LESON 28
Montre Ou Rekonesans pou Seki Zeova ek Zezi Inn Fer pou Ou
Ki ou resanti kan ou kamarad donn ou enn zoli kado? Kitfwa ou pou bien kontan ek ou pou anvi montre ou kamarad ki kantite ou apresie sa kado-la. Parey kouma nou finn trouve, Zeova ek Zezi finn donn nou pli zoli kado ki ena: Laranson. Kouma nou kapav montre zot nou rekonesans pou sa zoli kado-la?
1. Kouma nou kapav montre nou rekonesans anver Bondie ek Zezi Kris pou seki zot finn fer pou nou?
Labib promet nou ki “tou dimoun ki krwar dan [Zezi]” kapav viv pou touletan. (Zan 3:16) Me ki savedir krwar dan Zezi? Savedir ki nou montre nou lafwa dan bann desizion ki nou pran ek par bann kitsoz ki nou fer. (Zak 2:17) Sa pou fortifie nou lamitie avek Zezi ek avek so Papa, Zeova.—Lir Zan 14:21.
2. Ki levennman spesial kapav ed nou pou montre nou rekonesans pou seki Zeova ek Zezi finn fer pou nou?
Lanwit avan so lamor, Zezi finn montre so bann disip enn lot fason pou montre zot rekonesans pou sakrifis ki li ti pou fer. Li ti etabli enn levennman spesial ki Labib apel “repa Lesegner.” Nou apel sa levennman-la osi Komemorasion lamor Zezi Kris. (1 Korintien 11:20) Zezi ti etabli sa levennman-la pou ki so bann zapot, ek bann lezot vre Kretien ki pou vini apre zot, kapav kontign rapel ki li finn donn so lavi pou nou. Konsernan sa levennman-la, Zezi ti donn sa komannman-la: “Fer sa, an mo memwar.” (Lik 22:19) Kan ou asiste Komemorasion, ou montre ou rekonesans pou gran lamour ki Zeova ek Zezi ena pou nou.
ANOU GET INPE PLIS
Nou pou get bann lezot fason kouma nou kapav montre nou rekonesans pou gran lamour ki Zeova ek Zezi finn montre anver nou. Nou pou get osi kifer Komemorasion lamor Zezi Kris li inportan.
3. Seki nou kapav fer pou montre nou rekonesans
Mazine ki enn dimounn inn sap ou lavi. Eski ou pou bliye seki sa dimounn-la inn fer pou ou? Ouswa ou pou trouv bann fason pou montre ou rekonesans pou seki li’nn fer pou ou?
Gras-a Zeova, nou ena posibilite pou viv pou touletan. Lir 1 Zan 4:8-10, ek apre sa, get sa bann kestion-la ansam:
Kifer sakrifis Zezi li enn kado spesial?
Ki ou resanti pou seki Zeova ek Zezi finn fer pou ou?
Kouma nou kapav montre nou rekonesans pou seki Zeova ek Zezi finn fer pou nou? Lir 2 Korintien 5:15 ek 1 Zan 4:11; 5:3. Apre ki ou’nn lir sak verse, get sa kestion-la ansam:
Dapre sa verse-la, ki nou kapav fer pou montre nou rekonesans?
4. Imit Zezi
Enn lot fason ki nou kapav montre nou rekonesans, se kan nou imit Zezi. Lir 1 Pier 2:21, ek apre sa, get sa kestion-la ansam:
Kouma ou kapav montre ki ou pe swiv bien lexanp Zezi?
Zezi ti kontan Parol Bondie, ti pres bon nouvel, ek ti ed lezot
5. Asiste Komemorasion lamor Zezi Kris
Lir Lik 22:14, 19, 20, pou kone seki ti pase pandan premie Repa Lesegner. Apre sa, get sa bann kestion-la ansam:
Ki ti arive pandan Repa Lesegner?
Ki dipin ek divin reprezante?—Get verse 19 ek 20.
Zezi ti anvi ki so bann disip fer Repa Lesegner enn fwa par an, pou laniverser so lamor. Se akoz sa, ki bann Temwin Zeova zwenn enn fwa par an pou rapel lamor Zezi Kris, parey kouma Zezi inn demann nou pou fer. Pou aprann plis lor sa renion bien inportan la, zwe VIDEO-la. Apre sa, get sa kestion-la ansam:
Ki pase pandan Komemorasion lamor Zezi?
Dipin ek divin se bann sinbol. Dipin reprezant lekor parfe ki Zezi inn sakrifie pou nou. Divin reprezant so disan
SEKI NOU’NN APRANN
Nou montre nou rekonesans pou seki Zezi inn fer pou nou, kan nou krwar dan li ek kan nou asiste Komemorasion so lamor.
Eski Ou Rapel?
Ki savedir krwar dan Zezi?
Kouma ou ti pou kontan montre ou rekonesans pou seki Zeova ek Zezi finn fer pou ou?
Kifer li bien inportan ki nou asiste Komemorasion lamor Zezi Kris?
DEKOUVER
Ki kitsoz lamor Zezi Kris bizin pous nou pou fer?
Aprann plis lor lafwa ek kouma nou kapav montre nou lafwa.
“Exers To Lafwa dan Bann Promes Zeova” (Latour Degard, Oktob 2016)
Enn madam rakonte ki lefe sakrifis Zezi Kris finn ena lor so lavi. Lir so zistwar: « Je me sens pure et j’aime la vie ».
“Labib Sanz Bann Dimounn” (Latour Degard, 1e Out 2011, an Franse)
Aprann kifer ena zis enn tigit dimounn ki manz dipin ek bwar divin pandan Komemorasion lamor Zezi.