“Pou ki Zot Pa Tombe Dans Tentation”

“Contigne veillé ek prié sans cesse, pou ki zot pa tombe dans tentation.”—MATTHIEU 26:41.

JAMAIS avant, pa finn éna enn pression aussi intense lor Jésus Christ, Garçon Bondié. Li ti pré pou termine so la-vie lor la terre. Li ti koné so bann l’ennemis ti pré pou arrête li, pou condamne li à mort, et pou couloute li lor enn poteau de supplice. Li ti koné ki chaque décision ki li prend et chaque action ki li faire, ti pou éna enn l’effet lor nom so Papa. Jésus ti koné aussi ki l’avenir l’humanité ti dans balance. Face ar tou sa pressions-la, ki Jésus ti faire?

² Li ti al dans jardin Gethsémané ensemble avec so bann disciples. Sa ti so l’endroit préféré. Là-bas, li ti éloigne li enn tipé avec so bann disciples, pou retrouve li tousel. Lerla, li ti prié so Papa pou gagne la force; li ti dévide so léker devant Li. Pa zis enn fois ki li’nn prié, mais trois fois. Malgré ki li ti parfait, Jésus ti koné ki li pa ti pou kapav tini sa pression-la li tousel.—Matthieu 26:36-44.

³ Nou’si zordi, éna beaucoup pressions lor nou. Au commencement sa brochure-la, nou ti examine bann preuves ki nou pé vive dans dernier jours sa système-la. Le monde Satan pé mette de plus en plus tentations ek stress lor nou. En tant ki serviteur vrai Bondié, tou nou bann décisions ek actions éna enn l’effet lor nom Bondié ek lor nou l’avenir éternel dans le monde nouveau ki Li’nn promette nou. Nou content Jéhovah. Nou envie “enduré ziska la fin”—soit la fin nou la-vie, soit la fin sa système-la. (Matthieu 24:13) Mais couma nou kapav vive avec l’idée ki la fin bien près? Et couma nou kapav contigne veillé?

⁴ Jésus ti conscient ki so bann disciples—so l’époque ek zordi aussi—ti pou konn beaucoup pressions. À cause sa, li ti donne sa conseil-la: “Contigne veillé ek prié sans cesse, pou ki zot pa tombe dans tentation.” (Matthieu 26:41) Ki sa bann mots-la védir pou nou zordi? Kont ki tentation ou pé bizin lutté? Et couma eski ou kapav “contigne veillé”?

Ki Tentation?

⁵ Toulé-jours, nou tou bizin résisté kont tentation pou pa rentre dans “piège le Diable.” (2 Timothée 2:26) La Bible averti nou ki Satan pé vise particulièrement bann adorateurs Jéhovah. (1 Pierre 5:8; Révélation 12:12, 17) Avec ki l’intention? Pa nécessairement pou prend nou la-vie. Parski li pa pou enn victoire pou Satan si nou mort fidèle ar Bondié. Satan koné ki de toute façon, Jéhovah pou ressuscite bann dimoune mort, dans l’heure ki Li’nn fixé.—Luc 20:37, 38.

⁶ Satan oulé détruire enn kitsoz beaucoup pli précieux ki nou la-vie—nou l’intégrité ar Bondié. Satan bien envie prouvé ki li kapav détourne tou dimoune ar Jéhovah. Donc, si li réussi faire nou vinn infidèle—li faire nou arrête prêché ou-soit li faire nou désobéir bann principes Chrétien—sa pou enn victoire pou Satan! (Éphésiens 6:11-13) À cause sa, “le Tentateur” mette bann tentations devant nou.—Matthieu 4:3.

⁷ Satan servi tou sorte qualité “tactiques.” (Éphésiens 6:11, Jewish New Testament) Li kapav tente nou avec plusieurs kitsoz: bann désirs matérialiste, la peur, bann doutes, l’amour pou plaisirs. Mais parmi so bann méthodes ki pli efficace, éna découragement. Satan veille tou ti l’occasion; li koné ki découragement kapav affaibli nou lor plan spirituel ek faire nou tenté pli facilement. (Proverbes 24:10) Oui, c’est surtout kan nou ‘moral bien bas,’ ki Satan faire nou envie abandonné.—Psaume 38:8.

