LESON 42
Ki Labib Dir lor Maryaz ek lor Lavi Selibater?
Dan sertin kiltir, bann dimounn panse ki enn dimounn pa kapav ere tanki li pa marye. Pourtan, pa tou dimounn ki marye ki ere, ek pa tou dimounn ki selibater ki malere. Dapre Labib, ki enn dimounn li marye ouswa selibater, toulede se enn kado.
1. Ki bann bienfe enn dimounn gagne kan li selibater?
Labib dir: “Seki marye . . . fer bien, me seki desid pou pa marye, fer pli bien ankor.” (Lir 1 Korintien 7:32, 33, 38.) Dan ki fason enn dimounn selibater “fer pli bien”? Enn Kretien ki selibater pena pou pran swin enn konzwin, alor an zeneral li pli lib. Sertin kapav desid pou fer plis pou Zeova. Par exanp, zot kapav al pres bon nouvel dan enn lot landrwa ouswa enn lot pei. Ek anplis, zot ena plis letan pou fer zot lamitie avek Zeova vinn pli for.
2. Ki bienfe enn dimounn gagne kan li marye sivil?
Parey kouma enn kikenn gagn bann bienfe kan li res selibater, enn kikenn ki marye kapav gagn bann bienfe. Labib dir ki “de pli bon ki enn.” (Ekleziast 4:9) Ek sa li vre sirtou pou bann Kretien ki swiv bann prinsip Labib dan zot maryaz. Bann koup ki marye sivil fer promes pou kontan, pou respekte, ek pou pran swin sakenn zot kamarad. Akoz sa, zot santi zot plis an sekirite ki de dimounn ki zis viv ansam. Anplis, maryaz kree enn lanvironnman ki stab pou elve bann zanfan.
3. Kouma Zeova konsider maryaz?
Kan Zeova ti fer premie maryaz, Li ti dir: “Enn zom pou kit so papa ek so mama, ek li pou atase ar so madam.” (Zenez 2:24) Zeova anvi ki enn misie ek so madam kontan sakenn zot kamarad, ek res ansam tanki zot ankor vivan. Li permet ki zot divorse zis kan ena enn ant zot ki’nn fer ladilter. Dan sa ka-la, Zeova donn sa dimounn ki inosan la drwa pou deside si li pou divorse ouswa non.a (Matie 19:9) Zeova pa aksepte ki enn Kretien ena plizir madam ouswa plizir misie anmemtan.—1 Timote 3:2.
ANOU GET INPE PLIS
Aprann kouma ou kapav ere ek fer Zeova plezir, ki ou marye ouswa ki ou selibater.
4. Servi ou lavi selibater dan enn bon fason
Zezi ti konsider lavi selibater kouma enn don. (Matie 19:11, 12) Lir Matie 4:23, ek apre sa, get sa kestion-la ansam:
Kouma Zezi ti servi so lavi selibater pou servi so Papa ek ed lezot?
Parey kouma Zezi, bann Kretien ki selibater kapav zwaye. Zwe VIDEO-la, ek apre sa, get sa kestion-la ansam:
Kouma bann Kretien ki selibater kapav ena enn lavi ki fer zot gagn bann bienfe?
Eski ou ti kone?
Labib pa dir apartir ki laz enn dimounn kapav marye. Me li ankouraz enn dimounn atann ki li nepli “tro zenn.” Kifer? Parski se enn peryod kot so bann dezir sexiel bien for ek sa kapav anpes li pou pran enn bon desizion.—1 Korintien 7:36, NW.
5. Swazir bien avek kisannla ou pou marye
Enn parmi bann desizion pli inportan ki ou pou bizin pran, se swazir avek kisannla ou pou marye. Lir Matie 19:4-6, 9, ek apre sa, get sa kestion-la ansam:
Kifer fode pa ki enn Kretien prese pou marye?
Labib ed nou pou kone ki bann kalite enn dimounn bizin ena pou ki li enn bon mari ouswa enn bon fam. Me seki pli inportan, se ki sa dimounn-la bizin kontan Zeova.b Lir 1 Korintien 7:39 ek 2 Korintien 6:14. Apre sa, get sa bann kestion-la ansam:
Kifer nou bizin marye zis avek enn Kretien ki servi Zeova?
Si nou marye avek enn kikenn ki pa kontan Zeova, ki ou panse Zeova pou resanti?
Si atas de zanimo ki bien diferan ansam, zot pou soufer. Dan mem fason, si enn Kretien marye avek enn kikenn ki pa servi Zeova, li pou gagn boukou difikilte
6. Ena mem fason panse ki Zeova lor maryaz
Dan lepok Izrael, sertin zom ti divors ar zot madam pou bann rezon egois. Lir Malaki 2:13, 14, 16, ek apre sa, get sa kestion-la ansam:
Kifer Zeova deteste enn divors ki pa Biblik?
Ladilter ek divors amenn boukou soufrans
Zwe VIDEO-la, ek apre sa, get sa kestion-la ansam:
Si ou’nn marye avek enn kikenn ki pa Temwin, ki ou kapav fer pou ki ou ena enn lavi maryaz ki ere?
7. Swiv bann prinsip Zeova lor maryaz
Enn dimounn kitfwa bizin fer boukou zefor pou swiv bann prinsip Zeova lor maryaz.c Me Zeova beni bann ki fer sa bann zefor-la. Zwe VIDEO-la.
Lir Ebre 13:4, ek apre sa, get sa kestion-la ansam:
Eski ou panse ki bann prinsip Zeova lor maryaz zot rezonab? Kifer ou pans sa?
Zeova atann ki bann Kretien anrezistre zot maryaz ek zot divors, parski dan laplipar bann pei, bann gouvernman atann ki bann dimounn fer sa. Lir Tit 3:1, ek apre sa, get sa kestion-la ansam:
Si ou marye, eski ou sir ki gouvernman rekonet ou maryaz?
SERTIN KAPAV DEMANDE: “Kifer bizin marye? De dimounn pa kapav zis viv ansam?”
Ki ou ti pou reponn?
SEKI NOU’NN APRANN
Pou Zeova, ki enn dimounn li marye ouswa li selibater, toulede se enn zoli kitsoz. Dan toulede ka, sa dimounn-la kapav ere ek ena enn zoli lavi, si li swiv bann prinsip Zeova.
Eski Ou Rapel?
Kouma enn dimounn kapav bien servi so lavi selibater?
Kifer Labib dir ki nou bizin marye zis avek enn Kretien ki servi Zeova?
Dapre Labib, pou ki sel rezon enn dimounn kapav divorse?
DEKOUVER
Ki savedir marye “avek enn Kretien”?
Get de video ki kapav ed ou pou pran bann bon desizion konsernan frekantasion ek maryaz.
Gete kifer enn frer ena santiman ki tou seki Zeova finn donn li, ena plis valer ki tou seki li’nn abandone.
Lor ki kitsoz enn dimounn bizin reflesi avan ki li pans pou divorse ouswa separe?
“Onor ‘Seki Bondie Finn Met Ansam’” (Latour Degard, Desam 2018)
a Not 4 explike kifer enn kikenn kapav separe ar so misie ouswa ar so madam, mem si pa finn ena adilter.
b Dan sertin kiltir, se bann paran ki swazir ar kisannla zot zanfan pou marye. Dan sa ka-la, bann bon paran pa pou les larzan ouswa ran sosial enn dimounn inflians zot swa. Me okontrer zot pou gete si sa dimounn-la kontan Zeova.
c Si ou pe viv avek enn dimounn ar ki ou pa’nn marye, se ou ki pou deside si ou pou kit dimounn-la ouswa marye ar li.