité parmi bann mort.” Ki resultat sa finn ena? “Certain parmi zot [bann Juif] ti vinn croyant,” ek “beaucoup Grec” aussi.​—Actes 17:1-4.

⁵ Zordi beaucoup dimoune impressionné par fason ki bann serviteur Bondié servi la Bible. En Suisse, apré ki enn missié ti ecoute enn soeur lire enn verset la Bible, li ti demann li: “Kisannla ou representé?” Soeur-la ti reponn: “Mo camarade ek moi, nou bann Témoins de Jéhovah.” Missié-la ti dire li: “Mo ti bizin koné sa. Kisannla a part bann Témoins de Jéhovah ki pou vinn devant mo la porte pou lire la Bible?”

6, 7. (a) Couma bann ki enseigné dan congregation kapav servi la Bible dan enn fason efficace? (b) Kifer li bien important ki nou servi la Bible dan bann l’etude?

⁶ Couma nou kapav servi la Bible dan enn fason efficace dan nou l’enseignement? Si ou ena privilege pou enseigne la congregation lor l’estrade, servi bann verset bien precis. Au lieu ki ou zis dire seki ena dan bann verset, ou-soit ou lire sa bann verset-la lor enn page ki ou finn imprimé ou-soit ou lire zot lor enn l’appareil electronik, ouvert ou la Bible ek lire bann verset-la, ek encourage l’assistance pou faire pareil. Aussi, prend le temps pou expliké couma sa bann verset-la kapav aide l’assistance pou vinn pli proche ar Jéhovah. Au lieu ki ou servi bann l’exemple compliké ek bann l’experience ki pou zis faire l’assistance riyé, servi sa le temps-la pou explik Parole Bondié.

⁷ Ki nou bizin rappel kan nou conduire bann l’etude la Bible? Kan nou pé faire l’etude avek enn dimoune, fodé pa nou saute bann reference biblik ki’nn cité dan nou livre. Nou bizin encourage etudiant la Bible-la pou lire bann verset ki’nn cité ek aide li pou comprend seki sa vedir. Couma? Pa donne bann longue l’explication kot nou koz tou nou-mem, mais encourage etudiant-la pou exprime-li. Au lieu ki nou dire li seki li bizin croire ou-soit couma pou agir, nou kapav pose li bann question bien reflechi ki pou aide li pou tire bann bon conclusion.b

 8. Kont ki kitsoz Paul ti bizin lutté?

⁸ Souvent, nou pensé ki c’est bann ancien ki ena responsabilité pou “corrigé.” Li vrai ki c’est bann ancien ki ena responsabilité pou ‘corrige bann dimoune ki pratik peché.’ (1 Tim. 5:20; Tite 1:13) Mais li important aussi ki nou corrige-nou-mem. Paul ti enn Chretien ki ti donne enn bon l’exemple, li ti ena enn conscience clair. (2 Tim. 1:3) Kan-mem sa, li ti ecrire: “Mo trouve enn lot la loi dan mo bann membre ki pé faire la guerre kont la loi mo l’esprit, ek ki pé faire moi vinn esclave la loi peché.” Kan nou etudié contexte sa bann parole-la, nou comprend pli bien ki la guerre Paul ti bizin faire pou controle so tendance pou faire peché.​—Lire Romains 7:21-25.

9, 10. (a) Ki bann faiblesse kitfois Paul ti ena? (b) Couma kitfois Paul ti faire la guerre kont so bann faiblesse?

⁹ Paul pa ti dire ki faiblesse li ti ena, mais kan li ti ecrire Timothée, li ti reconette ki avant, li ti enn “dimoune insolent.” (1 Tim. 1:13) Avant ki li ti vinn enn Chretien, Paul ti agir dan enn fason bien cruel envers bann Chretien. Concernant so bann sentiment envers bann disciple Christ, li ti admette: “Mo ti mauvais en colere avek zot.” (Actes 26:11) Paul ti aprann pou controle so caractere, mais parfois, surement li ti bizin lutté pou controle so bann sentiment ek so bann parole. (Actes 15:36-39) Ki ti aide li pou reussi?

¹⁰ Kan li ti ecrire bann Chretien dan Corinthe, Paul ti expliké seki ti aide li pou corrige-li-mem. (Lire 1 Corinthiens 9:26, 27.) Li ti prend bann action bien severe kont so bann faiblesse. Pena doute ki li ti rod conseil dan bann l’Ecriture, li ti suppliye Jéhovah pou aide li pou applik sa bann conseil-la, ek li ti travail dur pou ameliore-li.c Nou kapav gagne bann bienfait ar so l’exemple parski nou aussi nou pé lutte kont nou bann tendance imparfait.