⁸ Li parette ki plus la fin pé approché, éna plus kitsoz ki kapav décourage nou. Sa kapav affecté nou. (Guette l’encadré “Certains Problèmes Ki Décourage Nou.”) Kan nou découragé, quelque soit la cause, nou perdi courage. Et kan nou senti nou fatigué lor plan physique, mental ek affectif, li vinn difficile pou “ré-acheté le temps favorable” pou rempli nou bann obligations spirituel, couma par exemple étudié la Bible, assisté réunions ek prêché. (Éphésiens 5:15, 16) Pa blié, Satan envie faire ou arrête servi Jéhovah. Mais c’est pa le moment pou ralenti et pou blié ki la fin bien près! (Luc 21:34-36) Couma eski ou kapav resisté kont bann tentations ek contigne veillé? Sa quatre suggestions-la kapav aide ou.

“Prié Sans Cesse”

⁹ Compte lor Jéhovah dans la prière. Rappelle l’exemple Jésus dans jardin Gethsémané. Ki li ti faire kan li ti senti enn bel pression lor li? Li ti demann Jéhovah l’aide dans la prière. So la-prière ti tellement intense ki “so la-sueur ti vinn coumadire bann gouttes du sang ki pé coule en-bas.” (Luc 22:44) Réfléchi inpé. Jésus ti bien konn Satan. Kan li ti dans le ciel, Jésus ti observe bann tentations ki Satan servi pou piége bann serviteurs Bondié. Mais pourtant, Jésus pa’nn sous-estime bann tentations ki Satan ti kapav mette devant li. Donc, si Garçon Bondié, enn dimoune parfait, ti bizin prié Bondié pou gagne l’aide ek courage, maziné aster nou, ki quantité nou bizin faire sa!—1 Pierre 2:21.

¹⁰ Rappelle aussi, ki après ki li ti encourage so bann disciples pou “prié sans cesse,” Jésus ti dire: “Bien-sûr, l’esprit éna bon volonté, mais la chair faible.” (Matthieu 26:41) La chair kisannla Jésus pé kozé ici? Pa so la-chair en tou cas, parski li, li ti parfait; li pa ti éna okenn faiblesse. (1 Pierre 2:22) Mais so bann disciples pa ti parfait. Parski zot finn hérite l’imperfection ek péché, zot ti bien bizin l’aide pou résisté tentation. (Romains 7:21-24) Ala kifer, Jésus ti encourage zot—et tou bann Chrétiens après zot—pou prié pou résisté kont tentation. (Matthieu 6:13) Jéhovah réponn bann la-prières coumsa. (Psaume 65:2) Couma? Dans au moins deux façons.

¹¹ Premièrement, Bondié aide nou pou reconnaite bann tentations. Bann tentations Satan zot couma bann la-trappes ki finn placé dans noir. Si ou pa trouve zot, ou kapav facilement rentre dans piège. À travers la Bible ek bann publications Biblique, Jéhovah faire nou découvert bann pièges Satan, pou ki nou pa laisse nou tombe dans tentation. Pendant plusieurs l’années, bann publications ek bann programmes l’assemblée pa finn arrête mette nou en garde kont la crainte de l’homme, l’immoralité sexuel, matérialisme, ek lézot tentations Satan. (Proverbes 29:25; 1 Corinthiens 10:8-11; 1 Timothée 6:9, 10) Eski nou pa bizin reconnaissant envers Jéhovah pou sa bann avertissements-la? (2 Corinthiens 2:11) Tou sa bann avertissements-la, c’est enn façon ki Jéhovah réponn ou la-prière pou résisté kont tentation.

