Ki ‘Don Gratwi Bondie ki Nou Pa Kapav Dekrir’ Motiv Nou

1, 2. (a) Ki “don gratwi ki nou pa kapav dekrir” inplike? (b) Ki kestion pou nou examine dan sa lartik-la?

KAN Zeova finn avoy Zezi, so garson ki Li bien kontan, lor later, Zeova finn donn nou pli gran don ki kapav existe! (Zan 3:16; 1 Zan 4:9, 10) Lapot Pol ti dir ki se enn “don gratwi ki nou pa kapav dekrir.” (2 Korintien 9:15, NW.) Kifer Pol finn servi sa lexpresion-la?

² Pol ti kone ki sakrifis Zezi se enn garanti ki tou bann promes extraordiner ki Bondie inn fer pou realize. (Lir 2 Korintien 1:20, NW.) Sa vedir ki “don gratwi ki nou pa kapav dekrir” inplik sakrifis Zezi ek tou lamour fidel ek tou bonte ki Zeova manifeste anver nou. Telman sa don-la ena valer ki li inposib pou dekrir sa dan enn fason ki nou kapav bien konpran. Ki lefe sa don spesial la bizin ena lor nou? Kouma sa don-la bizin motiv nou amezir ki nou prepar nou pou Memoryal lamor Zezi Kris, ki tom Merkredi le 23 Mars 2016?

3, 4. (a) Ki to resanti kan enn dimounn donn twa enn kado? (b) Kouma enn don spesial kapav sanz to lavi?

³ Nou bien kontan kan enn dimounn donn nou enn kado. Me sertin kado telman ena enn gran sinifikasion ouswa bien spesial, ki sa kapav sanz nou lavi. Par exanp, fer koumadir to finn partisip dan enn krim. Pinision pou sa krim-la, se lamor. Me enn kout, enn dimounn ki to pa kone dispoze pou gagn sa pinision-la dan to plas. Li dispoze mor pou twa! Ki to ti pou resanti pou enn don spesial koumsa?

⁴ Kitfwa enn don koumsa, ki spesial ek ki ranpli ar lamour, pou motiv twa pou fer bann sanzman dan to lavi. Sirman sa pou osi pous twa pou ena plis zenerozite ek plis lamour pou lezot ek pou pardonn ninport kisannla ki’nn mal azir anver twa. Pou leres to lavi, to pou anvi montre to rekonesans pou sa kikenn ki’nn sakrifie li pou twa la.

 5. Kifer laranson samem pli gran don ki Bondie inn done?

⁵ Laranson se enn don ki Bondie inn donn nou. Li ena enn pli gran valer ki don nou’nn fek mansione dan lexanp paragraf 3. (1 Pier 3:18) Reflesi lor la: Nou tou nou finn erit pese ar Adan, ek pinision pou pese se lamor. (Romin 5:12) Lamour ti motiv Zeova pou avoy Zezi lor later pou mor pou tou dimounn, pou “gout lamor pou tou dimoun.” (Ebre 2:9) Me sakrifis Zezi pou fer plis ki sa! Li pou eliminn lamor pou touletan. (Izai 25:7, 8; 1 Korintien 15:22, 26) Tou bann ki ena lafwa dan sakrifis Zezi pou viv dan lape ek zot pou ere pou touletan. Swa zot pou regne avek Kris dan lesiel, swa zot pou viv kouma bann sitwayen Rwayom Bondie lor later. (Romin 6:23; Revelasion 5:9, 10) Ki benediksion ankor nou gagne gras-a don ki Zeova done?

 6. (a) Parmi tou bann benediksion ki nou pou gagne gras-a don Zeova, lekel to pe atann? (b) Sit trwa kitsoz ki sa don ki Bondie done la pou motiv nou pou fer.

