Enn Paradis—Pou Ou?

“Mo konn enn zom en union avec Christ ki . . . ti enlevé pou al dans paradis.”—2 CORINTHIENS 12:2-4.

 1. Ki bann promesses dans la Bible touche beaucoup dimoune?

PARADIS. Eski ou rappelle séki ou ti ressenti kan, pou la première fois, ou ti tann koz promesse ki Bondié inn faire pou établi enn paradis lor la terre? Rappelle, kan ou ti aprann ‘ki lizié bann aveugles pou ouver, zoreilles bann sourdes pou débouché, ek désert pou vinn enn joli l’endroit bien fleuri’; kan ou ti aprann sa prophétie ki koz lor le loup avec enn l’agneau ek enn ti-cabri avec enn léopard; ek kan ou ti lire ki bientôt tou bann dimoune ki ou content ek ki’nn mort, pou ressuscité avec l’espoir pou vive dans sa paradis-la, eski sa pa ti faire ou enn grand plaisir?—Isaïe 11:6; 35:5, 6; Jean 5:28, 29.

2, 3. (a) Kifer ou kapav dire ki ou l’espérance ki basé lor la Bible, li bien fondé? (b) Ki l’autre fondement nous éna pou garde nou l’espérance?

² Ou l’espérance li bien fondé. Ou éna bann bon raisons pou croire dans bann promesses la-Bible concernant paradis. Par exemple, ou éna confiance dans bann paroles ki Jésus ti dire sa malfaiteur ki ti à côté li lor poteau: “To pou avec moi dans Paradis.” (Luc 23:43) Ou faire confiance sa promesse-la: “D’après so promesse, nous pé atann nouveau le ciel ek enn nouveau la-terre, kot pou éna la justice.” Ou éna aussi confiance ki Bondié pou souye tou larme dans nou lizié; la mort népli pou existé; deuil, cri, douleurs pou disparaite. Sa montré nous ki enn jour paradis pou retabli lor la terre!—2 Pierre 3:13; Révélation 21:4.

³ Mais ou l’espérance pou sa Paradis-la éna enn l’autre fondement encore. Sa fondement-la touche tou bann Chrétiens dans le monde entier depuis asterla même. Ki été sa? Eh bien Bondié inn fini établi enn paradis spirituel ek li’nn mette so peuple ladan. Sa expression “paradis spirituel”-la kapav parette abstrait, inpé difficile pou comprend, mais pourtant la Bible ti prédire sa, ek li existé vrai-même.

Enn Vision lor Paradis

 4. Ki vision 2 Corinthiens 12:2-4 mentionné, ek kisannla ki apparemment ti gagne sa vision-la?

⁴ Note séki l’apôtre Paul ti écrire, concernant sa paradis spirituel-la: “Mo konn enn zom en union avec Christ ki ti enlevé, pareil couma li ti été, pou al ziska troisième lé-ciel. Oui, mo konn enn zom coumsa—si pa avec so lé-corps ou-soit sans so lé-corps, mo pa koné, Bondié ki koné—li ti enlevé pou al dans paradis ek li ti tann bann paroles ki pa kapav exprimé ek ki enn zom péna droit dire.” (2 Corinthiens 12:2-4) Sa passage-la vinn zis après ki li pé défann so position en tant ki apôtre. En plus, la Bible pa koz okenn l’autre dimoune ki finn konn enn expérience coumsa, ek c’est Paul ki ti pé raconte nous sa. Donc, c’est kitfois Paul li-même ki finn gagne sa vision-la. Dans vision ki Jéhovah ti faire li gagné, dans ki “paradis” Paul ti rentré?—2 Corinthiens 11:5, 23-31.

 5. Ki Paul pa’nn trouvé dans so vision; donc ki qualité “paradis” sa ti été?

⁵ Contexte sa bann verset-la montré ki sa expression “troisième lé-ciel”-la, pa représente l’atmosphère autour la terre, ni l’espace dans l’univers, ni bann l’univers parallèle couma certain astrophysiciens supposé. La Bible souvent utilise sa chiffre trois-la pou mette l’emphase, pou représente degré, ou-soit pou donne plus la force. (Ecclésiaste 4:12; Isaïe 6:3; Matthieu 26:34, 75; Révélation 4:8) Donc, séki Paul ti trouvé en vision ti bien élevé, ti mérite la gloire. C’était enn kitsoz spirituel.