¹² Deuxièmement, Jéhovah réponn nou la-prière kan Li donne nou la-force pou endure bann tentations. So parole dire: “Bondié . . . pa pou laisse zot gagne enn tentation ki zot pa pou kapav supporté, mais avec tentation-la Li pou ouvert enn chemin aussi, pou ki zot kapav endure sa.” (1 Corinthiens 10:13) Si nou contigne compte lor Jéhovah, jamais Li pa pou laisse enn tentation pez lor nou à tel point ki nou népli éna la force spirituel pou resisté kont sa. Couma eski Li “ouvert enn chemin” pou nou? Li ‘donne l’esprit saint ar bann ki demann Li.’ (Luc 11:13) L’esprit saint kapav faire nou rappelle bann principes Biblique ki pou renforci nou détermination pou faire séki bon ek aide nou pou prend bann bon décisions. (Jean 14:26; Jacques 1:5, 6) Li kapav aide nou pou développe bann qualités ki nou bizin pou combatte nou bann mauvais tendances. (Galates 5:22, 23) L’esprit Bondié kapav mem faire lézot Chrétiens vinn ‘enn l’aide ki fortifié nou.’ (Colossiens 4:11) Eski nou pa reconnaissant envers Jéhovah pou sa bann façon ki Li réponn nou la-prières-la?

Nou Bizin Raisonnable Dans Séki Nou Atann

¹³ Pou nou contigne veillé, nou bizin raisonnable dans séki nou atann. À cause bann pressions ki nou gagné dans la vie, défois nou tou senti nou abatte. Mais fodé pa nou blié ki Jéhovah pa’nn promette nou enn la-vie tranquille dans sa lé-monde-la. Dans le passé aussi, bann serviteurs Bondié ti konn beaucoup situations difficile—persécution, la pauvreté, dépression, ek maladies.—Actes 8:1; 2 Corinthiens 8:1, 2; 1 Thessaloniciens 5:14; 1 Timothée 5:23.

¹⁴ Zordi, nou’si nou éna nou problèmes. Kitfois, nou pé bizin faire face ar persécution, problème économique; nou pé bizin lutte kont dépression, maladies ek lézot souffrances encore. Si Bondié ti faire miracles, Li protège nou kont tou problèmes, eski sa pa ti pou donne Satan raison pou provoque Jéhovah? (Proverbes 27:11) Oui, Jéhovah permette ki so bann serviteurs gagne tentations ek l’épreuves, ek dans certain cas, Li permette mem ki bann l’ennemis touye zot.—Jean 16:2.

¹⁵ Ki Jéhovah inn promette alors? Couma nou’nn trouvé, Li finn promette ki Li pou aide nou résisté kont bann tentations, pourvu ki nou faire Li full confiance. (Proverbes 3:5, 6) Par moyen so Parole, so l’esprit, ek so l’organisation, Li protège nou lor plan spirituel, et sa aide nou préserve nou relation avec Li. Si nou relation avec Jéhovah reste intact, eh bien mem si nou mort, nou kapav dire ki nou finn sorti gagnant. Nanrien, pa mem la mort, pa kapav empêche Bondié récompense so bann fidèle serviteurs. (Héb. 11:6) Et dans le monde nouveau ki bien près aster, Jéhovah pa pou manqué réalise le reste so bann promesses ki pou amène bénédictions pou bann ki content Li.—Psaume 145:16.

Pa Blié Bann Questions Ki Satan Ti Soulevé

¹⁶ Pou enduré ziska la fin, fodé pa nou blié bann questions important ki finn amène Bondié pou tolère la méchanceté. Si parfois, nou senti ki nou bann problèmes pé vinn enn montagne ek nou envie abandonné, anou rappelle ki Satan finn mette en doute souveraineté Jéhovah. Li finn aussi mette en doute l’attachement ek l’intégrité bann adorateurs Bondié. (Job 1:8-11; 2:3, 4) Sa bann questions-la ek façon ki Jéhovah finn décidé pou réglé sa, zot éna beaucoup plus l’importance ki nou la-vie. Couma sa?

¹⁷ Parski Bondié pé tolère la souffrance temporairement, sa finn donne lézot dimoune l’occasion pou accepté la vérité. Pense sa enn coup: Jésus inn souffert pou nou gagne la vie. (Jean 3:16) Eski nou pa reconnaissant pou sa? Mais eski nou disposé pou supporte bann difficultés encore inpé pli longtemps pou ki lézot aussi kapav gagne la vie? Pou enduré ziska la fin, nou bizin reconnaite ki sagesse Jéhovah beaucoup pli supérieur ki nou sagesse. (Isaïe 55:9) Li pou élimine la méchanceté au moment ki pli approprié pou réglé, enn fois pou tou, sa bann questions ki’nn soulevé-la ek sa, pou nou bien-être éternel. Oui, péna l’autre façon pou Bondié réglé sa bann questions-la. Péna l’injustice avec Bondié!—Romains 9:14-24.

