Jéhovah Donn Nou Seki Nou Bizin ek Protez Nou

1, 2. Kouma nou diferan lor plan familial ek lor fason ki nou finn konn laverite?

JÉHOVAH inn kree lafami. (Éph. 3:14, 15) Selman, mem si nou dan mem fami, nou ena diferan personalite ek nou sitiasion diferan. Li posib ki ou finn viv avek ou bann paran depi ou nesans ziska ki ou finn vinn enn adilt. Kitfwa sertin zot paran inn mor akoz maladi, enn aksidan ouswa akoz lezot maler. Ek ena sertin ki pa mem kone kisannla zot paran.

² Parmi bann adorater Jéhovah, sertin finn konn laverite dan diferan fason. Kitfwa, kouma sertin dir, ou finn ‘grandi dan laverite,’ ek ou bann paran finn ansegn ou bann prinsip Biblik. (Deut. 6:6, 7) Li posib osi ki, parey kouma plizir milie dimounn, ou finn konn laverite gras-a predikasion bann serviter Jéhovah.​—Rom. 10:13-15; 1 Tim. 2:3, 4.

 3. Ki pwin komin nou tou nou ena?

³ Malgre nou diferans, nou tou nou ena bann pwin komin. Nou tou nou inparfe, nou fer pese ek nou mor parski Adam finn dezobeir Bondie. (Rom. 5:12) Me kanmem, antan ki bann vre adorater, nou kapav apel Jéhovah “nou Papa.” Dan lepase, pep ki Bondie ti swazir ti kapav dir bann parol ki trouv dan Isaïe 64:8: “Ah Jéhovah, tomem nou Papa.” Anplis, Jésus ti koumans lapriyer model par sa bann parol-la: “Nou Papa ki dan lesiel, ki to nom sanktifie.”​—Mat. 6:9.

4, 5. Pou ogmant nou lamour pou Jéhovah, ki nou pou examine?

⁴ Nou Papa ki dan lesiel pran swin ek donn proteksion ki bizin so bann serviter ki invok so nom avek lafwa. Dapre ekrivin Psaume 91, Jéhovah ti dir: “Parski li [enn vre adorater] finn ena lafeksion pou mwa, mo pou sov li. Mo pou protez li parski li konn mo nom.” (Ps. 91:14) Wi, avek amour, Jéhovah delivre nou ar nou bann lennmi ek protez nou antan ki so pep, pou ki bannla pa detrir nou.

⁵ Pou ogmant nou lamour pou nou Papa ki dan lesiel, anou examinn trwa pwin inportan: (1) Nou Papa donn nou seki nou bizin. (2) Jéhovah protez nou. (3) Bondie nou pli bon Kamarad. Amezir ki nou pou examinn sa bann pwin-la, li pou bon ki nou medit lor nou bann relasion avek Bondie ek gete kouma nou kapav donn Li loner antan ki nou Papa. Li bon osi ki nou reflesi lor bann benediksion ki Jéhovah promet bann ki apros ar Li.​—Jacq. 4:8.

 6. Sit enn fason kouma Jéhovah donn nou “tou zoli don.”

⁶ Disip Jacques ti ekrir: “Tou zoli don ek tou kado parfe sorti lao . . . li sorti kot Papa tou lalimier ki dan lesiel.” (Jacq. 1:17) Lavi limem se enn zoli kado ki Jéhovah inn donn nou. (Ps. 36:9) Kan nou servi nou lavi pou fer volonte Bondie, nou gagn boukou benediksion asterla ek nou ena lesperans pou gagn lavi eternel dan lemond nouvo. (Prov. 10:22; 2 Pierre 3:13) Me kouma sa kapav posib alor ki nou tou nou inparfe, nou fer pese ek nou mor akoz dezobeisans Adam?

