Anou ena “beaucoup compassion”

JAMAIS autant dimoune inn bien bizin enn l’aide rempli avek compassion couma zordi kot zot bizin faire face ar la famine, la maladie, la misere, crime, bann la-guerre civil ek bann catastrophe naturel. Enn dimoune ki ena compassion, c’est enn dimoune ki comprend souffrance ek malheur lezot ek ki aussi envie diminué zot souffrance. Pareil couma bann rayon chaud soleil faire di-bien kan nou pé gagne frais, compassion aussi kapav reconforte enn dimoune ki desesperé, soulage douleur, ek remonte moral bann dimoune ki dan probleme.

Nou kapav montré compassion par nou bann action ek nou bann parole kan nou prend compte lezot, ek nou là kan zot bizin nou. Fodé pa ki nou montré compassion zis envers nou famille, nou bann camarade ek nou bann connaissance. Nou kapav montré compassion envers lezot dimoune, mem envers bann dimoune ki nou mem pa koné. Dan so Sermon lor montagne, Jésus ti demandé: “Si zot content bann ki content zot, ki recompense zot ena?” Jésus Christ, ki ti ena compassion ti aussi dire: “Alors, tou kitsoz ki zot envie bann dimoune faire pou zot, zot aussi, zot bizin faire pareil pou bannla.”—Matthieu 5:46, 47; 7:12.

Ou kapav trouve sa bann parole ki appel Règle d’or-la, dan la Bible. Beaucoup dimoune d’accord ki la Bible, sa-mem pli bon guide ki kapav explik nou couma pou montré compassion. Souvent la Bible faire nou comprend ki nou ena l’obligation pou aide bann ki, pou kit raison, pa kapav sorti dan zot probleme par zot-mem. La Bible presente Jéhovah, sa Kikenn ki’nn faire ecrire sa livre-la, ek aussi nou Createur, couma pli grand l’exemple compassion ki ena.

Par exemple, nou lire: “[Bondié] defann droit bann orphelin ek bann veuve, [ . . . ] Li content bann ki’nn quitte zot pays pou vinn reste dan enn lot pays ek Li donne zot di-pain ek linge.” (Deutéronome 10:18, Nouvelle Bible Segond) La Bible presente Jéhovah couma sa Kikenn ki “applik jugement pou bann ki victime l’injustice-la, sa Kikenn ki donne di-pain bann ki gagne faim-la.” (Psaume 146:7) Concernant bann dimoune ki’nn quitte zot pays pou vinn reste dan enn lot pays ek ki defavorisé, Jéhovah ti donne sa l’ordre-la: “Zot bizin considere sa etranger-la . . . couma enn dimoune ki finn né parmi zot; ek to bizin content li couma to-mem.”—Lévitique 19:34.

Mais, li pa dan nature tou dimoune pou ena compassion. L’apotre Paul ti ecrire bann chretien ki ti reste dan la ville Colosses: “Tire vié personnalité lor zot ensam avek so bann pratik, ek mette nouveau personnalité, ki grace a la connaissance exact pé contigne changé dapré ressemblance sa Kikenn ki finn crée li-la . . . Couma bann dimoune ki Bondié inn choisir, bann dimoune ki saint ki Li content, mette lor zot bann tendre l’affection compassion.”—Colossiens 3:9, 10, 12.

Alors, nou bizin faire zeffort pou developpe compassion. Compassion forme partie dan “nouveau personnalité” ki bann chretien bizin mette lor zot. Paul ti reste dan ancien la ville Rome kot bann dimoune ti sans pitié. Li ti encourage so bann compagnon pou faire bann grand changement dan zot personnalité pou ki zot kapav vinn bann dimoune ki pli comprend lezot dimoune, ki ena plus compassion.

Pouvoir ki compassion ena

Certain pensé ki enn dimoune ki ena compassion, c’est enn dimoune faible ek fragile. Eski sa li vrai?