 6. Couma l’histoire éclaire nous lor séki Paul inn trouvé?

⁶ Bann prophéties la-Bible ki ti écrire avant, éclaire nous lor sa sujet-la. Après ki so peuple dans l’antiquité ti montré li infidèle, Bondié ti’nn prend décision pou laisse bann Babyloniens attaque Juda ek Jérusalem. Selon chronologie Biblique, c’est en 607 A.N.L., ki sa finn réalisé. D’après la prophétie, la terre d’Israël ti pou reste abandonné pendant 70 ans. Après sa Bondié ti pou permette bann Juifs ki finn repenti pou retourne dans zot pays ek rétabli vrai l’adoration. Sa finn arrivé à partir 537 A.N.L. (Deutéronome 28:15, 62-68; 2 Rois 21:10-15; 24:12-16; 25:1-4; Jérémie 29:10-14) Mais, ki ti arrivé ar la terre-la li-même? Pendant sa 70 l’années-la, li finn vinn enn désert, enn l’endroit kot mauvais l’herbe finn poussé, kot bann chacals finn vinn resté. (Jérémie 4:26; 10:22) Pourtant, zot ti gagne sa promesse la: “Jéhovah pa pou manqué pou console Sion. Oui, Li pou console tou so bann l’endroit ki’nn dévasté. Li pou faire so désert vinn couma jardin d’Éden ek so bann la-plaines kot nanyin pa poussé pou vinn couma jardin [ou-soit Paradis, La Septante] Jéhovah.”—Isaïe 51:3; note.

 7. Ki ti pou arrivé après 70 ans désolation?

⁷ Tou sa finn arrivé après sa 70 ans désolation-la. Grâce à bénédiction Bondié, bann conditions finn amélioré. Essaye imagine sa dans ou l’esprit: “Désert ek bann l’endroit sec pou content, ek la plaine kot nanyin pa poussé, pou dans la joie ek pou bourgeonné couma safran. Oui, sans faute li pou bourgeonné, ek vrai-même li pou dans la joie ek c’est dans la joie ki li pou crié. . . . Séki boiteux pou sauté couma enn cerf ek la langue bann ki pa kapav kozé, zot pou crié avec la joie. Parski de l’eau pou sorti dans bann déserts, ek bann grand la-rivières pou coulé dans bann la-plaines kot nanyin pa poussé. Ek kot ti éna la terre sec, c’est enn grand lac ki pou éna, ek kot pa ti éna di-tout de l’eau, pou éna bann la-sources. Là kot bann chacals ti pé resté, kot bannla ti pé reposé, pou éna l’herbe vert avec bann roseaux ek bann plantes papyrus.”—Isaïe 35:1-7.

Enn Peuple Ki’nn Rétabli ek Transformé

 8. Couma nous koné ki Isaïe chapitre 35 applique ar bann dimoune?

⁸ C’est enn vrai transformation, pa vrai? Li ti enn désolation, li’nn vinn enn paradis. Et pourtant, sa ek encore lézot prophéties ki nous kapav faire confiance, montré ki bann dimoune aussi pou changé, pareil couma enn la-terre kot nanyin pa poussé, inn vinn enn jardin bien fleuri. Kifer nous kapav dire sa? Eh bien, Isaïe ti pé concentré lor “bann ki Jéhovah finn pardonné,” ki ti pou retourne dans zot pays “avec enn cri de joie,” ek zot pou gagne ‘l’allégresse ek la joie.’ (Isaïe 35:10) Sa pa ti applique ar la terre au sens littéral mais ar bann dimoune. Après, dans enn l’autre place encore, Isaïe ti prédire ki le peuple pou rétabli à Sion: “Pou appelle zot bann grand zarbres de justice, bann plantations Jéhovah . . . Parski pareil couma la terre produire so germe, . . . c’est la justice ek bann louanges ki Jéhovah pou faire germé devant tout bann nations.” Concernant peuple Bondié, Isaïe ti aussi dire: “Jéhovah, sans faute, pou conduire toi touletan . . . , ek Li pou redonne to lézo la vie; ek to pou vinn couma enn jardin bien arrosé.” (Isaïe 58:11; 61:3, 11; Jérémie 31:10-12) Donc, pareil couma ti pou éna bann améliorations lor la terre au sens littéral, ti pou éna aussi bann changements en rapport avec le peuple Juif ki finn rétabli.