11. Couma nou kapav ‘contigne testé-nou-mem’ pou guetté si nou pé marche dan chemin la verité?

¹¹ Fodé jamais nou pensé ki nou kapav arrete lutté kont nou bann faiblesse. Au contraire, nou bizin ‘contigne testé-nou-mem’ pou faire sur ki nou pé marche dan chemin la verité. (2 Cor. 13:5) Kan nou lire bann verset couma Colossiens 3:5-10, nou kapav demann-nou-mem: ‘Eski mo pé travail dur pou detruire net mo bann tendance pou faire peché ou-soit eski mo pé commence content bann kitsoz ki Jéhovah pa content? Si mo lor Internet ek enn site immoral parette, eski mo ferme site-la desuite, ou-soit eski mo al rod bann lezot site immoral?’ Si nou applik conseil ki trouve dan Parole Bondié dan nou la vie personnel, sa pou aide nou pou “reste lor nou garde ek garde nou bon sens.”​—1 Thess. 5:6-8.

12, 13. (a) Ki l’objectif nou bizin ena kan nou “mette bann kitsoz en ordre,” ek couma nou kapav suive l’exemple Jésus kan nou faire sa? (b) Kan nou pé “mette bann kitsoz en ordre” avek lezot, ki fason kozé fodé pa nou ena?

¹² L’expression Grec ki finn traduire par “mette bann kitsoz en ordre” vedir “faire [enn kitsoz] vinn bon, corrigé, redressé, ré-mette dan enn bon condition.” Parfois, nou bizin mette bann kitsoz en ordre, setadir reglé bann probleme ki nou finn gagné avek lezot ki finn mal comprend nou ou-soit nou bann action. Par exemple, bann chef religieux Juif ti reproche Jésus parski li ti bon avek “bann ki ramasse taxe, ek bann ki faire peché.” Jésus ti reponn: “C’est pa bann dimoune ki bien ki bizin docteur, mais bann ki malade. Alors, al aprann seki sa vedir: ‘Mo’lé misericorde, pa sacrifice.’” (Mat. 9:11-13) Avek patience ek bonté, li ti explik zot tou Parole Bondié. Alors, bann dimoune humble ti aprann pou konn Jéhovah couma “enn Bondié ki ena misericorde ek compassion, ki pa en colere vite ek ki ena l’amour fidele ek la verité en abondance.” (Ex. 34:6) Grace a bann zeffort ki Garson Bondié ti faire pou “mette bann kitsoz en ordre,” beaucoup dimoune ti ena la foi dan la bonne nouvelle.

¹³ L’exemple Jésus enseigne nou couma nou bizin aide lezot. Li possible ki enn kikenn ki en colere dire dan enn fason brite: ‘Mo ena enn probleme pou reglé ar toi-la.’ Mais c’est pa dan sa fason-la ki nou bizin comprend seki’nn ecrire dan 2 Timothée 3:16. La Bible pa permette nou pou koz brite avek lezot. Kan nou critik lezot dan enn fason severe, c’est coumadir nou pé donne “bann coute l’epée,” souvent sa faire beaucoup di-tort ek bien rare sa amenn bann bienfait.​—Prov. 12:18.

14-16. (a) Couma bann ancien kapav “mette bann kitsoz en ordre” pou aide lezot reglé zot probleme? (b) Kifer li bien important ki bann parent servi la Bible pou “mette bann kitsoz en ordre” avek zot zenfant?

¹⁴ Alors, couma nou kapav agir avek patience ek bonté kan nou “mette bann kitsoz en ordre”? Supposé ki enn couple demann enn ancien pou aide zot parski souvent zot discuté. Ki ancien-la pou faire? Sans ki ancien-la prend part personne, li kapav raisonne avek zot lor bann principe biblik, kitfois li kapav servi bann principe ki trouve dan livre Le secret du bonheur familial, chapitre 3. Pendant ki ancien-la pé koz ar zot, mari-la ek so femme kitfois pou trouvé ki conseil sakenn bizin mette plus en pratik. Plitar, ancien-la pou demann couple-la si zot situation inn amelioré ek li propose pou aide zot encore, si zot bizin.

¹⁵ Couma bann parent kapav “mette bann kitsoz en ordre” pou fortifié spiritualité zot bann zenfant? Faire coumadir ou envie aide ou tifi adolescent pou arrete frequente enn camarade ki kapav ena enn mauvais l’influence lor li. Ki ou kapav faire? Premierement, ou bizin konn plus lor sa camarade-la. Apré, si ou ena enn raison pou tracassé, ou kapav koz avek li, kitfois ou kapav servi bann point ki trouve dan livre Les jeunes s’interrogent — Réponses pratiques, Volume 2. Apré sa, faire sur ki ou passe plus le temps avek li. Ou kapav aussi observé ki l’attitude li ena kan li sorti dan predication ou-soit pendant bann moment detente avek la famille. Si ou ena patience ek ou montré-ou bon, ou tifi pou senti ki ou content li ek ki ou interessé avek li. Pena doute ki sa pou pousse li pou mette en pratik ou conseil ek pou evite prend enn mauvais chemin.