 7. Kouma Bondie finn pran dispozision pou ki nou kapav ena bann bon relasion avek Li?

⁷ Jéhovah Li vremem donn nou seki nou bizin dan plizir fason. Par exanp, Li sov nou gras-a so faver ki personn pa merite. Wi, nou tou nou fer pese ek nou inparfe akoz Adam. (Rom. 3:23) Selman, parski Jéhovah ena lamour pou nou, Li finn pran enn dispozision pou ki nou kapav ena bann bon relasion avek Li. Lapot Jean ti ekrir: “Se dan sa fason-la ki Bondie inn manifeste so lamour anver nou, parski Bondie inn avoy so sel Garson ki Li’nn kree direk, pou ki nou kapav gagn lavi par li. Se samem ki vedir lamour: se pa ki nou finn kontan Bondie, me se plito Li ki finn kontan nou ek Li’nn avoy so Garson kouma enn sakrifis ki kouver nou bann pese.”​—1 Jean 4:9, 10.

8, 9. Dan lepok Abraham ek Isaac, kouma Jéhovah inn montre ki Li donn so bann serviter seki zot bizin? (Get zimaz dan koumansman lartik.)

⁸ Dan 19^em siek Avan Nou Lepok, enn levennman dan lavi Abraham ti montre kouma, dan so lamour, Jéhovah ti pou donn lavi eternel tou bann dimounn obeisan. Hébreux 11:17-19 dir: “Par lafwa, Abraham ti koumadir ofer Isaac an sakrifis, kan Bondie ti teste li. Abraham, sa zom ki ti kontan kan li ti gagn bann promes la, ti esey ofer so sel garson, mem si ti dir li: ‘Seki pou apel to desandans pou vinn par Isaac.’ Me li ti konpran ki Bondie ti kapav mem relev li parmi bann dimounn mor, ek Abraham ti regagn Isaac, ek sa ti servi kouma enn lexanp.” Parey kouma Abraham ti dispoze pou sakrifie Isaac, Jéhovah osi ti dispoze pou ofer so Garson, Jésus Christ, pou sov limanite.​—Lir Jean 3:16, 36.

⁹ Sirman Isaac ti bien soulaze kan li ti realize ki li pa ti bizin donn so lavi an sakrifis! Pena dout ki li ti bien rekonesan kan Jéhovah ti ranplas sa sakrifis-la par enn belie ki pa ti tro lwin. (Gen. 22:10-13) Li pa etonan ki Abraham ti apel sa plas-la, “Jéhovah-Yiré,” ki vedir “Jéhovah Pou Done.”​—Gen. 22:14; not.

10, 11. Kisannla ki finn pran latet dan “minister rekonsiliasion,” ek kouma zot finn fer sa?

¹⁰ Kan nou medit lor tou seki Jéhovah inn donn nou, nou bien rekonesan ki sakrifis Jésus permet nou pou ena bann bon relasion avek Jéhovah. Paul ti ekrir: “Parski nou finn konpran ki enn sel zom finn mor pou tou dimounn; ek alor tou dimounn ti’nn mor. Ek li’nn mor pou nou tou, pou ki bann ki viv nepli viv pou zotmem, me pou sa kikenn ki’nn mor pou zot ek ki finn releve.”​—2 Cor. 5:14, 15.

¹¹ Bann Kretien dan premie siek ti ena lamour pou Bondie ek ti bien rekonesan pou privilez ki zot ti ena pou servi Li. Alor, zot ti bien kontan pou aksepte “minister rekonsiliasion.” Zot ti partisip dan predikasion ek zot ti fer bann disip ek sa ti fer bann dimounn sinser rekonsilie avek Bondie ek vinn so kamarad. Finalman, sa bann dimounn sinser la vinn bann zanfan spiritiel Bondie. Dan nou lepok, bann Kretien ki ena lesperans pou al dan lesiel akonpli mem minister. Zot servi antan ki bann anbasader Bondie ek Christ. Gras-a zot predikasion, Jéhovah atir bann dimounn bien dispoze pou vinn so bann serviter.​—Lir 2 Corinthiens 5:18-20; Jean 6:44; Actes 13:48.

12, 13. Kouma nou kapav montre ki nou rekonesan pou tou seki Jéhovah inn donn nou?