 9. Ki “paradis” Paul ti trouvé, ek kan sa ti’nn accompli?

⁹ Séki finn arrivé dans l’histoire concernant bann Juifs aide nous pou comprend vision ki Paul ti gagné. Sa ti pou inclure la congrégation Chrétienne, ki Paul ti désigné couma “bann plantations Bondié” ek ki ti pou bizin rapporte beaucoup fruits. (1 Corinthiens 3:9) Kan eski sa vision-la ti pou accompli? Paul ti appelle séki li’nn trouvé, enn ‘révélation’ c’est-à-dire enn kitsoz ki ti pou arrivé dans l’avenir. Li ti koné ki après so la-mort, l’apostasie ti pou prend enn grand l’ampleur. (2 Corinthiens 12:1; Actes 20:29, 30; 2 Thessaloniciens 2:3, 7) Pendant ki bann apostats ti pé dominé ek coumadire zot ti pé touffe bann vrai Chrétiens, ti difficile pou compare sa bann Chrétiens-la ar enn jardin bien fertile. Et pourtant l’heure ti pou vini kot vrai l’adoration ti pou élevé encore. Bondié ti pou retabli so peuple pou ki ‘bann justes kapav brillé aussi fort ki soleil dans royaume zot Papa.’ (Matthieu 13:24-30, 36-43) C’est exactement séki finn arrivé, dé-trois l’années après ki royaume Bondié finn établi dans le ciel. Dans les dizaine d’années ki finn passé après, li finn vinn bien évident ki le peuple Bondié pé jouir enn paradis spirituel, ki Paul ti’nn trouvé dans sa vision-la.

10, 11. Kifer nous kapav dire ki nous dans enn paradis spirituel même si nous imparfait?

¹⁰ Bien-sûr, étant donné ki nous imparfait, de temps en temps kapav éna bann problèmes entre nous, pareil couma bann Chrétiens dans l’époque l’apôtre Paul. (1 Corinthiens 1:10-13; Philippiens 4:2, 3; 2 Thessaloniciens 3:6-14) Mais même sa, réfléchi enn coup lor sa paradis spirituel ki nous pé jouir asterla. Comparé avec l’état dans ki nous ti été avant ki nous konn Jéhovah, eski nous pa finn guéri spirituellement asterla? Ek concernant la nourriture spirituel, eski nous pa ti affamé avant, ek asterla nous pé gagne la nourriture en abondance? Au lieu ki nous lutté couma dans enn pays spirituel ki ressemblé enn désert, le peuple Bondié pé konn So l’approbation ek enn quantité bénédictions. (Isaïe 35:1, 7) Alors ki avant nous pa ti pé trouve clair sur le plan spirituel, pareil couma enn prisonnier dans enn cachot noir, asterla nous pé trouve la lumière la-liberté ek faveur Bondié. Beaucoup ti sourde dans le sens ki jamais zot finn tann bann prophéties la Bible; asterla zot pé tendé ek zot pé comprend les Saintes Écritures. (Isaïe 35:5) Par exemple, éna bann millions Témoins de Jéhovah autour la terre ki finn étudié la prophétie Daniel, verset par verset. Après sa zot finn examine en profondeur chaque chapitre livre Isaïe. Eski sa nourriture spirituel ki rafraîchi nous-la pa enn preuve ki nous dans enn véritable paradis spirituel?

¹¹ Pense aussi, bann changements personnalité ki bann dimoune sincères dans tou races finn apporté. Zot finn faire zot mieux pou comprend ek applique parole Bondié dans zot la-vie. En fait, zot finn faire zefforts pou change bann défauts ki faire zot ressemblé bann zanimaux. Kitfois ou’si ou finn faire zeffort pou surmonte certain vilain défauts ek ou finn gagne bann bon résultats; ou bann frères ek soeurs spirituel zot aussi zot finn faire pareil. (Colossiens 3:8-14) Alors, kan ou pé fréquente enn congrégation Témoin de Jéhovah, ou en compagnie bann dimoune ki’nn vinn pli paisible, ek pli agréable. Biensûr, zot pankor vinn parfait, mais certainement nous pa kapav compare zot ar bann lions féroce ou bann zanimaux rapace. (Isaïe 35:9) Sa l’association spirituel dans calme ek dans la paix-la, ki li montré? Li montré clairement ki nous pé jouir enn condition spirituel ki vrai-même nous kapav appelle enn paradis spirituel. Ek nou paradis spirituel, c’est enn avant-goût d’enn paradis terrestre ki nous pou kapav hérité si nous reste fidèle ar Bondié.

12, 13. Ki nous bizin faire pou nous reste dans nou paradis spirituel?