Pa ditou! La force ki ena derriere vrai compassion, c’est l’amour profond ki sorti kot Bondié, ki Li-mem pli grand l’exemple l’amour. “Bondié Li l’amour.” (1 Jean 4:16) C’est avek raison ki appel Jéhovah “Papa ki ena beaucoup misericorde ek Bondié ki donne tou consolation.” (2 Corinthiens 1:3) L’expression ki traduire par “beaucoup misericorde” vedir surtout “pitié, compassion pou bann malheur lezot.” Jéhovah mem “bon envers bann ki pena reconnaissance ek ki mauvais”!—Luc 6:35.

Nou Createur attann ki nou aussi nou montré sa bann qualité-la, par exemple compassion. Nou lire dan Mika 6:8: “Li finn dire toi, dimoune ki’nn faire ar la poussiere, ki kitsoz ki bon. Ek ki Jéhovah pé demann toi, sinon pou pratik la justice, pou content la bonté?” Dan Proverbes 19:⁠22, nou lire: “Kitsoz ki desirable dan dimoune ki’nn faire ar la poussiere, c’est so l’amour fidele.” Jésus Christ, Garson Bondié ki ti reflete net personnalité so Papa, li aussi li ti dire so bann disciple: “Contigne ena misericorde, pareil couma zot Papa Li ena misericorde.” (Luc 6:36) La Bible de Jérusalem traduire sa conseil-la coumsa: “Ena compassion, pareil couma zot Papa ena compassion.”

Nou ena bann bon raison pou ena compassion, parski compassion li ena pouvoir pou faire nou gagne bann grand recompense. Souvent nou trouvé ki seki ecrire dan Proverbes 11:17, li vrai: “Enn dimoune ki ena l’amour fidele, li agir dan enn fason kot li faire di-bien so prop nâme.” Kan nou montré compassion pou enn dimoune ki bizin l’aide, Bondié considere sa couma enn faveur ki nou faire Li. Li prend responsabilité pou agir en retour avek bonté envers so bann adorateur pou n’importe ki kitsoz ki zot faire par compassion. Bondié ti inspire le roi Salomon pou ecrire: “Seki aide enn ti-dimoune pé prete Jéhovah, ek seki li’nn faire, Jéhovah pou rann li.” (Proverbes 19:17) Ek Paul ti ecrire: “Zot koné ki n’importe ki di-bien ki sakenn faire, li pou regagne sa ar Jéhovah.”—Éphésiens 6:8.

Compassion li ena pouvoir pou garde la paix ek li kapav contribué pou reglé bann probleme. Li aidé pou reglé bann malentendu, ek li ouvert chemin pou pardon. Bann malentendu kapav arrivé parski nou pa touletan exprime nou bann pensée ek seki nou ressenti couma nou ti pou envie, ou-soit lezot kapav mal interprete nou bann action. C’est lerla ki compassion kapav aide nou pou reglé bann probleme ek pou garde la paix. Kan nou koné ki enn dimoune ena compassion, li pli facile pou pardonne li. Compassion aide nou pou applik sa conseil ki Paul donne bann chretien-la: “Contigne supporte sakenn so camarade, ek si kikenn ena enn kitsoz kont enn lot, li bizin pardonne li avek tou so leker.”—Colossiens 3:13.

Compassion agir

En plus, compassion li ena pouvoir pou soulage enn dimoune ki pé souffert. Couma nou finn trouvé, kan nou ena compassion, sa montré ki nou comprend bann ki dan la peine ek sa faire nou souffert ensam avek zot. Sa vedir aussi ki nou ena bann profond sentiment consideration pou bann dimoune ki dan probleme ek nou faire bann kitsoz pratik pou aide zot.

Kan nou comprend lezot, nou imite Jésus. Jamais li pa ti trop occupé pou aide lezot ki li dan domaine materiel ou-soit dan domaine spirituel. Kan li ti comprend ki zot ti bizin l’aide, avek compassion li ti trouve enn fason pou aide zot.

Noté couma Jésus ti reagir kan li ti trouve bann la-foule ki ti pé passe misere lor plan spirituel: “Kan li ti trouve bann la-foule, li ti ena pitié pou zot, parski zot ti gagne maltraité ek zot ti senti-zot perdi pareil couma bann mouton ki pena berger.” (Matthieu 9:36) Concernant mot grec ki traduire par “ti ena pitié,” enn bibliste expliké ki sa montré “enn sentiment ki prend enn dimoune endan li, dan fond.” En realité, inn appel sa mot-la enn parmi bann mot pli fort ki servi en grec pou exprime sentiment compassion.