¹² Tou bann Kretien ki ena lesperans pou viv lor later bien rekonesan anver Jéhovah ki donn so bann serviter seki zot bizin. Alor, ansam avek bann Kretien ki pou al dan lesiel, zot partisip dan laktivite predikasion. Dan sa laktivite-la, nou servi Labib, enn lot don ki Bondie inn donn nou. (2 Tim. 3:16, 17) Kan nou servi Labib dan enn fason efikas dan nou minister, nou donn lezot dimounn posibilite pou gagn lavi eternel. Jéhovah donn nou osi so lespri sin ek nou tou, nou kont lor sa lespri-la pou ed nou dan nou minister. (Zek. 4:6; Luc 11:13) Parey kouma nou lir dan sak l’Annuaire des Témoins de Jéhovah ki sorti toule lane, laktivite predikasion prodir bann rezilta extraordiner. Li vremem enn gran privilez pou partisip dan sa laktivite-la ek pou donn loner nou Papa ki donn nou seki nou bizin!

¹³ Kan nou reflesi lor tou seki Bondie inn donn nou, li bon nou demann noumem: ‘Eski mo pe fer tou seki mo kapav dan mo minister pou montre Jéhovah ki kantite mo apresie tou seki Li’nn donn mwa? Dan ki fason mo kapav amelior mwa ek vinn enn proklamater pli efikas?’ Si nou ena rekonesans pou tou seki Bondie inn donn nou, nou pou met so Rwayom an premie dan nou lavi. Si nou fer sa, nou kapav sir ki Jéhovah pou donn nou tou seki nou bizin. (Mat. 6:25-33) Nou anvi fer tou seki nou kapav pou fer Jéhovah plezir ek pou fer so leker kontan, parski Li kontan nou.​—Prov. 27:11.

14. Kouma Jéhovah finn protez so pep?

¹⁴ David enn parmi bann ekrivin Psaume, ti sante: “Mo dezespere ek mo malere; mo swete ki Jéhovah pran mwa kont. To mo led ek to sov mwa.” (Ps. 40:17) Plizir fwa, Jéhovah inn delivre so pep antan ki enn group, sirtou kan zot finn konn bann gran persekision ek kan zot bann lennmi ti atak zot. Nou bien rekonesan ki Bondie ed nou dan sa bann moman difisil la, ek ki Li touletan donn nou seki nou bizin lor plan spiritiel pou res fidel.

15. Donn enn lexanp kouma enn bon papa ti protez so zanfan.

¹⁵ Enn papa ki ena lamour pa zis donn so bann zanfan seki zot bizin, me li osi protez zot. Li pou rod sov zot deswit si zot an danze. Enn frer rapel kouma so papa ti protez li kan li ti tipti. Li ek so papa ti pe retourn lakaz apre predikasion ek zot ti bizin travers enn ti larivier. Ti ena enn gro lapli sa gramatin-la ek larivier-la ti deborde. Ti ena enn sel fason pou zot traverse: Zot ti bizin sot lor bann gro ros. Ti garson-la ti mars devan so papa, enn kout, li ti glis lor enn ros, li ti tom dan delo, ek li ti koule de fwa. Li ti bien rekonesan kan so papa deswit ti trap li par so zepol ek ti tir li dan delo pou li pa nwaye! Nou Papa ki dan lesiel osi delivre nou ar bann danze ki ena dan sa move lemond-la ek ar so sef, Satan. Pena personn ki kapav protez nou kouma Jéhovah.​—Mat. 6:13; 1 Jean 5:19.

16, 17. Kouma Jéhovah ti ed bann Izraelit ek ti protez zot kan zot ti pe lager kont bann Amalekit?

¹⁶ An 1513 Avan Nou Lepok, Jéhovah ti delivre bann Izraelit ki ti esklav an Égypte, ek Li ti fer enn mirak pou protez zot kan zot ti pe travers la Mer Rouge. Apre ki zot ti travers dezer pou al ver Montagn Sinaï, zot ti ariv Rephidim.