¹² Éna enn l’autre kitsoz ki fodé pa nous blié. Bondié ti dire bann Israélites: “Zot bizin garde tou commandement ki mo pé commande zot zordi, pou ki zot vinn fort ek zot kapav rentré ek prend sa pays-la pou zot.” (Deutéronome 11:8) Lévitique 20:22, 24, mentionne sa même pays-la, li dire: “Zot bizin garde tou mo la-loi ek tou mo bann décisions judiciaire ek pratique zot, pou ki sa pays ki mo pou faire zot rentré-la pa vomi zot. À cause sa mo dire zot: ‘Zot, de zot côté, zot pou prend sa pays-la, ek moi, de mo côté, mo pou donne zot sa pays-la, enn pays kot du lait ek du miel pé coulé.’ ” Oui, zot héritage de la Terre Promise ti dépann lor enn bon relation avec Bondié Jéhovah. C’était parski bann Israélites pa finn obéir li, ki Bondié ti permette bann Babyloniens vaincre zot ek tire zot dans zot pays.

¹³ Éna beaucoup kitsoz dans nou paradis spirituel ki kapav faire nous plaisir. Par exemple, so l’environnement joli pou guetté, li enn calmant pou nou nerfs. Nous vive en paix avec bann Chrétiens ki’nn faire beaucoup zefforts pou débarrasse zot bann défauts ki ti faire zot ressemblé bann zanimaux. Zot faire zeffort pou zot vinn gentil ek aide lézot. Mais, pou nous reste dans sa paradis spirituel-la, nous bizin faire plus ki zis éna enn bon relation avec sa bann dimoune-la. Nous bizin éna enn bon relation avec Jéhovah ek faire so volonté. (Mika 6:8) Nou’nn rentre dans sa paradis spirituel-la avec nou propre volonté, mais nous kapav al à la dérive—ou-soit Jéhovah kapav mette nous dehors, si nous pa faire zeffort pou préserve nou relation avec Li.

14. Ki pou aide nous reste dans sa paradis spirituel-la?

¹⁴ Enn facteur important ki pou aide nous, c’est si nous contigné fortifié nous par moyen Parole Bondié. Note séki Psaume 1:1-3 dire dans enn langage symbolique: “Heureux sa dimoune ki pa finn marche dans conseils bann méchants . . . Mais so plaisir li dans la loi Jéhovah, ek li lire li à voix basse la-nuit li-jour. Vraiment, li pou vinn pareil couma enn pié ki’nn planté près kot bann ti la-rivières, et ki rapporte fruits dans so saison. So feuillage jamais pa pou sec, et tou séki li faire, pou réussi.” Séki nous ena encore, c’est bann publications ki basé lor la Bible, ki l’esclave fidèle et avisé donne nous pou nourri nous dans sa paradis spirituel-la.—Matthieu 24:45-47.

Renforci Ou Vision lor Paradis

15. Kifer Moïse pa finn réussi conduire bann Israélites dans la Terre Promise, mais ki li finn réussi trouvé?

¹⁵ Anou considère enn l’autre avant-goût lor paradis. Après ki Israël ti tourne en rond dans désert pendant 40 ans, Moïse ti conduire zot dans les Plaines de Moab, ki ti trouve à l’est la Rivière Jourdain. À cause enn erreur ki Moïse ti commette dans le passé, Jéhovah ti’nn décidé ki Moïse pa ti pou dirige bann Israélites kan zot ti pou traverse le Jourdain. (Nombres 20:7-12; 27:12, 13) Moïse ti’nn supplie Jéhovah: “S’il-te-plaît, laisse moi traversé, ek guette sa bon pays ki trouve l’autre côté Jourdain-la.” Mais même si li pa ti pou rentre dans la Terre Promise, kan li’nn monte lor Montagne Pisga ek li’nn trouve différent partie sa pays-la, Moïse finn bizin constaté ki vrai-même c’était enn “bon pays.” D’après ou couma sa pays-la ti été?—Deutéronome 3:25-27.

16, 17. (a) Ki différence éna entre la Terre Promise ki ti existé longtemps ek séki li été asterla? (b) Ki permette nous croire ki la Terre Promise ti enn temps, couma enn paradis?