⁶ Gras-a don ki Bondie done, later pou vinn enn paradi, bann dimounn malad pou geri, ek bann mor pou resisite. (Izai 33:24; 35:5, 6; Zan 5:28, 29) Nou kontan Zeova ek so Garson pou ‘don gratwi ki pa kapav dekrir’ ki zot inn donn nou. Ki sa don-la pou motiv nou pou fer? Sa pou motiv nou (1) pou imit bien Zezi Kris, (2) pou kontan nou bann frer, ek (3) pou pardonn lezot avek tou nou leker.

7, 8. Ki santiman nou bizin ena konsernan lamour Kris, ek ki sa bizin motiv nou pou fer?

⁷ Premierman, nou bizin santi nou motive pou servi nou lavi pou onor Zezi. Lapot Pol ti dir: “Lamour ki Kris ena, met enn lobligasion lor nou.” (Lir 2 Korintien 5:14, 15, NW.) Pol ti kone ki si nou aksepte gran lamour ki Zezi ena, sa pou obliz nou, ouswa motiv nou, pou kontan Zezi ek pou donn li loner. Kan nou konpran bien seki Zeova inn fer pou nou, so lamour pou motiv nou pou viv dan enn fason ki montre ki nou donn Zezi loner. Kouma nou pou fer sa?

⁸ Nou lamour pou Zeova pou motiv nou pou imit lexanp Zezi, ek swiv bien so tras. (1 Pier 2:21; 1 Zan 2:6) Kan nou obeir Bondie ek Kris, nou montre nou lamour pou zot. Zezi ti dir: “Ninport kisannla ki ena mo bann komannman ek ki obeir zot, se limem ki kontan mwa. An retour, seki kontan mwa, mo Papa pou kontan li, ek mo pou kontan li ek mo pou fer li konn mwa bien.”​—Zan 14:21, NW; 1 Zan 5:3.

 9. Ki kalite presion nou gagne zordi?

⁹ Pandan lepok Memoryal, li bon ki nou medit lor fason ki nou pe servi nou lavi. Alor, demann tomem: ‘Dan ki domenn eski mo deza pe imit Zezi? Dan ki domenn eski mo bizin ameliore?’ Li inportan ki nou poz noumem sa bann kestion-la parski lemond anvi ki nou viv dapre so mantalite. (Romin 12:2) Si nou pa fer atansion, nou kapav arive santi nou oblize pou imit bann filozof, bann vedet sportif ouswa sinema dan sa lemond-la. (Kolosien 2:8; 1 Zan 2:15-17) Kouma nou kapav reziste kont sa presion-la?

10. Ki bann kestion nou kapav demann noumem pandan lepok Memoryal? Ki sa bann repons-la kapav motiv nou pou fer? (Get zimaz dan koumansman lartik.)

¹⁰ Li bon ki nou pran letan pandan lepok Memoryal pou reflesi lor nou labiyman, bann fim ki nou gete, lamizik ki nou ekoute, ek osi seki ena lor nou computer, nou portab, ouswa nou tablet. Demann tomem: ‘Si Zezi ti la ek ti trouv mo labiyman, eski mo ti pou anbarase?’ (Lir 1 Timote 2:9, 10, NW.) ‘Eski mo bann linz montre ki mo enn disip Kris? Eski Zezi ti pou kontan get mo bann fim? Eski li ti pou anvi ekout mo lamizik? Si Zezi ti pran mo portab ouswa mo tablet prete, eski mo ti pou anbarase pou seki li ti pou trouve? Eski li ti pou difisil pou explik Zezi kifer mo zwe sertin video game?’ Nou lamour pou Zeova bizin motiv nou pou zet tou kitsoz ki pa bon pou enn Kretien, ki li bomarse ouswa bien ser. (Zistwar Bann Apot 19:19, 20) Kan nou ti vwe nou lavi ar Zeova, nou ti promet Li ki nou pou servi nou lavi pou donn loner Zezi Kris. Akoz sa, fode pa ki nou gard nanye ki pou anpes nou imit Zezi.​—Matie 5:29, 30; Filipien 4:8.