Dan mem fason, bann chretien ki ena compassion reagir vite kan zot trouve bann dimoune ki bizin enn l’aide materiel ou-soit spirituel. L’apotre Pierre ti ecrire: “Zot tou, zot bizin ena mem pensée, mette zot dan place zot camarade, montré l’affection fraternel, beaucoup compassion.” (1 Pierre 3:8) Par exemple, kan enn famille chretien ki ti dan le besoin ti bizin demenagé a cause bann probleme la santé, zot bann compagnon chretien ki ti reste dan sa l’endroit-la, ti laisse zot reste dan enn lakaz pendant six mois sans ki zot paye location. Mari-la dire: “Toulé-jour zot ti vinn prend nou nouvelle, ek zot bann parole encourageant ti faire nou senti-nou kot nou.”

Bann vrai chretien prend compte aussi besoin bann dimoune ki zot pa koné. Zot donne zot lé-temps, zot l’energie, ek zot bann ressource avek joie pou aide sa bann dimoune-la. Dan premier lartik, c’est bann Témoins de Jéhovah ki ti forme partie dan sa groupe volontaire ki ti aide bann dimoune ki zot pa ti koné ditou-la.

C’est coumsa ki dan congregation, ena enn l’atmosphere kot compassion ek l’amour fidele dominé. Bann membre la congregation gagne courage pou rod bann fason pou servi lezot parski zot ena l’amour. Bann orphelin ek bann veuve kitfois bizin ki ou prend zot compte ek ki ou essaye mette-ou dan zot place kan zot gagne bann probleme personnel. Zot bizin faire face ar la misere, ou-soit zot pena moyen pou gagne bann soin medical, ou-soit zot pena enn bon lakaz, ou-soit zot ena lezot difficulté personnel. Eski ou kapav aide zot pou faire face ar zot bann probleme?

Anou guette seki ti arrive enn couple en Grèce. Mari-la ti gagne enn attak cerebral. Ti amenn li ek so madame dan enn l’hopital ki ti bien loin. Mais pou zot gagne zot ti kass pou vive, ti bizin casse zorange ki ti’nn mur dan zot verger. Kisannla ti pou faire sa pendant ki zot dan l’hopital? Zot congregation ti decide pou faire kitsoz. Zot ti casse ek vann sa bann zorange-la, seki ti faire sa couple ki ti dan le besoin-la gagne zot ti kass, ek sa ti aussi aide zot pou garde zot l’esprit en paix.

Nou kapav montré compassion dan beaucoup fason. Par exemple, bann chretien ki ena compassion comprend ki parfois seki enn dimoune ki dan probleme bizin, c’est surtout gagne visite bann dimoune ki pou ecoute li avek compassion, pou koné couma pou mette-zot dan so place, ek pou encourage li avek bann pensée la Bible.—Romains 12:15.

Goute enn l’atmosphere kot ena compassion

Congregation chretien dan le monde entier, li enn l’endroit kot nou kapav gagne la paix ek reconfort, enn l’endroit kot ena compassion ek la bonté. Bann vrai chretien koné ki kan nou ena compassion, sa attire lezot, alors ki kan nou pena pitié, sa repousse lezot. A cause sa, zot imite zot Papa ki dan le ciel, ek zot faire tou pou montré dan bann fason pratik ki zot “ena beaucoup compassion.”

Bann Témoins de Jéhovah invite ou pou vinn goute sa l’atmosphere ki ena parmi zot-la, l’atmosphere kot ena compassion, l’amour ek l’affection. Zot sur ki ou pou senti-ou bien parmi zot.—Romains 15:7.

[Zimage, page 5]

Dan lettre ki li ti ecrire bann chretien dan Colosses, Paul ti demann zot pou mette lor zot bann tendre l’affection compassion

[Zimage, page 7]

Kan Jésus ti trouvé ki enn dimoune ti bizin l’aide, avek compassion li ti trouve enn fason pou aide li