¹⁷ Kitfwa Satan ti fer tou seki li ti kapav pou atak bann Izraelit ki ti paret san defans, parski li konn profesi ki ena dan Genèse 3:15. Li ti fer sa kan li ti servi bann Amalekit, bann lennmi pep Bondie. (Nomb. 24:20) Get seki Jéhovah ti fer par mwayin kat zom fidel: Josué, Moïse, Aaron, ek Hour. Amezir ki Josué ti pe lager avek bann Amalekit, Moïse, Aaron ek Hour ti lor enn kolinn pa tro lwin. Kan Moïse ti lev so de lame anler, bann Izraelit ti pli for ki zot lennmi. Kan so de lame ti vinn lour, Aaron ek Hour ti bizin tini so de lame. Finalman, gras-a led ek proteksion Jéhovah, “Josué ti gagn laviktwar lor Amaleq ek so pep.” (Ex. 17:8-13) Moïse ti aranz enn lotel laba, ek li ti apel sa “Jéhovah-Nissi,” setadir “Jéhovah Li Mo Proteksion.”​—Lir Exode 17:14, 15; not.

18, 19. Ki proteksion Bondie finn donn so bann serviter dan nou lepok?

¹⁸ Jéhovah protez bann dimounn ki kontan Li ek ki obeir Li. Parey kouma bann Izraelit dan Rephidim, nou rod proteksion Jéhovah kan nou bann lennmi atak nou. Souvan Jéhovah finn protez nou antan ki enn group kont bann latak Satan. Par exanp, plizir fwa Bondie finn protez nou bann frer ki ti gagn persekision parski zot pa ti pran par okenn parti politik. Se seki ti arive an Allemagne ek dan lezot pei dan lepok Nazi, dan bann lane 1930 ek koumansman 1940. Bann biografi ek bann lexperyans ki ena dan l’Annuaire koz lor fason ki Bondie ti protez so bann serviter dan lepok persekision. Kan nou lir ek nou medit lor sa bann resi-la, sa fortifie nou konfians ki Jéhovah kapav protez nou.​—Ps. 91:2.

¹⁹ Dan so lamour, Jéhovah donn nou bann rapel pou protez nou atraver so lorganizasion ek bann piblikasion. Reflesi kouma sa bann rapel-la finn protez nou pandan sa bann dernie lane-la. Pli ale lemond pe vinn pli imoral ek bann dimounn pe vinn esklav lalkol ek pornografi. Me Jéhovah finn donn nou bann rapel bien inportan ek bann konsey bien presi pou nou pa fer bann kitsoz ki kapav met an danze nou relasion avek Li. Par exanp, nou Papa ki dan lesiel finn konsey nou pou evit bann move frekantasion atraver bann rezo sosial.a​—1 Cor. 15:33.

20. Kouma nou gagn proteksion ek direksion dan kongregasion?

²⁰ Kouma nou kapav montre ki nou vremem “bann dimounn ki Jéhovah inn ansegne”? Nou montre sa kan nou obeir so bann komannman. (Is. 54:13) Dan kongregasion nou an sekirite. Se enn plas kot nou gagn enn bon direksion ek proteksion parski ena bann zom fidel ki servi antan ki ansien ek ki ed nou ek donn nou bann konsey ki baze lor Labib. (Gal. 6:1) Se sirtou atraver sa ‘bann zom ki kouma bann don-la’ ki Jéhovah pran nou swin avek amour. (Éph. 4:7, 8) Alor, kouma eski nou bizin reazir kan bann ansien donn nou bann konsey? Nou bizin dispoze pou montre nou lobeisans ek nou soumision. Si nou fer sa, Jéhovah pou beni nou.​—Héb. 13:17.

21. (a) Ki nou bizin bien determine pou fer? (b) Ki nou pou examine dan prosin lartik?

²¹ Alor, anou kont lor lespri sin pou gagn led ek pou aksepte direksion ki Jéhovah donn nou. Nou bizin osi medit lor lavi Jésus Christ, Garson Bondie, ek fer tou seki nou kapav pou swiv so lexanp extraordiner. Jésus ti gagn enn gran rekonpans parski li ti obeir ziska lamor. (Phil. 2:5-11) Parey kouma li, si nou fer Jéhovah konfians avek tou nou leker, Li pou beni nou. (Prov. 3:5, 6) Wi anou touletan kont lor Jéhovah pou donn nou seki nou bizin ek pou protez nou. Li kapav fer sa pli bien ki ninport kisannla. Li vremem enn lazwa ek enn gran privilez pou servi Li! Me kouma Jéhovah Li nou pli bon Kamarad? Nou lamour pou Li pou grandi amezir ki nou pou reponn sa kestion-la dan prosin lartik.