11. (a) Kouma nou lamour pou Zeova ek pou Zezi motiv nou dan predikasion? (b) Kouma nou lamour kapav motiv nou pou ed lezot dan kongregasion?

¹¹ Nou lamour pou Zezi pou motiv nou pou prese ek ansegne avek zel. (Matie 28:19, 20; Lik 4:43) Pandan lepok Memoryal, eski to kapav organiz to program toulezour pou ki to kapav fer pionie tanporer ek pas 30 ouswa 50 er dan predikasion? Enn vef ki ena 84 an ti panse ki li pa pou kapav fer pionie tanporer akoz so laz ek so move lasante. Me bann pionie ki ti res dan so landrwa ti anvi ed li. Zot ti organiz enn transpor ek ti swazir enn teritwar apropriye kot li ti pou kapav prese. Finalman, sa frer-la inn reisi fer so 30 er. Eski to kapav ed enn kikenn dan to kongregasion pou fer pionie tanporer an Mars ouswa Avril? Li vre ki pa tou dimounn ki kapav fer pionie. Me nou kapav servi nou letan ek nou lafors pou ogmant nou servis pou Zeova. Si nou fer sa, nou pou montre, parey kouma Pol, ki lamour Zezi motiv nou. Ki kitsoz ankor lamour pou Bondie pou pous nou pou fer?

12. Lamour ki Bondie ena pou nou ankouraz nou pou fer ki kitsoz?

¹² Deziemman, lamour ki Zeova ena pou nou bizin motiv nou pou kontan nou bann frer. Lapot Zan ti ekrir: “Bann ki mo bien kontan, si se koumsa ki Bondie finn kontan nou, alor nou osi nou dan lobligasion pou kontan sakenn nou kamarad.” (1 Zan 4:7-11, NW.) Alor, si nou aksepte lamour Bondie, nou bizin kontan nou bann frer. (1 Zan 3:16) Kouma nou kapav montre nou lamour pou zot?

13. Kouma Zezi inn donn nou lexanp dan fason ki li ti kontan lezot?

¹³ Lexanp Zezi montre nou kouma nou bizin kontan lezot. Kan li ti lor later, li ti ed bann dimounn, sirtou bann ki ti ena limilite. Li ti geri bann malad, bwate, aveg, sourd ek bann ki pa kapav koze. (Matie 11:4, 5) Zezi pa ti azir kouma bann sef relizie, okontrer, li ti kontan ansegn bann dimounn ki ti anvi konn Bondie. (Zan 7:49) Li ti kontan bann dimounn ki ena limilite ek li ti fer tou seki li ti kapav pou ed zot.​—Matie 20:28.

14. Ki to kapav fer pou montre lamour pou to bann frer?

¹⁴ Lepok Memoryal se enn bon lepok pou reflesi lor fason ki to kapav ed bann frer ek ser dan to kongregasion, sirtou bann ki aze. Eski to kapav al vizit sa bann frer ek ser aze la? Eski to kapav amenn enn repa pou zot, ed zot dan zot louvraz, amenn zot renion dan to transpor, ouswa invit zot pou akonpagn twa dan predikasion? (Lir Lik 14:12-14.) Les lamour Bondie motiv twa pou montre lamour pou to bann frer!

15. Ki nou bizin rekonet?

¹⁵ Trwaziemman, lamour ki Zeova ena pou bann dimounn motiv nou pou pardonn nou bann frer ek ser. Tou dimounn finn erit pese ek lamor ar Adan. Akoz sa, personn pa kapav dir: “Mo pa bizin laranson.” Mem serviter Bondie ki pli fidel bizin sa don laranson la. Sakenn parmi nou bizin rapel ki Zeova inn bien manifeste mizerikord anver nou! Kifer li inportan ki nou rekonet sa? Nou gagn repons sa kestion-la dan enn lexanp ki Zezi finn done.