¹⁶ Avek patience ek bonté, nou kapav aussi encourage bann ki tracassé a cause zot la santé, bann ki decouragé parski zot inn perdi zot travail, ou-soit ki trouve difficile pou accepté certain l’enseignement biblik. Si ou servi Parole Bondié pou “mette bann kitsoz en ordre,” sa kapav faire bann serviteur Jéhovah gagne bann grand bienfait.

17. Kifer nou bizin accepté avek reconnaissance discipline ki nou gagné?

¹⁷ “Tou discipline kan nou pé gagne li pa parette enn kitsoz ki donne la joie, mais enn kitsoz ki triste.” Ek pourtant, “plitar pou bann ki li finn formé, li rapporte enn fruit la paix, setadir la justice.” (Héb. 12:11) La plupart Chretien ki bann adulte zordi, d’accord ki discipline ki zot ti gagné ar zot bann parent finn aide zot. Ek kan nou accepté ki Jéhovah discipline nou a travers bann ancien, sa aide nou pou reste lor chemin ki amenn vers la vie.​—Prov. 4:13.

18, 19. (a) Kifer conseil ki trouve dan Proverbes 18:13 bien important pou “discipline dan enn fason juste”? (b) Ki resultat souvent sa ena, kan bann ancien montré la douceur ek l’amour pou conseil bann ki’nn faire peché?

¹⁸ Couma bann ancien ek bann parent kapav aprann pou discipline dan enn fason efficace? Jéhovah ti demann bann Chretien pou discipline “dan enn fason juste.” (2 Tim. 3:16) Alors, nou bizin servi bann principe la Bible pou guide nou kan nou discipline lezot. Enn parmi sa bann principe-la trouve dan Proverbes 18:13: “Kan enn dimoune donne enn reponse lor enn kitsoz avant-mem ki li ecouté, li montré ki li bete ek c’est enn la honte pou li.” Alors, kan bann ancien bizin koz avek enn dimoune ki’nn faire enn peché grave, zot bizin rod tou bann renseignement lor seki’nn arrivé. (Deut. 13:14) C’est zis lerla ki zot kapav discipline “dan enn fason juste.”

¹⁹ En plus, Parole Bondié demann bann ancien pou corrige lezot “avek douceur.” (Lire 2 Timothée 2:24-26.) Li vrai ki enn dimoune inn kapav jette deshonneur lor nom Jéhovah ek inn faire di-tort lezot innocent. Mais, si enn ancien en colere kan li pé conseil li, sa pa pou aide sa dimoune-la. Selman, kan bann ancien imite “bonté” ki Bondié ena, zot kapav faire sa dimoune ki’nn faire peché-la, repenti.​—Rom. 2:4.

20. Ki principe bann parent bizin appliké kan zot discipline zot zenfant?

²⁰ Kan bann parent elevé zot zenfant “dan discipline ek dan bann l’avertissement Jéhovah,” zot bizin applik bann principe la Bible. (Éph. 6:4) Si enn papa inn tann dire ki so garson inn faire enn mauvais kitsoz, ki li pou faire? Li bizin faire sur ki li gagne tou bann detail avant ki li decide pou corrige so garson. Ek dan enn famille Chretien, fodé pa ki enn kikenn tellement en colere ki li agir avek violence. “Jéhovah Li rempli ar l’affection ek misericorde,” ek bann ki ena responsabilité pou discipline bann jeune bizin faire zeffort pou montré sa bann mem qualité-la.​—Jacq. 5:11.

21, 22. Ki l’expression dan Psaume 119:97-104 decrire bien sentiment ki ou ena pou Parole Jéhovah?

²¹ Enn fois, enn serviteur Bondié ti dire pou ki raison li ti content la loi Jéhovah. (Lire Psaume 119:97-104.) Kan li ti etudié sa la loi-la, li ti gagne la sagesse, enn bon jugement, ek capacité pou comprend. Kan li ti obeir bann principe ki ti ena ladan, sa ti aide pou evite faire bann erreur ki ti pou faire lezot souffert. Li ti bien content pou etudié bann l’Ecriture. Li ti bien decidé pou obeir la loi Bondié ek sa ti faire li gagne bann grand bienfait dan so la vie.

²² Eski “tou l’Ecriture,” setadir la Bible en entier, ena enn grand valeur pou ou? Grace a la Bible, ou fortifié ou la foi ki Bondié pou realise so projet. So bann conseil ki’nn inspiré par Bondié protege ou ek aide ou pou evite pratik bann peché ki amenn vers la mort. Ek kan ou servi li dan enn fason efficace, ou kapav aide lezot pou marche lor chemin ki amenn vers la vie ek pou reste lor la. Anou servi bien “tou l’Ecriture” a mesure ki nou pé faire volonté nou Bondié Jéhovah, ki sage ek ki content nou.