“Vinn Proche Avec Bondié”

¹⁸ Pou nou pa blié ki la fin pré, nou bizin reste proche avec Jéhovah. Fodé jamais nou blié ki Satan pé faire tou pou détruire nou bon relation avec Jéhovah. Satan envie ki nou croire ki jamais la fin pa pou vini, et ki donc péna okenn raison pou prêche la bonne nouvelle ek pou respecté bann principes la Bible. Mais li enn “menteur ek papa mensonge.” (Jean 8:44) Nou bizin bien déterminé pou “résisté kont le Diable.” Fodé jamais nou sous-estime valeur nou relation avec Jéhovah. Avec amour, la Bible donne nou sa l’encouragement-la: “Vinn proche avec Bondié, et Li pou vinn proche ar zot.” (Jacques 4:7, 8) Couma nou kapav vinn pli proche ar Jéhovah?

¹⁹ Li bien important aussi ki nou médite dans la prière. Kan bann pressions pèse lor ou à tel point ki ou népli kapav, dévide ou léker ar Jéhovah. Si ou précis dans séki ou demann Li, ou pou trouvé facilement couma Li pou réponn ou. Peut-être Li pa pou réponn ou exactement couma ou ti pé atann. Mais, si ou désire honore Li ek garde ou l’intégrité, Li pou donne ou l’aide ki ou bizin pou ou kapav faire face ar ou bann problèmes. (1 Jean 5:14) À mesure ki ou senti ki Jéhovah pé guide ou dans ou la-vie, ou pou vinn pli proche ar Li. Li bien important aussi ki nou lire la Bible ek nou médite lor bann qualités ki Jéhovah manifesté ek lor bann façon ki Li agir. Sa qualité méditation-la faire nou konn Jéhovah pli bien; li touche nou léker ek faire nou l’amour pou Li, grandi. (Psaume 19:14) Et sa l’amour-la, plus ki lézot kitsoz, pou aide ou resisté kont tentations ek contigne veillé.—1 Jean 5:3.

²⁰ Pou reste proche ar Jéhovah, li important aussi ki nou reste proche ar nou bann frères ek soeurs. Nou pou examine sa dans dernier section sa brochure-la.

QUESTIONS D’ÉTUDE:

• Ki Jésus ti faire kan li ti ressenti enn pression intense lor li zis avant li mort, et ki li ti encourage so bann disciples pou faire? (Parag. 1-4)

• Kifer Satan pé vise surtout bann adorateurs Jéhovah, et ki bann tentations li mette devant nou? (Parag. 5-8)

• Pou résisté kont tentation, kifer nou bizin prié sans cesse (Parag. 9-12), kifer nou bizin raisonnable dans séki nou atann (Parag. 13-15), kifer fodé pa nou blié bann questions ki Satan inn soulevé (Parag. 16-17), et kifer nou bizin “vinn proche avec Bondié” (Parag. 18-20)?

[L’encadré page 25]

Certains Problèmes Ki Kapav Décourage Nou

La santé/l’âge. Enn maladie ki péna guérison ou-soit la vieillesse kapav démoralise nou parski nou pa kapav faire plus pou Jéhovah.—Hébreux 6:10.

Déception. Nou kapav découragé kan nou trouvé ki beaucoup dimoune pa accepté message Parole Bondié ki nou prêché.—Proverbes 13:12.

Sentiments infériorité. Parski enn dimoune finn maltraité pendant longtemps, li kapav pensé ki personne pa content li, mem pa Jéhovah.—1 Jean 3:19, 20.

Kan finn offense nou. Kan enn kikenn finn bien offensé par enn lot Chrétien, sa kapav tellement affecté li ki li arrête assisté réunions ek arrête prêché.—Luc 17:1.

Persécution. Bann ki pa partage ou croyances kapav faire l’opposition kont ou, persécute ou, ou-soit mem boufonn ou.—2 Timothée 3:12; 2 Pierre 3:3, 4.

[Zimage, page 26]

Jésus ti encourage nou pou “prié sans cesse” pou gagne l’aide pou résisté kont tentation