16, 17. (a) Ki nou bizin aprann ar lexanp Zezi lor lerwa ek bann esklav? (b) Apre ki to finn medit lor lexanp Zezi, ki to bien deside pou fer?

¹⁶ Zezi ti donn enn lexanp konsernan enn lerwa ki pardonn so esklav ki ti dwa li enn det 60 milyon denie. Me plitar, sa esklav-la pa ti pardonn enn lot esklav ki ti dwa li enn ti det 100 denie. Mizerikord lerwa-la ti bizin pous sa esklav-la pou pardonn so kamarad. Lerwa ti ankoler kan li’nn tande ki so esklav pa finn pardonn enn lot esklav ki ti ena zis enn ti det. Lerwa ti dir: “To move! Mo finn rey tou to det parski to finn sipliy mwa. To pa panse to ti bizin ena pitie pou to kamarad serviter parey kouma mo finn ena pitie pou twa?” (Matie 18:23-35) Parey kouma sa lerwa-la, Zeova finn pardonn nou enn gran det. Ki lamour ek mizerikord Zeova bizin motiv nou pou fer?

¹⁷ Amezir ki nou prepar nou pou Memoryal, nou kapav demann noumem: ‘Eski enn frer inn bles mwa? Eski mo gagn difikilte pou pardonn li?’ Si wi, se enn bon moman pou imit Zeova, ki “dispoze pou pardone.” (Neemia 9:17; Psom 86:5) Si nou ena rekonesans pou Zeova so gran mizerikord, nou pou montre mizerikord anver lezot ek nou pou pardonn zot avek tou nou leker. Si nou pa kontan nou bann frer ek pa pardonn zot, nou pa kapav atann ki Zeova pou kontan nou ek pou pardonn nou. (Matie 6:14, 15) Kan nou pardonn lezot, blesir ki nou finn gagne pa pou disparet enn sel kout, me li pou ed nou pou konn enn lavenir pli zwaye.

18. Kouma lamour Bondie finn ed enn ser pou siport linperfeksion enn lot ser?

¹⁸ Li kapav difisil pou siport linperfeksion nou bann frer ek ser. (Lir Efezien 4:32; Kolosien 3:13, 14, NW.) Enn parmi nou bann ser ki’nn reisi fer sa apel Lily.^[1] (Get not alafin lartik.) Li ti ed enn vev ki apel Carol. Lily ti amenn Carol partou kot Carol ti bizin ale, ti ed li pou aste bann kitsoz ki li ti bizin, ek ti fer boukou lezot kitsoz pou li. Malgre tou seki Lily ti fer, Carol touletan ti kritik li, ek parfwa sa pa ti fasil pou Lily ed li. Me Lily ti konsantre lor bann bon kalite ki Carol ti ena ek li ti ed Carol pandan plizir lane, ziska ki Carol ti tom bien malad ek ti’nn mor. Mem si li ti difisil pou Lily ed Carol, Lily dir: “Mo pe atann avek inpasians pou retrouv Carol kan pou ena rezireksion. Mo anvi konn li kan li pou vinn parfe.” Li kler ki lamour Bondie kapav motiv nou pou siport nou bann frer ek ser ek pou mazinn lepok kot linperfeksion tou dimounn pou disparet pou touletan.

19. Kouma don Bondie ki gratwi ek ki nou pa kapav dekrir, kapav motiv twa?

¹⁹ Zeova vremem finn donn nou enn “don gratwi ki nou pa kapav dekrir.” Anou touletan montre ki nou apresie sa! Lepok Memoryal, se enn bon lepok pou medit lor tou seki Zeova ek Zezi inn fer pou nou. Ki zot lamour motiv nou pou imit bien Zezi, pou montre lamour pou nou bann frer, ek pou pardonn nou bann frer avek tou nou leker.