¹⁶ Si ou base ou lor séki kapav trouvé dans sa région-la asterla, ou nek pou trouve du sable, bann régions sec, bann déserts plein avec roche, kot tou grillé dans soleil. Mais, beaucoup kitsoz montré ki en général sa région-la ti bien différent dans les temps Biblique. Dans journal Scientific American, enn agronome, Dr Walter C. Lowdermilk inn expliqué ki sa pays-la finn “détérioré parski li finn trop exploité pendant mille ans.” Sa agronome-la finn écrire: “Si le ‘désert’ finn remplace sa pays ki ti bien fertile-la, c’est bann zom ki responsable, pa la nature.” En fait, bann l’études ki li finn faire montré ki “enn temps, sa pays-la ti enn paradis bien fertile.” Li clair alors ki c’est à cause bann abus ki bann humains inn faire, sa “paradis bien fertile-la” finn détérioré.a

¹⁷ Kan ou réfléchi lor séki ou finn lire dans la Bible, ou’si ou pou tire sa conclusion logique ki sa pays-la ti vrai-même couma enn paradis. Rappelle ou séki Jéhovah ti promette à travers Moïse: “Sa pays kot zot pou passé ek ki zot pou prend pou zot-la, c’est enn pays kot éna montagne, vallée ek la plaine. Li boire de l’eau la pluie ki sorti dans le ciel; enn pays ki Jéhovah zot Bondié prend soin.”—Deutéronome 11:8-12.

18. Dans ki façon Isaïe 35:2 ti donne bann Israélites exilé, enn l’idée couma paradis ti pou été?

¹⁸ La Terre Promise so verdure ti tellement joli ek fertile ki nek éna pou mentionne zis dé-trois l’endroits, et toute de suite nous faire vision bann conditions ki ressemblé paradis. La prophétie d’Isaïe chapitre 35, ki finn éna so premier accomplissement kan bann Israélites ti retourne de Babylone, montré nous sa clairement. Isaïe ti prédire: “Sans faute li pou bourgeonné, ek vrai-même li pou dans la joie ek c’est dans la joie ki zot pou crié. Pou bizin donne li la gloire du Liban, ek la splendeur du Carmel ek du Sharôn. Et éna ki pou trouve la gloire Jéhovah, la splendeur nou Bondié.” (Isaïe 35:2) Le fait ki faire référence ar Liban, Carmel, ek Sharôn, finn bizin faire bann Israélites pense enn paysage bien joli ek bien reposant.

19, 20. (a) Décrire l’ancien région Sharôn. (b) Cite enn façon couma nous kapav fortifié nou l’espérance pou enn Paradis?

¹⁹ Anou examine le Sharôn, enn la-plaine maritime ki trouve entre bann collines Samarie ek la Grande Mer, c’est-à-dire la Méditerranée. (Guette photo page 10.) Li ti bien connu pou so beauté ek so fertilité. Étant donné ki li bien arrosé, li ti enn l’endroit convenable pou l’élevage, mais ti éna aussi bann la-forêts de chêne dans la région du nord. (1 Chroniques 27:29; Chant de Salomon 2:1, note; Isaïe 65:10) Donc Isaïe 35:2 ti prédire enn rétablissement ek enn la-terre magnifique ki pou fleuri avec splendeur, ki pou vinn couma enn paradis. Sa prophétie-la ti pé désigne aussi enn magnifique paradis spirituel, pareil couma séki Paul plitar ti trouvé dans so vision. Finalement, kan nous compare sa prophétie-la avec lézot prophéties, sa fortifié nou la-foi dans enn paradis terrestre pou l’humanité.

²⁰ Tandis ki nous pé habite dans sa paradis spirituel-la, nous kapav augmente nous l’appréciation ek nou l’espérance ki la terre pou ré-vinn enn paradis. Couma? Kan nous approfondi nou compréhension lor séki nous lire dans la Bible. Bann descriptions ek bann prophéties la-Bible décrire souvent bann régions bien précis. Eski ou ti pou content gagne enn l’idée pli clair lor sa bann l’endroits-la? Kot zot ti trouvé, ek ki rapport zot ti éna avec lézot régions? Dans prochain l’article, nous pou trouvé couma ou kapav faire sa ek tire profit.

[Note]

Eski Ou Rappelle?

• Ki “paradis” l’apôtre Paul ti trouvé en vision?

• Ki premier accomplissement Isaïe chapitre 35 finn koné ek ki rapport sa ti éna avec vision ki l’apôtre Paul ti gagné?

• Couma nous kapav augmente nou l’appréciation pou nou paradis spirituel ek pou nou l’espérance pou enn paradis terrestre?

[Zimage, page 10]

La Plaine Sharôn, enn région bien fertile dans la Terre Promise

[Credit Line]

Pictorial Archive (Near Eastern History) Est.

[Zimage, page 12]

Moïse ti comprend ki c’était enn “bon pays”